Category: Sport

Igli Tare pritet të zhvillojë së shpejti një takim me superagjentin Pini Zahavi për të diskutuar dy dosje të rëndësishme merkatoje: Christopher Nkunku dhe Robert Lewandowski.

Sa i përket sulmuesit polak, ai ka kontratë me Barcelonën deri në korrik 2026 dhe operacioni konsiderohet mjaft i ndërlikuar. Megjithatë, drejtuesit kuqezinj kanë planifikuar një takim për të kuptuar vullnetin e lojtarit dhe për të analizuar kërkesat e mundshme ekonomike.

Në anën tjetër, Nkunku iu bashkua Milanit verën e kaluar për 38 milionë euro, plus 4 milionë euro në formë bonusesh. Paraqitjet e tij deri tani kanë shkaktuar shqetësim tek drejtuesit, të cilët synojnë të bëjnë një vlerësim të qartë të situatës në bisedën me agjentin e tij, Zahavi.

Qëllimi kryesor është përcaktimi i rrugës më të mirë për të ardhmen e lojtarit dhe definimi i strategjive të merkatos. /ATVLIVE.TV

Sulmuesi belg Romelu Lukaku po afrohet drejt rikthimit në fushë pas ndërhyrjes kirurgjikale në këmb që e mbajti jashtë për disa muaj. Lukaku zhvilloi sot një seancë stërvitore individuale dhe u përshëndet shkurtimisht me gazetarët, duke thënë: “Shihemi së shpejti”.

Ylli i Napolit pritet të rikthehet në lojë para fundit të muajit dhe mund të debutojë në sezonin 2025–26 të Serie A kundër Udineses ose në gjysmëfinalen e Superkupës së Italisë ndaj Milanit. Ai nuk do të jetë i gatshëm për sfidën e së nesërmes në Ligën e Kampionëve ndaj Benficas, por sipas mediave italiane, mund të grumbullohet për njërën nga dy ndeshjet e ardhshme.

Lukaku u detyrua të operohej pas një dëmtimi serioz të këmbës gjatë një miqësoreje verore, gjë që çoi Napolin të aktivizonte Rasmus Hojlund nga Manchester United, duke kompletuar sulmin e skuadrës së re, ku më herët ishte transferuar edhe Lorenzo Lucca.

Në sezonin e tij të parë me Napolin, 2024–25, Lukaku shënoi 14 gola në 38 paraqitje, duke kontribuar në fitimin e Scudettos dhe duke u bërë një nga elementët kyç të skuadrës. Rikthimi i tij pritet të rrisë ndjeshëm forcën sulmuese të Napolit në këtë sezon.

Mbrojtësi i Barcelonës, Ronald Araujo, ka udhëtuar drejt Tel Avivit për një vizitë me karakter shpirtëror, pasi paraprakisht ka marrë miratimin e klubit katalanas.

Lajmi është konfirmuar nga burime pranë lojtarit, ndërsa udhëtimi vjen në një periudhë delikate për uruguaianin, i cili së fundmi ka qenë në qendër të vëmendjes për formën dhe të ardhmen e tij te Barça.

Araujo njihet për besimin e tij të fortë dhe shpesh ka theksuar rëndësinë që spiritualiteti ka si në jetën personale, ashtu edhe në atë profesionale.

Sipas burimeve, vizita në Tel Aviv synon të sjellë qetësi të brendshme dhe rigjetje të fokusit, ndërkohë që pritet që lojtari të rikthehet shumë shpejt në Barcelonë.

Klubi blaugrana ka treguar mirëkuptim të plotë, duke i mundësuar Araujos këtë shkëputje të shkurtër, teksa stafi teknik i Hansi Flick vazhdon përgatitjet për ndeshjet e radhës. /ATVLIVE.TV

FC Drenica ka konfirmuar sot emërimin e trajnerit gjerman Thomas Brdarić, vetëm pak ditë pas shkarkimit të ish-trajnerit Bylbyl Sokoli. Brdarić, ish-lojtar i Bundesligës dhe trajner me eksperiencë në disa kampionate evropiane, ka nënshkruar një kontratë afatgjatë dhe pritet të sjellë standarde të reja profesionale dhe një vizion modern në klubin kuqezi.

Klubi ka theksuar se kjo lëvizje shënon fillimin e një epoke të re për futbollin drenicas, duke u fokusuar jo vetëm te rezultatet e ekipit të parë, por edhe në zhvillimin e talenteve të rinj përmes akademisë dhe projekteve të tjera sportive. Projekti udhëhiqet nga presidenti Dr. Thomas Wüstefeld dhe nënkryetari Faton Seferi, të cilët synojnë të ndërtojnë një identitet të ri për klubin, që përfaqëson bashkimin e shpirtit drenicas me profesionalizmin gjerman.

Po ashtu, FC Drenica ka bërë thirrje për mbështetje të gjerë nga tifozët, institucionet dhe komuniteti lokal, duke theksuar se vetëm me bashkëpunim mund të realizohen objektivat ambicioze të klubit. Synimi i klubit është të rikthehet në majat e futbollit kosovar, të forcojë akademinë e futbollit, të zhvillojë brezat e rinj dhe të bëhet një shembull i profesionalizmit dhe modernizimit në rajon.

Me ardhjen e Thomas Brdarić, Drenica synon të ndërtojë një ekip konkurrues, të afrimit ndërkombëtar të klubit dhe të krijojë një vizion të qartë për të ardhmen.

E ardhmja e Karim Benzemas nuk lidhet më me një rikthim në futbollin evropian. Sulmuesi francez, një nga figurat më të mëdha të Real Madridit në dekadën e fundit, duket se do ta përfundojë karrierën e tij në Ligën Profesionale Saudite, ku tashmë ndihet plotësisht i adaptuar.

Sipas ish-futbollistit saudit Hamad Al-Montashari, Benzema ka nënshkruar tashmë një zgjatje kontrate për edhe dy vite me klubin e tij aktual, Al Ittihad, marrëveshje që pritet të zyrtarizohet brenda ditëve të ardhshme.

Ky rinovim konsiderohet si një lëvizje strategjike e klubit saudit, i cili kërkon të mbajë liderët kryesorë të ekipit, ndërsa paralelisht synon përforcime të reja gjatë afatit kalimtar të verës. Investimet e mëdha pritet të vazhdojnë, me qëllim që Al Ittihad të rrisë konkurrencën dhe të sfidojë dominimin e klubeve kryesore evropiane në arenën ndërkombëtare.

Benzema, i cili u largua nga Real Madridi në verën e vitit 2023 pas një periudhe të artë me klubin mbretëror, duket se e ka gjetur veten në Arabinë Saudite. Pavarësisht thashethemeve për rikthim në Evropë, sulmuesi francez ka zgjedhur të vazhdojë aventurën e tij në kampionatin saudit, që është duke u zhvilluar me shpejtësi dhe po tërheq emra gjithnjë e më të mëdhenj.

Me një karrierë të pasur në nivel evropian, Benzema tani po shkruan një kapitull të ri në Lindjen e Mesme, duke kombinuar suksesin e madh që pati në Evropë me sfidat dhe mundësitë e reja që i ofron futbolli saudit.

Mesjava do të shënojë fillimin e edicionit të ri në Ligën Unike në konkurrencën e femrave.

Edhe në këtë edicion do të marrin pjesë gjashtë skuadra, tri nga Kosova dhe tri nga Shqipëria. Nga Kosova do të marrin pjesë Bashkimi, Peja 03 dhe Prishtina, ndërsa në anën tjetër nga Shqipëria pjesëmarrës janë Flamurtari, Partizani dhe Tirana.

Nga gjashtë skuadra, në “Play-off” do të kualifikohen katër më të mirat për titullin e kampionit, ku në këtë vit do të mbahet në Kosovë në mars të vitit të ardhshëm.

Të mërkurën do të ndeshen Bashkimi me Partizanin në Prizren, derisa në Vlorë ndeshen Flamurtari me Peja 03. Prishtina-Tirana zhvillohet më vonë.

Kampion aktual është Flamurtari i Vlorës, që në finale kishte mundur Peja 03.

