Category: ZGJEDHJET 2025

Në kuadër të fushatës zgjedhore të Kosova Demokratik Türk Partisi, kryetari aktual dhe kandidati për një mandat të ri në Mamushë, Abdulahadi Krasniç gjatë një tubimi me qytetarët është zotuar për vazhdimin e zhvillimit në fushën e arsimit, shëndetësisë dhe bujqësisë.

Ai njoftoi gjithashtu bashkatdhetarët nga Mamusha që jetojnë në Turqi për organizimin e transportit falas nga Bursa drejt Kosovës, në mënyrë që të mund të marrin pjesë në zgjedhjet lokale të 12 tetorit.

Kurse në Prizren, kandidati për kryetar komune, Furkan Bütüç, ditën e 28 të fushatës e kaloi në qendrën e personave me sindromën Down, ku u zotua se do të jetë pranë tyre për të adresuar nevojat dhe sfidat e tyre.

Bütüç, gjatë takimit me Shoqatën e Zejtarëve të Prizrenit, premtoi mbështetje të plotë për zejtarët dhe për t’u dhënë hapësira të reja për zhvillim.

Bütüç rikujtoi gjithashtu se zyra e KDTP-së në lagjen Kurila do të mbetet gjithmonë e hapur për qytetarët, duke theksuar se mbështetja e popullit është forca që i jep energji ekipit të tij për të ecur drejt fitores më 12 tetor.

Në vazhdën e fushatës zgjedhore për zgjedhjet lokale të 12 tetorit, kandidati i partisë GUXO për kryetar të Malishevës, Valon Krasniqi, ka premtuar se do të ngrihet shtatorja e Presidentit historik, Ibrahim Rugova, si simbol nderimi dhe mirënjohjeje për kontributin e tij në shtetndërtim.

Krasniqi gjatë vizitës në fshatin Carrallukë ka kritikuar pushtetin aktual për, siç tha ai, “trajtim të padrejtë” ndaj këtij lokaliteti. Sipas tij, mungesa e investimeve, infrastruktura e dobët dhe politizimi i arsimit janë ndër problemet që do të marrin fund me ardhjen e qeverisjes së tij.

Gjatë ditës së premtë, Krasniqi gjithashtu ka falënderuar deputetin Nezir Kraki për mbështetjen në fushatë, duke e cilësuar atë si një personalitet të përgatitur dhe frymëzues.

Ndërkohë, në Lipjan, kandidati i partisë GUXO, Ardian Bytyqi, ka theksuar se qytetarët e kësaj komune meritojnë ndryshim pas, siç u shpreh ai, “12 viteve të keqqeverisjes, keqmenaxhimit dhe keqpërdorimit”. Ai ka premtuar një qeverisje të re, të bazuar në transparencë dhe zhvillim të qëndrueshëm për të rinjtë dhe komunitetin.
Bytyqi po ashtu ka sqaruar edhe mënyrën e votimit për listën e partisë GUXO dhe ka kërkuar mbështetje për të dhe kandidatët për asamblenë komunale.

Kandidati për kryetar të Podujevës, Xhemajl Hasani nga Nisma Socialdemokrate gjatë vizitës në Klubin Futbollistik Llapi, premtoi investime në këtë klub dhe sportin në përgjithësi, duke e konsideruar si një mënyrë për të ndërtuar një të ardhme më të shëndetshme dhe më të fortë për brezin e ri të Podujevës.

Hasani thotë nuk premton mrekulli, por siguron përkushtim të plotë për mbrojtjen e interesave të qytetarëve dhe realizimin e projekteve që përmirësojnë jetën në komunën e Podujevës.

Shefki Salihu, kandidati për kryetar të Obiliqit, u bën thirrje qytetarëve që të votojnë me përgjegjësi dhe vetëdije qytetare, duke theksuar rëndësinë e votës si mjeti i fuqishëm për ndryshim demokratik.

Ndër premtimet që Salihu paraqet është ndërtimi i një stacioni modern të autobusëve në Obiliq, si një komunë që shërben si nyje tranziti ndërmjet Prishtinës, Mitrovicës dhe Vushtrrisë.

Në Malishevë, kryetari aktual dhe kandidat për mandatin e ri, Ekrem Kastrati, shpreh optimizmin për një fitore të sigurtë më 12 tetor, duke u mbështetur në bashkimin e qytetarëve dhe përkrahjen e partisë.

Kurse, Albulena Balaj-Halimaj, kandidate për kryetare të Prizrenit, vizitoi një akademi të Brazilian Jiu-Jitsu, të vetmen në vend të drejtuar nga një trajner me brez të zi. Ajo vlerësoi sportin si forcë edukimi dhe frymëzim për brezat e rinj dhe gjithë komunitetin.

