Dyshohet se para pak minutave ka ndodhur një vrasje në Kijevë të Malishevës.
Sipas burimeve dyshohet se personi që ka mbet i vrarë është një 50 vjeçar dhe se dyshohet se sherri ka ndodhur për një parcelë.
Në vend të ngjarjes janë njësitet policore dhe hetimet po vazhdojnë.
Lajmi në përditësim…
Një burrë është arrestuar dje në Pejë pasi dyshohet se me forcë e ka detyruar një grua të konsumojë substancë narkotike në formë të cigares.
Policia ka informuar se viktima është dërguar në spital për trajtim mjekësor.
Me vendim të prokurorit, i dyshuari është dërguar në mbajtje
Gjykata Themelore në Prishtinë e ka dënuarit ish-gjykatësin Sali Berisha me 2 vjet e gjysmë burgim.
Ai akuzohej për marrjen e 2 mijë eurove ryshfet dhe posedim të revoles pa leje.
Berishës i është shqiptuar edhe dënimi plotësues ku i është ndaluar ushtrimi i funksioneve publike dhe shtetërore për tri vitet e ardhshme.
Berisha është dënuar edhe me gjobë prej 4 mijë eurosh për “marrje ryshfeti” dhe 1 mijë euro për armëmbajtje pa leje. Dënim unik me gjobe prej 5 mije euro duhet ta paguajë në afat prej 1 muaji pas plotëfuqishmërisë së aktgjykimit.
Sipas aktakuzës së ngritur më 5 shkurt 2020, nga Prokuroria Speciale, Berisha, gjyqtar në Departamentin për Krime të rënda në Gjykatën Themelore të Pejës, akuzohet se në mënyrë të drejtpërdrejtë kishte kërkuar dhe kishte pranuar përfitim në mënyrë që të veprojë në kundërshtim me detyrën e tij zyrtare.
Policia e Kosovës ka njoftuar se ka arrestuar një grua në Prishtinë, e cila dyshohet se në bashkëkryerje me disa të dyshuar të tjerë kishte mashtruar 39 persona, duke iu premtuar vende pune jashtë vendit.
Përmes raportit 24 -orësh, Policia ka bërë me dije se e njëjta është dërguar në mbajtje.
“Prishtinë 27.04.2023 – 18:25. Është arrestuar e dyshuara femër kosovare pasi në bashkëkryerje me disa të dyshuar të tjerë kishte mashtruar 39 persona duke ju premtuar vende pune jashtë vendit. Me urdhër të prokurorit e dyshuara është dërguar në mbajtje”, thuhet në raport.
Ndërmarrja “Termokos”, të premten sot ka përmbyll sezonin e ngrohjes 2022/2023.
Në ceremoninë përmbyllëse të sezonit ishte i pranishëm edhe kryetari i Prishtinës, Përparim Rama i cili teksa ka falënderuar të gjithë për punën, tha se gjatë këtij sezoni ngrohtorja nuk ka pas asnjë problem në furnizim.
Rama tregoi se ngrohja do të vazhdoj për Qendrën Klinike Universitare të Kosovës.
“Ka qenë sezoni më efikas dhe më i gjatë i gjithë historikut, kemi filluar më herët dhe po e përfundojmë dhe gjatë gjithë kësaj periudhe nuk ka pas asnjë problem dhe ka pas ngrohje tërë kohën dhe ka pas një konfort të shtuar të gjithë qytetarëve të kryeqytetit…QKU do të vazhdoj për shkak se kemi aty pacientë të cilët kanë nevojë shtesë për ngrohje dhe ajo do të vazhdojë nxehjen”, tha ai.
Kryeshefi i Termokosit, Fisnik Osmani e ka quajtur të suksesshme këtë sezon i cili u përmbyll sot dhe presin sezon edhe më të suksesshëm vitin e ardhshëm.
Ai tha se kanë pasur 11% më pak humbje gjatë sezonit të ngrohjes 2022/2023.
