Category: LAJME

Shefi i Zyrës së Bashkimit Evropian në Kosovë, Tomasz Szunyog, ka thënë se përfaqësuesit e komuniteteve pakicë janë pjesë e rëndësishme e strukturës politike në Kosovë.

Ai tha se pakicat luajnë rol vendimtar përfaqësues në demokracinë e Kosovës.

Szunyog, u takua të hënën me përfaqësues të pakicave për të diskutuar rolin dhe mbështetjen e tyre në implementimin e marrëveshjes për normalizimin e raporteve mes Kosovës dhe Serbisë.

“Përfaqësuesit e komuniteteve pakicë janë pjesë e rëndësishme e strukturës politike të Kosovës dhe luajnë një rol vendimtar përfaqësues në demokracinë e Kosovës. Kontributi i tyre në arritjen e progresit në rrugën e integrimit të Kosovës në BE është i domosdoshëm”, tha ai.

Presidentja e Kosovës, Vjosa Osmani e Kryeministri Albin Kurti, sot do të bëjnë homazhe në Izbicë të Skenderajt, në 24-vjetorin e masakrës së Izbicës, ku forcat policore dhe ushtarake serbe, pas rrethimit të mijëra civilëve të fshatit Izbicë dhe vendbanimeve përreth, veçuan 147 burra të rinj dhe pleq, të cilët i vranë dhe i masakruan, ndërsa pjesën tjetër e dëbuan jashtë Kosovës.

ZKM ka njoftuar se në Izbicë do të shkojë në orën 09:30, ndërsa në Podujevë në orën 11:00.

“1. Kryeministri i Republikës së Kosovës, Albin Kurti, bën homazhe te Memoriali në Izbicë, Skenderaj. VENDI: Memoriali në Izbicë, Skenderaj, KOHA: 09:30/ 2.Kryeministri i Republikës së Kosovës, Albin Kurti, bën homazhe te varrezat e Familjes Bogujevci dhe Duriqi, në Podujevë. VENDI: Varrezat e Familjes Bogujevci dhe Duriqi, Podujevë, KOHA: 11:00”, thuhet në komunikatë.

Masakra e Izbicës hyn në radhën e krimeve më të rënda të shtetit të Serbisë, ku vrasja masive, përdhosja e trupave dhe varrimi i tyre, përmes pamjeve satelitore, u bë lajm botëror.

Deputetja e të Gjelbërve në Parlamentin Evropian (PE) Viola von Cramon ka thënë se deklaratat e presidentit serb, Aleksandar Vuçiq, para marrëveshjes evropiane për Kosovën, ishin shumë të lavdërueshme, sepse kanë hapur rrugën për arritjen e marrëveshjes.

“Megjithatë, retorika pas gjithë kësaj dhe talljet me “dhimbje të padurueshme në dorën e djathtë“ u prit shumë keq, si në Bruksel ashtu edhe në kryeqytetet kyçe të Bashkimit Evropian (BE), ka deklaruar Von Cramon për gazetën serbe “Nova”, duke komentuar deklaratën e Vuçiqit se nuk e ka nënshkruar marrëveshjen, transmeton Paparaci.

Von Kramon, e cila është edhe raportuese për Kosovën në PE, ka deklaruar se nuk i takon Serbisë të vendosë nëse Kosova mund të hyjë në OKB.

Ajo ka shtuar se e kupton që deklarata të tilla janë për publikun e brendshëm, por se nuk është në dorën e Serbisë, sepse pranimi në OKB varet nga vendimi i Këshillit të Sigurimit.

Kryetari i Lidhjes Demokratike të Kosovës, Lumir Abdixhiku, ka thënë se ministrja e Drejtësisë, Albulena Haxhiu, duhet të japë dorëheqje, si akt moral pas rrëzimit të Ligjit për Këshillin Prokurorial.

