Category: Lajme

Dielli ka ndriçuar përmendoren e djalit të saj të vrarë, teksa pa ndalim lëmon faqet e tij. Ajo po heq mallin e Samiut përmes fotografisë aty, të cilit ia këputen rininë në moshën 20-vjeçare. E moshuara nga fshati Brovinë, ka marrë ulësen me vete për të qëndruar me orë në afërsi, ku prehet trupi i më të dashurit të saj. Mezi iu bën bashkë edhe eshtrat, pas masakrës së Mejës ku të njëjtin fat e patën edhe 376 të tjerë.

Mosha e mërzia nuk ia kanë shlyer kujtimet e tmerrshme të kësaj masakre.

Nënë Tixhja nga fshati Brovinë e Gjakovës, jeton me dhimbjen për djalin e saj, të cilin ia morën nga jeta paramilitarët serbë.

“I djalit tim është (varri) që ma kanë vrarë këtu në Mejë, sot 22-23 vjet. Ne kështu të mërzitura cdoherë. Çfarë të bëjmë…. Atëherë na qiten shkijet neve, këta i ndalen këtu, duart për mbrapa, e gjunjtë në tokë. Qaty i kemi lënë, nuk kemi guxuar me i ndal, sa atje i kemi dëgjuar krismat që i kanë vrarë aty. Tani na kanë mërthyer për Shqipëri, jemi shkuar për Prizren edhe atje patën me na vra shkijet, duke na i vendosur thikat në fyt, duke na kërkua pare, menzi jemi dalë në Shqipëri për Shqipëri”, tha ajo.

Ajo shtoi se po e ka të vështirë të jetojë me këtë dhimbje, por për ta ndryshuar këtë nuk ka mundësi.

“Vallahi po, vdekjen e djalit, të burrit, tre vëllezërve, qaty. Çka të bëjmë? Po u dashke me jetu, me qëndru, e tona me i bo”, shtoi ajo.

Në 24 vjetorin e kësaj masakre, pranë shumë varreve në Mejë, janë kujtuar edhe prindërit që lanë fëmijët me dhimbje. Mire Ndreca tregon për KosovaPress, për nënën e saj të vrarë në 27 prillin e vitit 1999.

“Se harrojmë kurrë, është ditë e paharrueshme kjo ditë. Vet të vjen merzia, kur t’i kujtojmë se si kanë shkuar. Na i kanë mbyt, na i kanë dërguar në Serbi dhe i kanë sjell pasi janë rivarrosur… Tmerr e kemi kaluar boll, nëpërmjet TV e radiove, pa e ditur, të gjithë duke ikur”, rrëfeu ajo për KosovaPress.

Shteti serb nuk kurseu as të miturit. Ajshe Avdyli po kujton 16-vjeçarin, aso kohe, Bajrushin.

“Nuk e bën as toka e as qielli sa zor është. Shumë vështirë, veç Zoti qysh e ka bërë… i kanë ndal të gjithë, neve edhe kunatin këtu në Mejë, në kolonë i kanë zhbërit prej traktorit i kanë mbledhur… As toka e as qielli nuk e bën këtë masakar çfarë është bërë në atë vend”, shtoi ajo.

Ajshja tha se institucionet nuk kanë bërë asgjë në vendosjen e drejtësisë për të gjithë të vrarët.

“Sen nuk kanë bërë, sen mbi këtë tokë nuk po bëjnë, për veti po bëjnë boll, tjetër kënd për kërkënd”, përfundoi ajo.

24 vjet më parë, 377 shqiptarë janë vrarë nga paramilitarët serbë.

Kosova ende nuk dinë për fatin e më shumë se 1 mijë e 600 personave të vrarë e të zhdukur gjatë luftës së fundit në Kosovë.

Me rastin e Ditës Ndërkombëtare të Punës më 1 maj, Komuna e Podujevës njoftoi se kjo është festë zyrtare dhe rrjedhimisht edhe ditë pushimi për bizneset.

Megjithatë, ajo që bie në sy në njoftimin e kësaj komune është se përjashtim për këtë vendim kanë shumica e bizneseve, ndër to edhe gastronomia.

