Category: Sport

Klubi i njohur kosovar, Feronikeli ’74, ka mbajtur sot (e enjte) Kuvendin e Jashtëzakonshëm, ku anëtarët diskutuan dhe vendosën për përbërjen e re të kryesisë së klubit.

Në këtë proces, unanimisht është zgjedhur Alban Veseli si president i ri, duke marrë përgjegjësinë për drejtimin e një prej klubeve më të respektuara të futbollit kosovar.

Përveç presidentit Veseli, në ekipin drejtues janë emëruar edhe Lapidar Lladrovci si drejtor sportiv dhe Argjend Bardhi si menaxher, duke krijuar një ekip me përvojë dhe energji për të zhvilluar klubin në nivele të larta.

Pas zgjedhjes, presidenti Veseli shprehu mirënjohjen e tij ndaj anëtarëve të kuvendit dhe bordit drejtues për besimin e dhënë:

“Jam i privilegjuar të menaxhoj një klub si Feronikeli ’74. Kam gjetur bashkëpunëtorë me energji të jashtëzakonshme dhe së bashku do të punojmë që klubi të jetë ndër më të organizuarit, duke bërë krenar qytetin e Drenasit dhe gjithë Kosovën. Fokusi ynë kryesor do të jetë zhvillimi i akademisë dhe krijimi i kushteve më të mira për talentët e rinj.”

FC Feronikeli ’74 i uron suksese Presidentit Veseli dhe bordit të ri drejtues, duke shprehur besimin se nën udhëheqjen e tij, klubi do të arrijë rezultate dhe suksese të reja në të ardhmen.

Të martën dhe të mërkurën u zhvilluan ndeshjet e para të çerekfinaleve të UEFA Champions League, duke dhuruar emocione dhe rezultate të forta.

Bayern Munich triumfoi si mysafire ndaj Real Madrid, ndërsa Atlético Madrid mposhti Barcelona në një përballje të tensionuar. Në ndeshjet e tjera, Paris Saint-Germain doli fituese ndaj Liverpool FC, ndërsa Arsenal FC fitoi me përmbysje ndaj Sporting CP.

Pas këtyre takimeve spektakolare, faqja zyrtare e Champions League publikoi formacionin më të mirë të javës, ku nuk mungojnë emrat e yjeve më në formë:

Formacioni më i mirë i javës:

Portier: Manuel Neuer

Mbrojtës: Stanisic, Marquinhos, Le Normand, Aeaujo

Mesfushor: Joshua Kimmich, Joao Neves, Kai Havertz

Sulmues: Khvicha Kvaratskhelia, Lamine Yamal, Julián Álvarez

Ky formacion reflekton lojtarët më vendimtarë dhe paraqitjet më të shkëlqyera të javës, duke përgatitur terrenin për ndeshjet kthyese që pritet të vendosin finalistet e këtij edicioni.

Portieri legjendar i Bayern Munich, Manuel Neuer, ka shkëlqyer në ndeshjet e para çerekfinale të UEFA Champions League dhe është zgjedhur lojtari më i mirë i javës.

Neuer ishte vendimtar në përballjen ndaj Real Madrid, ku Bayern fitoi 2-1 në Madrid. Portieri gjerman realizoi nëntë pritje gjatë takimit, shifra më e lartë për të në një ndeshje që nga nëntori i vitit 2020.

Ky performancë e jashtëzakonshme e bën Neuerin edhe më të veçantë në historinë e ndeshjeve eliminatore të Champions League, pasi ky ishte numri i tij më i madh i pritjeve në një takim të tillë që nga prilli i vitit 2017.

Pritjet e tij vendimtare nuk i lanë shanse Real Madridit, duke i dhënë Bayernit avantazh të madh para ndeshjes së kthimit dhe duke konfirmuar sërish se Neuer mbetet një nga portierët më të mëdhenj të futbollit evropian.

Sipas mediave italiane si Gazzetta dello Sport dhe Tuttosport, trajneri italian ka rënë dakord për një kontratë të re dyvjeçare që do ta mbajë në Torino deri në verën e vitit 2028.

Spalletti, i cili iu bashkua Juventusit në muajin tetor me një marrëveshje afatshkurtër deri në fund të sezonit 2025/26, ka bindur drejtuesit e klubit me rezultatet dhe stabilitetin e sjellë në ekip.

Raportohet se ai do të përfitojë një pagë që varion nga 5 deri në 6 milionë euro në sezon, në varësi të bonuseve, ndërsa për pjesën e mbetur të këtij sezoni do të arkëtojë rreth 3 milionë euro.

Vendimi për rinovimin e kontratës u forcua pas rezultateve pozitive të Juventusit, përfshirë edhe fitoren bindëse ndaj Sassuolos në janar, e cila shënoi një moment kyç në ecurinë e ekipit.

