Category: Teknologji

Një robot kinez është futur në Librin e Rekordeve Guinness pasi ka kryer ecje 100 kilometra në tre ditë. Kjo është distanca më e gjatë e përshkuar ndonjëherë në këmbë nga një robot.

Me një gjatësi 1.69 metra dhe duke qëndruar mbi dy këmbë, AgiBot A2 u nis nga qyteti i Suzhou-t, në Kinën lindore, mbrëmjen e 10 nëntorit dhe kaloi autostradat dhe rrugët për të mbërritur më 13 nëntor në lagjen historike Bund të Shangait.

Kompania AgiBot me seli në Shangai, tha se makina përshkoi një sërë sipërfaqesh duke respektuar gjithmonë rregullat e trafikut gjatë turit të saj pa ndalesa prej 106,286 metrash , i cili u certifikua të enjten.

Ky robot A2 është projektuar për detyra të tilla si shërbimi ndaj klientit dhe është i pajisur me një funksion bisede dhe mund të lexojë buzët. Kompanitë globale të teknologjisë po investojnë shuma kolosale në të ashtuquajturën inteligjencë artificiale natyrore, e cila përfshin ligjet e fizikës dhe mund të evoluojë në botën njerëzore.

Qeveria kineze po i inkurajon ndërmarrjet kombëtare të zhvillojnë robotë të tillë, me shpresën për t’u bërë lider global në këtë industri.

Ndërsa tregu hyn në një periudhë me konsum të shtuar dhe në pritje të Black Friday, transaksionet online shumëfishohen dhe rreziku i mashtrimit online rritet ndjeshëm.

Konsumatorëve u kërkohet të lundrojnë në një mjedis ku ofertat, reklamat dhe mesazhet promocionale mbushin ekranet e tyre, shpesh në mënyra që e bëjnë të vështirë dallimin e së vërtetës nga ajo mashtruese.

Në këtë kontekst, Autoritetet Kombëtare të Sigurisë Kibernetike, me qëllim informimin dhe mbrojtjen e qytetarëve, thekson se njohuria dhe parandalimi mbeten armët më të fuqishme kundër kriminelëve kibernetikë.

Ekspertët thonë se mashtruesit po përdorin teknologjinë, truket dhe presionin psikologjik për të arritur te përdoruesit e pavetëdijshëm, nga profilet e rreme dhe mesazhet mashtruese deri te faqet e internetit që duken krejtësisht legjitime. Në të njëjtën kohë, shpejtësia me të cilën po evoluon tregtia elektronike po krijon mundësi të reja, por edhe kërcënime të reja.

Prandaj, informimi i konsumatorëve tani konsiderohet thelbësor, jo vetëm për mbrojtjen e parave të tyre, por edhe për sigurimin e të dhënave të tyre personale. Me rastin e sezonit festiv dhe rritjes së blerjeve online, të dy organet paraqesin këshilla praktike që mund të ulin ndjeshëm rrezikun e mashtrimit dhe të forcojnë besimin në mjedisin dixhital.

Pesë rregulla për blerje të sigurta online:

Kontrolloni burimin

Mashtruesit investojnë në detaje: ata krijojnë faqe interneti që duken legjitime, përdorin reklama tërheqëse për syrin dhe shfrytëzojnë teknologjitë moderne, madje edhe inteligjencën artificiale, për të simuluar mesazhe ose fytyra të vërteta. Ekspertët rekomandojnë vetëm një hap para se të klikoni: disa sekonda të menduari kritik. Vlerësimi i përmbajtjes dhe besueshmërisë së burimit mund të parandalojë gabime serioze.

Kini kujdes nga “mundësitë” joshëse

Ofertat që skadojnë brenda pak minutash, dhuratat falas ose zbritjet e pabesueshme janë një praktikë e zakonshme e mashtruesve, të cilët mbështeten në presionin e kohës dhe nxitimin e përdoruesit. Konsumatorët inkurajohen të bëjnë një kërkim të shkurtër: a është oferta realiste? A ka ndonjë vlerësim? A ka kompania një faqe zyrtare interneti?

Mos i beso vetëm profilit — kontrollo dërguesin e vërtetë

Mesazhet që duket se vijnë nga miq, persona me ndikim ose biznese të njohura mund të jenë rezultat i llogarive të kompromentuara. Ekspertët rekomandojnë verifikimin përmes një kanali tjetër: një telefonatë, vizita në faqen zyrtare të internetit ose kontrolli me shërbimin ndaj klientit mund të zgjidhë çdo dyshim.

Kontaktoni lëshuesin e kartës

Aktivizimi i vërtetimit me dy faktorë, mbajtja e aplikacioneve të përditësuara dhe cilësimet e sigurta të privatësisë janë masa kryesore mbrojtëse. Përveç kësaj, çdo postim ose reklamë e dyshimtë duhet të raportohet në platformën ku është gjetur. Në rast të një transferimi të dyshimtë parash, komunikimi i menjëhershëm me lëshuesin e kartës është thelbësor.

Metoda të sigurta pagese — ose asnjë fare

Ndarja e të dhënave bankare në platformat e mediave sociale është një nga kurthet më të zakonshme. Pagesat nëpërmjet transferit bankar, kur kërkohen nga tregtarë të panjohur, pothuajse gjithmonë konsiderohen të dyshimta. Konsumatorët inkurajohen të përdorin vetëm sisteme zyrtare pagesash që ofrojnë mbrojtje dhe të shmangin blerjet kur këto nuk ofrohen.

CEO i Alphabet, Sundar Pichai, ka dhënë një paralajmërim të qartë për përdoruesit: inteligjenca artificiale është e dobishme, por nuk është e pagabueshme. Në një intervistë për BBC, ai tha se mjetet e IA-së duhet të përdoren si ndihmë, jo si burimi i vetëm i informacionit.

Pichai u ndal edhe te integrimi i Gemini 3.0 në Google Search, përmes “AI Mode”, duke theksuar se kjo teknologji po e transformon mënyrën si kërkojmë dhe marrim informacion. Sipas tij, Google synon t’i ofrojë përdoruesit një përvojë më të natyrshme, si të bisedosh me një ekspert, por pranoi se IA ende mund të gabojë.

Paralajmërimi i tij përputhet me gjetjet e një hulumtimi të BBC-së, që tregoi se disa chatbotë të njohur, përfshirë ChatGPT dhe Gemini, shpesh japin përmbledhje të pasakta lajmesh.

Pichai tha se industria e teknologjisë po zhvillohet me ritme të shpejta, duke sjellë sfida për ruajtjen e sigurisë dhe verifikimin e përmbajtjes. Ai shtoi se Google po investon në teknologji që ndihmojnë në zbulimin e imazheve të krijuara artificialisht dhe në rritjen e transparencës.

I pyetur për komentet e Elon Musk mbi rrezikun që kompanitë e mëdha të dominojnë IA-në, Pichai u shpreh se sot ka shumë aktorë në treg dhe se “kjo teknologji nuk mund të jetë pronë e një kompanie të vetme”.

A do t’i besoje një makine që duket si lodër të të çojë fëmijën në shkollë? Toyota po thotë “po, pse jo?”. Në Panairin e auto në Japoni 2025, kompania prezantoi Kids Mobi – një makinë elektrike e vogël, vetë-drejtuese, ndërtuar posaçërisht për fëmijë. Po flasim për një “pod” të rrumbullakët me sy LED që shprehin emocione dhe me sensorë në formë veshësh, tamam sikur të kishte dalë nga ndonjë film i animuar.

Kids Mobi është menduar si “mjet i sigurt me inteligjencë artificiale për fëmijë”. Ka një kabinë të vetme për fëmijë deri në 130 cm, dhe një kupolë që hapet si në ndonjë film futuristik. Brenda, një asistent AI që quhet “UX Friend” bisedon e luan me udhëtarin e vogël gjatë rrugës, duke i dhënë ndjesinë sikur është vetë në timon – pa qenë vërtet në timon.

Toyota thotë se qëllimi është t’u japë fëmijëve një ndjesi pavarësie, siç kanë të rriturit me makinat e tyre. Ide interesante, po edhe pak e frikshme: një fëmijë që lëviz vetëm me ndihmën e AI-së.

Për momentin, Kids Mobi është vetëm koncept, por Toyota e quan “synimi përfundimtar” i qendrës së saj AI x Robotics. Me pak fjalë, kjo lodër me rrota mund të jetë hapi i parë drejt botës ku fëmijët shkojnë në shkollë… me shofer robot.

Vetura e parë BMW M në prodhim në histori është në shitje.

Nëse bëhet pyetja se cila ishte vetura e parë BMW M e prodhuar, ka të ngjarë të vijojnë disa përgjigje të ndryshme.

Disa thonë se është një M1, të tjerë thonë se është një 530 MLE nga viti 1976, e lansuar dy vjet para superveturës së lartpërmendur, por hyn në lojë një model edhe më i vjetër, 3.0 CSL.

BMW 3.0 CSL është një version garash i modelit të bukur E9, i cili u shfaq në vitin 1973, një vit pas themelimit të BMW Motorsport GmbH.

Fillimisht u ndërtuan 21 shembuj.

Shasia E9/R1 ishte automjeti i parë i përfunduar dhe tani ofrohet për shitje.

