Category: Lajme

Të enjten rreth orës 11:18, njësitet policore janë njoftuar për të shtëna me armë zjarri në Prishtinë.

Sipas raportit 24-orësh të Policisë, njësitet policore kanë dalë në vendin e ngjarjes dhe kanë gjetur e konfiskuar 4 gëzhoja, të cilat dyshohet se kanë mbetur si pasojë e të shtënave me armë zjarri nga një veturë në drejtim të një veture tjetër, të cilat ishin larguar nga vendi i ngjarjes në drejtim të panjohur.

Nuk raportohet për të lënduar, lidhur me rastin është informuar e konsultuar edhe prokurori. Rasti mbetet nën hetime.

Policia në Jashanicë të Leposaviqit ka ndaluar një veturë me vozitës serb që dyshohet se është futur në territorin e Kosovës duke iu shmangur pikëkalimeve të rregullta kufitare.

Sipas policisë, në veturë ka pasur të ngarkuara produkte ushqimore dhe tekstil, për të cilat dyshohet të jenë mallra të kontrabanduara.

“Lidhur me rastin është konsultuar prokurori i shtetit i cili ka rekomanduar që ndaj të dyshuarit të iniciohet rasti i lartcekur dhe të procedohet në procedurë të rregullt”, thuhet në raportin 24 orësh të policisë.

Policia e Kosovës ka arrestuar dy persona në Graçanicë, pasi të njëjtit dyshohet se kishin sulmuar dy zyrtarë policorë teksa po kryenin detyrën e tyre.

Në raportin 24-orësh të Policisë së Kosovës bëhet e ditur se zyrtarët policorë kanë pranuar tretman mjekësor.

“Në vendin e ngjarjes kanë dalë njësitë relevante policore dhe prokurori kujdestar i cili ndaj të dyshuarve ka caktuar masën e ndalimit për 48 orë dhe nën mbikëqyrjen e njësitit policor kompetent kanë pranuar tretman mjekësor”, thuhet aty.

Rasti është hapur si “Pengim i personit zyrtar gjatë kryerjes së detyrës zyrtare & sulm ndaj personit zyrtarë”.

Rasti nën hetime

Britania e Madhe, Franca dhe Gjermania kritikuan Iranin për shkeljen e zotimit të tij në lidhje me pasurimin e uraniumit.

Të tri vendet evropiane dhanë një deklaratë të përbashkët për Agjencinë Ndërkombëtare të Energjisë Atomike (IAEA) mbi zbatimin e angazhimeve të Iranit në kuadër të Planit të Përbashkët Gjithëpërfshirës të Veprimit (JCPoA) të mërkurën, shkruan aa, transmeton KosovaPress.

“Fatkeqësisht, veprimet e Iranit mbeten në shkelje të qartë të zotimeve të tij në JCPoA dhe synimeve të deklaruara”, thuhet në deklaratë, duke shtuar se Teherani vazhdoi të përshkallëzojë programin e tij bërthamor në “një nivel alarmues qartësisht përtej justifikimit të besueshëm civil”.

Ata gjithashtu vunë në dukje se Irani nuk i përmbushi angazhimet e tij për transparencë.

“Raportet e IAEA tregojnë se Irani ka vazhduar të akumulojë uranium të pasuruar shumë përtej kufijve të JCPoA, në 5%, 20% dhe, më alarmante, në 60%. Kjo do të thotë se pesha e rezervave të uraniumit të pasuruar të Iranit tani është mbi 18 herë më shumë se sasia e lejuar sipas JCPoA”, theksuan të tre vendet, duke thënë se do të ndërmarrin hapa diplomatikë për të “parandaluar Iranin nga zhvillimi i armëve bërthamore”.

Një grup tjetër prej 63 vendeve nënshkroi të enjten një deklaratë të përbashkët duke denoncuar mungesën e bashkëpunimit të Iranit për Marrëveshjen e Masave Mbrojtëse të NPT.

