Category: SPORT

Federata Argjentinase e Futbollit (AFA) ka vendosur të bëjë publike një letër që presidenti i FIFA-s, Gianni Infantino, ia dërgoi presidentit të AFA-s, Claudio Tapia, pas përfundimit të Kupës së Botës 2026.

Letra mbërriti pas humbjes dramatike të Argjentinës në finalen e Kupës së Botës 2026 ndaj Spanjës me rezultat 1:0, pas vazhdimeve. Në të, kreu i FIFA-s vlerësoi paraqitjen e “Albicelestes”, duke e cilësuar fitimin e medaljes së argjendtë si një sukses të madh.

Edhe pse mesazhe të tilla zakonisht kanë karakter diplomatik dhe mbeten private, AFA vendosi ta publikojë letrën në faqen e saj zyrtare të internetit.

Në letër, Infantino theksoi se loja e Argjentinës dha një kontribut të rëndësishëm që Kupa e Botës 2026 të mbahet mend si një festival i paharrueshëm futbolli.

Kreu i FIFA-s vlerësoi gjithashtu punën e trajnerit Lionel Scaloni, lojtarëve, stafit teknik dhe mjekësor, si dhe tifozëve argjentinas që e mbështetën ekipin gjatë gjithë turneut.

“Fitoret dhe sukseset janë gjithmonë fryt i punës së palodhur, profesionalizmit dhe vëmendjes ndaj detajeve, por edhe i pasionit, përkushtimit dhe dashurisë për këtë sport të bukur. E gjithë kjo paralajmëron një të ardhme shumë premtuese për futbollin argjentinas. Ju lutem përcillni urimet e mia më të sinqerta për lojtarët, trajnerin Lionel Scaloni, stafin teknik dhe mjekësor, si dhe për tifozët që e mbështetën ekipin gjatë gjithë garës”, shkroi Infantino.

Kjo letër diplomatike dhe jashtëzakonisht pozitive tërhoqi vëmendje të madhe në opinion, pasi presidenti i FIFA-s nuk përmendi polemikat e shumta që shoqëruan Argjentinën gjatë gjithë turneut.

Mbrojtësi i majtë i Spanjës dhe i Real Madridit, Marc Cucurella, është rikthyer në qendër të vëmendjes pas paraqitjeve të shkëlqyera në Kupën e Botës 2026, ku ishte një nga lojtarët më të spikatur në rrugëtimin e Spanjës drejt titullit kampion.

Megjithatë, kësaj radhe vëmendja nuk lidhet vetëm me futbollin. Pas rikthimit nga Botërori, Cucurella ka folur hapur për jetën me djalin e tij katërvjeçar, Mateo, i cili është diagnostikuar me autizëm.

Në një intervistë emocionale, mbrojtësi spanjoll nuk i mbajti dot lotët teksa tregoi sfidat me të cilat përballet familja e tij.

“Kjo është hera e parë që flas për këtë. Është shumë e vështirë për mua. Po vuaj shumë, sepse nuk di si ta ndihmoj, veçanërisht kur e shoh në gjendje të vështirë. Kam nevojë të flas për këtë dhe ta ndaj këtë përvojë”, u shpreh Cucurella.

Ai pranoi se kjo mbetet tema më e ndjeshme në jetën e tij.

“Është një temë që, sinqerisht, më prek shumë. Megjithatë, jam i lumtur që po e ndaj këtë histori, sepse është hera e parë që flas publikisht për të.”

Gjatë kësaj vere, Cucurella u transferua nga Chelsea te Real Madridi. Sipas raportimeve, një nga kushtet që ai vendosi për ta pranuar transferimin ishte që klubi madrilen t’i siguronte familjes së tij mbështetjen dhe kushtet më të mira për trajtimin dhe zhvillimin e djalit të tij.

Edhe bashkëshortja e futbollistit, Claudia Rodríguez, foli për përvojën e tyre si prindër.

“Ai na ka mësuar shumë. Çdo vendim që marrim e mendojmë duke pasur parasysh atë. Ka gjëra që nuk mund t’i bëjmë, sepse nuk janë të mira për të. Edhe pushimet janë gjithmonë një sfidë”, tha ajo.

Në fund, Cucurella zbuloi edhe arsyen pse nuk dëshiron t’i presë flokët e tij karakteristikë.

“Flokët e mi janë një mënyrë që djali im të më njohë menjëherë kur jam në fushë. Për këtë arsye nuk dua t’i ndryshoj.”

Manchester City mbetet i qetë sa i përket të ardhmes së mesfushorit spanjoll, Rodri, duke e konsideruar atë një pjesë kyçe të projektit të klubit, pavarësisht interesimit të madh nga Real Madridi.

Sipas gazetës spanjolle AS, drejtuesit e klubit anglez kanë hedhur poshtë mundësinë e shitjes së Rodrit gjatë afatit kalimtar të verës, edhe nëse Real Madridi paraqet një ofertë zyrtare.

Te Manchester City besojnë se spekulimet e fundit rreth një transferimi të mundshëm janë rezultat i paraqitjeve të shkëlqyera të mesfushorit në Kupën e Botës 2026, ku ai jo vetëm që ndihmoi Spanjën të fitonte trofeun, por u shpall edhe lojtari më i mirë i turneut.

Klubi anglez synon t’ia zgjasë kontratën 30-vjeçarit, e cila skadon në verën e vitit të ardhshëm, për ta mbajtur atë në “Etihad Stadium” edhe për disa sezone të tjera.

Nga ana tjetër, Real Madridi vazhdon ta ketë Rodrin si një nga objektivat kryesorë në këtë merkato verore. Sipas raportimeve, drejtuesit e klubit madrilen kanë ndryshuar qasjen e tyre dhe janë të gatshëm të bëjnë gjithçka për të siguruar shërbimet e mesfushorit spanjoll.

Raportet shtojnë se edhe vetë Rodri e sheh një transferim te Real Madridi si hapin e ardhshëm në karrierën e tij, çka mund ta bëjë këtë një nga sagat më të mëdha të merkatos së verës.

Përgjigjja zyrtare e Pep Guardiolës për mundësinë e drejtimit të Kombëtares së Italisë ka mbërritur dhe është negative. Trajneri katalanas i ka thënë “jo” Federatës Italiane të Futbollit, duke refuzuar ofertën për të marrë drejtimin e “Azzurrëve”.

Sipas raportimeve, Guardiola e shqyrtoi me kujdes propozimin e paraqitur nga Paolo Maldini dhe Leonardo, madje duke e imagjinuar veten në stolin e Italisë. Megjithatë, pas disa ditësh reflektimi, ai vendosi të mos e pranojë ofertën.

“Faleminderit, jam i nderuar, por tani për tani nuk kam dëshirë”, ka qenë përgjigjja e trajnerit spanjoll.

Vendimi i Guardiolës lidhet me dëshirën për të marrë një pushim pas përfundimit të aventurës së tij dhjetëvjeçare te Manchester City. Ai dëshiron t’i kushtojë më shumë kohë vetes dhe familjes së tij, përpara se të rikthehet në pankinë.

Një tjetër arsye e rëndësishme është mënyra se si Guardiola e sheh profesionin e trajnerit. Ai e ka cilësuar veten si “të varur nga futbolli” dhe beson se një ekip duhet të drejtohet me përkushtim të plotë.

“Nëse e bëj, do ta bëj 100 për qind”, mësohet të ketë thënë Guardiola gjatë bisedimeve, duke theksuar se nuk i pëlqen të marrë përsipër një projekt pa u angazhuar plotësisht.

Në vendimin e tij ka ndikuar edhe respekti për Italinë, një vend me të cilin ka një lidhje të veçantë, si dhe për Paolo Maldinin, i cili i kishte paraqitur një projekt ambicioz dhe afatgjatë. Drejtori teknik i Kombëtares së Italisë kishte propozuar një plan bashkëpunimi për tetë deri në dhjetë vjet, por Guardiola vendosi se nuk ishte momenti i duhur për të nisur një sfidë të re.

Qendërmbrojtësi i River Plate dhe Kombëtares së Argjentinës, Nicolas Otamendi, ka njoftuar tërheqjen e tij nga futbolli ndërkombëtar pas përfundimit të Kupës së Botës 2026.

38-vjeçari e bëri të ditur vendimin përmes një postimi në rrjetet sociale, ku u përshëndet me tifozët dhe falënderoi të gjithë ata që e mbështetën gjatë karrierës së tij me fanellën e Argjentinës.

“Sot duhet të shkruaj fjalët më të vështira të gjithë karrierës sime. Që nga fëmijëria ëndërroja të vishja fanellën e Kombëtares së Argjentinës. Ishte privilegji më i madh që më dha futbolli. E mbrojta me gjithë zemër, me krenari dhe përgjegjësi, plotësisht i vetëdijshëm për atë që do të thotë për miliona argjentinas”, shkroi fillimisht Otamendi.

“Tani po largohem me paqe në zemër, duke e ditur se dhashë gjithçka. Nuk kursyeva asnjë përpjekje, nuk pushova kurrë së besuari dhe nuk pushova kurrë së ndjeri se veshja e kësaj fanele ishte nderi më i madh i jetës sime.”

Mbrojtësi argjentinas pati edhe një mesazh të veçantë për tifozët.

“Faleminderit tifozëve argjentinas. Faleminderit për dashurinë tuaj të pakushtëzuar, për çdo flamur, për çdo këngë dhe që ishit me ne në kohët e mira, por sidomos në momentet më të vështira. Falë jush, sa herë që këndohej himni, ndiheshim sikur nuk ishim vetëm njëmbëdhjetë lojtarë në fushë, por miliona njerëz që mbronin të njëjtën ëndërr.”

Ai falënderoi edhe familjen për mbështetjen e vazhdueshme.

“Faleminderit familjes sime. Ju ishit streha ime pas çdo pengese dhe forca ime në çdo sfidë. I përballuat ndarjet, mungesën time, lotët dhe zhgënjimet. Këtë rrugëtim nuk e bëra kurrë i vetëm – e përshkuam së bashku, hap pas hapi.”

Në fund, Otamendi theksoi se finalja e Kupës së Botës 2026 ishte ndeshja e tij e fundit me fanellën e Argjentinës.

“Ndodhi që ndeshja ime e fundit ishte finalja e Kupës së Botës. Nuk ishte rezultati që dëshironim, por po largohem me kokën lart, sepse kjo skuadër luftoi deri në sekondën e fundit.”

Barcelona ka marrë një lajm të hidhur në prag të sezonit të ri, pasi mesfushori Frenkie de Jong ka pësuar një këputje të ligamentit medial kolateral në gjurin e djathtë. Dëmtimi do ta mbajë reprezentuesin holandez larg fushave për disa javë.

Klubi katalanas konfirmoi se 29-vjeçari nuk do t’i nënshtrohet operacionit. Në vend të kësaj, ai do të ndjekë një program të specializuar rehabilitimi nën mbikëqyrjen e stafit mjekësor, me synimin për t’u rikthyer sa më shpejt në dispozicion të skuadrës.

Problemet fizike të De Jong u shfaqën gjatë paraqitjeve me Holandën në Kupën e Botës 2026. Pas shqetësimeve në gju, ai iu nënshtrua ekzaminimeve të detajuara, ndërsa në ndeshjet e fundit të turneut u pa duke luajtur me një mbrojtëse në gju.

Ky zhvillim përbën një goditje të madhe për trajnerin Hansi Flick, i cili do ta nisë sezonin pa një nga shtyllat kryesore të mesfushës.

Pavarësisht mungesës së De Jong, mediat spanjolle raportojnë se Barcelona nuk ka ndërmend të ndryshojë planet në merkaton e verës dhe nuk do të transferojë një zëvendësues për holandezin.

Drejtuesit e klubit besojnë se skuadra ka alternativa të mjaftueshme për të mbuluar boshllëkun e krijuar. Pedri, Gavi, Dani Olmo, Fermín López dhe Marc Bernal pritet të marrin më shumë përgjegjësi në mesfushë, ndërsa edhe Eric García dhe Andreas Christensen mund të aktivizohen në atë repart nëse situata e kërkon.

Vlen të theksohet se De Jong ishte paraqitur në qendrën stërvitore “Joan Gamper” disa ditë përpara rikthimit zyrtar të ekipit, për t’iu nënshtruar kontrolleve mjekësore lidhur me gjurin që e kishte shqetësuar gjatë Botërorit.

Ky është një tjetër dëmtim për mesfushorin holandez, i cili gjatë dy sezoneve të fundit është përballur vazhdimisht me probleme fizike, duke i penguar vazhdimësinë në formën e tij më të mirë.

Trajneri i njohur gjerman, Jürgen Klopp, është emëruar zyrtarisht trajneri i ri i Kombëtares së Gjermanisë, ka njoftuar sot (e premte) Federata Gjermane e Futbollit (DFB). Emërimi i tij vjen pas shkarkimit të Julian Nagelsmannit, pas paraqitjes zhgënjyese të Gjermanisë në Kupën e Botës 2026, të zhvilluar në Shtetet e Bashkuara, Kanada dhe Meksikë.

Për Kloppin, ky është një rikthim i madh në stolin e trajnerit, pasi gjatë një viti e gjysmë të fundit ai ka ushtruar detyrën e drejtorit të operacioneve globale të futbollit në kompaninë Red Bull.

59-vjeçari nënshkroi sot një kontratë katërvjeçare në Kampusin e DFB-së në Frankfurt am Main dhe do ta udhëheqë ekipin kombëtar drejt Kampionatit Evropian 2028 dhe Kupës së Botës FIFA 2030”, thuhet në njoftimin e DFB-së.

Klopp drejtoi Liverpoolin për nëntë vjet, duke hyrë në historinë e klubit anglez me fitimin e Premier League dhe Ligës së Kampionëve, si dhe disa trofeve të tjerë të rëndësishëm.

Ai ka nënshkruar kontratë me DFB-në deri në verën e vitit 2030, përkatësisht deri në përfundim të Kupës së Botës, e cila do të organizohet nga Spanja, Portugalia dhe Maroku.

Në stafin teknik të Kloppit do të bëjnë pjesë Peter Krawietz, Pepijn Lijnders dhe Sven Bender.

Malisheva ka dhuruar një tjetër mbrëmje të paharrueshme për futbollin kosovar. Skuadra nga Kosova ka triumfuar me rezultatin 2-0 ndaj Hibernianit të Skocisë, duke hedhur një hap gjigant drejt kualifikimit në raundin e tretë të UEFA Europa Conference League.

Me një paraqitje të disiplinuar dhe plot karakter, Malisheva dominoi përballjen ndaj një kundërshtari me përvojë në arenën evropiane, duke siguruar një fitore që e vendos në një pozitë shumë të favorshme për ndeshjen e kthimit.

Ky sukses përfaqëson një nga rezultatet më të rëndësishme në historinë e klubit, ndërsa skuadra vazhdon të shkruajë faqe të reja në debutimin e saj në garat evropiane.

Fitorja ndaj Hibernianit jo vetëm që rrit ndjeshëm shanset për kualifikim, por është edhe një tjetër dëshmi e rritjes së futbollit kosovar në skenën ndërkombëtare.

Tashmë, Malishevën e ndan vetëm edhe një ndeshje nga realizimi i një ëndrre të madhe, sigurimi i një vendi në raundin e tretë të UEFA Europa Conference League dhe vazhdimi i aventurës evropiane.