Në një shkrim në Facebook, Abdixhiku ka thënë se “Një ministre që në vend skuqjes e dorëheqjes sulmon Gjykatën Kushtetuese s’mund të jetë as bartëse e Ministrisë së Drejtësisë”.

“Nga logjika e ‘vajit në tepsi’, tek sulmet ndaj rendit juridik. Një Ministri e një ministre që cenon rendin kushtetues të Republikës, s’mund të sjellë politika të drejtësisë. Ky është interpretimi i Gjykatës më të lartë në vend – cenim i rendit kushtetues dhe rendit juridik”, ka shkruar Abdixhiku. “Çfarë shembulli drejtësie e barazie për qytetarët punëtorë e të drejtë?! Pse duhet të tjerët të respektojnë Gjykatat kur ato s’respektohen nga pushtetarët?”

Sipas Abdixhikut, pushteti aktual “kaq di”.

“Përveçse të padijshëm janë dhe të rrezikshëm. Dorëheqja, si akt moral, është domosdoshmëri, e rendi kushtetues është i shenjtë – diçka që popullistët s’arrijnë ta kuptojnë asnjëherë”, ka vazhduar ai.

Të premten, Gjykata Kushtetuese rrëzoi Ligjin për KPK-në duke thënë se ai shkel disa nene të Kushtetutës. Vendimi është pranuar nga Ministria e Drejtësisë, që megjithatë ka shprehur “vërejtje për disa pika të vendimit”.

Vetë Haxhiu ka thënë se s’do të dorëhiqet, pas akuzave e kërkesave të LDK-së.

Kryeministri i Kosovës Albin Kurti, ka thënë BE dhe ShBA duhet të shtojnë presionin ndaj Serbisë për njohje ndaj Kosovës.

Ai ka thënë se Beogradi e ka dëshmuar se gjuhën e presionin e njeh më së miri.

Kurti ka thënë se Serbia nuk është shtet demokratik.

“Besoj që është e domosdoshme të bëhet më shumë trysni në Beograd, sepse e ka dëshmuar që këtë gjuhë e kupton më së mirë. Serbia nuk është shtet demokratik, atje pushteti bënë shumë trysni mbi popullin e vet, atje nuk pranojë pluralizëm nuk respektohen të drejtat e njeriut, nuk sundon ligji mbi politikën por politika mbi ligjin. Andaj vetëm një përpjekje e përbashkët me trysni shtesë edhe nga ana e Brukselit dhe Washingtonit, por do thosha sidomos nga Berlini, Parisi e Roma do të mund të sillte rezultate. Është e domosdoshme kjo”, ka thënë Kurti, përcjell teve1.info.

Kurti ka folur edhe për dakordimin për marrëveshjen me Serbinë, duke e akuzuar këtë të fundi se nuk ishte konstruktive.

Ai ka përsëritur qëndrimin se Serbia nuk ishte e gatshme të nënshkruaj marrëveshjen në Bruksel më 27 shkurt e 18 mars.

“Qysh dje po të varet prej meje, por është e qartë se pala e cila nuk është konstruktive, pala e cila është agresive, ajo e cila nuk distancohet as nga e kaluara pra Millosheviçi, as nga e tashmja problematike për kontinentin tonë, pra Kremlini e Putini është Beogradi zyrtar. Ne si shtet demokratik dhe i pavarur jemi të bindur që jemi edhe më demokratik edhe të pavarur se sesa Serbia. Ajo është një regjim hibrid, autokraci praktikisht dhe në anën tjetër nuk është e pavarur nga federata ruse. Kjo bën që ta kemi fqinjësinë e vështirë, ndërkohë që kemi dëshirë të kemi fqinjësi të mirë, por për këtë do të ndihmojë shumë zbatimi i kësaj marrëveshje që e kemi dakorduar në Bruksel dhe në Ohër e cila nënkupton njohje defakto të ndërsjellët ndërmjet Kosovës dhe Serbisë”, ka thënë Kurti në Top Channel.

