Një i ri shqiptar nga Kosova, me inicialet Y.Z., ka humbur jetën në Austri si pasojë e një aksidenti të rëndë trafiku që ndodhi në rajonin Urfahr-Umgebung, pas përplasjes së një veture me një kamion.
Një aksident i rëndë me pasoja fatale është regjistruar sot në Austri, ku ka ndërruar jetë një 18-vjeçar shqiptar nga Kosova, me inicialet Y.Z..
Sipas burimeve brenda redaksisë së Albinfo.at, viktima ishte i lindur në Linz të Austrisë, ndërsa rrjedh nga një familje shqiptare me origjinë nga Opoja, konkretisht nga fshati Kuk.
Ngjarja tragjike ka ndodhur në Zwettl an der Rodl, në rajonin Urfahr-Umgebung, ku rreth mesditës në rrugën B126, një veturë është përplasur me një kamion në një kthesë të djathtë.
Si pasojë e përplasjes së fuqishme, drejtuesi i veturës, 18-vjeçari shqiptar, ka mbetur i vdekur në vend, pavarësisht përpjekjeve të ekipit mjekësor për ta rikthyer në jetë.
Nga ky aksident ka mbetur i lënduar edhe shoku i tij, i cili sipas informatave është shtetas rumun.
Rrethanat e aksidentit janë ende duke u hetuar nga autoritetet austriake, ndërsa lajmi ka shkaktuar dhimbje të madhe tek familjarët dhe komuniteti shqiptar në Austri./Albinfo.at
Sonte me fillim nga ora 20:45 në stadiumin “Fadil Vokrri” Kosova do të përballet me Turqinë.
Mbështetje Kombëtares së Kosovës i është dhënë edhe nga Ambasada gjermane.
“Duke mbështetur me krenari Kosovën sonte. 🇽🇰⚽🇹🇷 I gjithë ekipi ynë i mban gishtat e kryqëzuar për ekipin e Kosovës sonte. Një finale historike — të fortë, të patrembur dhe gati për të bërë histori”, ka shkruar Ambasada gjermane në një postim në Facebook.
Është zhvilluar këtë të martë ceremonia e betimit të Drejtorit të Përgjithshëm të Policisë së Shtetit, Skënder Hita, në prani të zëvendëskryeministres Albana Koçiu dhe Ministrit të Brendshëm Besfort Lamallari.
Hita është zgjedhur pas garës për kreun e ri të policisë, pas dorëheqjes së Ilir Prodës.
“Në këtë çast solemn, në respekt të të gjithë brezave të policisë shqiptare, në shenjë nderimi, detyrimi dhe respekti për gjakun e rënë të policëve, të vendosur për të mbrojtur rendin dhe sigurinë publike dhe për të garantuar zbatimin rigoroz të ligjit, në nderin tim personal betohem për të mbajtur me nder flamurin e Policisë së Shtetit”, ka thënë në nisje të fjalës së tij Hita.
Më tej, para fjalës së Hitës ka folur edhe Ministri i Brendshëm Lamallari, i cili ka thënë se në këto momente kërkohet një lidership i fortë në Policinë e Shtetit, sipas tij, raporton euronews.al.
“Zoti Drejtor i Përgjithshëm, ju e merrni detyrën në një moment kur kërkohet një lidership i fortë, një vizion i qartë dhe vendosmëri. Besimi që ju është dhënë është një besim i lartë, në përputhje me integrimin evropian”, tha Lamallari.
Dhuna në familje mbetet fenomen shqetësues në Kosovë, me shumicën e viktimave gra, ndërsa sfidë kryesore vazhdon të jetë zbatimi i ligjeve në praktikë, u tha në një tryezë të organizuar nga Grupi për Studime Juridike dhe Politike (GLPS) me temën “Një vlerësim mbi trajtimin institucional të rasteve të dhunës në familje: Si u trajtuan gjatë vitit 2025?”, raporton Ekonomia Online.
Drejtoresha ekzekutive e GLPS-së, Njomza Arifi, tha se dhuna në familje vazhdon të mbetet shqetësim serioz në vend, pavarësisht përmirësimeve të caktuara në trajtimin institucional.