Tashmë, përveç Spallettit, në fokusin e klubit janë edhe rinovimet e mundshme të kontratave për disa lojtarë kyç të mesfushës.

Vinicius Jr mund të jetë në rrugë drejt Premier League këtë verë, pas raportimeve mbi zhvillimet më të fundit lidhur me të ardhmen e tij.

Ylli i Real Madrid ka qenë prej kohësh në bisedime për rinovimin e kontratës, pa arritur ende një marrëveshje përfundimtare.

Kontrata aktuale skadon në vitin 2027, por për shkak të mungesës së progresit në negociata, raportohet se Manchester United është ndër klubet që synojnë të përfitojnë nga kjo situatë, duke përgatitur një lëvizje të bujshme për brazilianin.

Sipas TEAMTalk, përfaqësuesit e Vinicius Jr kanë kontaktuar Manchester United, si dhe Manchester City, Arsenal, Chelsea dhe Liverpool lidhur me një transferim të mundshëm gjatë verës për 25-vjeçarin. Gjithashtu, ndërmjetësit e tij kanë kontaktuar edhe gjigantë evropianë si Paris Saint-Germain dhe Bayern Munich, të cilët mund të përballojnë financiarisht një transferim të tillë. Vinicius pritet të kërkojë një pagë shumë të lartë, rreth 580,000 euro në javë.

Edhe pse Vinicius nuk është i vendosur të largohet nga kampionët 15-herë të Evropës, ai po mban të gjitha opsionet e hapura për të ardhmen e tij.

Kylian Mbappe është aktualisht lojtari më i paguar te Real Madrid pas transferimit të tij me parametra zero në vitin 2024, por kampi i Vinicius thuhet se po kërkon një pagë më të lartë për rinovimin e kontratës. Në nëntor, The Athletic raportoi se Real Madrid i kishte ofruar një kontratë me vlerë 20.3 milionë euro në vit gjatë bisedimeve në fund të sezonit të kaluar, duke rritur pagën e tij vjetore me pak më pak se 2.3 milionë euro. Megjithatë, pala e lojtarit nuk ishte e kënaqur me këtë ofertë dhe, kur klubi kërkoi të propozonin një shifër, ata thuhet se kërkuan rreth 30.2 milionë euro në vit.

Një kontratë e tillë do të përfaqësonte marrëveshjen më të shtrenjtë në historinë e Real Madridit, në të njëjtin nivel me atë që fitonte fituesi pesë herë i Topit të Artë, Cristiano Ronaldo, në sezonin e tij të fundit përpara transferimit te Juventus.

Ish-sulmuesi legjendar Thierry Henry nuk ka kursyer kritikat ndaj vendimit për kartonin e kuq të dhënë për Pau Cubarsí, episod ky që ndikoi ndjeshëm në humbjen 2-0 të Barcelonës ndaj Atlético Madrid në çerekfinalet e UEFA Champions League.

Në analizën e tij, Henry e ka cilësuar vendimin si të ekzagjeruar dhe ka vënë në dyshim drejtësinë e tij. “Jo, për mua nuk është karton i kuq”, u shpreh ish-ylli francez, duke sqaruar se, edhe pse rregulli për ndalimin e një rasti të pastër për gol nga lojtari i fundit është i qartë, çdo situatë duhet të analizohet në kontekstin konkret të momentit.

Sipas Henry, gjatë ndërhyrjes, lojtari i Atletico-s nuk kishte kontroll të plotë mbi topin, këndi i goditjes nuk ishte ideal dhe distanca nga porta mbetej e konsiderueshme. “A jemi të sigurt që ai do të shënonte? Unë nuk jam i bindur”, theksoi ai.

Ish-ylli francez theksoi rëndësinë e interpretimit të detajeve nga arbitrat dhe sugjeroi që vendimet e tilla duhet të marrin parasysh jo vetëm pozicionin në fushë, por edhe probabilitetin real të realizimit të golit.

Ky reagim vjen ndërsa Barcelona po përgatitet të paraqesë ankesë në UEFA ndaj arbitrit rumun Istvan Kovacs, duke kërkuar rishikimin e vendimeve vendimtare që ndikuan në fatin e ndeshjes.

AC Milan po përgatitet për një verë vendimtare, ku objektivi kryesor mbetet përforcimi i repartit ofensiv, pas problemeve të vazhdueshme me realizimin e golave gjatë sezonit.

Sipas raportimeve nga mediat italiane, drejtuesit kuqezi kanë vënë në shënjestër disa emra të mëdhenj për sulmin. Në listë kryeson Robert Lewandowski, i cili ende nuk ka vendosur për të ardhmen e tij te FC Barcelona. Kontrata e tij skadon në verë dhe mbetet për t’u parë nëse do të rinovojë me kushte të reja apo do të kërkojë një aventurë të re. Megjithatë, paga e lartë e polakut mund të jetë një pengesë serioze për Milanin.

