Kuvendi i Kosovës sot do të mbajë seancë të jashtëzakonshme për zgjedhjen e presidentit.
Kështu ka bërë të ditur kryetarja e Kuvendit, Albulena Haxhiu.
“Natyrisht që sot”, tha ajo kur është pyetur se a do të mbahet sot seanca për zgjedhjen e presidentit.
Ish-punonjësja e Organizatës për Siguri dhe Bashkëpunim në Evropë (OSBE), Jelena Gjukanoviq, është dënuar me 6 vjet burgim për veprën penale të spiunazhit.
Gjukanoviq, shtetase serbe, ishte arrestuar më 28 shkurt 2025 në pikën kufitare në Jarinje dhe që nga ajo kohë ndodhej në paraburgim.
Sipas aktakuzës, ajo dyshohet se ka qenë e përfshirë në aktivitete spiunazhi në bashkëpunim me një person tjetër, i cili gjithashtu është nën hetim nga autoritetet.
Është shtyrë gjykimi në themel për ish-presidentin Ilir Meta. Procesi ka zgjatur më pak seç pritej, sepse nga sa raporton gazetarja e Top Channel, Anila Hoxha, gjyqi është shtyrë për datën 11 maj, ora 12:00 e mesditës.
Avokatja e Fatime Kryemadhit, e ëma e Monika Kryemadhit, ka kërkuar ndërprerje të seancës, për shkak se nuk ka në prokurë tagrat për të kërkuar gjykim të shkurtuar.
Sot ishte hera e parë që një gjyq i Metës transmetohej direkt në media sociale apo në televizion, teksa u pa edhe një ndryshim në pamjen e ish-presidentit, i cili qëndron prej më shumë se një viti i izoluar në “Burgun 313”.
Avokati i Metës, Kujtim Cakrani, pas përfundimit të seancës dha një deklaratë për mediat, ku tha se ish-presidenti meriton gjyq publik, teksa përmendi rastin e Fatos Nanos.
Ish-presidenti Ilir Meta, pre 18 muajsh mbahet në paraburgim, ndërsa gjyqi ndaj tij vijon. Këtë të hënë, për herë të parë gjyqi në themel në GJKKO u transmetua një pjesë online, ku shihej Meta në kafazin e xhamit, e pranë tij ish-bashkëshortja Monika Kryemadhi dhe avokati i tij Kujtim Cakrani. /Tch/
Presidenti amerikan, Donald Trump, njoftoi një ndryshim të mundshëm të emrit të një agjencie kyçe federale.
Vetëm një ditë pasi i mbijetoi një tjetër atentati , Trump ndau një postim nga një mbështetës i tij, i cili i kërkonte atij të ndryshonte emrin e Zyrës së Imigracionit dhe Doganave të SHBA-së.
“Dua që Trump ta ndryshojë nga ICE në NICE, kështu që mediat duhet të thonë agjentë të NICE gjithë ditën, çdo ditë”, shkroi përdoruesi i X, alyssamariie11.
Trump më pas e ripostoi mesazhin e përdoruesit të X në Truth Social.
Surreal being posted by my favorite president @realDonaldTrump pic.twitter.com/ulcz1sMl2q
— alyssa (@alyssamariiee11) April 27, 2026
Ndryshe, versione të këtij propozimi kanë qarkulluar si meme midis mbështetësve të presidentit për disa kohë tani, veçanërisht pasi ai u përball me kritika për taktikat agresive të përdorura nga oficerët e ICE në goditjet kundër imigracionit.
Kjo ka çuar në protesta kundër ICE dhe agjencive të tjera federale.
Gjatë protestave në Minneapolis në fillim të këtij viti, agjentët federalë qëlluan dhe vranë dy qytetarë amerikanë: Renee Good dhe Alex Pretti.
Në shënimin e Ditës së Personave të Zhdukur me Dhunë, Grupi Parlamentar i Partisë Demokratike të Kosovës ka bërë homazhe pranë Monumentit të Personave të Zhdukur, në nderim të mijëra qytetarëve të zhdukur gjatë luftës së viteve 1998-1999.
