Category: Sport

Kapiteni i Kosovës, Amir Rrahmani, ka realizuar një gol të bukur me kokë në ndeshjen e Napolit ndaj Pisas.

Mbrojtësi dardan shënoi në minutën e 27-të të takimit, pasi u shërbye me një harkim të saktë nga Eljif Elmas. Rrahmani reagoi mjaft mirë brenda zonës dhe me një goditje precize me kokë e dërgoi topin në rrjetë, duke e lënë pa asnjë mundësi reagimi portierin mysafir.

Goli i mbrojtësit kosovar i dha Napolit epërsinë 0-2, me skuadrën italiane që po dominon ndeshjen ndaj Pisas.

Paraqitja e Rrahmanit vazhdon të konfirmojë formën e mirë të reprezentuesit kosovar, i cili mbetet një nga lojtarët më të rëndësishëm në repartin defensiv të Napolit, por edhe një rrezik i vazhdueshëm në fazën ofensive gjatë ndërprerjeve.

Tashmë është zyrtarizuar data e rikthimit të Conor McGregor në oktagon. UFC ka bërë të ditur se ylli irlandez i MMA-së, i njohur me nofkën “Notorious”, do të përballet me Max Holloway më 11 korrik në eventin UFC 329, i cili zhvillohet në kuadër të “International Fight Week”.

Për McGregorin, kjo do të jetë rikthimi i shumëpritur pas një periudhe të gjatë mungese nga sporti. Ish-kampioni irlandez nuk ka luftuar prej pesë vitesh, pas dëmtimit të rëndë që pësoi në duelin ndaj Dustin Poirier në vitin 2021.

Luftëtari që konsiderohet si një nga figurat më të mëdha dhe më me ndikim në historinë e MMA-së do të rikthehet pikërisht ndaj një rivali të njohur. McGregor dhe Holloway kanë histori të gjatë mes tyre, pasi për herë të parë u përballën në vitin 2013, në një duel që shënoi fillimin e rrugëtimit të tyre drejt majës së UFC-së.

Tani, pas më shumë se një dekade, dy legjendat do të ndajnë sërish oktagonin në një nga duelet më të shumëpritura të vitit në sportet luftarake.

Për shumë tifozë dhe analistë, kjo përballje mund të jetë edhe një nga luftërat e fundit të McGregorit në UFC, duke marrë parasysh dëmtimin serioz që pësoi vite më parë, por edhe problemet personale dhe ligjore që kanë shoqëruar karrierën e tij në vitet e fundit.

Megjithatë, rikthimi i “Notorious” pritet të sjellë interesim të jashtëzakonshëm në botën e MMA-së dhe ta kthejë edhe një herë vëmendjen globale te emri i Conor McGregor.

Bayern Munich ka hyrë në histori pasi e mbylli sezonin në Bundesliga me plot 122 gola të shënuar, duke thyer rekordin legjendar të Real Madridit të Jose Mourinhos, që kishte realizuar 121 gola në sezonin 2011/12.

Skuadra e drejtuar nga Vincent Kompany vulosi rekordin në javën e fundit të kampionatit, ku triumfoi bindshëm me rezultat 5-1 ndaj FC Köln.

Në qendër të këtij suksesi ishte padyshim Harry Kane, i cili realizoi het-trik dhe e mbylli sezonin me statistika mbresëlënëse. Sulmuesi anglez shënoi 58 gola në 50 ndeshje në të gjitha garat, ndërsa vetëm në Bundesliga realizoi 36 gola, duke lënë pas rivalë si Erling Haaland dhe Kylian Mbappé në garën për “Këpucën e Artë”.

Kane e hapi serinë e golave në minutën e 10-të pas asistimit të Joshua Kimmich, ndërsa pak minuta më vonë realizoi sërish me kokë për ta dyfishuar epërsinë e bavarezëve.

Kolni reagoi përkohësisht me golin e Said El Malas, por Bayerni ruajti kontrollin e takimit. Tom Bischof realizoi golin e tretë me një goditje të fuqishme nga distanca, ndërsa Kane kompletoi het-trikun në minutën e 69-të për rezultatin 4-1.

