Category: Lajme

Komandanti i KFOR-it, Ozkan Ulutash ka pritur në takim emisarin special për Ballkanin Perëndimor të kryeministrit të Hungarisë, Zsolt Bunford.

Në takim është folur për situatën e sigurisë në rajon.

“Takimi i ofroi Komandantit një mundësi të vlefshme për të përshkruar situatën e sigurisë në rajon, duke theksuar angazhimin e KFOR-it për të ruajtur një mjedis të sigurt për të gjithë njerëzit në Kosovë. Gjenerali Ulutash shprehu gjithashtu vlerësimin e tij të sinqertë për kontributet e gjata të Hungarisë në misionin e KFOR-it”, thotë KFOR- i në një njoftim për media rreth takimit.

Tre persona mbetën të lënduar si pasojë e një aksidenti që ndodhi paraditen e sotme në Banjë të Istogut.

Siç ka konfirmuar zëdhënësi i Policisë së Pejës, Fadil Gashi, në aksident u përfshinë dy vetura.

Ai po ashtu bëri të ditur se Policia ka dalë në vendin e ngjarjes për të hetuar rrethanat.

Ish-kryetari i Lëvizjes Vetëvendosje, Visar Ymeri, ka treguar pse partia e Albin Kurtit nuk e kishte votuar për president Adem Demaçin në vitin 2011.

Në emisionin “Debat Plus”, ai ka thënë se kane qenë dy arsyeje që VV-ja nuk e ka votuar simbolin e rezistencës kombëtare për president.

Ai ka bërë me dije se arsyeja e parë ka qenë frika se mos ishte lojë e Thaçit.

“Dy kanë qenë arsyet kryesore. E para është që Albin Kurtit i është dokur që z. Demaçi po bëhet pjesë e lojës së Thaçit, jo me qëllim me e zgjedhjes, por me e fut në lojë”, ka thënë Ymeri, duke treguar edhe arsen kryesore.

“Dhe e dyta, unë nuk kam qenë në takim, por ka pasur një takim të Liburnit dhe Albinit me z, Demaçi. Ata pastaj me kanë treguar se njëra prej pyetjeve që i është shtruar z. Demaçi ka qenë: nëse të bëjnë president a e mandaton Hashim Thaçin për kryeministër? Dhe z. Demaçi ka thënë “po”, sepse ai i ka fituar zgjedhjet. Ky i ka thënë: jo, Hashim Thaçi nuk bën me kanë”, ka treguar Ymeri.

Rifat Jashari ishte prezent në shënimin e përvjetorit të parë të rënies së Sali Çekajt, të organizuar nga Lidhja Demokratike e Kosovës në Gjermani.

Fotografinë nga ngjarja e ka publikuar Gani Geci, ish-deputeti dhe anëtari i Lidhjes Demokratike të Kosovës.

Geci, i cili ka lidhje familjare me Jasharajt, ka rrëfyer sesi Rifat Jashari kishte hapur zjarr ndaj policëve serbë gjatë rrethimit të Kullës së Jasharajve më 1991.

“Rifat Jashari ka qenë shtylla e Familjes Jashari, një njeri punëtor, i urtë dhe trim. Më 30 dhjetor 1991, kur u rrethua për herë të parë kulla e Shaban Jasharit – kullë të cilën e kishte ndërtuar Rifat Jashari duke punuar në Gjermani – ai ndodhej në shtëpi, në pushim për nder të Vitit të Ri”, ka shkruar Geci.

“Kur doli Rifati në lamë, dy policë i bënë “stoj”. Rifati hapi zjarr me një rafalë dhe, sipas lajmeve të Serbisë, plagosi dy policë serbë”.

Sot, Kosova feston Ditën e Veteranit çdo vit më 30 dhjetor, si shenjë nderimi për luftën e familjes Jashari.

“Me propozimin tim në Komisionin për Siguri në Kuvendin e Republikës së Kosovës, data 30.12 ka mbetur Dita e Veteranit. PDK dhe AAK kanë propozuar dy data të tjera: një në vitin 1995 dhe një me daljen e UÇK-së në skenë, në vitin 1997”, ka thënë Geci.

