Category: Sport

Komisioni Disiplinor i Federatës së Futbollit të Spanjës (RFEF) ka bërë të ditur zyrtarisht se portieri i Real Zaragozës, Esteban Andrada, është dënuar me 13 ndeshje pezullim pas incidentit të rëndë të ndodhur në derbin e Aragonës ndaj Huescas, në kuadër të Ligës së Dytë të Spanjës.

Sipas vendimit, Andrada është ndëshkuar me një nga sanksionet më të rënda disiplinore pas një sulmi fizik ndaj kapitenit të Huescas, Jorge Pulido. Ngjarja ndodhi në fund të ndeshjes, kur portieri argjentinas fillimisht protestoi ashpër pranë gjyqtarit kryesor, Damaso Arcediano Monescillo, duke kërkuar rishikimin e një situate me VAR ku ishte ndëshkuar një bashkëlojtar i tij.

Pas ndërhyrjes së Pulidos, situata u përshkallëzua dhe Andrada reagoi fillimisht me shtyrje, veprim për të cilin mori kartonin e dytë të verdhë dhe u përjashtua nga loja.

Pas daljes nga fusha, sipas raportit zyrtar, ai goditi me grusht në fytyrë lojtarin kundërshtar, duke i shkaktuar hematomë në zonën e mollëzës së majtë.

Komisioni Disiplinor i RFEF-së i ka shqiptuar atij 12 ndeshje pezullim për sulmin fizik ndaj kundërshtarit, ndërsa një ndeshje shtesë është shtuar si pasojë e kartonit të kuq të marrë në të njëjtën ndeshje.

Liverpool FC e ka vendosur Nico Williams si një nga objektivat kryesorë për përforcimin e repartit ofensiv në sezonin e ardhshëm.

Sulmuesi anësor i Athletic Bilbao ka hyrë fuqishëm në radarët e klubit anglez, i cili synon të ndërtojë një projekt afatgjatë me profile të reja dhe dinamike në sulm. Drejtuesit e Liverpoolit e shohin Williams si një element ideal për stilin e lojës që kërkojnë të zhvillojnë në vitet në vijim.

Shpejtësia, driblimi dhe aftësia për të krijuar rrezik në situata një kundër një e bëjnë spanjollin një nga anësorët më të vlerësuar në futbollin evropian. Performancat e tij në La Liga kanë qenë të qëndrueshme dhe në rritje, duke e konsoliduar si një lojtar kyç për skuadrën baske.

Vlera aktuale e kartonit të tij vlerësohet rreth 80 milionë euro, shumë që Liverpooli është i gatshëm ta shqyrtojë për të realizuar transferimin.

Nga ana tjetër, Athletic Bilbao mbetet i vendosur të mos e lehtësojë largimin e lojtarit. Klubi e konsideron Williams një pjesë thelbësore të projektit sportiv dhe një nga figurat kryesore për të ardhmen. Qëndrimi i tyre është i qartë: çdo negociatë mund të ndodhë vetëm nëse respektohet klauzola e lirimit dhe kushtet financiare të vendosura.

Megjithatë, presioni nga klubet e mëdha evropiane, përfshirë Liverpoolin, pritet ta bëjë situatën më të ndërlikuar gjatë verës.

Afati kalimtar veror pritet të jetë vendimtar për të ardhmen e Williams. Nga perspektiva e lojtarit, një kalim në Premier League dhe në një klub me ambicie të mëdha evropiane do të përfaqësonte një hap të rëndësishëm në karrierë.

Pavarësisht kësaj, Athletic Bilbao beson se mund ta bindë lojtarin të vazhdojë zhvillimin e tij në “San Mamés”.

Në çdo rast, Nico Williams pritet të jetë një nga emrat më të përfolur të merkatos së verës, me të ardhmen e tij që mund të sjellë një nga transferimet më të bujshme të sezonit.

Mbrojtësi i Kosovës, Lumbardh Dellova, pritet të largohet nga CSKA Sofia gjatë afatit kalimtar të verës, pasi ndaj tij kanë mbërritur dy oferta konkrete.

