Category: Sport

E ardhmja e mesfushorit të Bernardo Silva te Manchester City vazhdon të jetë në dyshim, pasi trajneri Pep Guardiola ka pranuar se ende nuk ka marrë asnjë njoftim zyrtar nga lojtari për një largim të mundshëm.

Guardiola u shpreh se, pavarësisht marrëdhënies së mirë me Silvën, ai nuk ka marrë asnjë sinjal të qartë për vendimin e tij, duke theksuar se dëshiron të jetë i pari që informohet nëse lojtari vendos të largohet nga klubi.

Kontrata e Silvës skadon në fund të sezonit, çka ka shtuar spekulimet për një transferim të mundshëm gjatë verës. Në media janë përmendur klube si FC Barcelona dhe Juventus, si dhe interesa nga liga të tjera jashtë Evropës.

Silva, i cili është pjesë e Cityt që nga viti 2017, ka qenë një nga lojtarët kyç të suksesit të klubit në vitet e fundit, duke fituar trofe të shumtë në Angli dhe Evropë.

Për momentin, e ardhmja e tij mbetet e hapur, ndërsa vendimi pritet të qartësohet në javët ose muajt në vijim.

Sezoni i rregullt në Superligën e Kosovës në basketboll u mbyll pas 28 xhirove të mbushura me ndeshje dramatike, emocione dhe paraqitje të forta individuale që e bënë këtë edicion një nga më të veçantët e viteve të fundit.

Në xhiron e fundit, spikati Jericole Hellems i Vëllaznimit, i cili në ndeshjen ndaj Pejës realizoi 22 pikë, 8 kërcime dhe 8 asistime, duke arritur indeksin më të lartë të javës (30). Ai ka qenë një nga lojtarët kryesorë të skuadrës gjakovare gjatë gjithë sezonit.

Trepça arriti fitore ndaj Sigal Prishtinës, ku u dalluan Akili Vining dhe Drilon Hajrizi. Vining regjistroi 22 pikë, 3 kërcime dhe 9 asistime, ndërsa Hajrizi kontribuoi me 19 pikë, 7 kërcime dhe 1 asistim.

Bashkimi triumfoi ndaj Borës, në një ndeshje pa ndikim në renditje, me Jalen Riley që ishte më i miri në parket me 22 pikë, 5 kërcime dhe 5 asistime.

Rahoveci 029 siguroi një nga fitoret më të rëndësishme të sezonit, duke mposhtur Golden Eagle Yllin pas vazhdimeve. Në këtë duel u dallua Kentrell Pulliam me 25 pikë, 7 kërcime dhe 6 asistime.

Në përfundim të javës, Jericole Hellems u shpall lojtari më i mirë (MVP), falë paraqitjes së tij të kompletuar me 22 pikë, 8 kërcime dhe 8 asistime, si dhe indeksit 30.

Top 5-shja e javës u plotësua nga Jalen Riley, Akili Vining, Drilon Hajrizi dhe Kentrell Pulliam, të cilët gjithashtu patën performanca shumë të mira në ndeshjet përkatëse

Kupa e Botës ende nuk ka filluar, por debati për çmimet e biletave po bëhet gjithnjë e më i nxehtë. Sipas raportimeve të Associated Press, FIFA ka rritur sërish kostot për ndjekjen e ndeshjeve nga stadiumi, duke shtuar një kategori të re biletash më ekskluzive.

Bëhet fjalë për vendet “e rreshtit të parë”, të cilat konsiderohen si më premium në stadium dhe ofrojnë pozicionin më të afërt me fushën. Çmimi i tyre shkon deri në 4.105 dollarë, duke e bërë këtë një nga opsionet më të shtrenjta ndonjëherë për një ndeshje të Kupës së Botës.

Më herët, biletat e klasit të parë kishin arritur deri në 2.735 dollarë, por me këtë përditësim të ri, kostoja për tifozët që duan përvojën më të afërt me lojën është rritur ndjeshëm.

Rritja e çmimeve ka shtuar debatet rreth aksesueshmërisë së turneut për tifozët e zakonshëm.

Bayern Munich është përballur me një lajm jo të mirë në prag të ndeshjeve të rëndësishme të sezonit. Talenti i ri i skuadrës bavareze, Lenart Karl, ka pësuar një lëndim muskulor gjatë seancave stërvitore, duke vënë në pikëpyetje praninë e tij në sfidat e ardhshme.

Sipas informacioneve të para, Karl ka ndjerë shqetësime gjatë stërvitjes dhe pas ekzaminimeve mjekësore është konfirmuar një dëmtim në muskuj. Edhe pse stafi mjekësor i klubit ende nuk ka bërë të ditur kohëzgjatjen e saktë të rikuperimit, është pothuajse e sigurt se ai do të mungojë në ndeshjen e radhës ndaj St. Pauli, si dhe në përballjen shumë të rëndësishme kundër Real Madrid.

