Category: Lajme

Vdekja e akademik Rexhep Qosjes ka nxitur reagime të shumta në Kosovë dhe Shqipëri, ku figura e tij po nderohet nga liderë politikë e institucionalë, si dhe nga njerëz të kulturës, letërsisë dhe artit.

Në mesin e tyre është edhe kryeministri i Kosovës, Albin Kurti, i cili përmes një postimi në Facebook ka vlerësuar lart jetën dhe veprën e akademikut të ndjerë.

Kurti ka shkruar se vepra e Qosjes do të vazhdojë të jetojë edhe pas vdekjes së tij, duke marrë një dimension të ri leximor pa autorin.

Sipas tij, librat e shumtë të akademikut, nga studimet gjuhësore, kritika letrare, ditarët historikë e deri te veprat letrare, do të vazhdojnë të lexohen dhe të interpretohen nga gjeneratat e ardhshme, duke mbetur burim i rëndësishëm dijeje dhe inspirimi.

Postimi i plotë:

Ngushëllimi na vjen prej jetës së tillë

Rexhep Qosja ndërroi jetë sot. Vepra e tij padyshim që do të jetojë shumë më gjatë se shekulli i tij. Mirëpo, fillimisht, vepra e tij nis një jetë të re sot: jetën pa autorin.

Dhjetëra libra të Rexhep Qosjes tash fitojnë një tjetër lloj leximi dhe sigurisht edhe lexues të rinj. Nga studimet gjuhësore dhe kritika letrare te ditarët historikë, nga tregimet e dramat te romanet voluminoze, tani do të mund të ripërjetohen ndryshe. Dhe nga ai rilexim i yni dhe i gjeneratave në vijim do të varen mësimet e insiprimet e së ardhmes. Është fat i madh për një komb të ketë regjistrues të këtillë të kohëve të veta, të mendimit dhe të situatave.

Natyrisht që askush nuk do të mund të thotë që ky apo ai shkrimtar a veprimtar ishte rilindasi ynë i fundit. Por sigurisht që të gjithë duhet ta themi që askush nuk i ka njohur dhe ditur më thellë si dhe çmuar e afirmuar më lart rilindasit tanë sa akademik Rexhep Qosja.

Në akademi ishte gjuhëtar e në gjuhë ishte historian, në publik ishte shkrimtar e në shkrim ishte mendimtar, në shoqëri ishte politikan e në politikë dijetar. Midis trashëgimisë së iluminizmit evropian dhe jetëshkrimit të Gjergj Kastriotit Skënderbeut, sikurse edhe midis romantizmit dhe postmodernes, qarkullonte mahnitshëm dhe frymëzonte parreshtur.

Shkruante edhe për shkak se kishte lexuar shumë. Shkruante shumë sidomos për shkak se kishte çfarë të thoshte. Jetën e kaloi midis librave, jo pak prej të cilëve e kanë për autorë vetë atë, në bibliotekën e secilit prej nesh.

Populli shqiptar nuk ka një akademik tjetër bashkëkohor i cili kaq shumë kontribuoi për gjuhën dhe kombin tonë e njëkohësisht aq shumë u sulmua nga politika dhe kolegët e tij. Do të mbahet mend siç ishte dhe ishte siç mbeti – i paepur.

Dy muaj pa i mbushur nëntë dekada që ia kanë vlejtur fort për shqiptarët mbarë. U nda nga jeta, por i rron gjallë vepra.

Është mbajtur sot seanca gjyqësore në Gjykatën Themelore në Prishtinë ndaj të akuzuarës Jelena Gjukanoviq, e cila ngarkohet për veprën penale të spiunazhit.

Në fjalën përfundimtare, Prokuroria ka kërkuar dënimin maksimal prej 25 vjetësh burgim, duke e cilësuar rastin si një ndër më të rëndësishmit në fushën e sigurisë kombëtare.