Në fund, Nico Jackson vulosi fitoren 5-1 në minutën e 83-të, duke i dhënë Bayernit një mbyllje perfekte të sezonit.

Ky rekord historik konfirmon dominimin ofensiv të Bayernit nën drejtimin e Vincent Kompanyt dhe i jep këtij sezoni një rëndësi të veçantë në historinë e futbollit evropian, përtej fitimit të titullit kampion.

Sonte zhvillohet ndeshja e tretë finale e “ProCredit Superliga”, ku Bashkimi do të jetë nikoqir i kampionit aktual, Trepçës, në një përballje shumë të rëndësishme për fatin e serisë finale.

Skuadra mitrovicase vjen në këtë duel me epërsi 2-0 në seri, pasi triumfoi në dy ndeshjet e para të finales. Në takimin e parë, Trepça fitoi me rezultat 93:83, ndërsa në ndeshjen e dytë tregoi edhe një herë forcën e saj duke triumfuar bindshëm me rezultat 94:79.

Për Bashkimin, situata është bërë edhe më e vështirë pas mungesës së lojtarit amerikan Kyan Anderson, i cili nuk do të paraqitet në ndeshjet e mbetura të finales për shkak të një lëndimi. Mungesa e tij konsiderohet goditje e madhe për prizrenasit, pasi Anderson ishte një nga lojtarët më të rëndësishëm të skuadrës gjatë këtij sezoni.

Në anën tjetër, Trepça synon ta mbyllë serinë sonte dhe të festojë titullin kampion, ndërsa Bashkimi do të kërkojë reagimin para tifozëve vendas për të mbetur në garë për trofeun.

Ndeshja zhvillohet nga ora 19:30 në palestrën “Sezai Surroi” në Prizren, ku pritet atmosferë e zjarrtë dhe interesim i madh i tifozëve për finalen e tretë të elitës së basketbollit kosovar.

Chelsea ka konfirmuar zyrtarisht emërimin e Xabi Alonsos si trajnerin e ri të përhershëm të klubit. Strategu spanjoll ka firmosur një kontratë katërvjeçare me klubin londinez dhe do ta nisë zyrtarisht punën në Stamford Bridge më 1 korrik, përpara fillimit të fazës përgatitore për sezonin e ri.

42-vjeçari vjen në krye të Chelseat pas shkarkimit të Liam Rosenior në muajin prill. Deri në ardhjen e Alonsos, skuadra do të drejtohet përkohësisht nga Calum McFarlane.

Ish-mesfushori spanjoll ishte objektivi kryesor i drejtuesve të Chelseat për postin e trajnerit dhe pritet të udhëheqë një projekt afatgjatë, që synon rindërtimin e skuadrës dhe rikthimin e stabilitetit në Stamford Bridge.

Njoftimi për emërimin e Alonsos vjen në një moment të vështirë për klubin londinez, i cili aktualisht renditet në vendin e nëntë në Premier League dhe po lufton për të siguruar një vend në garat evropiane për sezonin e ardhshëm.

Manchester City e ka fituar trofeun e FA Cup pasi mposhti Chelsea FC në finale me rezultat minimal 1-0.

“Qytetarët” triumfuan falë një supergoli të Antoine Semenyo.

City e nisi shumë më mirë takimin dhe arriti të shënojë përmes Erling Haaland, por goli u anulua për pozitë jashtë loje.

Edhe Semenyo pati një rast ideal në pjesën e parë, por goditja e tij nga afërsia përfundoi mbi portë.

Megjithatë, sulmuesi ganez korrigjoi gabimin në minutën e 72-të, duke realizuar me thembër pas asistimit të Haalandit për t’i dhënë Cityt trofeun e FA Cup.

Chelsea kërkoi dy herë penallti pas rrëzimit të João Pedro brenda zonës, por gjyqtari nuk vendosi ta rishikojë asnjërin rast në VAR, duke i qëndruar besnik vendimit të tij fillestar.

Kësisoj, Manchester City e fiton FA Cup, ndërsa tani do të synojë t’i fitojë edhe dy ndeshjet e mbetura në Premier League, me shpresën që Arsenal FC të lëshojë pikë në garën për titull.