Një tjetër opsion është Darwin Núñez, aktualisht te Al-Hilal, i cili po mendon largimin për shkak të hapësirave të kufizuara nën drejtimin e trajnerit Simone Inzaghi. Interes për të ka shfaqur edhe Juventusi, duke e bërë garën edhe më të fortë.

Në listë figuron edhe Nicolas Jackson, i cili pritet të rikthehet te Chelsea FC pas përfundimit të huazimit te Bayern Munich. Megjithatë, e ardhmja e tij mbetet e paqartë, pasi nuk duket të jetë pjesë e planeve të trajnerit Liam Rosenior, sidomos për shkak të formës së mirë të João Pedro.

Ndërkohë, Mateo Retegui shihet si një mundësi më e arritshme. Sulmuesi dëshiron të rikthehet në Evropë nga Al-Qadsiah, me Milanin dhe Juventus FC që po monitorojnë nga afër situatën e tij.

Me disa alternativa në tryezë, Milani synon të marrë vendimin e duhur për të zgjidhur një nga problemet kryesore të sezonit dhe për të rikthyer fuqinë në repartin ofensiv.

Portieri legjendar gjerman, Manuel Neuer, ka konfirmuar përfundimisht se nuk do të rikthehet në Kombëtaren e Gjermanisë dhe, rrjedhimisht, nuk do të jetë pjesë e Kupës së Botës 2026.

Neuer ka bërë të qartë se vendimi i tij është i prerë, duke i dhënë fund çdo spekulimi për një rikthim të mundshëm. “Rikthimi në kombëtare? Gjithçka ka përfunduar në lidhje me këtë… tani e rëndësishme është sezoni me Bayernin”, është shprehur ai, duke theksuar fokusin e tij te klubi.

Sipas legjendës gjermane Lothar Matthäus, edhe trajneri i Kombëtares, Julian Nagelsmann, nuk do ta hapë derën për rikthimin e portierit me përvojë. Kjo e bën edhe më të qartë se vendimi i Neuer për t’u tërhequr nga futbolli ndërkombëtar është përfundimtar.

Kështu, një nga portierët më të mëdhenj në historinë e futbollit i jep fund kapitullit të tij me Gjermaninë, duke lënë pas një trashëgimi të jashtëzakonshme dhe suksese të panumërta në arenën ndërkombëtare.

Khvicha Kvaratskhelia po shkëlqen në këtë edicion të Ligës së Kampionëve, duke u shndërruar në një nga lojtarët më dominues të garës më prestigjioze evropiane.

Ylli gjeorgjian ka qenë vendimtar në pothuajse çdo ndeshje, duke lënë gjurmë me gola dhe asistime kundër skuadrave të mëdha. Ai ka realizuar ndaj Atalantas, Sporting CP, Monacos, Chelseat (në dy ndeshje) dhe Liverpoolit, ndërsa ka kontribuar me asistime kundër Bayer Leverkusenit, Tottenhamit dhe Newcastle United.

Kulmi i paraqitjeve të tij erdhi pikërisht ndaj Chelseat, ku shpërtheu me dy gola dhe një asistim, duke konfirmuar se është një lojtar për ndeshje të mëdha.

Me këtë formë mbresëlënëse në Champions League, Kvaratskhelia po dëshmon se është një nga yjet më të rrezikshëm të momentit në Evropë. Aftësia e tij për të vendosur ndeshje, kreativiteti dhe guximi në lojë e bëjnë atë një kërcënim konstant për çdo kundërshtar.

Në këtë ritëm, gjeorgjiani duket i pandalshëm dhe një nga figurat kryesore të këtij sezoni në elitën e futbollit evropian.

Pas humbjes në ndeshjen e parë çerekfinale të Ligës së Kampionëve ndaj Atletico Madridit, te Barcelona nuk ka vend për dorëzim.

Talenti i ri i katalanasve, Lamine Yamal, ka reaguar pas ndeshjes përmes rrjeteve sociale, duke dërguar një mesazh motivues për ekipin dhe tifozët para sfidës kthyese.

“Kjo nuk ka përfunduar ende. Do të japim gjithçka në ndeshjen e kthimit. Gjithmonë të bashkuar, ka shkruar Yamal në Instagram.

Pavarësisht disfatës në takimin e parë, te Barcelona mbetet besimi se kualifikimi është ende i arritshëm. Mesazhi i Yamal tregon qartë vendosmërinë dhe shpirtin luftarak brenda skuadrës.

Gjithçka do të vendoset në ndeshjen e kthimit, ku katalanasit synojnë përmbysjen dhe vazhdimin e rrugëtimit në garën më prestigjioze evropiane.