Kryeministri ka dënuar sulmin në drejtim të objektit të Top Channell ku roja i objektit mbeti i vrarë.

Inspektorati Policor i Kosovës ka hetuar 257 punonjës policorë gjatë vitit 2022, derisa ka arrestuar 108 prej tyre në dyshimet për përfshirje në veprimtari penale.

Kryeshefi i Inspektoratit Policor, Kushtrim Hodaj, në raportimin në Komisionin Parlamentar për Siguri të martën, tha se vitin e kaluar kanë pranuar rreth 1700 ankesa, ku 66 për qind prej tyre i kanë adresuar për hetim disiplinor në Polici, kurse 34 për qind për hetim penal.

“Gjatë vitit 2022 kemi administruar 1697 ankesa të pranuara në mënyra të ndryshme nga ana e qytetarëve. 34 për qind prej tyre i kemi orientuar për hetim penal në departamentin e hetimeve në kuadër të Inspektoratit të Kosovës, pjesën e mbetur prej 66 për qind i kemi orientuar për hetim disiplinor apo administrativ në divizionin e hetimeve të brendshme në kuadër të Policisë së Kosovës. Në fushën e parandalimit dhe hetimit të veprimtarisë penale kemi pasur angazhim të shtuar duke shënuar rezultate të larta që nga themelimi i IPK-së. Kemi hetuar 257 punonjës policorë, kemi arrestuar 108 punonjës policorë dhe qytetarë në dyshimet për përfshirje të veprimtarive penale. Kemi rekomanduar suspendimin e 164 punonjësve policorë”, tha Hodaj.

Përkitazi me këtë, Hodaj tha se edhe aktualisht janë duke hetuar zyrtarë policorë të niveleve të ndryshme për përfshirje në vepra kriminale.

“Kemi shumë raste në hetim, sigurisht për rezultatet dhe epilogun e tyre njoftoheni në momentin e duhur. Ka të gjitha niveleve, ne kemi arrestuar dhe të kaluarën. Tash ka të niveleve të ndryshme, ka informacione për të përfshirë në veprimtari të ndryshme kriminale”, shtoi ai.

Në anën tjetër, nga deputetët opozitarë u ngritën shqetësime për rekrutimin në njësitin e specializuar Mbrojtja e Afërt.

Kryetari i Komisionit për Siguri, Bekë Berisha, tha se është shqetësuese nëse disa kandidatë kalojnë tw gjitha kriteret dhe në prag të certifikimit ata diskualifikohen.

Ai pyeti kryeshefin e IPK-së se a ka pasur ndikim politika në këtë rast.

“Kam pasur ankesa dhe e di si është shkuar puna në konkursin e fundit të mbrojtjes së afërt me disa policë. Në ditën e fundit kur kanë pasur me u certifikuar ka ndodhur një problem aty, është prishur ceremonia dhe ata pasi kanë kaluar gjitha kriteret me u pranu, si duket dikush ka ndikuar që ata mos të kalojnë. A ka ndikuar politika në këtë rast”, tha pyeti.

Në lidhje me këtë rast reagoi edhe deputeti i PDK-së, Rashit Qalaj, i cili tha se moscertifikimi i zyrtarëve policorë për arsye banale në mbrojtjen e afërt është humbje e madhe për Policinë e Kosovës.

“Është humbje e madhe dhe shpenzim i madh kur një operatorë qoftë në FIT apo Mbrojtjen e Afërt i kryen të gjitha fazat e trajnimit dhe në fund nuk certifikohet për ndonjë arsye banale”, theksoi ai.

Mirëpo, kryeshefi i IPK-së, Kushtrim Hodaj, tha se në këtë rast s’ka pasur ndikim politik, përkundrazi janë zbatuar kriteret e rekomanduara për rekrutim.

Ai tha se IPK-ja ka rekomanduar që zyrtarët që rekrutohen për njësitin Mbrojta e Afërt të kenë edhe certifikatën e sigurisë të lëshuar nga AKI-ja, ku bëhet verifikimi i hollësishëm i të kaluarës.