Ata i kërkuan Iranit që të “sqarojë dhe zgjidhë këto çështje në një mënyrë të kënaqshme për IAEA”.

Në një deklaratë të veçantë, SHBA u bashkua me tre vendet evropiane për të kujtuar se Irani bëri zotime më 4 mars, në lidhje me çështjet e masave mbrojtëse.

Nuk ka pasur përparim, thuhej në deklaratë dhe shtoi se: “Në vend të kësaj, Irani vazhdon në refuzimin e tij të qëllimshëm për t’u angazhuar seriozisht me agjencinë (IAEA).

Më vonë, shefi i politikës së jashtme të BE-së, Josep Borrell, lëshoi një deklaratë pasi mori një letër nga ministrat e jashtëm të Francës, Gjermanisë dhe Mbretërisë së Bashkuar në lidhje me zbatimin e Planit të Përbashkët Gjithëpërfshirës të Veprimit (JCPoA).

“Siç është kërkuar, ua kam shpërndarë letrën pjesëmarrësve të tjerë të JCPoA, përkatësisht Kinës, Iranit dhe Federatës Ruse”, tha Borrell, duke shtuar se do të konsultohet me të gjithë pjesëmarrësit e JCPoA për rrugën përpara si koordinator.

JCPoA, e njohur gjithashtu si marrëveshja bërthamore e Iranit, u nënshkrua në vitin 2015 midis Iranit dhe P5+1, pesë anëtarëve të përhershëm të Këshillit të Sigurimit të OKB-së, Kinës, Francës, Rusisë, Britanisë së Madhe dhe SHBA-së, plus Gjermanisë së bashku me BE-së.

Sipas marrëveshjes, Teherani është zotuar të kufizojë aktivitetin e tij bërthamor për qëllime civile, dhe në këmbim të kësaj, fuqitë botërore ranë dakord të heqin sanksionet e tyre ekonomike kundër Iranit.

Ambasadori i ri i Austrisë në Kosovë, Georg Schnetzer, ka qëndruar për vizitë në zyrat qendrore të misionit të EULEX.

Ai është pritur nga drejtuesi i këtij misioni, Giovanni Pietro Barbano.

“Austria vijon ta mbështesë punën dhe aktivitetet e misionit për çfarë ne kemi vlerësim t lartë”, ka shkruar Barbano.

Komisioni Qendror i Zgjedhjeve pritet të mbajë mbledhjen e rregullt.

Sipas rendit të ditës të shpërndarë për mediat nga Zëdhënësi i KQZ-së, Valmir Elezi, askund nuk është paraparë që të diskutohet lidhur me Udhëzimin Administrativ të nxjerrë nga Ministria e Pushtetit Lokal për largimin e kryetarëve nga funksioni i tyre.

Ministria e Punëve të Brendshme (MPB), ditë më parë është pajisur me një veturë të tipit LAND Range Rover, veturë kjo e cila ishte konfiskuar nga Agjencia për Administrimin e Pasurisë së Sekuestruar ose të Konfiskuar.

Kjo veturë së bashku edhe me dy të tjera, i takonin Hysri Peqanit i njohur si “Burdushi”, të cilat iu konfiskuan pas arrestimit të tij.

Drejtori i Agjencisë për Administrimin e Pasurisë së Sekuestruar ose të Konfiskuar, Fadil Bunjaku në një intervistë për Telegrafin ka thënë se vetura të tilla të konfiskuara u janë dhënë në shfrytëzim të gjitha institucioneve shtetërore, e jo vetëm MPB-së.

E lajmin që bëri bujë për veturën e Peqanit, Bunjaku e ka arsyetuar me faktin se është person publik.