Është prodhuar midis fundit të vitit 1972 dhe fillimit të vitit 1973 si një automjet testimi dhe zhvillimi për ekipin e fabrikës.

Celulari (ose telefoni celular) është një nga inovacionet më të rëndësishme teknologjike në historinë moderne, duke revolucionarizuar mënyrën se si ne komunikojmë. Historia e celularëve përfshin disa faza zhvillimi dhe përparime teknologjike.

Para se të shpikësh telefonin celular, ishin krijuar telefonat tradicionalë dhe sistemi i telekomunikacionit përmes linjave fikse.

Mirëpo, këto sisteme ishin të kufizuara në lidhje dhe lëvizshmëri.

Ideja e telefonit të parë celular u zhvillua në vitet 1940.Në vitin 1947, inxhinierët e kompanisë “Bell Labs” në Shtetet e Bashkuara dhanë idenë se telefonat mund të ishin portativë dhe të përdornin teknologjinë radio për komunikim.

Në vitin 1973, inxhinieri Martin Cooper, nga “Motorola”, bëri telefonat e parë mobile.

Ai bëri thirrje nga një telefon celular të quajtur Motorola DynaTAC 8000X, i cili peshoi rreth 2.5 kg dhe kishte një jetëgjatësi të kufizuar me bateri.

Edhe nëse përdorni versionin falas të ChatGPT, OpenAI tani ka shtuar mundësinë e bisedave grupore për të gjithë përdoruesit.

Me këtë opsion, deri në 20 persona mund të bashkëpunojnë në të njëjtin chat — miq, familje apo kolegë — për të planifikuar udhëtime, përgatitur dokumente, diskutuar ide, apo marrë vendime së bashku.

Çdo përdorues ka privatësinë e tij: caktimet dhe “memoria” e chat-it janë të pavarura për individët.

Për të krijuar një grup, mjafton të shtypni ikonën me figura njerëzish dhe të ftoni pjesëmarrësit – qoftë direkt, qoftë me link. Ata që pranojnë ftohjen do të ndërtojnë një bisedë të re bashkë.

OpenAI thotë se ChatGPT di kur të flasë dhe kur të qëndrojë mënjanë në grup: përdoruesit mund të “etiketojnë” ChatGPT-në që t’u përgjigjet, dhe ai mund të reagojë me emoji ose të referohet në profilet e pjesëmarrësve.

Teknologjia e transferimit e Apple, Airdrop, është konsideruar si një nga veçoritë më të rëndësishme të iPhone, por deri më tash ajo është përdorur vetëm nga përdoruesit që kanë pasur të njëjtën pajisje.

Nga tash e tutje transferimi i të dhënave midis pajisjeve Apple dhe Google funksionon edhe me Android.

Telefonat inteligjentë më të fundit Pixel të Google do të jenë të parët që do të lansohen, me pajisje të tjera që do të pasojnë së shpejti.

Sipas Google, për të qenë në gjendje të ndajnë të dhënat, përdoruesit e iPhone duhet vetëm të aktivizojnë përkohësisht lidhjen Airdrop për të gjithë përdoruesit në cilësime.

“Në përpjekjen tonë për ta bërë komunikimin midis platformave sa më të pandërprerë të jetë e mundur, ne e kemi bërë Quick Share të pajtueshëm me Airdrop. Kjo mundëson ndarjen e ndërsjellë të skedarëve midis pajisjeve Android dhe iOS,” njofton Google.

Apple dhe Google nuk punuan së bashku, por zbatimi u zhvillua në mënyrë të njëanshme nga ofruesi i Android, siç konfirmoi një zëdhënës i Google për The Verge.

Si pjesë e Aktit të Tregjeve Digjitale (DMA), Apple i kishte bërë thirrje në fillim të vitit që të hapte protokollin e patentuar Apple Wireless Direct Link në favor të standardit të hapur Wi-Fi Aware.

Apple e ka zbatuar këtë me iOS 26, andaj Quick Share do të funksionojë vetëm me pajisjet Apple që funksionojnë në versionin më të fundit të softuerit.

Airdrop nuk është teknologjia e parë që Apple është dashur ta rishikojë si pjesë e rregulloreve të BE-së. Kohët e fundit, funksioni i përkthimit të Airpods Pro 3 të rinj u rishikua për ta bërë atë të pajtueshëm me rregulloret e BE-së.

Tregjet globale po përballen me goditje të njëpasnjëshme për shkak të tarifave të reja amerikane, rritjes së inflacionit dhe pasigurisë së vazhdueshme mbi drejtimin e normave të interesit.

Këta faktorë kanë krijuar presion të fortë mbi asetet e rrezikshme, duke përfshirë edhe kriptomonedhat, të cilat po tërhiqen me shpejtësi. Si rezultat, Bitcoin është rrëzuar nën nivelin me të cilin e nisi vitin, duke humbur vrullin që e shoqëroi gjatë muajve të parë të 2025-s.