“Dhuna në familje vazhdon të mbetet shqetësim në Kosovë dhe shumica e viktimave janë gra. Këto janë edhe të gjeturat e raportit tonë. Ndonëse ka pasur përmirësime ndër vite sa i përket trajtimit të rasteve të dhunës në familje dhe dhunës në bazë gjinore nga sistemi gjyqësor dhe prokurorial, ende ka probleme dhe sfida strukturore të cilat kërkojnë natyrisht vëmendje të mëtejshme si nga sistemi ashtu edhe ndaj institucioneve të tjera. Megjithatë, i gjithë raporti fokusohet në punën e gjyqësorit, prokurorisë dhe policisë”, tha ajo.
Përfaqësuesja e Zyrës së BE-së, Lumnije Azemi, vlerësoi raportin si bazë të rëndësishme të të dhënave, duke theksuar si shqetësuese numrin e rasteve në veri, por edhe progresin në uljen e kohëzgjatjes së trajtimit të rasteve.
“Raportin e kam lexuar, është një bazë e mirë e të dhënave, më kanë rënë në sy dy gjëra diametralisht të kundërta. E para ka të bëjë me numrin e madh të rasteve në Mitrovicën e Veriut. Nuk e kam zgjedhur me ndonjë prapavijë, mirëpo më ka rënë në sy se aty ishte numri më i madh i rasteve. Nga ana tjetër, zvogëlimi i kohës së rasteve si dhe zvogëlimi i backlogut të rasteve. Kjo ishte një anë shumë pozitive që nuk duhet të çdo herë të potencojmë gjërat të cilat janë negative meqenëse të gjithë i dimë, por në anën tjetër edhe diçka pozitive. Për të parën, në fakt fatkeqësisht përpjekjet dhe të dhënat edhe të raportit edhe të bazës ligjore dhe të institucioneve janë më të ngadalta, meqenëse është një temë shumë delikate, shumë e rëndësishme dhe mjaft serioze, nuk ka mundësi që ajo të ndryshohet ngadalë”, tha ajo.
Menaxheri i projektit, Liridon Salihi, tha se rreth 75% e viktimave të dhunës në familje janë gra, ndërsa sfidë kryesore mbetet politika ndëshkimore dhe zbatimi i legjislacionit.
“E gjetura kryesore nga ky raport është se dhuna në familje mbetet një fenomen shqetësues që prek të gjitha grupmoshat e shoqërisë, nga fëmijët deri tek personat e moshës së shtyrë. Forma më e përhapur e dhunës në familje është dhuna ndaj grave. Me të dhënat e shohim se rreth 75% e viktimave të dhunës në familje rezultojnë të jenë gra, ndërsa 25% janë burra. Kosova ka një kornizë të konsoliduar ligjore për mbrojtjen dhe parandalimin e këtij fenomeni. Sfidë kryesore mbetet implementimi në praktikë i legjislacionit ekzistues. Policia vazhdon të pranojë një numër të konsiderueshëm të raportimeve të dhunës në familje, për nga numri i raportimeve prin rajoni i Prishtinës, ndërsa rajoni i Mitrovicës së Veriut prin në bazë të incidentes në 10,000 banorë. Por ajo çka mbetet sfiduese edhe nga të gjeturat e këtij raporti mbetet politika ndëshkimore”, tha ai.
Ai shtoi se shumica e akteve akuzuese përfundojnë me vendime dënuese, por dënimet shpesh nuk janë në përputhje të plotë me parashikimet ligjore.
“Rreth 87% e akteve akuzuese të prokurorive konfirmohen nga gjykatat dhe përfundojnë me aktgjykime dënuese, pra paraqet një efikasitet të lartë të akteve akuzuese që ngriten nga ana e prokurorit të shtetit. Sa i përket gjykatave, vetëm 14% e të akuzuarve marrin dënimin kumulativ, gjobë dhe dënim me burgim, siç e parashikon Kodi Penal i Republikës së Kosovës”, tha ai.
Salihi theksoi se një nga problemet kryesore mbetet edhe numri i madh i seancave të shtyra.
“Sfidë kryesore mbetet numri i lartë i seancave të anuluara apo të shtyra, si pasojë e mungesës së të pandehurve, dhe palëve të tjera të përfshira në procese gjyqësore. Çka kemi vlerësuar te pjesa e kornizës ligjore, ajo çka mbetet shqetësuese pra është çështja e implementimit në praktikë. Siç e dini, nga viti 2015, Kosova e ka ligjin për mbikëqyrjen elektronike të personave, lëvizja e të cilëve është kufizuar me vendim gjyqësor”, tha ai.