Shtetet e Bashkuara të Amerikës kanë vendosur një paketë të re tarifash prej 10 për qind për importet ndaj të gjitha shteteve, që ka hyrë në fuqi më 24 shkurt. Sipas një raporti të publikuar më 26 shkurt nga Banka Evropiane për Rindërtim dhe Zhvillim (EBRD), Kosova renditet ndër vendet më të goditura nga këto tarifa në rajonin ku operon kjo bankë.

Sipas EBRD-së, tarifat e importit të SHBA-së për vendet e rajonit janë rritur mesatarisht me 0.3 pikë përqindjeje, ndërsa 29 shtete përballen tani me tarifa më të larta. Rritjet më të mëdha janë regjistruar në Armeni, Egjipt, Kenia, Kosovë dhe Ukrainë.

“Rritja e tarifave për Armeninë, Egjiptin, Kenian, Kosovën e Ukrainën lëviz nga +3.7 deri në +4.8 pikë përqindjeje”, thuhet në raport.

Ndërkohë, disa vende të tjera të rajonit si Bosnja dhe Hercegovina e Serbia, si dhe Moldavia e Tunizia konsiderohen përfituese relative nga ndryshimet e fundit tarifore pasi tarifat ndaj tyre ose kanë pasur rritje shumë më të vogël, ose kanë mbetur pothuajse në të njëjtin nivel.

Raporti nënvizon se, mesatarisht, tarifat e importit të SHBA-së për vendet ku operon EBRD-ja janë rritur nga 14.6 në 15 për qind, duke rritur presionin mbi eksportuesit, përfshirë edhe ata nga Kosova.

Megjithëse, raporti thekson se tarifat kanë pasur efekt më pak sesa është pritur.

Më 20 shkurt, Gjykata Supreme e SHBA-së rrëzoi tarifat globale të Trumpit përveç atyre për industrinë e çelikut, aluminit, drurit dhe automobilave, me argumentin se ligji emergjent për fuqitë ekonomike nuk ia lejon presidentit të vendosë tarifa të tilla. Më pas, presidenti amerikan u zotua për tarifa të reja prej 15 për qind. Por në fund vendosi ta zëvendësojë tarifën prej 10 për qind me një të re në po atë vlerë – kësaj radhe në bazë të nenit 122 të Aktit të Tregtisë të vitit 1974, i cili i lejon presidentit të vendosë një tarifë të tillë për 150 ditë pa miratimin e Kongresit.

Sipas të dhënave të Doganës së Kosovës, në vitin 2019 ishin eksportuar mallra në SHBA me vlerë tre milionë euro, ndërsa tre vjet më vonë (2022) kjo shifër u rrit në mbi 131 milionë euro.

Produktet që i eksporton Kosova në SHBA përfshijnë ushqime, lëngje, tekstil, dyshekë, por dhe prodhime nga druri dhe plastika.

Prokuroria e Posaçme në Shqipëri, ka sekuestruar një apartament në Qerret të Kavajës, në pronësi të Shemsi Bahtirit, ish-anëtarit të Vetëvendosjes, i cili ishte arrestuar vitin e kaluar në një aksion të madh të Policisë së Kosovës kundër krimit të organizuar.

Ai ndodhet në paraburgim nën dyshimin trafik ndërkombëtar narkotikësh.

Siç raportojnë sot mediat në Shqipëri, SPAK u vu në lëvizje mbi bazën e një kërkese për ndihmë të ndërsjelle juridike nga prokuroria Speciale e Kosovës, e cila po e heton Bahtirin për përfshirje në aktivitetin e paligjshëm të trafikut të drogës.

Prokuroria speciale kërkoi ndihmë nga SPAK për sekuestrimin e pasurive të paluajtshme të personave që ishin pjesë e grupit kriminal, pasi kishte dyshime se paratë e fituara nga aktiviteti kriminal i kanë investuar në pasuri të paluajtshme, si si tokë, shtëpi, banesa, vetura etj. Bazuar në këtë kërkesë SPAK kreu një sërë verifikimesh jo vetëm për Bahtirin, por edhe të paktën dy të dyshuar të tjerë. Nga këqyrja e faqes së Qendrës Kombëtare të Biznesit rezultoi se në emër të Shemsi Bahtiri rezulton subjekti “DAIMAN” shpk me objekt veprimtarie “Shitblerje e pasurive të paluajtshme”, i regjistruar më date 11.03.2025, bëhet e ditur në raportim.