Kandidati i Aleancës për Ardhmërinë e Kosovës, për kryetar të Prishtinës, Bekë Berisha, ftoi qytetarët e Prishtinës t’a votojnë më 12 tetor për t’i realizuar punët që sipas tij kanë mbetur qe 12 vjet.

Berisha po ashtu shpërndau edhe një video me banorët e Taukbahçes, ku premtoi zgjidhje të problemeve të tyre.

Ardini Gjini, i cili garon edhe për një mandat në krye të Gjakovës, publikoi pamje nga nisja e punimeve tek ura e Taliqit, projekt me vlerë rreth 1.5 milion euro që synon të kthejë këtë zonë në një hapësirë moderne dhe atraktive për qytetarët.

Projekte promovi edhe Zenun Elezaj, i cili garon për kryetar të Klinës edhe për katër vjet.

Ndërsa, kandidati i partisë për Gjilanin, Nazim Gagica, takoi veteranët e luftës.

“Në këtë takim shprehëm mirënjohjen tonë për sakrificën e gjeneratës së luftës dhe riafirmuam zotimin tonë për ta mbështetur me vepra dhe respekt të përhershëm”, shkroi Gagica.

Ndërkaq, kryetari aktual i Rahovecit, Smajl Latifi, që po kërkon edhe një mandant, takoi blegtorët rahovecas nga aty u premtoi mbështetjen në kohë e forma të ndryshme.

Biznese takoi edhe kandidati i partisë për Suharekën, Bali Muharremaj e po ashtu priti ne takim veteranë nga Kroacia.

Kandidati për kryetar të Prishtinës nga radhët e Lidhjes Demokratike të Kosovës Përparim Rama,
ka ndarë një videoincizim ku përshëndet përfundimin e rrugës Sofali – Kolovicë dhe tregon punimet që po vazhdojnë në Sheshin “Xhorxh Bush”, duke vënë theksin te zhvillimi urban dhe përmirësimi i infrastrukturës.

Në Gjilan, kandidati Arbër Ismajli premtoi përmirësim të infrastrukturës rurale për fshatin Llashticën dhe Zhegoc.

Në Istog, Ilir Ferati ka përqendruar premtimet në shërbimet shëndetësore, duke paralajmëruar finalizimin e QKMF-së së re me teknologji moderne, shtimin e shërbimeve specialistike, rritjen e subvencioneve për pacientët kronikë dhe nenat vetëushqyese.

Në Fushë Kosovë, kandidati Besnik Osmani ka promovuar projektin për internet falas në rrugën Dardania, me synimin që ky shërbim të përfshijë së shpejti të gjitha rrugët përreth.

Kurse Gëzim Plakolli, kandidat për kryetar të Mitrovicë, ka premtuar mbështetje për sektorin privat si motor të punësimit dhe zhvillimit vendor.
Në Lipjan, kryetari aktual Imri Ahmeti, i cili kandidon për një mandat të ri ka përmbledh punët e kryera gjatë mandatit të tij.

Në Podujevë, Ekrem Hyseni ka prezantuar projektin për transformimin e Parkut të Pishave dhe krijimin e Koridorit të Gjelbër si prioritet për zhvillimin urban.

Në Prizren, Driton Selmanaj ka premtuar mbështetje për projektet që nxisin kreativitetin dhe zhvillimin teknologjik në qytet.

Në Ferizaj, Visar Azemi ka vendosur ujin si prioritet kryesor, duke premtuar furnizim me ujë të pijshëm 24 orë në ditë për banorët.

Në Junik, Ruzhdi Shehu njofton përfundimin e rrugës “Shkelzen Gacaferi” dhe asfaltimin e rrugëve lokale, duke premtuar që së shpejti të gjitha rrugët në komunë do të jenë të asfaltuara, duke përmirësuar ndjeshëm infrastrukturën rrugore.

Kandidati i Partisë Demokratike të Kosovës, për kryetar të Prishtinës, Uran Ismaili kërkoi votë nga rinia e komunës.

Ai shprehet i bindur se më 12 tetor, programi i tij do ta marrë besimin qytetar.

“Bashkë do ta kthejmë Prishtinën në qytet që funksionon për të gjithë. Platforma jonë është e vetmja me zgjidhje konkrete për secilin problem të qytetit, dhe me projekte që do ta përmirësojnë jetën në çdo lagje e në çdo fshat”, tha Ismaili.

Shaqir Totaj që synon edhe një mandat në krye të Prizrenit, zhvilloi takime me disa biznese gjatë ditës.