Sipas të dhënave të prezantuara, gjatë vitit 2025 Policia e Kosovës ka pranuar 2815 raste të dhunës në familje, me Prishtinën që prin për nga numri i rasteve, ndërsa Mitrovica e Veriut për nga incidenca. Numri i përgjithshëm i viktimave ishte 2836, ku 75.35% ishin gra dhe 24.65% burra, ndërsa nga 2998 persona të dyshuar, 84% ishin burra.
Sipas raportit ai tha se Prokuroria ka pranuar 2453 penale. Ndërsa sipas tij nga databaza e KGJK për vitin 2025 janë pranuar 1007 raste.
“Siç shihet edhe nga tabela, në total gjatë vitit 2025 Policia e Kosovës ka pranuar 2815 raste të dhunës në familje. Prishtina prin si rajoni me numrin më të madh me 960 raste, ndërsa në bazë të incidencës në 10,000 banorë, prin rajoni i Mitrovicës së Veriut me rreth 25 raste për 10,000 banorë. Në nivel vendi, numri i përgjithshëm i viktimave të dhunës në familje ishte 2836, nga të cilat 75.35% e tyre ishin gra dhe 24.65% ishin burra. Nga të dhënat e raportuara tek Policia e Kosovës, kemi 2998 persona të dyshuar, ku 84% e tyre ishin burra, ndërsa 16% ishin gra. Nga numri i personave të dyshuar, 1081 persona janë arrestuar për dhunë në familje, ku prej tyre 92% janë burra ndërsa 8% janë gra”, tha ai.
Prokurorja në ZKPSH dhe koordinatore për rastet e dhunës në familje, Laura Pula, tha se dhuna në familje mbetet një nga sfidat më serioze për sundimin e ligjit.
“Unë konsideroj se dhuna në familje është një nga sfidat më serioze të shtetit të së drejtës dhe një provë reale për funksionimin e drejtësisë penale në çdo shoqëri demokratike. Gjithë pajtohemi se ajo nuk ndodh në hapësira publike, në sallë, nuk zhvillohet as para kamerave, ajo ndodh në heshtje pas dyerve të mbyllura aty ku viktima shpesh mbetet e vetme përballë frikës, presionit dhe dhunës së vazhdueshme. Prandaj është më se i domosdoshëm reagimi institucional ndaj dhunës në familje dhe nuk është vetëm detyrë ligjore por është detyrim morale dhe është detyrim shtetërore. Mund të themi se në Kosovë ne prokuroria përfaqëson mekanizmin kyç të reagimit të shtetit së bashku me Policinë e Kosovës”, tha ajo.
Zyra e Rregullatorit të Energjisë Elektrike përmes një komunikate për media ka njoftuar se Gjykata Kushtetuese e ka shpallur të papranueshme ankesën e PDK-së për çështjen e liberalizimit të tregut të energjisë elektrike.
ZRRE thotë se kjo e konfirmon ligjshmërinë e vendimeve të ZRRE-së sa i përket këtij procesi.
“Lidhur me Aktvendimin e Gjykatës Kushtetuese të Republikës së Kosovës, nr. Ref.: RK2990/26, të datës 23 mars 2026, në rastin KI252/25, parashtrues Partia Demokratike e Kosovës,
Zyra e Rregullatorit për Energji (ZRRE) informon opinionin publik se Gjykata Kushtetuese ka shpallur kërkesën e parashtruesit të papranueshme.
Ky vendim konfirmon ligjshmërinë e vendimeve të ZRRE-së dhe të procesit të liberalizimit të tregut të energjisë elektrike në Kosovë”, njofton ZRRE.
“ZRRE vazhdon zbatimin e plotë të procesit të liberalizimit të tregut të energjisë elektrike, në përputhje të plotë me Ligjin nr. 05/L-085 për Energjinë Elektrike dhe aktet nënligjore përkatëse. Qëllimi i këtij procesi është krijimi i një tregu konkurrues, transparent dhe efikas, në interes të të gjithë konsumatorëve”, thuhet në komunikatë.
Të martën, dronët ukrainas goditën portin rus të Ust-Luga në Detin Baltik për herën e pestë brenda vetëm 10 ditësh, duke goditur një terminal ngarkimi nafte dhe duke ndaluar pjesërisht eksportin rus të naftës.