Komuna tha se përjashtim nga ky njoftim kanë si vijon:

– Bizneset e hotelerisë ”dhe gastronomisë̈;

– Internet kafe, video lojëra dhe të ngjashme;

– Pikat e shitjes së derivateve;

– Barnatoret sipas kujdestarisë̈ në Zonat I, II dhe III;

– Furrat e bukës;

Ani se 1 Maji është ditë për të protestuar për të drejtat e punëtorëve, sipas këtij njoftimi, Komuna e Podujevës u ka dhënë leje numrit më të madh të punëtorëve që të punojnë edhe më 1 maj.

Ministrja e Punëve të Jashtme dhe Diasporës së Kosovës, Donika Gërvalla do të përfaqësojë Kosovën në mbledhjen e Këshillit të Sigurimit të Kombeve të Bashkuara, ku do të shqyrtohet raporti i ri gjashtëmujor nga sekretari i Përgjithshëm, Antonio Guterres.

Në mbledhjen e cila do të nisë nga ora 16:00 sipas kohës lokale në Kosovë, Gërvalla do të flas për të arriturat dhe sfidat e vendit, zhvillimet politike pas marrëveshjes së Ohrit.

“Gjatë kësaj seance, ministrja Gërvalla do t’i paraqesë të arriturat dhe sfidat me të cilat përballet Republika e Kosovës, zhvillimet politike pas marrëveshjes së Ohrit, zhvillimet e suksesshme në arenën ndërkombëtare, sukseset në fushën e ekonomisë, sundimit të ligjit si dhe t’i njoftojë pjesëmarrësit në seancë për perspektivën e përgjithshme të vendit në vitet pasuese”, thuhet në njoftim i MPJD-së.

Seanca e Këshillit të Sigurimit të OKB-së do të mbahet të enjten, më 27 prill, duke nisur nga ora 16:00 sipas orës lokale në Kosovë.

Gjykata Supreme ka informuar sot se i ka refuzuar si të pabazuara kërkesat për mbrojtje të ligjshmërisë të të dënuarit për krime lufte Goran Stanishiq, të të cilit Gjykata e Apelit ia kishte ulur dënimin nga 20 në 15 vjet burgim për vrasjen e 13 civilëve gjatë luftës në Kosovë.

“Kolegji i Gjykatës Supreme i ka refuzuar si të pabazuara, kërkesat për mbrojtje të ligjshmërisë, të mbrojtësit të dënuarit për krime lufte G.S., dhe të Prokurorit të Shtetit, të ushtruara kundër aktgjykimit të Gjykatës Themelore në Prishtinë dhe kundër aktgjykimit të Gjykatës së Apelit. Kolegji i Gjykatës Supreme, në çështjen penale kundër të dënuarit G.S. nga fshati S., komuna e L., me vendbanim në M., Republika e S., për shkak të veprës penale krimet e luftës kundër popullatës civile, nga neni 142 lidhur me nenin 22 të Ligjit Penal të Republikës Socialiste Federative të Jugosllavisë, duke vendosur sipas kërkesës për mbrojtje të ligjshmërisë, ushtruar nga mbrojtësi i të dënuarit dhe kërkesës për mbrojtje të ligjshmërisë ushtruar nga Prokurori i Shtetit, kundër aktgjykimit të Gjykatës Themelore në Prishtinë dhe aktgjykimit të Gjykatës së Apelit të Kosovës – Departamenti Special APS.nr.28/2022 datë 27.09.2022, në seancën e kolegjit të mbajtur më 16 shkurt 2023, i refuzoi si të pabazuara këto kërkesa.”, është bërë e ditur në komunikatë.

Sipas aktakuzës së ngritur nga Prokuroria Speciale, i akuzuari Goran Stanishiq, si pjesëtar i forcës policore, rezervë të Ministrisë së Punëve të Brendshme të Serbisë, në vitin 1999, gjatë luftës në Kosovë, gjatë një sulmi sistematik të forcave ushtarake paramilitare dhe policore serbe kundër popullatës civile shqiptare, në Sllovi dhe Tërbovc, ka marrë pjesë në dëbimin e popullatës civile shqiptare dhe kryerjen e vrasjeve dhe veprimeve tjera të kundërligjshme.