Në postimin e PDK-së, thuhet se kërkesa për të vërtetën dhe për zbardhjen e të fatit të mbi 1600 personave të zhdukur mbetet detyrim moral, kombëtar dhe institucional.
“Kërkesa për të vërtetën, për drejtësi dhe për zbardhjen e të fatit të mbi 1600 personave të zhdukur mbetet detyrim moral, kombëtar dhe institucional. Kosova nuk harron!”, thuhet në komunikatën për media.
Fatmire Mulhaxha-Kollçaku, deputete e VV-së, ka deklaruar se nuk kanë ende asnjë nënshkrim për kandidatë për president.
Ndër të tjera, ajo shtoi se është e pabesueshme se si opozita nuk ka emër të propozuar për shefin e vendit.
“Zgjedhjet e reja janë totalisht të panevojshme, të kushtueshme, ne tashmë e kemi një fitues, të rikonfirmuar në dy palë zgjedhje, dhe me të vërtetë presim reflektim nga opozita, me një kërkesë gjeneroze, por tek e fundit ne jemi një demokraci parlamentare, çka na mbetet është të gjejmë një figurë unifikuese”, u shpreh ajo.
“Jam e bindur se gjithë këto subjekte, që gjithë këto vite janë thirrur se janë institucionalistë, akademikë, dhe të mos gjendet një emër, jashta strukturave politike, dhe të mos vinë me atë emër në Parlament, është e pabesueshme”, tha kandidatja për presidente nga VV.
Dokumente dhe komunikime mes spiunëve serbë vazhdojnë të shfaqin ndikimin informativ kundër Kosovës në arenën ndërkombëtare, ku përfshihen elementë të BIA-s serbe dhe raportime që lidhen me OSBE-në.
Sipas këtyre materialeve të siguruara nga Dukagjini, agjenti i BIA-s, Aleksandar Vllajiq (tashmë i dënuar nga drejtësia kosovare), dyshohet se ka komunikuar me ish-zyrtaren e OSBE-së, Jelena Gjukanoviq, duke i dhënë udhëzime të drejtpërdrejta për mënyrën e hartimit të raporteve dhe ndërtimit të narrativave lidhur me zhvillimet në veri të Kosovës.
Në përmbajtjen e mesazheve përshkruhen orientime të detajuara se si duhet të strukturohet “historia”, duke paraqitur aksionet e Policisë së Kosovës dhe përdorimin e njësive speciale në veri si veprime të koordinuara politikisht dhe të perceptuara negativisht nga faktori ndërkombëtar.
Në një bisedë të publikuar mes Gjukanoviq dhe Vllajiq, ajo përshkruan takime dhe koordinime që lidhen me përgatitjen e një raporti për Kosovën brenda OSBE-së.
Në këtë komunikim, ajo përmend se kishte zhvilluar takime me atëbotë shefin e misionit të OSBE-së, Michael Davenport, i cili sipas saj, ishte duke e përgatitur një raport gjithëpërfshirës për Kosovën.
Sipas përmbajtjes së mesazhit, ky raport do të përfshinte të gjitha ‘sulmet’ e pretenduara ndaj serbëve nga Policia dhe do të paraqitej në Sekretariatin e OSBE-së në Vjenë përpara 57 shteteve anëtare.
Po ashtu, gjithmonë sipas bisedës, Davenport kërkonte të konsultohej edhe me ministrin e Jashtëm të Serbisë, Ivica Daçiq, para se ta paraqiste raportin në Vjenë.
Po ashtu, në komunikimin mes spiunëve serbë sugjerohet që të theksohet se ambasada amerikane në Prishtinë nuk është e kënaqur me sjelljen e kryeministrit Albin Kurti, ndonëse vazhdon ta mbështesë atë në luftën kundër korrupsionit.
“Nuk është e kënaqur me sjelljen e Kurtit”, është udhëzimi në një mesazh.