Sulmet e Kievit ndaj porteve baltike Ust-Luga dhe Primorsk janë pjesë e një valë të përshkallëzuar goditjesh ndaj infrastrukturës së eksportit të naftës ruse gjatë muajit të fundit, që sipas Reuterskanë ndalur rreth 40% të kapacitetit të vendit për eksport.
Tre persona, përfshirë dy fëmijë, u trajtuan për lëndime, ndërsa disa ndërtesa në rajon u dëmtuan. Ust-Luga është një nga portet kryesore për eksportin e naftës së Rusisë, zakonisht përpunon rreth 700,000 fuçi naftë bruto në ditë dhe eksportoi 32.9 milion tonë produktesh vitin e kaluar. Tre burime të industrisë konfirmuan se dronët goditën facilitetet e ngarkimit të naftës të operuara nga monopolisti rus i tubacioneve Transneft.
Autoritetet thanë se porti është sulmuar më 22, 25, 27, 29 dhe 31 mars, duke detyruar pezullimin e disa operacioneve të eksportit, raporton Reuters.
Presidenti ukrainas Volodymyr Zelenskiy tha se disa aleatë i kanë dërguar “sinjale” për mundësinë e uljes së goditjeve ndaj sektorit rus të naftës, ndërsa çmimet globale të energjisë vazhdojnë të rriten, duke e bërë secilën goditje një sfidë të madhe për tregun energjetik ndërkombëtar.
Kosova ka rezultatin më të lartë në rajon sa i përket pjesëmarrjes së qytetarëve në dëgjimet buxhetore.
Sipas të dhënave nga Anketa e Buxhetit të Hapur e publikuar nga Instituti “GAP” për vitin 2025, Kosova ka shënuar 32 pikë.
Sipas raportit, ky rezultat është kryesisht falë organizimit të dëgjimeve buxhetore që organizojnë komunat.
“Megjithatë, në nivel qendror dhe në Kuvend, dëgjime të tilla me qytetarë apo akterë të shoqërisë civile ende mungojnë”, thuhet nga GAP.
Pas Kosovës, e dyta është Mali i Zi me 22, e treta Shqipëria me 17 pikë.
Poashtu janë dhënë edhe disa rekomandime
Të përfshihen qytetarët në monitorimin e zbatimit të buxhetit
Të zgjerohet pjesëmarrja e qytetarëve në nivel qendror (jo vetëm lokal)
Të angazhohen grupet e nën-përfaqësuara
Kuvendi të lejojë dëgjime publike me qytetarë dhe OShC për buxhetin dhe raportin e auditimit
Sulmet ajrore ushtarake ruse në rajonet në Ukrainën veriore dhe qendrore kanë vrarë të paktën dy persona dhe kanë plagosur rreth 30 të tjerë, thanë zyrtarët vendas të hënën në mbrëmje.
Pranë qytetit të Poltavas, mbeturinat e një mjeti ajror pa pilot të rrëzuar vranë një person, plagosën tre të tjerë dhe dëmtuan një pallat, tha guvernatori rajonal Vitaly Diakinvych nëpërmjet Telegram. Një fëmijë ishte midis të plagosurve.
“Sipas informacionit të përditësuar, për fat të keq një person ka vdekur. Tre persona u plagosën. Dy u shtruan në spital, përfshirë një djalë”, shkroi ai.
Sulmet me dronë dhe zjarri i artilerisë vranë një burrë 65-vjeçar në rajonin fqinj të Dnipropetrovskit, pranë Nikopolit, tha guvernatori rajonal Oleksandr Ganza nëpërmjet Telegram, duke shtuar se dy persona të tjerë u plagosën në qytet dhe 12 në të gjithë rajonin.
Dy bomba ruse goditën një komunitet në rajonin Sumy, i cili kufizohet me Rusinë, duke plagosur 13 persona, përfshirë një vajzë 6-vjeçare, tha guvernatori rajonal Oleh Khryhorov nëpërmjet Telegram, duke shtuar se pesëmbëdhjetë shtëpi dhe automjete u dëmtuan.
Mëngjesin e kësaj të marte, një mjet ajror pa pilot rus u rrëzua në ballkonin e një apartamenti në katin e tretë të një pallati në Odessa, duke plagosur një burrë, siç raportohet në një deklaratë nga kreu i Administratës Shtetërore Rajonale të Odessa-s, Oleh Kiper.