Mungesa e tij konsiderohet një goditje për Bayernin, pasi Karl është parë si një nga lojtarët më premtues të akademisë dhe një opsion i vlefshëm për trajnerin në rotacionin e skuadrës së parë. Aftësitë e tij teknike, shpejtësia dhe vizioni në lojë e kanë bërë atë të dallohet në paraqitjet e fundit, duke fituar besimin e stafit teknik dhe tifozëve.

Në një periudhë kur ndeshjet janë të ngjeshura dhe çdo detaj ka rëndësi, mungesa e një lojtari të ri me potencial si Karl mund të ndikojë në thellësinë e skuadrës. Megjithatë, Bayern Munich mbetet një ekip me alternativa të shumta dhe pritet që trajneri të bëjë rregullimet e nevojshme për të përballuar këto sfida.

Tani vëmendja është përqendruar te rikuperimi i lojtarit, me shpresën që ai të kthehet sa më shpejt në fushë dhe të vazhdojë zhvillimin e tij si një nga yjet e së ardhmes për klubin bavarez.

Skuadra e Los Angeles Lakers është rikthyer te fitorja në NBA pas tri humbjeve radhazi, duke mposhtur 119-103 Golden State Warriors në transfertë. LeBron James ishte më i miri në parket për Lakers, me 26 pikë të shënuara.

Fitore të lehtë siguroi edhe Houston Rockets, që falë 29 pikëve të Kevin Durant mposhti 113-102 Philadelphia 76ers.

Në Konferencën e Lindjes, New York Knicks triumfuan 112-106 ndaj Boston Celtics, në një përballje direkte për vendin e dytë. Dyshja Josh Hart – Jalen Brunson realizoi së bashku 51 pikë për ekipin nga Nju Jorku.

Ndërkohë, Toronto Raptors mundën 128-114 Miami Heat, në një sfidë ku shkëlqeu Brandon Ingram me 38 pikë.

Fitore në transfertë arriti edhe Chicago Bulls, që mposhtën 119-108 Washington Wizards. Më i dalluari për Bulls ishte Tre Jones me 31 pikë.

Pa shumë ndikim në renditje ishte edhe fitorja e Indiana Pacers, që mundën 123-94 Brooklyn Nets. Obi Toppin ishte realizuesi më i mirë me 26 pikë.

Real Madridi po planifikon një lëvizje të madhe në tregun e verës, duke vendosur në shënjestër talentin ofensiv Michael Olise. Drejtuesit e klubit besojnë se ai është profili ideal për të forcuar sulmin dhe për t’i dhënë skuadrës më shumë kreativitet dhe balancë në fazën ofensive.

Sipas burimeve pranë klubit, madrilenët janë të gatshëm të paraqesin një ofertë që kap shifrën e 150 milionë eurove, duke përfshirë edhe kartonin e Brahim Diaz si pjesë të marrëveshjes. Kjo lëvizje synon të bindë klubin aktual të lojtarit që të pranojë transferimin.

Ideja e drejtuesve është ndërtimi i një tresheje të frikshme sulmi, ku Olise do të bashkohej me Kylian Mbappé dhe Vinícius Junior. Një kombinim i tillë shihet si çelësi për dominim në arenën evropiane në vitet e ardhshme.

Nga ana tjetër, për të balancuar skuadrën dhe financat, priten edhe largime të rëndësishme gjatë verës. Disa lojtarë që nuk kanë bindur plotësisht mund të sakrifikohen për të hapur rrugë për afrime të reja.

Nëse kjo marrëveshje realizohet, do të ishte një nga transferimet më të bujshme të viteve të fundit dhe një sinjal i qartë i ambicieve të Real Madridit për të qëndruar në majën e futbollit evropian.

Albi Mall Superliga e Kosovës rikthehet me ndeshjet e xhiros së 28-të, duke premtuar emocione dhe përballje të forta në garën për titull dhe mbijetesë.

Programi hapet të shtunën me duelin mes Prishtinës së Re dhe Malishevës, një ndeshje ku të dyja skuadrat synojnë pikë të rëndësishme për objektivat e tyre sezonale.

Të dielën zhvillohen tri përballje njëkohësisht. Kampioni në fuqi Ballkani pret Gjilanin në një sfidë që pritet të jetë vendimtare për kreun e tabelës. Ndërkohë, Drita përballet me Ferizajn në Gjilan, ndërsa Llapi do të ketë punë me Drenicën në Podujevë, në një duel që mund të ndikojë ndjeshëm në pjesën e poshtme të renditjes.