“Në fakt njeriu pak më i njohur dhe ka bërë ndikim mediatik, përndryshe kerri i është dhënë ministrisë dhe normal e vozit kabineti, stafi dhe kushdo që ka nevojë. Nuk ka marr automjet vetëm Xhelal Sveçla, por të gjitha ministritë dhe institucionet tjera. Sepse përveç ligji që e lejon dhënien në shfrytëzim të institucioneve është nxjerr dhe një memorandum i bashkëpunimit me Kryeprokurorit të Shtetit, Këshillit Gjyqësorë dhe Këshillit Prokurorial ku thuhet që mjetet të jepen në shfrytëzim sa më shumë institucioneve të Kosovës për shkak të kursimeve buxhetore”, ka shpjeguar Bunjaku.

Sipas tij, vetura e konfiskuara u jepen institucioneve në shfrytëzim të përhershëm

“Ato automjete regjistrohen në emër të atij institucioni të cilit i jepet në mënyrë të përhershme”, tha ndër të tjera drejtori Bunjaku.

Ndryshe, edhe nga MPB-ja kishin konfirmuar për Telegrafin se vetura e lartpërmendur tashmë është në shfrytëzim.

“MPB për shkak të mungesës së veturave ka kërkuar nga agjencia dy vetura dhe kërkesa jonë është aprovuar për një veturë që tashmë është në përdorim nga Ministria, sipas dispozitave të parapara ligjore”, kishte thënë zëdhënësja e MPB-së, Nora Fetoshi.

Ajo pati thënë se edhe veturat e tjera të konfiskuara u jepen në shfrytëzim institucioneve të ndryshme të shtetit.

Sipas ligjeve aktuale, konfiskimi i pasurisë nënkupton marrjen e përhershme të pasurisë që është fituar në mënyrë të kundërligjshme, sipas urdhrit të formës së prerë nga gjykata kompetente apo organi tjetër kompetent, kurse sekuestrimi nënkupton marrjen e pasurisë nga organi kompetent deri në vendimin e prerë të gjykatës.

Ndryshe, Gjykata Themelore në Prishtinë më 21 gusht 2023, e ka urdhëruar Burdushin që më 18 shtator 2023 të paraqitet në Shërbimin Korrektues të Republikës së Kosovës, në Qendrën e Paraburgimit në Prishtinë, për të filluar mbajtjen e dënimit me burgim.

Grupi për Ballkan do të mbajë sot një konferencë në Prishtinë me titull “Dialogu me Serbinë: Mësime nga e kaluara për të ardhmen e procesit” nga ora 09:30.

Sipas njoftimit, në këtë konferencë do të marrin pjesë baronesha Catherine Ashton dhe ish-ambasadori amerikan në Maqedoni të Veriut, Philip Reeker.

Po ashtu, bëhet e ditur se diskutimi do të shoqërohet me promovimin e librit të ish-ndërmjetëses së BE-së në dialogun Kosovë – Serbi, Ashton, me titull “Dhe pastaj çfarë? Brenda tregimeve të diplomacisë së shekullit 21”.

Udhëheqësi i Koresë së Veriut, Kim Jong Un, vazhdoi vizitën e tij disaditore në Rusi të premten, duke shkuar në një fabrikë avionësh në qytetin lindor të Komsomolsk-on-Amur, sipas mediave shtetërore ruse, pasi të dy palët thanë se bashkëpunimi ushtarak ishte një mundësi.

Objekti është fabrika më e madhe e prodhimit të aviacionit në vend dhe ndërton dhe zhvillon avionë luftarakë, përfshirë Su-35S, raportoi media shtetërore TASS, shkruan CNN, transmeton Klan Kosova.

Kim gjithashtu pritet të udhëtojë në qytetin port të Vladivostok ku do të shikojë aftësitë ushtarake të Flotës së Paqësorit të Rusisë, tha presidenti rus Vladimir Putin për agjencinë shtetërore të lajmeve Rusia 1.

Kjo vizitë erdhi pasi Putin tha se Rusia po shqyrton dhe diskuton një bashkëpunim ushtarak me Korenë e Veriut.

Takimi pesë-orësh i së mërkurës në Kozmodromin Vostochny sinjalizoi marrëdhënie më të ngushta midis dy vendeve, që të dyja përballen me izolim ndërkombëtar – