Category: Lajme

Shkaku “ende nuk dihet” ndërsa nga Komuna e Prishtinës thanë se i morën “masat fillestare” në mbrojtje të qytetarëve pas shembjes së një pjese të rrugës “Don Shtjefën Kurti” në kryeqytet.

Drejtori i Drejtorisë për Siguri dhe Emergjenca, Lulzim Fushtica tha se banorët e asaj zone aktualisht janë pa rrymë, ndërsa kompania rajonale e ujësjellësit, “Prishtina”, njoftoi më herët se është ndalur edhe furnizimi me ujë pas dëmtimit të rrjetit të ujësjellësit.

“Ekipet e ujësjellësit dhe të gjitha ekipet e tjera emergjente janë në vendin e ngjarjes. Është ndalur rryma, do të ndalet edhe uji dhe është duke u sanuar hapësira që të mos ketë rrezik në ditët në vijim”, tha Fushtica.

Ai tha se “shkaku ende nuk dihet sepe është ende herët që të flitet”, por shtoi se pronari i një ndëtrtese në afërsi është ftuar nga Policia për intervistim. Ndaj tij, ai tha se “sipas të gjitha gjasave do të inicohet edhe rast për shkaktim të rrezikut të përgjithshëm”.

Fushtica tha se inspektorët e ndërtimit “po e bëjnë vlerësimin e situatës”, kur u pyet nëse po menodjnë evakuimin e banorëve aty.

“Të gjitha ekipet janë këtu dhe për çdo rrezik, nëse ekziston rreziku më i vogël, ne do të marrim masa”.

“Do të vlerësohet nga ekipet e specializuara. Nëse ka nevojë të ketë evakuim, banorët do të evakuohen, por për momentin nuk shihet që ka nevojë përt ndonjë evakuim. Por nëse ka nevojë, patjetër që ne nuk do të rrezikojmë për asnjë moment dhe do ta largojmë çdo qytetar që ndjehet i rrezikuar apo nëse është e rrezikuar ndonjë ndërtesë apo hapësirë tjetër publike”, tha ai.

Ramush Haradinaj mbështeti protestën e thirrur nga organizatat e kategorive të dala nga lufta si reagim ndaj ekspozitës me pasaktësi për masakrat e luftës në Kosovë.

Haradinaj i ftoi bashkëluftëtarët e tij, familjarët e të rënvëve dhe të gjithë qytetarët që të dalin nesër në protestë.

“Mbështes protestën e thirrur nga kategoritë e dala nga lufta e UÇK-së kundër çdo përpjekjeje për shtrembërimin e së vërtetës së Luftës Çlirimtare”, shkroi ai në një postim në Facebook.

“Ftoj bashkëluftëtarët, familjarët e të rënëve dhe gjithë qytetarët që nesër, më 30 mars, në ora 13:00, para Kuvendit të Kosovës, të dalin në mbrojtje të sakrificës sonë për liri”, shtoi Haradinaj.

Partia Demokratike e Kosovës (PDK) ka shprehur mbështetjen e saj për protestën e paralajmëruar për nesër nga organizatat e dala nga lufta e UÇK-së, e cila synon të mbrojë dinjitetin e viktimave dhe kujtesën historike të luftës çlirimtare.

“Çdo përpjekje për të shtrembëruar faktet, për të relativizuar krimet apo për të rishkruar historinë tonë është e papranueshme dhe duhet të kundërshtohet me vendosmëri,” thuhet në deklaratën e PDK-së.

Sipas partisë, mbrojtja e së vërtetës për luftën e UÇK-së është jo vetëm një detyrim shtetëror, por edhe moral.

“Duke ruajtur të vërtetën, ne njëkohësisht nderojmë viktimat dhe sakrificën e tyre,” theksohet më tej në deklaratë.

PDK fton qytetarët dhe institucionet për respekt dhe vëmendje ndaj iniciativave që synojnë ruajtjen e kujtesës kolektive dhe drejtësinë historike, duke mbështetur çdo reagim të drejtë qytetar dhe kombëtar në këtë drejtim.

Deputeti i PDK-së, Artan Behrami i reagoi deputetes së LVV-së, Arbëreshë Kryeziu, e cila, reagimet e deputetëve lidhur me pasaktësitë e evidentuara në ekspozitën për masakrat në Kosovë, me autor ojq-në Admovere të udhëhequr nga Shkëlzen Gashi i konsideroi si të qëllimshme për ta goditur qeverinë dhe kryeministrin Albin Kurti.