Në bazë të kësaj ai tha se kanë mundur të diskualifikohen disa prej kandidatëve.

“Nuk kemi pasur informacione që ka pasur ndikim, përkundrazi unë e thash se rekomandimi ynë për të rritur dhe zbatuar kriteret e verifikimit mund të ketë qenë një nga arsyet që këta zyrtarë janë diskualifikuar. Të njëjtën kohë ne kemi zhvilluar një inspektim që nuk lidhet me këtë rast, ne në atë kohë kemi dhënë rekomandime… Janë dy lloje të verifikimit që bëhen. Është nëse zyrtari që rekrutohet ka të kaluar të shkeljeve penale, disiplinore, por ajo që ne kemi rekomandu është që zyrtarët e njësitit të Mbrojta së Afërt me qenë se kanë qasje në informacione, në agjendë të presidentes, kryeministrit dhe niveleve të larta, ata duhet të verifikohen dhe të kenë lejen e sigurisë nga Agjencia Kosovare për Inteligjencë (AKI)”, theksoi ai.

Krahas këtyre, Hodaj nënvizoi se prioritet i tyre është luftimi i korrupsionit në Policinë e Kosovës dhe ruajtja dhe fuqizimi i integritetit./kp/

Fjala “Ageism” sipas një përkufizimi nga fjalori i Oxfordit, thuhet se është paragjykim ose diskriminim për shkak të moshës së një personi.

Globalisht, sipas Organizatës Botërore të Shëndetësisë (OBSH), çdo i dyti njeri është ageist (moshist) person me paragjykime kundër njerëzve të moshuar. Në Evropë, të rinjtë raportohet se janë më moshist, krahasuar me vendet e tjera.

Për të diskutuar për këtë temë e cila është një formë sistematike e shtypjes sikurse pabarazitë e tjera (seksizmi, racizmi etj), por ndryshe nga to, nuk është trajtuar thuajse fare në Kosovë, të hënën në emisionin “LIBERO” ishin të ftuar: Afrim Kasolli – Publicist dhe Sociolog, Flaka Ymeri – Sociologe dhe Agon Rexhepi  – Aktivist për të drejtat e njeriut.

Sociologu Kasolli përmendi disa nga paragjykimet që ndodhin për shkak të moshës, derisa potencoi se duhet gjetur një formë e komunikimit ndërmjet brezave.

“…Paragjykimet në moshën e shtyer zakonisht ekzistojnë (me mendësinë) se ju ka humbur elani për punë, nuk kanë kapacitetet e duhura për ta kryer punën deri në fund, apo paragjykimet për moshën e re se nuk janë të pjekur për ta realizuar punën deri në fund. Mendoj se kjo qasje është gabim dhe duhet gjetur një formë e komunikimit ndërmjet brezave…”, deklaroi Kasolli.

Ndërkohë, Ymeri theksoi se të moshuarit diskriminohen më shumë për sa i takon aspektit kulturor, ndërsa të rinjtë në aspektin e perspektivës të punës dhe qasjes.

“…Edhe unë jam paragjykuar, për shumë vite… Më kërkohej përvoja e punës, ndërkohë që nuk më ofronin mundësi për të punuar…”, tha ajo.

Aktivisti për të drejtat e njeriut, Rexhepi tregoi disa nga paragjykimet që sipas tij i hasin kryesisht të rinjtë, derisa rrëfeu edhe një nga rastet kur ishte paragjykuar.

“…Më kanë thënë “Je shumë i ri për me ditë ti”… Më është dashur pak kohë derisa i kam mësuar prindërit e mi se edhe unë i di disa gjëra (përkundër moshës), sepse në kulturën tonë nuk është që i pyesin shumë të rinjtë… Qasja e tillë “Rri se nuk e din ti” mendoj se ndikon edhe në vetëbesim…”, potencoi ai.

