Një edukatore e një çerdhe private në Pejë është arrestuar pas dyshimeve se ka ushtruar dhunë ndaj një vajze 2-vjeçare. Ngjarja është zbuluar pasi prindërit e fëmijës kërkuan incizimet nga kamerat e sigurisë, ku shihej edukatorja duke e goditur disa herë vogëlushen me dorë në gojë.
Burime nga çerdhja “Shtëpia e Diellit” i kanë thënë ATV-së se incidenti ndodhi pasi e mitura paraprakisht kishte kafshuar dy fëmijë të tjerë, gjë që sipas tyre e kishte nxitur edukatoren të reagonte në mënyrë të dhunshme.
Prokuroria Themelore në Pejë ka konfirmuar arrestimin e saj.
“Edukatorja është arrestuar me dyshimin se ka përdorur dhunë dhe ka keqtrajtuar fëmijën. Pas analizimit të incizimeve, me urdhër të prokurorit është ndaluar për 48 orë,” tha zëdhënësi i Prokurorisë, Shkodran Nikçi.
Ai shtoi se hetimet janë zgjeruar për të parë nëse ka pasur edhe raste të tjera të ngjashme.
“Është duke u hetuar nëse ka edhe ndonjë vepër tjetër penale dhe nëse ka edhe fëmijë të tjerë që janë viktimë,” deklaroi Nikçi.
ATV ka tentuar të marrë qëndrim nga drejtoresha e çerdhes, por sipas stafit ajo nuk ishte paraqitur në punë ditën e ngjarjes dhe nuk iu përgjigj as telefonatave.
Rasti ishte raportuar në polici nga prindërit e vajzës më 30 shtator.
Leave a Reply