Prokurori theksoi se çështja nuk është vetëm individuale, por prek drejtpërdrejt sigurinë e shtetit dhe besimin e qytetarëve në institucionet e Republikës së Kosovës.

“Dënimi i drejtë dhe proporcional në këtë rast është dënimi maksimal i paraparë me nenin 124, paragrafi 3 të Kodit Penal, me qëllim që të mbrohet rendi kushtetues dhe siguria e zyrtarëve dhe qytetarëve të Republikës, si dhe për të dërguar një mesazh të qartë se veprimtari të tilla nuk do të tolerohen në shtetin tonë”, ka thënë ndër të tjera prokurori gjatë seancës.

Aktgjykimi për këtë rast pritet të shpallet më 27 prill 2026, në ora 13:15.

Ky është rasti i radhës i hetuar dhe realizuar nga Agjencia e Kosovës për Inteligjencë (AKI) në kuadër të luftës kundër spiunazhit.

Serbja Jelena Gjukanoviq, punonjëse e Organizatës për Siguri dhe Bashkëpunim në Evropë (OSBE), ishte arrestuar më 28 shkurt të vitit 2025 në pikën kufitare të Jarinjës, në veri të Kosovës, dhe që atëherë ndodhet në paraburgim.

Gjukanoviq dyshohet për spiunazh në bashkëpunim me një tjetër person, i cili po ashtu është nën hetime.

Sipas Kodit Penal të Kosovës, spiunazhi konsiderohet krim i rëndë dhe, në rast të konfirmimit të fajësisë, dënohet me minimum pesë vjet burg.

Gjukanoviq dyshohet të ketë bashkëpunuar me Agjencinë Serbe të Sigurisë dhe Inteligjencës (BIA).

Një 53-vjeçar ka humbur jetën si pasojë e një aksidenti në aksin Thumanë-Mamurras.

Siç raporton Euronews.al, aksidenti ndodhi ndërmjet dy veturave, ndërsa viktima nuk mundi të iu bëjë ballë plagëve të marra.

I përfshirë në aksident raportohet të jetë edhe një 20-vjeçar që drejtonte njërën veturë dhe një pasagjere, ku të dy janë në kujdesin e mjekëve dhe jashtë rrezikut për jetën.

Policia arrestoi 20-vjeçarin si shkaktar i aksidentit me pasojë vdekjen.

Një aksident po ashtu me fatalitet është regjistruar edhe të mërkurën në Thumanë, ku një person mbeti i vdekur.

Bashkimi Evropian po planifikon një ndryshim të rëndësishëm në tregun e karburanteve, duke shqyrtuar futjen e benzinës E20, e cila përmban deri në 20% bioetanol.

Sipas planit të Komisionit Europian, i udhëhequr nga Ursula von der Leyen, kjo iniciativë synon uljen e varësisë nga karburantet fosile dhe reduktimin e emetimeve të CO₂.

Aktualisht në BE përdoren standardet E5 dhe E10, ndërsa E20 do të kërkonte ndryshime në direktivat për cilësinë e karburanteve. Komisioni ka theksuar se do të vlerësohet edhe ndikimi në motorët ekzistues të automjeteve dhe nevoja për investime në biokarburante.

Sipas planit, E20 pritet të jetë më i lirë në pompë dhe të kontribuojë në uljen e emetimeve deri në rreth 15%, megjithëse mund të rrisë lehtë konsumin e karburantit.

Disa shtete dhe kompani në Evropë kanë nisur testime, ndërsa në vende si Brazili dhe Tajlanda përdoren tashmë përzierje edhe më të larta të bioetanolit.

Presidenti amerikan, Donald Trump, ka thënë se i ka urdhëruar Marinës Amerikane të “qëllojë dhe vrasë” çdo anije që minon në Ngushticën e Hormuzit.

Në një deklaratë në rrjetin e tij Truth Social, Trump deklaroi se “pastruesit e minave” po “pastrojnë ngushticën tani”.