Si ta minimizojmë ose eliminojmë këtë formë të diskriminimit?

Sipas Kasollit, që të luftohen të gjitha llojet e diskriminimit (specifikisht në vendet e punës), është e rëndësishme që kriteri i meritokracisë dhe profesionalizmit të shndërrohet në kriter vendimtar në rekrutimin e vendeve të punës.

Ndërsa sipas Rexhepit, hapi i parë për t’i hequr diskriminimet e tilla është që të flasim për këto çështje (përfshirë masmediat).

Sikurse Rexhepi mendon edhe Ymeri për sa i takon diskutimit, veçse ajo potencoi se edukimi fillon që nga familja, pastaj edhe shkollat…

Vlen të theksohet se sipas OBSH-së, tri strategjitë që ndihmojnë në reduktimin ose eliminimin e diskriminimit dhe pabarazisë në bazë të moshës janë politika dhe ligji, aktivitetet arsimore edukative dhe ndërhyrjet ndër breza.

Aktivitetet edukative mund të zvogëlojnë paragjykimet nëpërmjet ofrimit të informacione dhe shembujve kundër stereotipeve.

Ndërhyrjet ndër breza mund t’i bashkojnë njerëzit (e grup moshave të ndryshme), në mënyrë që t’i reduktojnë paragjykimet dhe stereotipet ndër grupore.

Politika dhe ligji mund të trajtojnë pabarazinë në bazë të moshës dhe t’i mbrojnë të drejtat e njeriut, kudo.

Për të marrë më shumë informacione rreth kësaj teme, klikoni në linkun e mëposhtëm:

“Tash do ta bëjmë operacion në fyt”, kështu rrëfen nënë Eminja e cila kujton mirë ditën e ftohtë të 28 marsit, kur pa për herë të fundit bashkëshortin e saj.

E moshuara nga Izbica tregon për rezistencën para ushtrisë e policisë serbe që bashkëshorti i saj mos të ndahet nga kolona. Ajo po jeton me pamjet e tmerrshme dhe zërat që i përsëriten në kokë të kërcitjeve të armëve që nuk u ndalën për më shumë se 20 minuta.

Për rreth 12 muaj, Emine Dajaku bashkë me fëmijët po strehoheshin kudo, pas djegies së shtëpisë. Ajo tregon për KosovaPress se si në Izbicë ranë në tytat e armikut, ku vet u plagos e burrin ia vranë.

“Burri mu ka vra këtu në Izbicë, në opqinë jena ardh, se në ’98 na janë djegur shtëpia, tani një vit nëpër dynja duke ndejt. Burri tha duam të shkojmë në Izbicë, jena ardh. Burri ka qenë ulur në traktor na ka sjell mua, fëmijët e djalit, renë, fëmijët e mi, tha shkau shqip foli ‘qu shqiptare, çfarë po pret’. Jam quar unë, i thash çfarë të kesh punë me burrë unë jepi përgjegjësi se është i bërë operacion në kry. Tha ‘tash do ta bëjmë operacion në fyt’. Kom piskat ‘kuku’, e kam kap burrin për krahu, ma ka kërsit një shkelëm në shpinë, më ka hedhur fluturim në lloq (baltë), më ka humb vetëdija, kur u qova, piskatën rejat, çikat, u qova. Burri nuk është. Nuk ka shkuar dy minuta, kanë kërsit pushkët ‘grrr’, 20 minuta edhe më shumë pa ndalë”, rrëfen ajo për KosovaPress.

Ajo thotë se nga ajo ditë nuk e ka parë më të gjallë bashkëshortin, e bashkë me fëmijë janë nisur për Shqipëri. Gruaja e të vrarit rrëfen se policia serbe kishte hedhur tri granate në drejtim të kolonës.