Linja telefonike midis Péter Szijjártó dhe Sergei Lavrov i ofroi Rusisë informacion strategjik mbi çështjet kritike të BE-së.
Tani janë publikuar provat se ministri hungarez i Punëve të Jashtme veproi në emër të Kremlinit, duke bërë përpjekje për të hequr nga lista rusët e sanksionuar, përfshirë motrën e Alisher Usmanov.
Në një bisedë tjetër me zëvendësministrin e energjisë të Rusisë, Szijjártó flet për bërjen e çmos për të shfuqizuar një paketë sanksionesh të BE-së dhe ofron të përpiqet të shpëtojë subjektet ruse nga sanksionet.
Sipas Szijjártó, qeveria sllovake po ndihmon gjithashtu këto përpjekje të koordinuara ruso-hungareze, transmeton Telegrafi.
Vetëm një orë pasi Ministri i Jashtëm hungarez Péter Szijjártó mbërriti në Budapest nga Shën Petersburgu më 30 gusht 2024, ai mori një telefonatë nga homologu i tij rus, Sergei Lavrov. Lavrov tha se Szijjártó ishte cituar në të gjitha mediat ruse pas vizitës së tij.
“A thashë diçka të gabuar”, pyeti Szijjártó me nervozizëm.
“Jo, jo, jo. Ata thjesht po thoshin se ju po luftoni në mënyrë pragmatike për interesat e vendit tuaj”, u përgjigj Lavrov.
Arsyeja e telefonatës së Lavrovit ishte një kërkesë: oligarku rus Alisher Usmanov po kërkonte që motra e tij, Gulbahor Ismailova, të hiqej nga listat e sanksioneve të BE-së dhe Szijjártó kishte premtuar të ndihmonte.
Usmanov, një manjat ruso-uzbekistanez, e grumbulloi pasurinë e tij në miniera, industri, telekomunikacion dhe media. Ai është përshkruar si një nga biznesmenët e preferuar të Putinit, një me “lidhje veçanërisht të ngushta” me presidentin rus.
“Dëgjo, po telefonoj me kërkesën e Alisherit dhe ai më kërkoi t’ju kujtoja se po bënit diçka për motrën e tij”, tha Lavrov.
“Po, absolutisht”, u përgjigj Szijjártó.
“Çështja është si vijon: së bashku me sllovakët po i paraqesim një propozim Bashkimit Evropian për ta hequr atë nga lista. Do ta paraqesim javën tjetër dhe, meqenëse do të fillojë periudha e re e shqyrtimit, do të vihet në agjendë dhe do të bëjmë çmos që ta heqim atë”, tha Szijjarto.
Lavrov ishte i lumtur dhe shprehu vlerësimin e tij për “mbështetjen dhe luftën tuaj për barazi në të gjitha fushat” e Szijjártó-s.
Qëllimi kryesor i bisedës u arrit, Lavrov dhe Szijjártó vazhduan të lidheshin mbi përbuzjen e tyre të përbashkët ndaj Bashkimit Evropian, veçanërisht vendeve me orientim pro-Ukrainë.
Të dy kritikuan Josep Borrell, atëherë Përfaqësuesin e Lartë të BE-së për Punët e Jashtme dhe Politikën e Sigurisë, të cilin Lavrov e quajti “zhgënjimin e tij më të madh” dhe Szijjártó e karakterizoi me përçmim si “Biden-i evropian”.
Socialisti spanjoll, vuri në dukje Lavrov, kishte qenë shumë më “i arsyeshëm” kur përfaqësonte interesat e Madridit vetëm si ministër i Jashtëm, para emërimit të tij në Komisionin Evropian, në të cilin cilësi një komisioner nuk mund ta prioritizojë vendin e tij të lindjes mbi bllokun në përgjithësi.
“Pra, nuk mundesh, nuk mund ta emërtosh vendin tënd, por duhet ta emërtosh gjininë tënde, apo jo”, e pyeti Lavrovi mosbesues Szijjártó-n, i cili i kishte përmbledhur këto protokolle burokratike.
Shtatë muaj më vonë, Ismailova u hoq nga lista e sanksioneve të BE-së.
