Category: ZGJEDHJET 2025

Partia Socialdemokrate ka vazhduar fushatën zgjedhore në ditën e gjashtë, me aktivitete simbolike dhe zotime konkrete nga kandidatët e saj për kryetarë komunash.

Në Prishtinë, kandidatja e PSD-së, Besa Shahini, ka zhvilluar një aktivitet elektoral që sipas saj kushtoi sa paga mesatare e një qytetari në kryeqytet, 650 euro. Shahini tha se kjo shifër përfaqëson realitetin ekonomik të shumë qytetarëve të Prishtinës.

Teksa në Deçan, kandidatja e PSD-së, Natyra Kuçi, ka premtuar zgjidhje për një nga problemet më të mëdha të banorëve, mungesën e rrjetit të kanalizimit. Nga fshati Isniq, Kuçi tha se çdo lagje dhe lokalitet do të përfshihet në projektet e reja infrastrukturore.

Në Kamenicë, kandidati i PSD-së, Qëndron Kastrati, ka shpërndarë një video në të cilën shpreh falënderim që është i rrethuar nga njerëz me pasion për zhvillimin e Kamenicës.

Në kuadër të zgjedhjeve lokale të 12 tetorit në Kosovë, edhe kandidatët e Partisë Demokratike të Kosovës po prezantojnë programet e tyre përmes vizitave në terren dhe takimeve me qytetarë.

Në Prishtinë, kandidati i PDK-së, Uran Ismajli, përmes një video-incizim ka prezantuar projektet kryesore për Hajvalinë: Ndërtimin e një çerdheje të re, rindërtimin e Qendrës Kulturore dhe përmirësimin e Unazës me trotuare të sigurta, gjelbërim dhe park.

Në Kaçanik, Sabedin Vishi ka kërkuar besimin e qytetarëve duke u zotuar për një udhëheqje që është pranë njerëzve çdo ditë. Ai përmes sloganit #Mamirë#PërKaçanikun premton përkushtim dhe qeverisje të afërt me qytetarët.

Arian Tahiri, kandidati për kryetar të Mitrovicës, ka zhvilluar takime me biznese lokale duke theksuar rëndësinë e bashkëpunimit mes komunës dhe sektorit privat. Ai ka përmendur zhvillimin profesional të të rinjve dhe mbështetjen për bujqësinë si prioritete të programit të tij.

Në Lipjan, Shukri Buja ka identifikuar problemet në transportin publik përmes një udhëtimi simbolik me autobus, ku ka premtuar ndërtimin e një stacioni të ri, lidhje të rregullta me fshatrat dhe transport falas për nxënësit.

Në Prizren, Shaqir Totaj ka theksuar potencialin turistik dhe historik të qytetit përmes një vizite me gazetarin shqiptar Blendi Fevziu. Ai ka theksuar rëndësinë e promovimit të vlerave kulturore për zhvillimin ekonomik dhe identitetin kombëtar.

Në Vushtrri, Ferit Idrizi ka vizituar objektin e ri të Kryqit të Kuq nga ku ka theksuar rëndësinë e përkrahjes për institucionet humanitare dhe ka premtuar përkushtim të vazhdueshëm për ofrimin e kushteve më të mira për qytetarët.

Në ditën e gjashtë të fushatës zgjedhore, lideri i NISMA Socialdemokrates, Fatmir Limaj zgjodhi Vushtrrinë, që të kërkojë votë për kandidaten për këtë komunë, Xhevahire Izmaku.

Në takim me qytetarët Limaj thotë se një grua në krye të Komunës është zgjidhje e duhur për Vushtrrinë.

Mbështetje për gratë që janë kryefamiljare premtoi, Xhevahire Izmaku, duke kritikuar në anën tjetër pushtetin aktual se nuk ka ofruar mbështetje deri më tani për këto gra.

Aktive gjatë të enjtes ishte edhe kandidatja tjetër grua nga kjo parti, Albulena Balaj Halimaj. Ajo premtoi transport të përballueshëm për nxënësit në Prizren, ndërkaq udhëtim falas për personat që i takojnë rasteve sociale.

Bashkëbisedime me qytetarë, takime me gra dhe vizita tek klubet e sportit ose në biznese të ndryshme, bënë në ditën e gjashtë kandidatët për kryetarë e aktivistë të Vetëvendosjes. Të shpërndarë në shumë komuna, ata po shpalosin pikat e programit të tyre dhe po zotohen se premtimet do t’i realizojnë.

Kandidati për kryetar të Prishtinës, Harjulla Ceku thotë se disa lagje janë degraduar. I njëjti po premton kthimin e identitetit të tyre historik.

Shpejtim Bulliqi i cili synon të jetë në krye të Podujevës edhe për katër vjet gjatë të enjtes derisa premtoi se do të vazhdojnë ta transferojnë Podujevën, ndau në Facebook edhe rinovimin e ish-hotelit “Llapi” që tash është shndërruar në një galeri.