“Unë jam plagosur, çika jem edhe djali i djalit. Edhe unë jam mbetur aty, çika 10 vjet më është ndarë e plaguar. Neve na kanë dërguar për Shqipëri, tri ditë e tri net duke piskatur fëmija pa hëngër e pa pi, fëmijët në shpinë deri në Shqipëri. Pak pa shkuar në Shqipëri, djali i djalit dy vjeç e kam kapur prej qafës, thash ta shoh a është i gjallë apo i vdekur, ish ngri”, shton ajo mes emocioneve.

Një grusht eshtra, siç tregon ajo, gjetën nga trupi i bashkëshortit, pesë vjet pas përfundimit të luftës.

“Nuk e kemi ditë, pesë vjet nuk e kanë gjet kufomën, duke i kërkuar. Derisa është shkuar djali i vogël në Prizren, dy herë kam shkuar edhe unë në Prizren me kërkua në bazë të rrobave, por pesë vjet. Deri në vitin 2005 i kemi gjetur një grusht eshtra”, përfundon Dajaku.

Nënë Eminja lutet edhe për ish-luftëtarët e UÇK-së, që tash e tri vjet po mbahen në Hagë. Për të njëjtit thotë se po gjykohen padrejtësisht dhe se të njëjtit dikur i mbronin popullatën civile. /kp

Gjatë fundjavës në Prishtinë do të mbahet marshi për drejtësi në mbështetje të ish- krerëve të UÇK-së që janë duke u gjykuar në Hagë, organizuar nga platforma “Liria ka emër”. Në lidhje më këtë, ideatorja e kësaj platformë deputetja e PDK-së, Eliza Hoxha, në një prononcim për Ekonomia Online ka thënë se përgatitjet për këtë marsh kanë filluar dhe se ftesa për pjesëmarrje është e hapur për të gjithë.

Sipas saj ky marsh është pa ngjyrime politike, shoqërore apo religjioze dhe se ky do të jetë vetëm një marsh solidarizimi e mbështetje për ata që janë në Hagë dhe se pjesëmarrja e gjithsecilit është e domosdoshme pasi sipas saj vendimet që do të merren në Hagë mund ta prekin edhe të ardhmen e Kosovës.

Hoxha ka thënë se janë duke u marr me përgatitje dhe se i falënderon të gjithë përkrahësit që janë duke mundësuar që ky marsh të jetë me i lehtë për t’u organizuar.

“Përgatitej veç ka nisur, këtë fillim jave jemi duke diskutuar se si ato do të distribuohen në nivel lokal sepse megjithatë ka plotë kategori shoqërore që shprehin dëshirën me ardhë por normalisht nuk kanë mundësi ose financiare ose të transportit me ardhë. Kjo është një pjesë e punës me të cilën është duke punuara një pjesë e ekipit. Në anën tjetër një falënderim special për gjithë përkrahësit qofshin edhe bizneset që në forma të ndryshme, për shembull dikush me ofrimin e shërbimeve të transportit, ose shërbimeve të tjera kanë mundësuar që ky marsh të jetë me i lehtë për tu organizuar”, tha ajo.

Ajo tha se nuk i kanë dërguar ftesa zyrtare partive tjera politike që të marrin pjesë, pasi sipas saj ftesa ka qenë e hapur, por nëse do të duhet ajo tha se do të dërgojnë edhe shkresa zyrtare që ti ftojnë partit politike që të marrin pjesë.

Hoxhaj theksoi se marshi nuk është politik, por është demonstrim i solidarizimi dhe mbështetjes për ata që janë në Hagë, pasi sipas saj vendimet që do të merren atje mund ta prekin edhe të ardhmen e Kosovës dhe të ardhme e atyre që do të lindin në një kohë tjetër.