Ai shkroi se “zhvillimi ekonomik dhe hapja e vendeve të reja të punës kanë qenë dhe mbeten ndër prioritetet tona kryesore”.

Ndërkaq, Agim Aliu, kryetari aktual i Ferizajt, i cili sërish garon për këtë post, ditën e nisi me anëtarë të shoqërisë civile.

Kandidati i PDK-së për Mitrovicë, Arian Tahiri, vizitoi Shoqatën e Folklorit të Mitrovicës, atyre u premtoi mbështetje teksa i falënderoi për përkrahjen e tyre.

Petrit Hajdari, kandidat për kryetar të Drenasin, dy ditë para zgjedhjeve u premtoi zhvillim banorëve të fshatit Dobroshec.

Rrahim Tërnava, i cili garon për postin e të parit të Fushë Kosovës, shpërndau video nga tubimi i së enjtes ku ishte krah liderit të partisë, Memli Krasniqi.

Kandidati i Lëvizjes Vetëvendosje për kryetar të Prishtinës, Hajrulla Çeku ka premtuar lidhje më të forta mes arsimit profesional dhe tregut të punës, nëpërmjet bashkëpunimit të komunës me sektorin privat dhe shkollat profesionale.

Alban Hyseni, kandidati për një mandat të dytë në krye të Gjilanit, ka premtuar mbështetjen për gratë dhe vajzat për nisma që promovojnë artin dhe ruajnë trashëgiminë kulturore.

Kadri Rahimaj, kryetari aktual i Kamenicës dhe kandidat për një mandat të dytë, u zotua për zhvillim të mëtejshëm të çdo lagjeje e fshati, duke e cilësuar votën si investimi për të ardhmen e komunitetit.

Faton Peci, kandidat për Mitrovicën, ka prezantuar projektet për lagjen “2 Korriku”, përfshirë rregullimin e shtratit të lumit Sitnica, ndriçimin publik, trotuare të reja, hapësira sportive dhe përmirësimin e infrastrukturës rrugore.

Artan Abrashi, kandidat për kryetar të Prizrenit, ka përqendruar fushatën në thirrjen për votë dhe mbështetje për listën e LVV-së në nivel komunal.

Qemajl Aliu, që kërkon një mandat të dytë në Shtime, ka paraqitur pesë projekte madhore, përfshirë ndërtimin e objektit të ri të QKMF-së, objektit të ri të komunës, , ndërtimin e unazës së madhe për lehtësimin e trafikut.

Arsim Ademi, kandidat për kryetar të Vitisë, është zotuar për funksionalizimin e Teatrit të qytetit, mbështetje për grupet artistike dhe restaurimin e objekteve të trashëgimisë kulturore.

Kurse, Valon Hoti, kandidat për Malishevë premtoi përkrahje të fortë pas zgjedhjeve për ta kthyer bujqësinë në shtyllë zhvillimi për Malishevën.

Në ditën e 27-të të fushatës zgjedhore për zgjedhjet lokale, kandidati për kryetar të Prishtinës nga radhët e Aleancës për Ardhmërinë e Kosovës, Bekë Berisha është zotuar për ndërtimin e një qendre të specializuar për trajtim dhe rehabilitim për të rinjtë e prekur nga varësia ndaj alkoolit.

Në Prizren, Besnik Krasniqi ka vlerësuar rolin e prodhuesve vendorë, duke marrë si shembull fabrikën e ëmbëlsirave “LIRI”. Ai është zotuar për mbështetje të pakursyer për bizneset lokale dhe forcimin e ekonomisë prodhuese si themel i zhvillimit të qëndrueshëm të komunës.

Në Deçan, kryetari aktual Bashkim Ramosaj, kandidat edhe për një mandat ka njoftuar për ndërtimin e urës dhe murit mbrojtës në fshatin Rastavicë, si projekt që synon mbrojtjen nga vërshimet dhe përmirësimin e qarkullimit.

Në Suharekë, kryetari aktual Bali Muharremaj, kandidat edhe për një mandat ka ndarë pamjet nga ndërtimi I objektit të ri të zjarrfikësve, duke reflektuar angazhimin e tij për vazhdimin e investimeve në këtë sektor.

Kurse Ardian Gjini në Gjakovë ka ndarë pamjet nga ndërtimi i Stadiumit të Qytetit, si dëshmi të investimeve konkrete në infrastrukturën sportive.

Në Istog, kandidati Uke Blakaj ka premtuar ndërtimin e një teleferiku për të nxitur zhvillimin rajonal.

Kurse në Pejë, kandidati Ali Berisha është zotuar për transformimin e qytetit në një hapësirë të pastër dhe të gjelbër.