Kjo telefonatë midis dy ministrave të Jashtëm, një nga disa midis viteve 2023 dhe 2025, nxjerr në pah miqësinë e jashtëzakonshme midis Szijjártó-s, i cili përfaqëson një anëtar të BE-së dhe NATO-s, dhe Lavrov-it, i cili përfaqëson një komb që ka pushtuar një vend evropian ndërsa zhvillon një luftë hibride që përfshin akte zjarrvënieje dhe sabotimi të kryera kundër vendeve në krahun lindor të NATO-s.
Thirrjet trafikojnë informacione të ndjeshme rreth diskutimeve të brendshme si të Budapestit ashtu edhe të Brukselit, të cilat padyshim janë me interes për Kremlinin.
Ato gjithashtu ofrojnë prova të qarta se si Rusia qëndron fshehurazi pas përpjekjeve të Hungarisë dhe Sllovakisë, për të penguar sanksionet e BE-së kundër individëve ose subjekteve ruse.
Në shkëmbimet e tij me Lavrovin, Szijjártó duket si i nënshtruar, në kufi me servilizmin.
“Nëse hiqni emrat dhe ia tregoni këto biseda ndonjë oficeri të çështjes, ai do të betohet se ky është një transkript i një oficeri të inteligjencës që punon me asetet e tij”, tha një oficer i lartë i inteligjencës evropiane pasi analizoi një kopje të shtypur të bisedave.
Transkriptet dhe audio regjistrimet të thirrjeve Lavrov-Szijjártó, si dhe thirrjet e Szijjártó me zyrtarë të tjerë të qeverisë ruse, u morën dhe u konfirmuan nga një konsorcium i mediave investigative të përbëra nga VSquare, FRONTSTORY, Delfi Estonia, The Insider dhe Qendra Investigative e Ján Kuciak (ICJK).
Trupa e Gardës Revolucionare Islamike (IRGC) e Iranit po kryen një fushatë për të rekrutuar fëmijë që në moshën 12 vjeç për t’u bërë vullnetarë për t’u bërë “luftëtarë mbrojtës të atdheut”, tha Human Rights Watch, Organizata mbikëqyrëse e të drejtave të njeriut. Sipas saj, rekrutimi dhe përdorimi ushtarak i fëmijëve është një shkelje e rëndë e të drejtave të fëmijëve dhe një krim lufte kur fëmijët janë nën 15 vjeç.
Më 26 mars 2026, një zyrtar nga Divizioni i 27-të Mohammad Rasulullah i IRGC-së në Teheran tha se një fushatë për të rekrutuar civilë, e quajtur “Luftëtarë që Mbrojtin Atdheun për Iranin”, kishte vendosur moshën minimale në 12 vjeç.
Zyrtarët iranianë duhet ta revokojnë fushatën dhe të ndalojnë të gjitha forcat ushtarake dhe paraushtarake në Iran të rekrutojnë fëmijë nën 18 vjeç.
“Nuk ka asnjë justifikim për një fushatë rekrutimi ushtarak që synon fëmijët për t’u regjistruar, e lëre më 12-vjeçarët. Kjo nënkupton se autoritetet iraniane me sa duket janë të gatshme të rrezikojnë jetën e fëmijëve për pak fuqi punëtore shtesë”, tha Bill Van Esveld , drejtor i asociuar i të drejtave të fëmijëve në Human Rights Watch.
Fushata synon të tërheqë civilë për të ofruar shërbime gatimi dhe kujdes mjekësor, për të shpërndarë artikuj dhe për t’u marrë me shtëpitë e dëmtuara, si dhe për aktivitete sigurie siç janë pikat e kontrollit të personelit, patrullat operative, patrullat e inteligjencës dhe konvojet e automjeteve, tha Rahim Nadali, një zyrtar i IRGC-së, në një intervistë me Agjencinë e Lajmeve Defa Press të Iranit. Posteri reklamues për fushatën e rekrutimit, i botuar nga agjencia e lajmeve, gjithashtu rendit këto aktivitete dhe paraqet dy fëmijë, një djalë dhe një vajzë, së bashku me dy të rritur, përfshirë një burrë me uniformë ushtarake.
Aplikantët mund të regjistrohen në xhamitë e Teheranit që strehojnë bazat e Basij, tha Nadali dhe posteri i rekrutimit. Forca Basij është nën komandën e IRGC-së.
