Category: Lajme

Të gjithë anëtarët e NATO-s kanë arritur për herë të parë objektivin e shpenzimeve për mbrojtjen prej 2 për qind të Prodhimit të Brendshëm Bruto (PBB), me shpenzimet totale që kanë arritur në 1.4 trilion dollarë.

Në vitin 2025, shpenzimet e aleancës tejkaluan 1.4 trilionë dollarë, nga 1.3 trilionë dollarë vitin e kaluar, sipas Euractiv.

Evropa dhe Kanada rritën buxhetet për mbrojtjen me 20 për qind në terma realë, duke arritur një rekord prej 574 miliardë dollarësh, ku 34 për qind e këtyre shpenzimeve u drejtuan për blerjen e armatimeve.

Tani ata përbëjnë rreth 41 për qind të shpenzimeve totale të NATO-s, ndërsa pjesa tjetër vjen nga Shtetet e Bashkuara.

Shkalla më e lartë e shpenzimeve ndaj PBB-së u regjistrua në Poloni (4.3 për qind), Lituani (4 për qind), Letoni (3.74 për qind) dhe Estoni (3.42 për qind). Shtetet e Bashkuara qëndrojnë në 3.19 për qind.

Sekretari i Përgjithshëm i NATO-s, Mark Rutte, e quajti vitin 2025 një “vit vendimtar” dhe theksoi se aleatët duhet të përparojnë drejt një objektivi të ri prej 5 për qind të PBB-së deri në vitin 2035, duke rritur gjithashtu prodhimin e armatimeve.

Zëvendësdrejtori menaxhues i Shërbimit Evropian të Veprimit të Jashtëm (EEAS) për Ballkanin Perëndimor, Emanuele Giaufret ka dhënë detaje nga vizita e tij e fundit në Kosovë, duke e cilësuar ditën e parë të takimeve si të suksesshme dhe produktive.

Ai bëri të ditur se gjatë qëndrimit në Kosovë është takuar me zyrtarë institucionalë, përfshirë Albulena Haxhiu, si dhe me kryetarë komunash nga veriu dhe partnerë ndërkombëtarë, ndër ta edhe EULEX.

Sipas tij, këto takime kanë shërbyer për të diskutuar zhvillimet aktuale dhe bashkëpunimin e mëtejshëm, ndërsa ka theksuar se është inkurajuar nga vendosmëria e përbashkët për të çuar përpara agjendën evropiane të Kosovës.

Had a good 1st day of mtgs in Kosovo with @albulenahaxhiu_, mayors in the north, @JetonZulfaj & international partners including @EULEXKosovo.
Encouraged by shared determination to keep 🇽🇰 advancing on its European path. pic.twitter.com/L4oHzyVSDM

— Emanuele Giaufret (@EGiaufretEU) March 27, 2026

Kushtrim Kokalla, një prej të akuzuarve për përfshirje në rastin e vrasjes së Liridona Ademajt, ka deklaruar sot në gjykatë se për vrasjen e Liridona Ademajt ka mësuar fillimisht nga portalet dhe jo nga përfshirja direkte në ngjarje.

Kokalla tha se në momentin e ngjarjes ndodhej në shtëpinë e tij me të afërmit, kur shoku i tij Flori e informoi për incidentin. Ai shtoi se fillimisht kishte menduar se bëhej fjalë për një grabitje, pasi lajmet e para raportuan për këtë. Tha se kishte tentuar të kontaktonte Naim Murselin, por telefoni i këtij të fundit ishte i paqasshëm, dhe vetëm pas 20-30 minutash kuptoi se ishte vrasje.

Ai deklaroi gjithashtu se kishte shkuar në Prishtinë bashkë me familjen e tij për të qëndruar pranë familjes Ademaj, duke theksuar se nuk kishte pasur rol në ngjarje.

Për qëndrimin në hotel, Kokalla tha se dhomën e kishte paguar një mik, Valon Lluka, pasi ai nuk kishte mundësi të përballonte koston e një dhome luksoze./BetimiperDrejtesi/

Kryeministri i Kosovës, Albin Kurti, ka udhëtuar sot për vizitë zyrtare në Francë, ka njoftuar Zyra e Kryeministrit.

Gjatë ditës, kryeministri Kurti pritet të ketë takim dhe drekë pune me presidentin e Fancës, Emmanuel Macron.

Reperi i shndërruar në politikan Balendra Shah u betua si kryeministër i Nepalit të premten, i ngarkuar me rivendosjen e stabilitetit politik dhe krijimin e vendeve të punës në kombin e varfër Himalayan, i cili prej kohësh është përballur me probleme nga qeveritë e brishta dhe perspektivat e dobëta të rritjes.

Shah, i cili mbante veshur pantallona të ngushta, një xhaketë të njëjtë, kapelen e tij të zezë prej cope nepaleze dhe syze dielli në ceremoni, është kryeministri më i ri i Nepalit në dekada. Ish-kryetari i bashkisë së kryeqytetit, Katmandu, Shah, 35 vjeç, u bë kryeministër pasi Partia e tij trevjeçare Rastriya Swatantra (RSP) fitoi 182 vende në parlamentin me 275 anëtarë në zgjedhjet e 5 marsit, votimi i parë pas protestave anti-korrupsion të Gjeneratës Z, në të cilat u vranë 76 persona në shtator të vitit të kaluar.

Në një videoklip të ri muzikor të postuar në faqen e tij në Facebook në prag të ceremonisë së betimit të tij, Shah theksoi patriotizmin dhe optimizmin për një të ardhme të ndritur për Nepalin.