Sipas mediave bullgare, një ofertë vjen nga MLS në Shtetet e Bashkuara të Amerikës, ndërsa tjetra nga Turqia. Në mesin e klubeve turke që kanë shfaqur interes për 27-vjeçarin përmenden Çaykur Rizespor, që garon në elitë, si dhe Amedspor, skuadër që aktualisht renditet e treta dhe synon ngjitjen në Superligën turke.

Po ashtu, raportohet edhe për interesim nga një klub rus, por mungesa e një pasaporte tjetër përveç asaj të Kosovës e vështirëson një transferim të tillë.

Dellova ka kontratë me klubin nga Sofja deri më 30 qershor 2027, ndërsa në marrëveshjen aktuale përfshihet një klauzolë lirimi prej 900 mijë eurosh. Kjo shumë konsiderohet e përballueshme për klubet e interesuara.

Gjatë afatit kalimtar të dimrit, Al Najma kishte shfaqur gatishmëri për të paguar klauzolën dhe i kishte ofruar lojtarit një pagë të lartë, por mbrojtësi kosovar e refuzoi ofertën, duke preferuar të qëndrojë në Evropë.

Në muajt e fundit janë zhvilluar bisedime për rinovimin e kontratës me kushte të përmirësuara dhe pa klauzolë lirimi, por deri më tani nuk është arritur marrëveshje.

Sipas mediumit “7 dni sport”, për më shumë se një vit, përfaqësuesit e lojtarit kanë ushtruar presion ndaj drejtuesve të klubit duke sjellë oferta nga skuadra të tjera, çka e bën edhe më të mundshëm një largim të Dellovës në verë.

Ylli ukrainas i Chelsea FC, Mykhailo Mudryk, ka marrë një dënim prej katër vitesh për shkelje të rregullave antidoping, sipas raportimit të gazetarit Ben Jacobs.

Sulmuesi 26-vjeçar luajti për herë të fundit me klubin londinez në vitin 2024, vetëm një vit pas transferimit nga Shakhtar Donetsk në një marrëveshje prej 89 milionë paundësh.

Në dhjetor 2024, karriera e tij në fushë u ndal përkohësisht pasi Federata Angleze e Futbollit (FA) njoftoi për një “gjetje të dyshimtë” në një test rutinë urine. Më pas, në qershor 2025, FA ngriti zyrtarisht akuzë ndaj lojtarit për praninë ose përdorimin e një substance të ndaluar.

Sipas Jacobs, dënimi i dhënë është maksimumi i parashikuar për këtë lloj shkeljeje. Megjithatë, Mudryk ka mohuar vazhdimisht çdo keqbërje dhe ka apeluar vendimin në Gjykata e Arbitrazhit Sportiv (CAS).

Aktualisht, palët janë në proces shkëmbimi dokumentesh, ndërsa ende nuk është caktuar një datë për seancën dëgjimore. Gjatë periudhës së tij te Chelsea, Mudryk ka zhvilluar 73 ndeshje dhe ka shënuar 10 gola.

Mundësitë në futboll shpesh vijnë në momentet më të papritura dhe një e tillë i është hapur Ardon Jashari pas përplasjes së Luka Modrić me Manuel Locatelli në ndeshjen Milan – Juventus.

Mesfushori kroat ka pësuar një dëmtim në mollëzën e faqes, i cili ka kërkuar ndërhyrje kirurgjikale dhe e ka nxjerrë jashtë fushave për pjesën e mbetur të sezonit me fanellën kuqezi. Me mungesën e organizatorit titullar, trajneri Massimiliano Allegri pritet t’u japë më shumë hapësirë lojtarëve që kanë pasur më pak minuta deri më tani.

Për shkak të profilit të tij teknik, Jashari shihet si alternativa kryesore për rolin në mesin e fushës te Milani.

Jashari iu bashkua klubit verën e kaluar për 34 milionë euro plus bonuse, duke e çuar investimin total në rreth 38–39 milionë euro, por deri tani ka pasur pak mundësi për të treguar veten. Kjo si pasojë e një dëmtimi në fibulë dhe zgjedhjeve taktike të trajnerit.