“U bë e gjallë Dejona. Asnjë reagim për ekspozitën e narracionit serb në sheshin e Prishtinës! Asnjë keqardhje, asnjë distancim!”, shkroi Behrami në një postim në Facebook.

“Do të thotë, VV-ja edhe më tutje beson që në Dubravë të burgosurit shqiptarë paskan qenë të armatosur!”, shtoi ai.

Behrami tha se “Shkëlzen Gashi është goja e Kurtit kur ky nuk flet”.

Agjencia për Parandalimin e Korrupsionit (APK) bëri të ditur se vetëm tri ditë para përfundimit të afatit ligjor për deklarimin e rregullt vjetor të pasurisë, një numër i konsiderueshëm i zyrtarëve publikë ende nuk e kanë përmbushur këtë obligim, raporton KosovaPress.

Sipas të dhënave të përditësuara më 29 mars 2026 në mesditë: 7,482 zyrtarë publikë ose 72.32% kanë përfunduar deklarimin, 1,394 ose 13.48% janë në proces dhe 1,469 ose 14.20% nuk e kanë filluar fare deklarimin.

“Nga gjithsej 10,345 zyrtarë të obliguar, mbi 1,400 ende mbeten jashtë procesit, duke rrezikuar drejtpërdrejt shkeljen e afatit ligjor”, njofton APK.

Sipas kësaj agjencie, tri ditët në vijim janë vendimtare dhe çdo mosveprim brenda këtij afati aktivizon automatikisht mekanizmat ndëshkues të paraparë me ligj.

“Deklarimi i pasurisë nuk është opsional – është obligim ligjor. Mosrespektimi i afatit ligjor rezulton me shqiptimin automatik të gjobës mandatore në vlerë prej 30% të pagës së subjektit deklarues. Çdo vonesë mbi 15 ditë përbën bazë për inicimin e hetimeve penale. Në këtë fazë, çdo neglizhencë është e pajustifikueshme. Ftojmë të gjithë zyrtarët që të përfundojnë deklarimin menjëherë. Koha po përfundon – veproni tani”, citohet në komunikatë Yll Buleshkaj, drejtor i Agjencisë për Parandalimin e Korrupsionit.

Agjencia rikujton se mosdeklarimi, vonesa apo deklarimi i pasaktë, përveç mostransparencës dhe llogaridhënjes ndaj publikut, përbëjnë edhe shkelje të drejtpërdrejta të obligimeve ligjore dhe trajtohen sipas legjislacionit në fuqi, duke përfshirë masa administrative dhe procedura penale.

APK mbetet në dispozicion për mbështetje teknike dhe sqarime gjatë gjithë periudhës, por thekson se përgjegjësia për deklarim në kohë është individuale dhe e pa transferueshme.

Emiratet e Bashkuara Arabe thonë se sot kanë kapur 16 raketa balistike dhe 42 dronë të lëshuar nga Irani.

Ministria e Mbrojtjes tha se, që nga fillimi i luftës, Irani ka lëshuar 414 raketa balistike.

Gjithashtu në njoftim thuhet se janë lëshuar dhe 15 raketa lundruese dhe 1,914 dronë drejt Emirateve.

الدفاعات الجوية الإماراتية تتعامل مع الصواريخ الباليستية والجوالة والمسيرات الإيرانية.

UAE Air Defences engaged Iranian
Ballistic and Cruise Missiles and UAVs Attacks#وزارة_الدفاع #وزارة_الدفاع_الإماراتية#MOD#UAEMinistryOfDefence pic.twitter.com/ouNuTBPBNH

— وزارة الدفاع |MOD UAE (@modgovae) March 29, 2026

Organizata e Veteranvëve të Luftës përmes një konference për media ka reaguar kundër ekspozitës “Masakrat në Kosovë 1998-1999” që u shfaq së fundmi në Prishtinë.

Ekspozita e cila mori kritika të shumta për pasaktësitë e detajeve të masakrave që kanë ndodhur gjatë luftës së fundit në Kosovë, u përcjell edhe me reagimin e OVL-UÇK.

Kryetari i OVL-UÇK, Hysni Gucati tha se kjo ekspozitë ishte fyerje për këtë organizatë dhe jo vetëm.

Ai falenderoi kryetarin e Prishtinës, Përparim Rama i cili mori aksion të menjëhershëm për largimin e kësaj ekspozite.

“Ne shoqatat e dalura nga lufta, siç e keni parë dje edhe reagimin kundër kësaj ekspozite që ka ndodhë, që ka qenë në sheshin e Prishtinës. Dua ta falenderoj pa hezitim, Përparim Ramën që ka marrë aksion të shpejtë për t’i larguar, që për ne kanë qenë një fyerje, jo vetëm për neve, por edhe si shoqëri dhe si komb”, tha Gucati.