Ekzistojnë frikëra se Irani ka minuar rrugën ujore vendimtare, megjithëse kjo nuk është konfirmuar.

Nëse e ka bërë këtë, do të kërcënonte të ndalonte trafikun përmes ngushticës – e cila në kohë paqeje është përgjegjëse për një të pestën e naftës dhe gazit natyror të lëngshëm në botë – në planin afatgjatë, duke dëmtuar më tej ekonominë globale.

“I kam urdhëruar Marinës së Shteteve të Bashkuara të qëllojë dhe të vrasë çdo anije, sado të vogla të jenë, që po vendosin mina në ujërat e Ngushticës së Hormuzit. Nuk ka asnjë hezitim”, shkroi Trump.

“Përveç kësaj, pastruesit tanë të minave po e pastrojnë Ngushticën tani. Me anë të kësaj po urdhëroj që ky aktivitet të vazhdojë, por në një nivel të trefishuar! Faleminderit për vëmendjen tuaj ndaj kësaj çështjeje. Presidenti DONALD J. TRUMP”, shtoi ai.

Ushtarë çekë, moldavë dhe italianë të caktuar në Njësinë e Specializuar Shumëkombëshe të KFOR-it, zhvilluan patrulla në Prishtinë.

Sipas njoftimit zyrtar të KFOR-it, këto patrulla synojnë ruajtjen e një mjedisi të sigurt, rritjen e ndërveprimit dhe forcimin e bashkëpunimit.

“Aktivitete të tilla pasqyrojnë angazhimin e KFOR-it për të ruajtur një mjedis të sigurt dhe për të mbështetur lirinë e lëvizjes për të gjithë njerëzit që jetojnë në Kosovë”.

Ministri i Administrimit të Pushtetit Lokal, Elbert Krasniqi ka nënshkruar sot Udhëzimi Administrativ për Bordin e Mitrovicës.

“Sot kam nënshkruar Udhëzimin Administrativ që rregullon organizimin dhe funksionimin e Bordit të Mitrovicës.

Ky bord po vazhdon të luajë rol të rëndësishëm në bashkëpunimin ndërmjet dy komunave dhe në realizimin e projekteve të përbashkëta që përmirësojnë jetën e qytetarëve.

Me këtë Udhëzim Administrativ:

Sigurojmë qëndrueshmëri në menaxhimin e projekteve të përbashkëta;

Fuqizojmë koordinimin mes nivelit qendror dhe dy komunave;

Hapim rrugë për investime të reja që përmirësojnë infrastrukturën dhe jetën sociale

Si ministri do të vazhdojmë ta mbështesim këtë proces për një bashkëpunim më efikas dhe zhvillim të qëndrueshëm në Mitrovicë”,  shkruan Krasniqi në njoftim.

Familja e ish-presidentit, Hashim Thaçi ka dërguar telegram ngushëllmi për familjen Qosja.

Në telegram thuhet se janë pikëlluar nga lajmi për ndarjen nga jeta të akademikut Qosja.

‘Duke vlerësuar mendimin e tij të pavarur, guximin intelektual dhe përkushtimin ndaj së vërtetës dhe vlerave kombëtare, ju lutemi pranoni ngushëllimet më të sinqerta në emër të familjes Thaçi dhe të ish-presidentit Hashim Thaçi’, thuhet ndër të tjera në telegram.

Gjykata Themelore në Prishtinë ka njoftuar se të premten, më 24 prill, do të shpallet aktgjykimi për rastin “Banjska”, nën masa të shtuara sigurie.

Seanca pritet të nisë në orën 15:00, ndërsa hyrja në objektin e gjykatës do të lejohet vetëm deri në orën 14:40.

Para trupit gjykues do të paraqitet vetëm i akuzuari Dushan Maksimoviq, ndërsa dy të akuzuarit e tjerë kanë refuzuar të jenë të pranishëm në shpalljen e vendimit.