Ndeshja e fundit si titullar për të daton më 15 mars kundër Lazios. Që prej asaj kohe, ai ka qëndruar në stol në tre takime dhe ka luajtur vetëm 28 minuta në total (10 kundër Juventusit dhe 18 ndaj Udineses).

Dëmtimi i Modrić tani i hap një derë të rëndësishme Jasharit, i cili pritet të ketë mundësinë të dëshmojë vlerat e tij në fazën përmbyllëse të sezonit dhe të fitojë besimin e stafit teknik.

Llapi ka marrë një fitore shumë të rëndësishme në javën e 31-të të Superliga e Kosovës, duke mposhtur bindshëm Prishtina e Re me rezultat të thellë 4-0.

Vendasit hynë në fushë me intensitet të lartë dhe e treguan që në start se sa shumë u duheshin pikët. Vetëm në minutën e 6-të, Arbnor Ramadani zhbllokoi rezultatin, duke i dhënë epërsinë e hershme skuadrës së tij. Pavarësisht disa rasteve të tjera, pjesa e parë u mbyll me këtë avantazh minimal.

Gjithçka u bë edhe më e lehtë për Llapin në pjesën e dytë, kur Prishtina e Re mbeti me dhjetë lojtarë pas përjashtimit të Endrit Morina në minutën e 53-të.

Duke shfrytëzuar epërsinë numerike, vendasit shtuan presionin dhe në vazhdim gjetën edhe golat e tjerë. Arianit Hasani dyfishoi shifrat, ndërsa në minutën e 85-të Erio Sadriu shënoi për 3-0, duke vulosur praktikisht fitoren. Në sekondat e fundit, Fiton Ademi kompletoi “festivalin” e golave për rezultatin përfundimtar 4-0.

Me këtë sukses, Llapi arrin në kuotën e 36 pikëve dhe mban gjallë shpresat për mbijetesë, ndërsa Prishtina e Re mbetet në fund të tabelës me 28 pikë, duke u përballur me një situatë gjithnjë e më të vështirë.

Malisheva ka marrë një fitore të rëndësishme në kuadër të javës së 31-të në Superliga e Kosovës, duke mposhtur Gjilani me rezultat 3-1 në një ndeshje ku vendasit dominuan nga fillimi deri në fund.

Takimi nisi me energji nga Malisheva, e cila gjeti shpejt avantazhin. Në minutën e 18-të, Xhemajl Ibishi shfrytëzoi një rast të mirë për të kaluar ekipin e tij në epërsi. Presioni i vendasve nuk u ndal me kaq dhe në fundin e pjesës së parë, konkretisht në minutën e 45-të, Dreni Kryeziu dyfishoi shifrat, duke e dërguar skuadrën në pushim me një epërsi komode.

Në pjesën e dytë, Malisheva tregoi pjekuri në menaxhimin e lojës, duke kontrolluar ritmin dhe duke mos i lënë shumë hapësira kundërshtarit. Në minutën e 72-të, sërish Xhemajl Ibishi u shfaq vendimtar, duke realizuar golin e dytë personal dhe të tretin për skuadrën e tij.

Në minutat shtesë, Gjilani arriti të shënojë golin e nderit përmes Armend Thaqi, duke ngushtuar rezultatin në 3-1, por pa arritur të ndryshojë fatin e takimit.

Me këtë fitore, Malisheva konfirmon formën e mirë dhe siguron tri pikë të vlefshme para tifozëve të saj.

Drita ka dalë fituese në derbin e javës së 31-të të Superliga e Kosovës, duke mposhtur Prishtina me rezultat minimal 1-0 në një përballje të luftuar deri në fund.

Ndeshja nisi me ritëm të lartë, por pjesa e parë u mbyll pa gola, pavarësisht disa tentativave serioze nga të dyja skuadrat. Portierët Faton Maloku dhe Altin Gjoka u treguan të sigurt, ndërsa rastet më të mira në këtë pjesë i patën Besnik Krasniqi dhe Gjelbrim Taipi.

Në fraksionin e dytë, Prishtina rriti presionin dhe iu afrua golit, me momentin më të rrezikshëm që erdhi nga Valmir Veliu, i cili goditi shtyllën.