Bayern Munich dhe Borussia Dortmund kanë arkëtuar pikët e plota në xhiron e fundit të Bundesliga.

“Bavarezët” triumfuan me rezultat bindës 5-1 ndaj 1. FC Köln, ndërsa Dortmundi fitoi 0-2 në udhëtim te Werder Bremen.

Bayerni zhvilloi edhe një tjetër paraqitje fantastike, pavarësisht se ishte shpallur kampion javë më parë.

Harry Kane realizoi het-trik, ndërsa për dy golat e tjerë shënuan Tom Bischof dhe Nicolas Jackson. Për Kölnin, golin e vetëm e realizoi El Mala.

Në anën tjetër, Dortmundi fitoi me rezultat komod 0-2 ndaj Bremenit, ku golat u shënuan nga Serhou Guirassy në minutën e 59-të dhe Yan Couto në minutën e 89-të.

Bayerni e përmbylli sezonin me 89 pikë, ndërsa Dortmundi në pozitën e dytë me 73 pikë. Në anën tjetër, Kölni dhe Werder Bremeni siguruan mbijetesën, duke e mbyllur kampionatin në pozitat 14 dhe 15 me nga 32 pikë.

Hoffenheim ka pësuar humbje në xhiron e fundit të Bundesliga, duke u mposhtur 4-0 në udhëtim nga Borussia Mönchengladbach.

Skuadra ku aktivizohen tre futbollistë shqiptarë nga Kosova mbeti me një lojtar më pak që në fillim të pjesës së dytë, pasi Tim Lemperle u ndëshkua me kartonin e dytë të verdhë.

Për vendasit realizuan Hugo Belin, Haris Tabaković, Diks dhe Robin Hack, duke i siguruar Mönchengladbachut tri pikët e plota.

Me këtë humbje, Hoffenheim e mbyll sezonin në pozitën e pestë me 61 pikë, tri më pak se VfB Stuttgart, dhe sezonin e ardhshëm do të garojë në UEFA Europa League.

Sa i përket futbollistëve kosovarë, Fisnik Asllani e përfundoi sezonin në Bundesliga me 10 gola dhe shtatë asistime, ndërsa pritet të ndryshojë skuadër gjatë verës. Ndërkohë, Albian Hajdari dhe Leon Avdullahu së fundmi kanë rinovuar kontratat me klubet e tyre.

Kapiteni i Real Madrid CF, Dani Carvajal, pritet të largohet nga klubi këtë verë me skadimin e kontratës së tij, duke mbyllur një kapitull të gjatë dhe të suksesshëm në “Santiago Bernabéu”.

34-vjeçari, një nga figurat më të rëndësishme të skuadrës në 13 sezonet e fundit, raportohet se nuk do të rinovojë kontratën dhe do të largohet si lojtar i lirë. Sipas burimeve pranë lojtarit, ai është i vetëdijshëm për vendimin e klubit për të mos i ofruar zgjatje të marrëveshjes.

Gjatë këtij sezoni, situata e tij ka qenë e ndërlikuar për shkak të dëmtimeve të përsëritura dhe konkurrencës së fortë në krahun e djathtë, ku rol më të madh ka marrë Trent Alexander-Arnold, i cili iu bashkua Real Madridit nga Liverpool FC verën e kaluar.

Për Carvajal, opsionet jashtë Evropës, përfshirë një kalim në Lindjen e Mesme, përmenden si të vështira në këtë moment. Ndërkohë, edhe lidhjet familjare me Joselu, ish-bashkëlojtar i tij në Madrid, janë përmendur në raportime të ndryshme sportive.

Carvajal ka pasur një sezon të vështirë me dëmtime, duke luajtur vetëm pak ndeshje të plota pas rikthimit nga një ndërhyrje në gju, ndërsa karriera e tij në klub mbetet një nga më të gjatat në historinë moderne të Real Madridit.

Ai iu bashkua akademisë së Real Madridit në vitin 2002 dhe ka zhvilluar gjithsej 448 paraqitje me ekipin e parë, duke u kthyer në një nga mbrojtësit më të qëndrueshëm dhe më të suksesshëm të klubit.