“Nepali nuk ka frikë këtë herë, zemra është plot me gjak të kuq… të qeshurat dhe lumturia do të arrijnë në çdo familje këtë herë”, këndoi Shah në videon që përmbante pamje të turmave të mëdha që e brohorisnin gjatë fushatës së tij zgjedhore.

Më shumë se 200 priftërinj hindu dhe lama budistë kënduan himne dhe lutje paqeje së bashku me fryrjen e guaskave të kërmijve gjatë ceremonisë në Pallatin Presidencial, ku morën pjesë diplomatë dhe zyrtarë të lartë qeveritarë.Pasi u betua, Shahu zgjodhi 14 anëtarë në kabinetin e tij, duke mbajtur premtimin e tij të fushatës për të pasur një ekip të vogël për të ulur shpenzimet shtetërore. Ai emëroi Swarnim Wagle, një ekonomist të arsimuar në Harvard, si ministër të financave. /Reuters

Gjatë intervistimit të tij, i akuzuari Kushtrim Kokalla ka dhënë detaje për takimet me të akuzuarit e tjerë, Naim Murselin dhe Granit Plavën, duke pohuar se nuk ka pasur lidhje me planifikimin ose kryerjen e vrasjes së Liridona Ademajt. Ai tha se gjatë intervistimit në polici ishin prezent 4-5 hetues, të cilët ndërkohë që njëri bënte pyetje, tjetri shkruante dhe të gjithë merrnin pjesë aktivisht.

Kokalla tha se kishte takuar Granitin disa herë, por vetëm për biseda të zakonshme dhe se nuk kishte ndërmjetësuar asnjë marrëveshje për kryerjen e veprës. Sipas tij, takimi i parë me Granitin kishte ndodhur në Shell, ku Naimi e kishte shoqëruar për t’u takuar me Granitin. Takimi kishte zgjatur 5-10 minuta dhe gjatë tij nuk u diskutua asgjë e veçantë, vetëm biseda të zakonshme rreth punës.

Ai tha se gjatë kthimit në Gjakovë, Naimi i kishte dërguar mesazh në WhatsApp për të marrë numrin e kontaktit të Granitit, numër të cilin ai e kishte përcjellë. Takimi i dytë me Granitin kishte ndodhur 4-5 ditë më vonë në Benita.

“Ata shkuan ta takojnë Naimin dhe udhëtuan përmes fshatit Kralan – rreth 10 km nga Cermjani – ku u takuan me të tek kryqëzimi Pejë-Kline-Gjakovë, pranë Benitës”, ka treguar Kokall.

Policia e Kosovës, me qëllim të parandalimit të aktiviteteve të kundërligjshme ka realizuar një plan taktik gjatë ditës së enjte, me ç’rast në vijën kufitare me Serbinë, në Hajkobillë të Prishtinës, janë arrestuar katër të dyshuar për “kontrabandë me mallra”, “kalim i paautorizuar i vijës kufitare”dhe “mbajtje në pronësi, kontroll, posedim i paautorizuar i armëve të zjarrit dhe municionit”.

Të njëjtit janë ndaluar nga ana e zyrtarëve policorë, derisa në afërsi të vijës kufitare është hasur një sasi e konsiderueshme e druve të kontrabanduara nga territori i Serbisë.

Me autorizim të prokurorit të Shtetit, është kryer bastisja e një shtëpie në afërsi të vijës kufitare, e cila dyshohet se është shfrytëzuar nga kontrabandistët, ku janë gjetur armë ilegale.

Lidhur me rastin janë sekuestruar provat materiale, si: 3 traktorë me tërheqje; 3 pushkë gjuetie; 1 pushkë ajrore dhe 83 fishekë të kalibrave të ndryshëm.

Me autorizim të prokurorit kompetent katër personat e dyshuar janë ndaluar për 48 orë.

Në Gjykatën Themelore ka vazhduar seanca për rastin e vrasjes së Liridona Ademajt, ku i akuzuari Kushtrim Kokalla ka dhënë mbrojtjen e tij, duke iu përgjigjur pyetjeve të avokatit të tij, Ndrec Doda.

Kokalla deklaroi se e kujton intervistimin në polici më 1 dhjetor 2023, kur ishte marrë në cilësinë e të dyshuarit për rastin, raporton “Betimi për Drejtësi”.

Ai tha se kishte qenë në shtëpi kur është kontaktuar nga policia për t’u paraqitur në stacionin policor në Gjakovë, ndërsa nuk i kujtohet ora e saktë e paraqitjes, por sipas tij, në Prishtinë ka arritur rreth orës 20:00.

Sipas deklarimit të tij, intervistimi kishte filluar rreth 30 minuta pas mbërritjes në polici.

Duke u përgjigjur në pyetjet për trajtimin nga organet e rendit, Kokalla tha se nuk ishte keqtrajtuar fizikisht gjatë intervistimit.

Megjithatë, ai theksoi se gjatë kohës para nisjes së intervistimit, hetuesit i kishin thënë se ai ishte “kryesori” i rastit.

“Ma tregun pse më kanë arrestu, më thanë që ti je kryesori, edhe pse nuk e ke ngreh gishtin, ti e ke bë të gjithë skenarin dhe është në interesin tënd dhe tonin të tregosh si e ke bërë skenarin”, deklaroi Kokalla.

Ai shtoi se gjatë kësaj periudhe nuk kishte qenë i pranishëm avokati i tij.