“Sot Termokosi po e përmbyll suksesshëm sezonin dhe po bëhemi gati të kemi një sezon edhe me të suksesshme për vitin e ardhshëm me 198 ditë aktive pa asnjë ndërprerje të funksionimit. Termokosi gjatë kësaj periudhe më 15 tetor e tutje është zgjeruar edhe me mbi 513 mijë metra katror të cilët i kemi futur në sistem dhe natyrisht po ecim tutje dhe me një performancë në aspektin teknik. Kemi 11 % më pak humbjen të ujit që i bie 4% për liferim të energjisë prej vitit paraprak. Kryeqyteti përmes Termokos po e merr karakterin e Prishtinës së gjelbër”, tha ai.
Osmani tha se aktualisht janë duke punuar në 5 projekte për zgjerim të ngrohjes.
Ndërsa, theksoi se deri tani kanë shpërndarë mbi 11 mijë matës.
“Jemi duke punuar në 5 projekte në të njëjtën kohë qytetarët e shohin që është një zgjerim i hovshëm Termokos në kryeqytet…procesi i vendosjes së matësve ose projekti HIT Save është proces që ka nis vitin e kaluar dhe është një dinamik e jashtëzakonshme mbi 11 mijë e 200 matës i kemi vendosur që nënkupton 17 mijë e 500 banesa janë në trajtim total gjatë kësaj periudhe ne po bëjmë përpjekje që të përfundojmë deri në tetor”, tha ai.
Emisari special i BE-së për dialogun Kosovë-Serbi, Miroslav Lajçak, ka zhvilluar takim me kryediplomatin grek, Nikos Dendias, për diskutimin e procesit të dialogut, si dhe për rajonin.
Për takimin dje ka njoftuar Dendias, i cili njoftoi për temën e takimit.“Gjatë një takimi të mbajtur më herët sot në Ministrinë e Jashtme të Greqisë, diskutova me Përfaqësuesin Special Miroslav Lajçak për progresin e dialogut Beograd-Prishtinë dhe perspektivën europiane të Ballkanit Perëndimor”.
Ndërkaq, sot Lajçak e ka falënderuar Dendias për interesin dhe mbështetjen e tij në përpjekjet në detyrat e tij në Ballkanin Perëndimor.
“Faleminderit i dashur Nikos Dendias për interesin e Greqisë për Ballkanin Perëndimor dhe mbështetjen për përpjekjet tona të përbashkëta në rajon”.
Emisari Lajak përgjatë procesit të dialogut ka zhvilluar shpesh takime me kryediplomatin grek.
Spanja është duke u përballur me një mot jashtëzakonisht të nxehtë prillin e këtij viti, ku temperaturat kanë arritur deri në 40 gradë celsius në disa pjesë të vendit.
Shërbimi kombëtar i motit i Spanjës tha se temperaturat do të “arrijnë vlerat tipike të verës” në pjesën më të madhe të vendit.
Në orën tre të pasdites, në Kordobë ishte 38.7 gradë ndërsa në Sevilje, 37,8 gradë.
Agjencia Shtetërore Meteorologjike tha se temperaturat ishin “jashtëzakonisht të larta” për muajin prill për shkak të një mase ajri shumë të ngrohtë dhe të thatë që vinte nga Afrika e Veriut.
Qeveria spanjolle ka kërkuar fonde emergjente nga Bashkimi Evropian për të mbështetur fermerët dhe blegtorët në qendrat bujqësore të vendit.
Aktualisht, 27% e territorit spanjoll është klasifikuar si në një thatësirë “emergjente” ose “alarm”, sipas Ministrisë së Tranzicionit Ekologjik, derisa rezervat ujore janë në 50% të kapacitetit kombëtar.
Në Kuvendin e Kosovës sot do të mbahen mbledhjet e tri komisioneve parlamentare.