Lirim Kastrati ka gjetur destinacionin e ri në karrierën e tij. Futbollisti kosovar është prezantuar zyrtarisht si lojtari më i ri i FK Kauno Žalgiris, kampionit në fuqi të Lituanisë, duke nisur kështu një sfidë të re në futbollin evropian.

27-vjeçari vjen nga klubi hungarez Diósgyőri VTK dhe te skuadra e re do të mbajë fanellën me numrin 62. Transferimi shihet si një mundësi e rëndësishme për mbrojtësin e krahut, i cili synon të rikthehet në nivelin më të lartë të performancës.

Kauno Žalgiris është një emër tashmë i njohur edhe për futbollin kosovar. Klubi lituanez tërhoqi vëmendjen gjatë kësaj vere pasi eliminoi Dritën në raundin e parë kualifikues të Ligës së Kampionëve, duke konfirmuar ambiciet e tij edhe në arenën evropiane.

Kastrati i bashkohet skuadrës me një përvojë të pasur ndërkombëtare. Ai ka qenë pjesë e Kombëtares së Kosovës që nga viti 2017, duke regjistruar 15 paraqitje me fanellën e “Dardanëve”. Edhe pse vitet e fundit ka mbetur jashtë grumbullimeve të përfaqësueses, transferimi në Lituani mund t’i japë mundësinë të rikthejë formën dhe të rikthehet në radarët e ekipit kombëtar.

Objektivi i tij tashmë është i qartë: të ndihmojë Kauno Žalgirisin në mbrojtjen e titullit kampion, të ketë një rol të rëndësishëm në garat evropiane dhe të hapë një kapitull të ri të suksesshëm në karrierën e tij.

Një kapitull i ri ka nisur në karrierën e Dardan Morinës. Mesfushori kosovar është zyrtarisht futbollist i Lokomotivës së Zagrebit, duke kaluar te një nga klubet më të njohura të futbollit kroat.

20-vjeçari mbërrin në Kroaci pas aventurës me Dukagjinin, ku kontrata e tij u ndërpre, ndërsa tashmë ka bërë një hap të rëndësishëm përpara në karrierë, duke iu bashkuar një kampionati me traditë dhe nivel të lartë.

Lokomotiva e Zagrebit e ka prezantuar Morinën si një nga përforcimet më të reja të skuadrës, duke vlerësuar cilësitë teknike dhe potencialin e tij.

“Mesfushori i talentuar 20-vjeçar Dardan Morina ka nënshkruar kontratë profesionale. Ai është pjesë e Kosovës U21 dhe karakterizohet nga teknika e shkëlqyer, pasimi final dhe cilësitë që e bëjnë një nga talentet më premtues në brezin e ri të mesfushorëve”, thuhet në njoftimin e klubit kroat.

Vetë Morina nuk e ka fshehur entuziazmin për mundësinë e re që i është ofruar. Ai ka falënderuar klubin për besimin dhe ka premtuar përkushtim maksimal në çdo stërvitje dhe ndeshje.

“Jam shumë mirënjohës për besimin që më kanë dhënë dhe për mundësinë që të jem pjesë e këtij klubi. Që nga bisedat e para e ndjeva se njerëzit këtu besojnë tek unë dhe kjo ka shumë rëndësi për mua. Kam ardhur me dëshirë të madhe për të treguar vlerat e mia dhe për të dhënë maksimumin”, u shpreh Morina.

Mesfushori kosovar e sheh kampionatin kroat si një sfidë të rëndësishme në zhvillimin e tij.

“Liga e Kroacisë është shumë cilësore dhe për mua do të jetë një test i madh. E di që Lokomotiva është një skuadër me shumë kualitet dhe që çdo sezon arrin rezultate të mira. Jam shumë i lumtur që jam këtu dhe mezi pres të filloj këtë aventurë të re”, deklaroi ai.

Me këtë transferim, Dardan Morina synon të vazhdojë rritjen e tij dhe të dëshmojë se talentet nga Kosova mund të hapin rrugë drejt skenave më të mëdha evropiane.