Xhiroja mbyllet të hënën me ndeshjen mes Prishtinës dhe Dukagjinit në stadiumin “Fadil Vokrri”, ku vendasit synojnë rikthimin te fitorja para tifozëve të tyre.

Me sezonin që po hyn në fazën vendimtare, çdo pikë ka peshë të madhe dhe kjo xhiro pritet të sjellë zhvillime të rëndësishme në renditje.

Raul Asencio mund të largohet nga Real Madridi këtë verë, me klubin që thuhet se është i gatshëm ta shesë atë për rreth 50 milionë euro.

Sipas mediumit OK Diario, ka pakënaqësi në rritje brenda klubit në lidhje me sjelljen e fundit të mbrojtësit, e cila nuk është pritur mirë nga brenda klubit.

Si rezultat, trajneri Alvaro Arbeloa pritet të kufizojë përfshirjen e tij për pjesën e mbetur të sezonit.

Situata daton që nga një periudhë e vështirë fizike për Asencion, i cili pësoi një shtrembërim të qafës gjatë një ndeshjeje të Ligës së Kampionëve kundër Benficës.

Megjithatë, thuhet se tensionet u rritën pasi klubi mbeti i pakënaqur nga sugjerimet se ai kishte menduar të mos udhëtonte për ndeshjen në Vigo. Nga ana tjetër, lojtari ndihej i nënvlerësuar, veçanërisht pasi u la në stol për ndeshjen e parë të 1/8-tës së Ligës së Kampionëve kundër Manchester Cityt.

Më pas thuhet se Asencio i është afruar Arbeloas për një shpjegim në lidhje me rolin e tij, një veprim që e përkeqësoi më tej pozicionin e tij brenda skuadrës.

23-vjeçari po tërheq interes nga Liga Premier, me Evertonin midis klubeve të lidhura, dhe Anglia besohet të jetë destinacioni i tij i preferuar.

Klubi i madh francez, Olympique Marseille ka ndryshuar zyrtarisht logon e klubit për herë të parë pas 22 vitesh.

Ashtu si dizajni i mëparshëm, stema ende ka një skemë ngjyrash blu me shkronjën “M” në qendër të saj, por fansat mendojnë se diçka nuk shkon.

“Mendo për të rinjtë, të trashëguar në histori, i projektuar për të lënë gjurmë në kohën e vet”, ishte postimi me një video brilante nga Marseille.

́ ,
’,
̧ . pic.twitter.com/kPaqEJo7Q8

— Olympique de Marseille (@OM_Officiel) April 8, 2026

Megjithatë, mbështetësit e klubit francez reaguan shpejt në internet dhe përgjigja ishte larg të qenit pozitive.

“Çfarë dreqin? Pse do të ndryshoje diçka që duket vërtet mirë?”, shkroi një tifoz, teksa një tjetër shtoi: “Mendova se ishte logoja e Volkswagen-it…”.

“Marseille ishte një nga klubet e pakta që kishte tashmë një logo moderne dhe minimaliste për vite me radhë që dukej absolutisht e bukur. Pse do ta ndryshonin atë për këtë? Nuk është as një logo retro…”, shkroi një tjetër tifoz.

“E blenë këtë nga një dizajner grafik 15-vjeçar”, ishte komenti tjetër kundër ndryshimit të logos së klubit.

Kombëtarja e Kosovës në futsall ka nisur me fitore të bujshme parakualifikimet për Botërorin 2028, duke shfaqur dominim total ndaj Gjibraltar.

Nën drejtimin e përzgjedhësit Agon Ramadani, Kosova triumfoi me një rezultat spektakolar 11-0, duke lënë të qartë synimin për t’u bërë një nga favoritët e Grupit D.

Takimi u zhvillua në Igalo të Mali i Zi, që është nikoqire e këtij grupi, ku krahas Kosovës dhe Gjibraltarit marrin pjesë edhe Austria dhe Mali i Zi.

Drilon Maxharraj shkëlqeu në këtë përballje, duke shënuar tre gola, ndërsa Shefki Kameri kontribuoi me dy gola. Golat e tjerë u realizuan nga Ylli Mazreku, Ramadan Alaj, Drilon Haxhijaj, Shqiprim Imeri, si dhe një autogol i Alan Parker plotësuan fitoren madhështore të Kosovës.

Kosova do të ndeshet sërish më 10 prill kundër Austrisë, duke nisur nga ora 16:30. Në të njëjtën ditë, Mali i Zi do të përballet me Gjibraltarin në orën 19:30. Ndeshja e fundit të fazës grupore, Kosova e luan më 12 prill ndaj Malit të Zi.

Sistemi i kualifikimeve parashikon që dy skuadrat e para të grupit të avancojnë në raundin kryesor, ku shorti do të tërhiqet më 19 qershor, duke hapur një fazë tjetër vendimtare drejt Botërorit 2028.