Njohësi i çështjeve politike, Agon Maliqi, duke reaguar lidhur me ekspozitën në Prishtinë për masakrat në Kosovë, ka thënë se Natasha Kandiq drejtuese e Fondit për të Drejtën Humanitare, ka bërë një punë që është nderuar nga të gjitha kampet politike dhe institucionet e Kosovës, lidhur me identifikimin e krimeve gjatë dhe pas luftës.

Maliqi, në postimin e tij, Shkëlzen Gashin e ka cilësuar si ‘’sharlatan’’, dhe ka kërkuar që në këtë ‘’rrëmujë publike’’, s’duhet që të ‘’merret zhag me vete edhe Kandiqi’’.

Postimi:

Natasha Kandiq mund të ketë qenë serbja e vetme e pranishme si mysafire e ftuar në seancën e Kuvendit të Kosovës kur u shpall pavarësia. Po flasim për një kohë kur në Beograd digjeshin ambasada perëndimore. Puna e organizatës së saj në identifikimin e krimeve gjatë dhe pas luftës është nderuar nga të gjitha kampet politike dhe insititucionet e Kosovës, së voni edhe me dhënien e çelësit të kryeqytetit, dhe shërben si bosht i ndërtimit të paqes në rajon. Në këtë rrëmujë publike mbi punën e një sharllatani dhe sofisti të dëshmuar si Hazreti Gashi i Metropolitankave të Prishtinës, e pakta që mund dhe duhet të bëhet është që të mos merret zhag me vete edhe Kandiqi, dhe të reagohet ndaj situatës nga prizmi i nacionalizmit primitiv folklorik.

Njëzet e dy migrantë kanë vdekur pranë bregdetit të Greqisë pasi kaluan gjashtë ditë në det me një gomone në drejtim të Evropës, ka njoftuar roja bregdetare greke.

Njëzet e gjashtë të mbijetuar, përfshirë një grua dhe një fëmijë, u shpëtuan nga një anije e agjencisë evropiane të kufirit të premten. Dy prej tyre u dërguan në spital në Heraklion, në ishullin e Kretës, raporton BBC, përcjell Gazeta Express.

Varka me migrantë ishte nisur nga porti i Tobrukut në lindje të Libisë më 21 mars, ka raportuar agjencia e lajmeve AFP, duke cituar një zëdhënës të rojës bregdetare. Moti i keq dhe mungesa e ushqimit dhe ujit kontribuan në vdekjet, ka thënë roja bregdetare.

Greqia, së bashku me Italinë, pranon një numër të madh migrantësh të parregullt përmes Mesdheut, shpesh nga Turqia dhe Afrika Veriore.

Shumë nga këto kalime ndodhin gjatë verës, kur ka më pak gjasa për mot të keq.

“Gjatë udhëtimit, pasagjerët [e gomones] humbën orientimin dhe qëndruan në det për gjashtë ditë pa ujë dhe ushqim,” tha roja bregdetare greke.

Varka u ndal përfundimisht 53 milje detare larg Ierapetrës, një qytet në bregdetin jugor të Kretës.

Autoritetet greke thanë se dy burra nga Sudani i Jugut, të moshës 19 dhe 22 vjeç, janë arrestuar nën dyshimin për trafikim njerëzish.

Ata tani janë nën hetim për “hyrje të paligjshme në vend” dhe “vrasje nga pakujdesia”

Roja bregdetare tha se 21 nga të mbijetuarit janë nga Bangladeshi, katër nga Sudani i Jugut dhe një nga Çadi.

Sipas agjencisë së OKB-së për refugjatë, UNHCR, të paktën 41,696 persona mbërritën në Greqi me rrugë detare në vitin 2025. Më shumë se 4,000 kanë mbërritur deri tani këtë vit.

Por udhëtimi mund të jetë i rrezikshëm, sidomos në mot të keq, ndërsa kontrabandistët shpesh i mbingarkojnë varkat pa furnizime të mjaftueshme apo jelekë shpëtimi.

Të paktën 103 persona konsiderohen të vdekur ose të zhdukur në Mesdheun lindor në vitin 2025, sipas të dhënave të UNHCR.

Në dhjetor, 17 migrantë u gjetën të vdekur brenda një varke që po mbushej me ujë dhe ishte fundosur pjesërisht pranë bregdetit të Kretës.