Se punën për transformim do ta vazhdojë, premtoi edhe kryetari aktual që po kërkon votën edhe për një mandat për Kamenicën, Kadri Rahimaj. Si njoftoi se tashmë rrugët në fshatin Feriqevë kanë përfunduar.

E kandidati për Ferizaj, Enver Haliti thotë se qëllimi është i qartë – një Ferizaj ndryshe.

Planet për arsim nën qeverisjen e tij, të enjten i shpalosi kandidati për Lipjanin, Ilir Qeriqi.

Takime me qytetarë ka zhvilluar edhe kandidati për kryetar të Obiliqit, Halil Thaci, i cili thotë se do të jetë “zgjidhja” për nevojat e banorëve të kësaj komune.

Ndërkaq, Uji i pijes, trotuari e kanalizimi thotë se nuk do të jenë më problem i Fushticës, nëse veç besimin për kryetare e merr Egzona Tërdevci.

Aleanca për Ardhmërinë e Kosovës ka hyrë në ditën e gjashtë të fushatës zgjedhore të 12 tetorit.

Në Prishtinë, kandidati i AAK-së, Bekë Berisha, është zotuar për mbështetje financiare për personat që jetojnë me epilepsi. Ai ka premtuar se çdo vit do të ndahen nga 1,000 euro për secilin prej tyre, duke e cilësuar këtë si të drejtë themelore, jo premtim elektoral.

Në Deçan, kryetari aktual Bashkim Ramosaj, i cili synon një mandat të ri, ka risjellë në fokus projektin e Lumbardhit dhe premton zhvillim të mëtejshëm

Në Gjilan, Nazmi Gagica prezantoi kabinat e telemjekësisë për konsultime mjekësore në qytet dhe fshatra.

Në Klinë, kryetari aktual Zenun Elezaj teksa ka promovuar parkun e ri në fshatin Zabergjë, premtoi se projekte të ngjashme rekreative do të realizohen në mandatin e ardhshëm.

Ndërkohë, në Prizren, kandidati Besnik Krasniqi ka nisur fushatën me shoqatat e dala nga lufta, duke premtuar një qendër multifunksionale për veteranët.

Në Suharekë, kryetari aktual Bali Muharremaj ka prezantuar platformën “Thirrja e Parë” për lidhje të drejtpërdrejtë mes qytetarëve dhe ndërmarrjes publike.

Në ditën e gjashtë, AAK-ja në Shtime prezantoi listën e kandidatëve për Asamble, në krye me Ramë Bislimin.

Ndërsa fushata për zgjedhjet lokale hyn në ditën e gjashtë, kandidatët e Lidhjes Demokratike të Kosovës po intensifikojnë angazhimet e tyre nëpër komunat e vendit.

Në Prishtinë, kryetari aktual Perparim Rama, kandidat për mandat të dytë, thekson transformimin e qytetit përmes ndërtimit të rrugëve kryesore.

Ai njoftoi gjithashtu nisjen e projektit “Park & Ride”, që synon lehtësimin e trafikut dhe mbrojtjen e mjedisit në kryeqytet.

Në Deçan, kandidati Jeton Mushkolaj gjatë vizitës në Strellcin e Epërm premtoi se do të jetë prioritet në investime dhe do të përfshihet me kuadro të dedikuara në kabinetin qeverisës komunal.

Në Gjilan, Arber Ismajli thekson rëndësinë e mbështetjes së artit dhe kulturës si shtylla kryesore të zhvillimit lokal, duke premtuar përkrahje të veçantë për krijuesit dhe artistët.

Në Lipjan, kryetari aktual Imri Ahmeti premtoi fillimin e projekteve të reja rrugore që do të përmirësojnë infrastrukturën dhe qarkullimin në qytet.

Në Obiliq, Xhafer Gashi shfaq ndryshimet pozitive me rehabilitimin e Qendrës Kulturore, duke përmendur përmirësimin e infrastrukturës dhe kushteve për komunitetin.

Në Prizren, kandidati Driton Selmanaj premtoi krijimin e “Zonave Kreative” që do të ofrojnë hapësira pune për të rinjtë dhe artistët.

Kryetari aktual i Vitisë, Sokol Haliti, kandidat për mandat të dytë, premton të vazhdojë mbrojtjen e natyrës dhe zhvillimin e ekoturizmit.

Ndërsa Ilir Ferati në Istog, gjatë vizitës së familjes Rugova, nënvizoi rëndësinë e trashëgimisë dhe përkushtimit të LDK-së në zhvillimin politik dhe shoqëror të komunës, duke garantuar se rrugëtimi për një Istog më të mirë do të vazhdojë fuqishëm.

Në ditën e pestë të fushatës zgjedhore, subjektet politike kanë zhvilluar aktivitetet e tyre politike.
Në vazhdim ju sjellim një përmbledhje të aktiviteteve kryesore.