Sipas ekspertëve të tregut, kriptomonedhat nuk po funksionojnë më si “strehë e sigurt”, siç janë perceptuar shpesh në të kaluarën. Përkundrazi, ato po lëvizin në të njëjtin ritëm me pasiguritë makroekonomike globale, duke u bërë të varura nga zhvillimet gjeopolitike dhe politikat monetare të bankave qendrore.

Bitcoin e nisi vitin me çmimin 93,540 dollarë dhe në tetor arriti një rekord të ri prej 126,200 dollarësh. Megjithatë, entuziazmi nuk zgjati: çmimi është kthyer rreth 83,425 dollarëve, duke fshirë kështu të gjitha fitimet e grumbulluara gjatë 2025-s.

Rënia nuk i ka kursyer as kriptomonedhat e tjera kryesore. Ethereum, për shembull, ka rrëshqitur ndjeshëm deri në 2,733 dollarë, duke reflektuar të njëjtën tendencë të presionit të përgjithshëm të tregut.

Në këtë klimë pasigurie, investitorët po i zvogëlojnë ekspozimet ndaj aseteve të rrezikshme dhe po kërkojnë stabilitet. Tregu i kriptomonedhave po hyn në një fazë konsolidimi, ndërsa pjesëmarrësit po rishikojnë strategjitë e tyre dhe po presin qartësi mbi zhvillimet e ardhshme ekonomike.

Megjithatë, disa analistë, përfshirë ekonomistin Harvey, kujtojnë se kriptomonedhat historikisht kanë treguar aftësi të rimëkëmbjes pas periudhave të rëna të forta.

Ai thekson se ciklet e ngjashme kanë ndodhur edhe më parë dhe se tregu i kriptove mund të rikthehet në rritje pasi të stabilizohen faktorët globalë.

Ndërkohë, vëmendja po zhvendoset gjithnjë e më shumë drejt stablecoin-ëve – monedha digjitale të mbështetura nga asete reale, kryesisht dollarë amerikanë—që shihen si një alternativë më e qëndrueshme në kohë turbulencash.

Investitorët po tregohen gjithnjë e më të kujdesshëm, veçanërisht ndaj skemave të rrezikshme të aseteve digjitale, duke kërkuar forma më të sigurta për të ruajtur kapitalin në një periudhë të mbushur me pasiguri ekonomike.

Përgatiti Anila Jashari

Në një epokë ku jeta sociale është gjithnjë e më shumë e zhvendosur në botën virtuale, rrjetet sociale po marrin rolin e një hapësire ku të rinjtë kërkojnë ngushëllim, kuptim dhe mbështetje emocionale. Postimet, mesazhet dhe reagimet online shpesh shihen si mënyra më e shpejtë për të kërkuar vëmendje dhe për të ndarë përjetime personale. Por sa e vërtetë është kjo mbështetje?

Sipas një raporti nga UNICEF, shumë adoleshentë përballen me sfida emocionale si stres, izolim dhe ankth, por mungon që t’i dëgjojnë në mënyrë serioze.

“…Shumë shpesh, kur të rinjtë flasin, nuk dëgjohen; ndjenjat e tyre shpërfillen si të parëndësishme, egoiste ose thjesht si një fazë kalimtare…”, thuhet në raport.

Megjithatë aty potencohet se gjithnjë e më shumë të rinjtë po i përdorin rrjetet sociale për të kërkuar mbështetje emocionale, duke ndarë probleme personale, ndjenja ankthi apo momente të vështira.

“…Mediat sociale ofrojnë një platformë të fuqishme… për të arritur te të rinjtë, për të ndarë burime të besueshme të shëndetit mendor dhe për të nxitur biseda kuptimplote rreth mirëqenies…”

Megjithatë, mbështetja që marrin aty shpesh është sipërfaqësore. Një “like”, një emoji apo një koment i shkurtër nuk zëvendëson komunikimin e vërtetë dhe ndihmën emocionale nga njerëz realë.

Sipas Organizatës Botërore të Shëndetësisë për sa i takon kujdesit mendor mbështetja emocionale nuk mund të vijë vetëm nga platformat online! Megjithatë, rrjetet sociale kanë edhe anët pozitive. Ato u kanë sjellë të rinjve mundësi për të ndarë përvoja, për të gjetur persona që i kuptojnë dhe për të ndërtuar komunitete mbështetëse në ditë të vështira. Por edhe UNICEF paralajmëron se kjo mbetet mbështetje afatshkurtër dhe nuk mund të zëvendësojë marrëdhëniet e vërteta offline.