Category: Lajme

Banka Kombëtare Zvicerane ka prezantuar sot serinë e saj më të fundit të kartëmonedhave zcerane të frangave.

Në përzgjedhjen e kartëmonedhave është marrë parasysh edhe mendimi i publikut.

Prandaj, u krye një sondazh i opinionit publik, i cili përbënte 50 për qind të vlerësimit. Sipas SNB-së, mbi 100,000 njerëz morën pjesë në këtë sondazh.

Çdo kartëmonedhë përshkruan një lartësi të ndryshme mbidetare në Zvicër.
Gjashtë kartëmonedhat u disenjuara nga Fabienne Kilchör dhe Sebastién Fasel në ngjyra pastel.

Kartëmonedhat e reja zvicerane do të dalin në qarkullim nga viti 2031.

Grupi parlamentar i Lëvizjes Vetëvendosje do të mblidhet edhe njëherë tjetër sot për të diskutuar për çështjen e zgjedhjes së një kandidati për postin e presidentit.

Ilir Kërçeli, deputet i LVV-së ka bërë të ditur se grupi parlamentar i kësaj partie do të mblidhet nga ora 13:00 për të diskutuar çështjen e presidentit.

“Në ora 13:00 kemi mbledhje, kemi me diskutu për çështjen e presidentit”, ka thënë Kërçeli.

Ndërkaq, në lidhje me emrat e propozuar deputeti i VV-së, Enver Haliti, ka bërë të ditur se nuk ka akoma asgjë konkrete.

Ai nuk ka pranuar të përgjigjet as për përzgjedhjen e Glauk Konjufcës, emri i të cilit është lakuar në media ditëve të fundit.

Deputeti i PDK-së, Eman Rrahmani, ka reaguar lidhur me situatën aktuale për presidentin.

Rrahmani ka thënë se VV-ja dhe Kurti po synojnë eleminimin politik të Vjosa Osmanit.

Ai deklaroi se vendi duhet të shkojë në zgjedhje, ose Kosova të rrëshqasë në diktaturë.

Postimi:

Albin Kurti dhe Lëvizja Vetëvendosje synojnë eliminimin politik të Presidentes Vjosa Osmani dhe mbajnë qasje përjashtuese ndaj çdo partie opozitare, vendi, shoqëria dhe demokracia janë në rrezik serioz.

Sot kemi vetëm dy rrugë:

Ose shkojmë në zgjedhje të reja dhe ia kthejmë vendimin qytetarit,

Ose heshtim dhe lejojmë që vendi të rrëshqasë drejt një autoritarizmi të plotë, me prirje drejt një diktature.

Policia e Kosovës, ka njoftuar se në një person është vetëdorëzuar në polici në Gjakovë, pasi që i njëjti ishte në kërkim.

Për të dyshuarin, policia dje kërkoi bashkëpunim me qytetarët për gjetjen e tij, përcjell Express.

Postimi:

Vetëdorëzohet personi i dyshuar në kërkim

Gjakovë, 4 mars 2026

Drejtoria Rajonale e Policisë në Gjakovë, me datën 3 mars 2026, ka publikuar një kërkesë për bashkëpunim me qytetarët, me qëllim lokalizimin dhe arrestimin e një personi të dyshuar, ku i njëjti sot, me datën 4 mars 2026, është vetëdorëzuar në Polici.

Pas intervistimit dhe procedurave të nevojshme policore, me vendim të prokurorit të Shtetit, i dyshuari është liruar në procedurë të rregullt.

Policia e Kosovës falënderon qytetarët dhe mediat për bashkëpunimin dhe mbështetjen e vazhdueshme dhe mbetet e përkushtuar në realizimin e detyrave dhe përgjegjësive ligjore për garantimin e rendit dhe sigurisë publike.

Shtetas të Serbisë, si dhe disa nga Maqedonia e Veriut, Bosnja dhe Hercegovina, Mali i Zi dhe Kroacia, të cilët u evakuuan nga Izraeli, mbërritën rreth orës dy pas mesnate në Beograd me një fluturim special të Air Serbia nga Sharm el-Sheikh, i organizuar nga Qeveria e Serbisë dhe Ministria e Punëve të Jashtme.

Fluturimi special, i cili u nis nga Beogradi dje rreth orës 17:00, mbërriti në Sharm el-Sheikh rreth orës 21:00 sipas kohës lokale dhe u kthye me 67 shtetas të Serbisë të evakuuar nga Izraeli, mes tyre edhe fëmijë të vegjël, raportoi “RTS”.

Fillimisht ishte organizuar kalimi tokësor përmes kufirit egjiptian, përkatësisht transporti deri në aeroportin egjiptian.

Përveç qytetarëve serbë, në aeroplan ndodheshin edhe shtetas të Maqedonisë, Bosnjës dhe Hercegovinës, Sllovenisë, Malit të Zi dhe Kroacisë.

Sekretari shtetëror në Ministrinë e Punëve të Jashtme, Damjan Joviq, i cili u dërgua në Egjipt për të koordinuar aksionin, tha se përveç faktit që bëhet fjalë për një çështje humanitare, kjo është edhe një mesazh që Republika e Serbisë dëshiron të dërgojë: “duam marrëdhëniet më të mira dhe më të afërta, të mbushura me solidaritet me vendet tona fqinje – Malin e Zi, Maqedoninë e Veriut dhe Bosnjën e Hercegovinën”.

Avioni i parë nga Dubai me shtetas serbë zbarkoi në Beograd dje.

Sipas të dhënave të fundit nga Ministria e Punëve të Jashtme dhe Tregtisë së Jashtme e Maqedonisë së Veriut, që nga fillimi i konfliktit deri më sot, gjithsej 473 shtetas maqedonas kanë kontaktuar përfaqësitë tona diplomatiko-konsullore në Tel Aviv, Doha dhe Abu Dhabi.

“Prej tyre, 19 persona janë paraqitur nga Izraeli, 106 nga Katari, ndërsa 348 shtetas i janë drejtuar DKP-së në Abu Dhabi. Në këtë numër përfshihen edhe 18 persona nga Kuvajti, si dhe 12 persona nga Bahreini”, njoftoi Ministria.

Deputeti i Partisë Demokratike të Kosovës, Mergim Lushtaku, është deklaruar lidhur me çështjen e presidentit duke thënë se nga kjo parti kanë qenë të vullnetshëm që të arrihet një zgjidhje e kësaj situate.

Lushtaku ka thënë se po vëren një ‘’lloj arrogance’’ nga LVV’ja, dhe se, përgjegjësia kryesore bie mbi këtë parti, përcjell Express.

‘’Kemi qenë të vullnetshëm që të bëjmë një zgjidhje të situatës aktuale politike që rrjedh me zgjedhjen e presidentit, kemi qenë pro një kandidati konsensual, por ja që nuk është arrit ajo figurë që të realizohet dhe propozohet, dhe kemi dhanë edhe propozimet tona si PDK. Fatkeqësisht shohim një lloj arrogance tek shumica parlamentare që është fituese e zgjedhjeve. Përgjegjësia kryesore i mbetet LVV’së’’, ka thënë ai për media.

Tutje, deputeti i PDK’së deklaroi ‘’me keqardhje’’ se vendi po ‘’sheh’’ zgjedhje të reja, dhe se, lideri i VV’së, Albin Kurti, sipas tij, më shumë ka qenë i angazhuar të fajësoj opozitën se sa të zgjidh probleme reale.

‘’Me keqardhje po shohim që jemi drejt zgjedhjeve të reja, dhe po shohim që Kurti ka qenë me shumë i angazhuar se si t’ia lë fajin opozitës, se sa t’i zgjedh problemet reale të qytetarëve. Ne çdo iniciativë e shohim të mirëseardhur, por duhet t’i kuptojmë edhe numrat që janë në Kuvendin e Kosovës. PDK nuk ardh deri të propozimi i asnjë kandidature, ne kemi kandidat të mjaftueshëm, por derisa nuk ka një pajtueshmëri me partinë në pushteti, sigurisht që nuk ka as hapësira as me kandidu, sepse e shohim se është vetëm lojë’’, ka thënë ai.

Ministri i Brendshëm Xhelal Sveçla, ka reaguar ndaj deklarimit të ish-shefit të Inteligjencës serbe Aleksandar Vulin, duke e cilësuar si atë si thellësisht kërcënuese dhe të papranueshme.

Sveçla ka deklaruar se nuk zmbrapsen përballë këtyre kërcënimeve.

“Institucionet e Republikës së Kosovës, në nivel të lartë profesionalizmi, po e përmbushin mandatin e tyre kushtetues dhe ligjor. Ato janë të gatshme të përballen me çdo lloj kërcënimi në mënyrë profesionale dhe në përputhje me ligjin. Njëkohësisht, ne si bartës të institucioneve nuk zbrapsemi përballë këtyre kërcënimeve dhe do të vazhdojmë rrugën tonë drejt forcimit të Republikës sonë të pavarur dhe sovrane”, ka deklaruar Sveçla.

“Përpjekjet e Rusisë dhe Serbisë për destabilizimin e rajonit duhet të kenë vëmendjen e plotë të faktorëve relevantë ndërkombëtarë. E as Vulin, as Vuçiq, as nuk mund të na frikësojnë e as të na ndalin”, theksoi ai.

Deklarimet e Vulinit vijnë duke komentuar sulmin e ShBA-së e Izraelit mbi Iranin.

Ai deklaroi se “kur mundet MOSSAD-i pse nuk mundemi ne?”.

Policia e Kosovës, ka njoftuar se gjatë 24-orëve të fundit janë shqiptuar 2380 gjoba trafiku.

Në raportin e PK’së shtohet edhe se, gjatë kësaj kohe janë raportuar të kenë ndodhur 28 aksidente me dëme materiale, dhe, 20 me të lënduar.

Aty theksohet edhe se janë arrestuar 16 persona.

KESCO, në cilësinë e Furnizuesit të Shërbimit Universal, njofton se në përputhje me Ligjin për Energjinë Elektrike dhe me kërkesë të Zyrës së Rregullatorit për Energji (ZRrE), nga data 1 prill 2026 do të vazhdojë faza e dytë e daljes së konsumatorëve komercialë në tregun e hapur. Sipas kornizës ligjore dhe rregullative në fuqi, konsumatorët komercialë që kanë mbi 50 punonjës ose realizojnë qarkullim vjetor mbi 10 milionë euro nuk do të furnizohen më në kuadër të shërbimit universal me tarifa të rregulluara, por do të jenë të obliguar të zgjedhin vetë furnizuesin e tyre.

Bazuar në të dhënat zyrtare të Administratës Tatimore të Kosovës, një numër biznesesh nuk i plotësojnë më kriteret për furnizim në kuadër të shërbimit universal. Për këtë arsye, duke filluar nga 01 prill 2026, KESCO në rolin e Furnizuesit të Shërbimit Universal nuk do të mund t’i furnizojë këto biznese me tarifa të rregulluara.

Bizneset përkatëse duhet që deri më 01 prill 2026 të zgjedhin një furnizues të licencuar në tregun e hapur dhe të fillojnë procedurën e ndërrimit të furnizuesit të paktën 21 ditë pune para hyrjes në fuqi të kontratës së re. Lista e furnizuesve të licencuar është e publikuar në faqen zyrtare të ZRrE-së (ERO)www.ero-ks.org.

Në rast se një biznes nuk zgjedh furnizues me kohë, nga 01 prill 2026 do të furnizohet përkohësisht nga Furnizuesi i Mundësisë së Fundit për një periudhë deri në 60 ditë, gjatë së cilës duhet të lidhë kontratë me një furnizues të licencuar. Në mungesë të një kontrate brenda këtij afati, furnizimi me energji elektrike do të ndërpritet në përputhje me legjislacionin në fuqi.

Gjithashtu, bizneset që janë vet-konsumatorë (prosumatorë) njoftohen se nga kjo datë përfundon marrëveshja ekzistuese për vet-konsum në kuadër të skemës me tarifa të rregulluara, ndërsa trajtimi i energjisë së prodhuar dhe të injektuar në rrjet do të rregullohet sipas kushteve të kontratës me furnizuesin e zgjedhur.

KESCO fton bizneset që të konfirmojnë pranë kompanisë numrin e punonjësve, qarkullimin vjetor dhe njësitë/matësit në shfrytëzim, në mënyrë që të sigurohet trajtimi korrekt gjatë procesit të kalimit në tregun e hapur.

Për informata shtesë:
[email protected]
038 501 701 2020
038 79 20 20