Ndërsa u zbulua se ai zotëronte një apartament në Qerret të Kavajës që tashmë është vënë nën sekuestrim.

Shemsi Bahtiri akuzohet se veprat penale “Pjesëmarrja ose organizimi i grupit kriminal të organizuar”, blerja, posedimi dhe shpërndarja e narkotikëve dhe pastrim parash.

Ai u arrestua në kuadër të operacionit të koduar “Qielli i Thyer” dhe gjatë kontrolleve u sekuestruan lëndë narkotike, shuma të konsiderueshme parash, armë të llojeve të ndryshme, laptopë, telefona, usb dhe dokumente të ndryshme.

Shemsi Bahtiri, i cili u përjashtua nga Partia Vetëvendosja e ALbin Kurtit u arrestua pas zbërthimit të aplikacionit të koduar Sky ECC, që iu vunë në dispozicion nga autoritetet franceze.

Lëvizja Vetëvendosje pas arrestimit kishte konfirmuar s Bahtiri ka qenë aktivist i saj, duke marrë vendim për përjashtim nga partia.

Të paktën 10 punonjës të FBI-së që punuan në hetimin e ish-Këshilltarit Special Jack Smith mbi mbajtjen e të dhënave të klasifikuara nga presidenti amerikan Donald Trump pasi ai u largua nga Shtëpia e Bardhë në vitin 2021 u pushuan nga puna të mërkurën, shkruan CBS News.

Shkarkimet erdhën pasi Reuters raportoi se FBI kishte kërkuar dëshmi të të dhënave të thirrjeve telefonike të bëra nga drejtori i FBI-së, Kash Patel, dhe Shefja e Shtabit të Shtëpisë së Bardhë, Susie Wiles, kur të dy ishin ende qytetarë privatë, si pjesë e hetimit të Smith ndaj Trump.

Artikulli i Reuters citoi Patelin, i cili pretendoi se FBI-ja kishte marrë fshehurazi të dhënat e tij telefonike “duke përdorur pretekste të dobëta dhe duke e varrosur të gjithë procesin në dosje të ndaluara të hartuara për të shmangur çdo mbikëqyrje”.

Artikulli i Reuters shtoi se nuk kishte verifikuar në mënyrë të pavarur asnjë nga pretendimet e Patelit.

Patel nuk dha asnjë provë për shkelje nga ana e stafit që u pushua nga puna.

Këshilltari Special Jack Smith mbikëqyri dy hetime federale ndaj presidentit të tanishëm Trump.

Njëri rast pretendonte se ai u përpoq në mënyrë të paligjshme të përmbyste rezultatet e zgjedhjeve presidenciale të vitit 2020, ndërsa tjetri u përqendrua në ruajtjen e dokumenteve të klasifikuara dhe përpjekjet për të penguar Departamentin e Drejtësisë kur ky i kërkoi t’i kthente dosjet.

Të gjithë agjentët dhe analistët e FBI-së që u pushuan nga puna të mërkurën ishin të përfshirë në rastin e dokumenteve të klasifikuara.

Hetimet e dyfishta të Smith ndaj Trump çuan në paditë e para penale federale kundër një ish-presidenti në historinë e SHBA-së.

Akuzat për dokumente të klasifikuara u rrëzuan nga një gjyqtar federal në Florida në mesin e vitit 2024 me arsyetimin se Smith ishte emëruar në mënyrë të paligjshme, dhe Smith i hoqi akuzat e zgjedhjeve të vitit 2020 pasi Trump fitoi garën e vitit 2024.

Që atëherë, administrata Trump ka vënë në shënjestër punonjësit federalë që punuan në të dy rastet.

Departamenti i Drejtësisë shkarkoi një grup prokurorësh që punuan në ekipin e Smith, dhe FBI ka shkarkuar agjentë të përfshirë në hetimin zgjedhor të Arctic Frost.

Elisa Spiropali, ministre e Punëve të Jashtme të Shqipërisë, është pritur në takim edhe nga kryetari i AAK-së Ramush Haradinaj. Për këtë të fundit, Spiropali ka thënë se ka ‘’ ka qenë një prej zërave të fortë dhe të qartë të orientimit euroatlantik të Kosovës’’.

Spiropali ka bërë të ditur edhe se, gjatë takimit kanë diskutuar për përgjegjësinë që kanë forcat politike sot: të garantojnë stabilitet institucional, të forcojnë partneritetin strategjik Shqipëri–Kosovë dhe të avancojnë më tej integrimin euroatlantik të rajonit tonë.

Postimi:

Prishtinë 🇦🇱🇽🇰

Me Kryetarin e Aleancës për Ardhmërinë e Kosovës, Ramush Haradinaj.

Ramushi ka qenë një prej zërave të fortë dhe të qartë të orientimit euroatlantik të Kosovës – në momente të vështira dhe në faza vendimtare për shtetin.

Folëm për përgjegjësinë që kanë forcat politike sot: të garantojnë stabilitet institucional, të forcojnë partneritetin strategjik Shqipëri–Kosovë dhe të avancojnë më tej integrimin euroatlantik të rajonit tonë.

Siguria mbetet boshti themelor i këtij vizioni. Roli i NATO-s në Kosovë dhe koordinimi i vazhdueshëm me aleatët janë garanci për paqen dhe stabilitetin afatgjatë.

Shqipëria dhe Kosova duhet të punojnë krah për krah për sigurinë kombëtare, aleancat strategjike dhe konsolidim ndërkombëtar.

Kryetari i Partisë Demokratike të Kosovës, Bedri Hamza, ka publikuar një fotografi simbolike, duke e lidhur atë me dy data të rëndësishme për historinë politike të vendit: 90-vjetorin e lindjes së Adem Demaçit dhe dhjetëvjetorin e zgjedhjes së Hashim Thaçit si President i Kosovës.

“Ua gjeta këtë fotografi si kujtim i dy datave të rëndësishme: 90-vjetorit të lindjes së Adem Demaçit, frymëzimit të brezave të patriotëve që bënë histori në vendin tonë, si dhe dhjetëvjetorit të zgjedhjes së Hashim Thaçi si President”, ka shkruar Hamza.

Ai ka rikujtuar simbolikën e betimit të Thaçit në ditëlindjen e Demaçit. “Në ditëlindjen e tij, para dhjetë vjetësh, një tjetër patriot i madh u betua si President i Kosovës së pavarur, duke kthyer sakrificën në institucion dhe ëndrrën në shtet”, ka thënë Hamza.

Sipas Hamzës, figura e Demaçit mbetet e pazëvendësueshme në historinë kombëtare. “Baca Adem mbetet figurë e qëndresës, humanizmit dhe sakrificës për liri, barazi dhe dinjitet njerëzor”, është shprehur ai.

Në fund, ai ka theksuar se “edhe sot, vlerat e tij dhe të çdo luftëtari të lirisë mbrohen me dinjitet nga çlirimtarët tanë, në burgun e fundit politik për popullin tonë”, duke e përmbyllur mesazhin me fjalët: “Liri. Drejtësi.”

Federata e Motoçiklizmit e Kosovës, në bashkëpunim me Klubin “Dardanët” dhe Klubin e Aeronautikës “Shqiponjat e Kastriotit”, do të organizojë më 6 mars jë parakalim motoristik dhe aktivitet paragllajdizmi në nderim të Epopesë së Ushtrisë Çlirimtare të Kosovës

Ngjarja mbahet nën moton “Ta nderojmë historinë tonë të lavdishme”.

“Ky aktivitet ka për qëllim përkujtimin me dinjitet të sakrificës dhe historisë sonë kombëtare, duke bashkuar komunitetin e motoristëve dhe sportdashësve në një organizim të përbashkët simbolik”, thuhet në një njoftim të Federatës së Motoçiklizmit të Kosovës.