Në edicionin e 19-të të Panairit Ndërkombëtar të Turizmit dhe Sportit që është hapur sot në kryeqytet, po marrin pjesë mbi 100 biznese vendore e ndërkombëtare.

Zëvendësministrja e Ministrisë së Kulturës dhe Sportit, Daulina Osmani tha se përmes këtij panairi po promovohet pasuria natyrore e ujore që ka Kosova.

Osmani u shpreh e lumtur që Kosova me kryeqytetin Prishtina dhe me shtatë komuna të tjera është edhe shtet kandidat për organizmin e lojërave mesdhetare 2030.

“Kosova, mirëpo edhe i gjithë rajoni me pasuri të shumta natyrore e ujore ka hapësire jashtëzakonisht të madhe për promovimin e turizmit sportiv, mirëpo përtej kësaj Kosova nga viti në vit po shndërrohet në një lokacion adekuat, ku po mirëpret organizime të aktiviteteve të shumta e të mëdha ndërkombëtare sportive. Aktualisht Kosova me kryeqytetin Prishtina dhe me shtatë komuna të tjera është edhe shtet kandidat për organizmin e lojërave mesdhetare 2030, e cila padyshim se është një projekt që do të kërkojë mobilizim te të gjitha strukturave e sektorëve në mënyrë që të jemi të gatshëm të ofrojmë një organizim të suksesshëm në vitin 2030”, tha Osmani.

Se panairet e tilla janë mundësi e mirë për promovimin e turizmit e tha edhe kryetari i komunës së Ulqinit, Omer Bajraktari.

Bajraktari theksoi se Kosova është tregu më i rëndësishëm turistik për Ulqinin.

“Vizitat tona të shpeshta në Kosovë, përfshirë edhe vizitën e fundit së bashku me kryeministrin, Abazoviq tregojnë qartësisht rëndësinë e tregut kosovar për turizmin e Ulqinit. Kosova është tregu më i rëndësishëm turistik për Ulqinin dhe se dëshirat dhe preferencat e turisteve nga Kosova janë ato që do ta determinojnë suksesin e sezonit turistik veror në Ulqin. Prandaj, pushteti lokal i Ulqinit po bënë përpjekje të forta që në Kosovë të prezantohet sa më denjësisht të ofrojë pushime dhe eksperienca unike për çdo qytetar të Kosovës”, tha Bajraktari.

Kryetari i Komunitetit Olimpik të Kosovës, Ismet Krasniqi u shpreh i lumtur me organizimin e këtij panairi,

Krasniqi tha se organizmi i ngjarjeve vendore dhe ndërkombëtare sportive për Kosovën kanë ndikim edhe me benifitet multidimensionale të cilat përveç atyre sportive kanë edhe efekte ekonomike duke pas parasysh fokusimin te turizmi që sporti ja sjell vendit tonë.

“Është kënaqësi të jemi sërish në një ngjarje ku sporti dhe turizmi lidhin ngushtë njëra me tjetrën dhe jo rastësisht ky panair ka ndërlidhë këto dy arterie të rëndësishme. Sot Komuniteti Olimpik i Kosovës bashkë me nëntë federata sportive, të cilat kryesisht lidhen me turizmin dhe organizimin e garave ndërkombëtare janë duke paraqitur ofertat e tyre për të joshur sa më shumë bizneset, sportistet e dashamirë të sportit. Organizmi i ngjarjeve vendore dhe ndërkombëtare sportive për Kosovën kanë ndikim edhe me benifitetet multidimensionale të cilat përveç atyre sportive kanë edhe efekte ekonomike duke pas parasysh fokusimin te turizmi që sporti ja sjell vendit tonë”, tha Krasniqi.

Edhe pjesëmarrësit tjerë konsiderojnë se panairet e tilla po ndihmojnë në promovimin e bizneseve të tyre.

Një nga përfaqësueset e një hoteli në Komunën e Dragashit, Lena Piraj tha se ky panair është një shërbim shumë i mirë që të vetëdijesohen njerëzit që Komuna e Dragashit bënë shërbime të bukura, duke përfshire edhe Bjeshkët e Malit, traditat, vlerat që i ka trashëguar brez pas brezi.