Liga Unike Femrat-Java 1

E mërkurë

15:30 Bashkimi-Partizani

17:00 Flamurtari-Peja 03

Prishtina-Tirana (zhvillohet më vonë). /ATVLIVE.TV

Komiteti Olimpik i Kosovës shënon sot 11 vjetorin e anëtarësimit në Komitetin Olimpik Ndërkombëtar, andaj në një postim në rrjete sociale shkruajnë:

Sot shënojmë 11 vjet nga anëtarësimi i Kosovës në Komitetin Olimpik Ndërkombëtar, një prej momenteve më historike për sportin tonë. Ky përvjetor na kujton se sa larg kemi ardhur dhe sa shumë kemi arritur brenda një kohe të shkurtër.

Urime 11-vjetori i anëtarësimit në IOC!. /ATVLIVE.TV

Edicioni i katërt i JR NBA Kosova ka nisur fuqishëm, duke sjellë ndeshje plot energji, pasion dhe emocione të mëdha. Projekti zhvillohet nga Federata e Basketbollit e Kosovës (FBK) në bashkëpunim me Federatën e Sportit Shkollor, duke përfshirë 30 shkolla fillore (11–12 vjeç), të ndara në dy konferenca dhe gjashtë divizione.

Garat po zhvillohen në të gjithë Kosovën: Prishtinë, Fushë Kosovë, Ferizaj, Gjilan, Pejë dhe Prizren, duke krijuar një atmosferë të mrekullueshme sportive në çdo qytet.

Në mesjavë u zhvillua xhiroja e dytë, e cila solli duele tejet interesante dhe nxori në pah shumë talent të ri. Fotot janë nga ndeshjet e mbajtura në Shkollën Fillore të Mesme të Ulët “Dardania” në Prishtinë.

JR NBA Kosova synon zhvillimin e brezit të ri të basketbollistëve dhe po bëhet një traditë e dashur për nxënësit dhe shkollat pjesëmarrëse. /ATVLIVE.TV

Ylli i Kombëtares së Anglisë, Ivan Toney, u arrestua në Londër nën dyshimin për një goditje me kokë ndaj një tifozi, jashtë një bari modern në Soho. Ngjarja ndodhi më 6 dhjetor, para mëngjesit të së shtunës, sipas mediumit The Sun.

Dëshmitarët thonë se konflikti shpërtheu kur një tifoz u përpoq të realizonte një “selfie” me sulmuesin e Al-Ahli. Njëri prej djemve tentoi të vendoste duart rreth qafës së Toneyt për një foto, dhe sulmuesi iu përgjigj duke i thënë: “Largohu nga unë, largohu nga unë”, për të përfunduar duke goditur me kokë njërin prej tyre.

Viktima supozohet të ketë pësuar dëmtime, përfshirë gishtin dhe hundën e thyer, me gjak të dukshëm në vendngjarje. Shërbimi i Ambulancës së Londrës konfirmoi se tre persona u vlerësuan, njëri dërgohet në spital, ndërsa dy të tjerët u lëshuan në vend.

Policia mbërriti në Rrugën Wardour në orën 00:47 pas raportimeve për një sulm. Toney, 29 vjeç, u arrestua për dy akuza sulmi dhe një akuzë për përleshje dhe më pas u lirua me kusht, në pritje të hetimeve të mëtejshme.

Dëshmitarët raportuan një prani të madhe policore dhe oficerë sigurie personal, ndërsa sulmuesi mund të ketë ndjerë kërcënim për shkak të veprimeve të tifozit. Në momentin e incidentit, Toney mbante bizhuteri të dukshme dhe një orë luksoze.

Ndryshe, Ivan Toney ka 7 paraqitje me Kombëtaren e Anglisë dhe ka shënuar mbi 140 gola në futbollin anglez me skuadra të ndryshme. /ATVLIVE.TV

Kampioni në fuqi i Kosovës, KB Trepça, ka njoftuar për përforcimin me basketbollistin amerikan Kenny Hasbrouck.

Bëhet fjalë për një veteran që pritet të japë kontribut të rëndësishëm në skuadrën e “Xehetarëve”.

Hasbrouck ka një gjatësi prej 188 centimetra.

Aktualisht, Trepça renditet e treta në tabelë (me një ndeshje më pak) dhe ka 13 pikë, dy më pak se Bashkimi pas javës së 9-të në elitën e basketbollit të Kosovës. /ATVLIVE.TV