Komisioni i posaçëm për shqyrtimin e kandidatëve për emërim në Gjykatën Kushtetuese, sot në ora 09:30 mbanë mbledhjen e radhës, në rend dite ka edhe Shqyrtimin e nominimeve të kandidatëve për gjyqtar në Gjykatën Kushtetuese, lidhur me përmbushjen e kushteve të parapara me Kushtetutë dhe Ligj.
Mbledhje mban edhe Komisioni për Mbikëqyrjen e Agjencisë së Kosovës për Inteligjencë, në rend dite është Raportimi i Drejtorit të Agjencisë së Kosovës për Inteligjencë, Petrit Ajeti.
Kurse, në orën 11:00 mblidhet Komisioni për Administratë Publike, Pushtet Lokal, Media dhe Zhvillim Rajonal, për ta vazhduar mbledhjen e papërfunduar, nga takimi i fundit.
Rusia ka kryer sulme ajrore ndaj qyteteve në mbarë Ukrainën, përfshirë edhe në kryeqytet, Kiev, duke vrarë të paktën pesë persona.
Në grua dhe një fëmijë trevjeçar u vranë në qytetin Dnipro, thanë autoritetet lokale.
Tre persona vdiqën në Uman pasi raketat goditën ndërtesat e banimit, thanë zyrtarët. Një ndërtesë banimi prej nëntë katesh po ashtu është dëmtuar rëndë.
Është raportuar për shpërthime edhe në qytetin Kremençuk dhe Poltava, sipas agjencisë së lajmeve, Interfax.
Në Kiev, 11 sulme me raketa dhe dy me dronë u parandaluan nga sistemi i mbrojtjes ajrore, thanë zyrtarët.
Kreu i administratës ushtarake të qytetit të Kievit tha se kjo ishte hera e parë në 51 ditë që Rusia sulmoi kryeqytetin ukrainas.
Ende nuk ka raportime për viktima të mundshme në mesin e civilëve në Kiev.
Sulmet vijnë në kohën kur besohet se forcat ukrainase po përgatisin një ofensivë ushtarake me pajisjet e reja, përfshirë tanket, që u kanë dhënë aleatët perëndimorë.
Rusia u përball me vështirësi gjati dimrit për të bërë përparim në fushëbetejë dhe që 10 muaj po tenton që të marrë kontrollin e Bahmutit, qytetit ukrainas që gjendet në rajonin lindor të Donjeckut./REL/
Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, biznese e institucione financiare që po shkaktojnë humbje e pasiguri. Hajnat në të shumtën e rasteve arrijnë që të ikin nga duart e organeve të rendit, por ka të atillë që kapen pas veprimeve hetimore të Policisë.
Kështu ka ndodhur në Lipjan, pasi një person dyshohet se kreu vjedhje në një shtëpi në fshatin Vershevc.
Burimet e Gazetës Sinjali brenda Prokurorisë kanë bërë me dije se 22-vjeçari është identifikuar pas më shumë se dy javësh në arrati dhe i njëjti është arrestuar gjatë ditës së djeshme.
Mësohet se ai dyshohet se ka vjedhur disa mjete pune në garazhin e shtëpisë dhe të njëjtat më pas i ka shitur te një person i tretë, i cili po ashtu ka dhënë dëshminë e tij në stacion policor.
I dyshuari fillimisht ka pranuar se ka kryer veprën për të cilën dyshohet, por më pas ka ndryshuar deklaratën e tij dhe ka mohuar të ketë vjedhur diçka. Në anën tjetër, personi që bleu mjetet e vjedhura, thotë se ato ia shiti i dyshuari.
Pas përfundimit të procedurave policore, Prokurori i Shtetit ka nxjerrë aktvendim që 22-vjeçarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Vjedhje e rëndë’.
Mjetet e vjedhura janë sekuestruar, ndërsa ndaj personit që i bleu ato është iniciuar rasti ‘Blerja, pranimi ose fshehja e sendeve të përfituara me kryerjen e veprës penale’.