Për më tepër, përmenden edhe organizata joqeveritare, “biseda të mbyllura” dhe rrjete informimi nga veriu, të cilat sipas këtyre udhëzimeve duhet të shfrytëzohen për ndërtimin e narrativave të caktuara.
Një element tjetër i ndjeshëm i komunikimit lidhet me pretendimet për përfshirjen e shtetasve britanikë, të cilët sipas mesazheve zhvillojnë takime intensive në veri dhe hartojnë raporte të inteligjencës që më pas shërbejnë si bazë për operacione policore. Në të njëjtin kontekst përmenden edhe struktura të inteligjencës brenda KFOR, përfshirë kontingjente sllovene dhe zvicerane. /RTVD/
Tre persona kanë pësuar lëndime trupore dhe kanë kërkuar tretman mjekësor në Urgjencën e Podujevës pasi dyshohet se shpërtheu bombola e gazit në një lokal në Podujevë.
Zëdhënësja e Policisë për rajonin e Prishtinës, Flora Ahmeti konfirmoi për “Betimi për Drejtësi” se rasti ka ndodhur në rrugën “4 Dëshmorët” në Podujevë.
“Sot rreth orës 08:30, në një lokal në rrugën ‘4 Dëshmorët’ në Podujevë, ka ndodhur një shpërthim. Zyrtarët policorë janë angazhuar menjëherë në vendin e ngjarjes. Bazuar në informacionet e para dyshohet që shpërthimi ka ardhur nga një bombolë gazi, ku tre persona kanë pësuar lëndime. Personat e lënduar janë dërguar për tretman mjekësor në urgjencën e qytetit”, tha Ahmeti.
Ahmeti shtoi se Policia është në vendngjarje dhe po merret me trajtimin e rrethanave të ngjarjes.
Irani ka paraqitur një propozim për të hequr kufizimet në Ngushticën e Hormuzit pa e trajtuar programin e tij bërthamor, sipas dy zyrtarëve rajonalë të cituar nga mediat ndërkombëtare.
Sipas tyre, propozimi është diskutuar në bisedime të mbyllura dhe është transmetuar në Shtetet e Bashkuara të Amerikës përmes Pakistanit.
Në të njëjtën kohë, ministri i Jashtëm i Iranit ka zhvilluar një vizitë në Rusi, ku ka deklaruar se takimi shërben për konsultime lidhur me luftën me Izraelin dhe SHBA-në.
Sipas burimeve siç raporton The Guardian, Irani kërkon gjithashtu që SHBA të heqë bllokadën ndaj vendit si pjesë e marrëveshjes së propozuar.
Megjithatë, ky plan nuk pritet të mbështetet nga presidenti amerikan Donald Trump, i cili ka deklaruar se çdo marrëveshje duhet të përfshijë edhe ndalimin e programit bërthamor iranian, si dhe hapjen e Ngushticës së Hormuzit.
Trump ka thënë më herët se SHBA ka “të gjitha kartat” dhe se Irani mund të kontaktojë Uashingtonin nëse dëshiron bisedime.
Shefi i grupit parlamentar të AAK-së, Besnik Tahiri e ka komentuar situatën aktuale sa i përket çështjes së presidentit.
Para seancës, deputeti tha se situata vërteton se Kosova është në prag të zgjedhjeve, dhe sipas tij, kjo është papërgjegjësi e shumicës parlamentare.
“Ajo që është shumë shqetësuese dhe brengë e secilit qytetarë është tema kryesore, zgjidhja dhe zgjedhja e presidentit. Jemi në ditën e fundit, po na përsëritet situata e para disa muajve kur vijmë në ditën e fundit dhe ende nuk e dimë kush janë kandidatët unifikues të cilët potencialisht mund t’i marrin 80 votat në Kuvend, kjo situatë na tregon papërgjegjësinë e shumicës parlamentare”, deklaroi Tahiri.
“Kosova është në prag të zgjedhjeve dhe na tregon për një eksperiment të vazhdueshëm”.