“Qëllimi ynë është që të përfaqësojmë turizmin, shërbimet tona kulturore dhe turistike që bëjmë ndaj të tjerëve. Një nga arsyet që jemi ardhur në këtë panair e shohim shumë në kuadrin tonë, është se jo çdokush është i vetëdijshëm për vlerat kulturore që shërben Komuna e Dragashit. Ky është një shërbim shumë i mirë që të vetëdijesohen njerëzit që Komuna e Dragashit bënë shërbime të bukura, duke përfshirë edhe Bjeshkët e Malit, traditat, vlerat që i ka trashëguar brez pas brezi”, tha Piraj.

E për t’i prezantuar më të rejat nga ofertat turistike të Ulqinit në këtë panair, është ardhur edhe drejtori i organizatës turistike i Ulqinit, Qazim Hoxha.

Hoxha tha se panairet e tilla janë mundësi e mirë që pjesëmarrësit t’i dëgjojnë risitë e Ulqinit.

“Kjo është ajo që mundësitë që nuk i kanë dëgjuar t’i dëgjojnë risitë për çdo vit se çfarë ka ofertë të re Ulqini, me çmime, sigurime… Pra, panairet gjithmonë janë të mirëseardhura dhe ne si organizate turistike e Ulqinit i thirremi pozitivisht çdo ftese që vjen nga Kosova”, tha Hoxha.

Qëllimi i këtij panairi vazhdon të jetë promovimi i turizmit vendor dhe rajonal duke shërbyer si udhëzues i pikave dhe atraksioneve turistike

Panairi do të jetë i hapur edhe të premten në sallën “1 Tetori” në kryeqytet.

Bullgaria renditet e gjashta në botë për sa i përket angazhimit të saj për ndihmën ndaj Ukrainës si përqindje e PBB-së bullgare, tha ministri i jashtëm i përkohshëm, Nikolai Milkov në një konferencë shtypi të enjten, duke cituar informacionet nga www.statista.com.

Sipas kësaj faqeje interneti, Bullgaria ofroi 0.36% të PBB-së së saj për të ndihmuar Ukrainën midis 24 janarit 2022 dhe 15 janarit 2023, duke u renditur pas Estonisë, Letonisë, Lituanisë, Polonisë dhe SHBA-së, midis 37 vendeve në mbarë botën.

“Bullgaria qëndron mirë në lidhje me pozicionin e saj të përgjithshëm dhe ndihmën ndaj Ukrainës. Partnerët tanë na përgëzojnë për pozicionin tonë dhe për ndihmën që japim,” tha ministri i jashtëm.

Ai u shpreh kundër përdorimit të çështjeve të tilla për konsum të brendshëm. “Për shkak të zgjedhjeve në të cilat Bullgaria ka qenë tashmë dy vjet, jashtëzakonisht shumë tema të politikës së jashtme janë instrumentalizuar për konsum të brendshëm,” komentoi Milkov. Ai argumentoi se kjo dëmton efektivitetin e politikës së jashtme dhe është një faktor që dëmton konsensuset e kahershme të politikës së jashtme të këtij vendi.

Më herët gjatë ditës së sotme, në hapjen e konferencës ndërkombëtare të Forumit të Sigurisë së Sofjes me temë “Adresimi i sfidave në arkitekturën e fragmentimit të sigurisë: Luftimi i aktiviteteve hibride ruse”, Milkov tha se “paralelisht me veprimet agresive ushtarake të Rusisë, ne po përballemi me një rritje të paprecedentë të sulmeve të ndryshme hibride që synojnë të minojnë qëndrueshmërinë e Bullgarisë, dhe rrjedhimisht vlerat dhe proceset tona demokratike”.

Rusia po përdor një arsenal të plotë të teknikave hibride, instrumentalizimin e furnizimeve me energji dhe ushqim, aktivitetet kibernetike të kontrollit mbi teknologjitë e ndjeshme, intensifikimin e paparë të propagandës që synon destabilizimin e brendshëm politik të shoqërive tona – duke provokuar pakënaqësi dhe duke reduktuar solidaritetin me Ukrainën, shtoi ai./BTA/