Megjithatë, kur pritej që vendasit të konkretizonin dominimin, goditjen vendimtare e dha Drita. Në minutën e 81-të, pas një aksioni të bukur, Liridon Balaj asistoi për Blerim Krasniqi, i cili nga afërsia realizoi golin që vendosi fatin e takimit.

Deri në fund nuk pati ndryshim rezultati, dhe Drita mori një fitore shumë të rëndësishme që e afron edhe më shumë me titullin kampion. Pas kësaj ndeshjeje, ajo kryeson renditjen me 60 pikë, ndërsa Prishtina mbetet në vendin e katërt me 45 pikë.

Bota e boksit po përgatitet për një duel të madh këtë verë, ku boksieri britanik Anthony Joshua do të përballet me shqiptarin Kristian Prenga, në një meç që tashmë ka nisur të marrë vëmendje të madhe ndërkombëtare.

Kjo do të jetë përballja e parë e Joshuas pas rikthimit në stërvitje, në një periudhë tejet të vështirë personale për të, pas një aksidenti tragjik me makinë në muajin dhjetor, ku humbi dy miq të tij të ngushtë. Britaniku pritet të hyjë në ring me motivim të lartë, duke kërkuar t’ua dedikojë fitoren atyre që nuk janë më.

Meçi ndaj Prengës është pjesë e një marrëveshjeje të re me disa ndeshje, që shënon një kapitull të ri në karrierën e ish-kampionit të botës. Nëse ai del fitues, mediat sportive raportojnë se një super përballje e shumëpritur me Tyson Fury mund të jetë shumë afër realizimit.

Në letër, Joshua shihet si favorit, duke marrë parasysh përvojën e tij në nivelet më të larta të boksit dhe përballjet me emra të mëdhenj si Andy Ruiz Jr. dhe Oleksandr Usyk, ndaj të cilëve ka zhvilluar duele historike.

Megjithatë, Prenga nuk duhet nënvlerësuar. Boksieri shqiptar ka një fizik të fortë, me gjatësi 1.88 metra dhe një rekord profesional mbresëlënës prej 20 fitoreve dhe vetëm 1 humbjeje, duke e bërë atë një kundërshtar të rrezikshëm në ring.

Vetë Joshua ka folur për këtë rikthim, duke theksuar se ka marrë kohë për t’u rikuperuar fizikisht dhe mendërisht dhe se tani ndihet gati për një kapitull të ri në karrierën e tij. Ai ka konfirmuar gjithashtu marrëveshjen për disa ndeshje, duke nisur nga 25 korriku në Arabinë Saudite, ku pritet të rikthehet fuqishëm në skenën e madhe të boksit.

Britaniku e ka përshkruar këtë fazë si një “rikthim në rrugën e duhur”, duke lënë të kuptohet se synimi i tij mbetet rikthimi në majat e boksit botëror.

Pas 14 vitesh në futbollin italian, duket se aventura e Paulo Dybala në Serie A po i afrohet fundit.

Sulmuesi argjentinas, i cili aktualisht mbron ngjyrat e AS Roma prej katër sezonesh, ka lënë gjurmë të rëndësishme edhe më herët te Palermo dhe veçanërisht te Juventus, ku përjetoi kulmin e karrierës së tij në Itali.

Kontrata e 32-vjeçarit me Romën skadon në fund të sezonit dhe, sipas raportimeve, palët nuk kanë arritur marrëveshje për vazhdimin e bashkëpunimit.

Sipas ESPN, e ardhmja e Dybalas tashmë është larg Evropës, pasi ai ka vendosur të rikthehet në Argjentinë. Madje, thuhet se lojtari ka arritur marrëveshje me Boca Juniors, një nga klubet më të mëdha të vendlindjes së tij.

Zyrtarizimi i transferimit pritet të vijë në muajin qershor, ku Dybala do të firmosë një kontratë trevjeçare, duke mbyllur një kapitull të gjatë dhe të suksesshëm në Itali dhe duke nisur një sfidë të re në Amerikën e Jugut.