“E treta që është po aq me rëndësi është që ne ftes zyrtare ose takim zyrtar me partitë politike nuk kemi pasur, ka qenë ftesë e hapur për të gjithë akterët dhe deri tani, është bashkangjitur edhe Partia Lëvizja për Bashkim. Dhe nëse këto ditë nuk ndodh unë besoj që do ta dërgojmë një shkresë formale, me qenë se nuk do të ishte dashur që të presim nga partitë politike, sidomos këto që janë pjesë e pushtetit dhe vendimmarrjes që të jenë pjesë e një marrshi të tillë. Sepse marshi nuk është politik, është demonstrim i solidarizimi dhe mbështetjes për ata që janë në Hagë, atje ku në fund fare nuk diskutohet vetëm e kaluara por vendimet që do të merren mund ta prekin edhe të ardhmen e Kosovës por edhe atyre që do të lindin në një kohë tjetër”.

“Mendoj pa ngjyrim partie, pa ngjyrim shoqëror dhe pa ngjyrim religjioz nuk ishte dashur që sot me mëndu se a duhet që të jemi pjesë e marshit apo jo. Atë ditë nuk do të demonstrojmë kundër as kujt, atë ditë do të marshojmë për të thirrur për një proces të drejt dhe fer, kjo është ajo ombrella që do të ishte dashur ti për bashkojë të gjithë pa dallim partie, ngjyre përcaktimi, përkatësie ose ideologjie. Kjo është ftesa jonë dhe ftesa është e hapur është publike për të gjithë akterët. Nismës i janë bashkuar tekë platforma “Liria ka Emër” plotë akterë, edhe të skenës kulturore edhe të skenës biznesore edhe të spektrit politik. Nëse është e domosdoshme që të ju dërgojmë një ftesë zyrtare edhe partive të tjera edhe atë besoj që do ta bëjmë”, tha ajo.

Ajo tha se me këtë marsh nuk e kanë për qellim që të ndikojnë në proces por që me këtë do të tregojnë një dashamirësi dhe një mbështetje morale për krerët që janë duke u gjykuar në Hagë.

“Unë nuk jam dikush që mund të kalkuloj, sepse ndonjëherë përkrahja që e marrim në media ose në media sociale mundet mos me u përputh më prezencën fizike, por që unë e shohë si një moment kyç atë ditë ne nuk do të mund as ta ndikojmë procesin, as nuk dëshirojmë që ta ndikojmë procesin, atë ditë mundemi vetëm me tregu një dashamirësi dhe një mbështetje morale për ata që janë atje që nuk i ka harruar Kosova, që Kosova i mbështet në krejt sfidën që po i kalojnë dhe nëse koritemi, koritemi ne me vetën dhe koritemi me Kosovën edhe me ata atje”, tha ajo për EO.

Marshi do të mbahet të dielën, më 2 prill, në Prishtinë në ora 14:00 . Marshi do të nisë nga sheshi “Zahir Pajaziti” dhe do të vazhdojë në drejtim të sheshit “Skënderbeu”.

Zvicra e ka nisur me fitore ciklin kualifikues për Kampionatin Evropian “Euro 2024”.

Të përzgjedhurit e Murat Yakin shënuan fitore ndaj Bjellorusisë në ndeshjen e parë të tyre në Grupin I, shkruan Express.

Kjo ndeshje u zhvillua në stadiumin “Karadorde” të Novi Sadit, teksa u mbyll me rezultatin 0:5.

Granit Xhaka ishte i vetmi shqiptar që u paraqit sonte, pasi Xherdan Shaqiri dhe Andi Zeqiri mungojnë shkaku i lëndimeve.

Mesfushori i Arsenalit la gjurmë në këtë ndeshje me një gol dhe asistim. Ai shënoi gol të bukur në minutën e 62-të, teksa asistoi pas tre minutave te goli i Zeki Amdouni.

Kapiteni i “Helvetikëve” në këtë ndeshje luajti për 66 minuta.

Tre golat tjerë u shënuan nga Renato Steffen, në minutat 4’, 17’ dhe 29’.

Zvicra tani me tre pikë prin në grup, teksa ndeshjen e radhës e luan kundër Izraelit, më 28 mars.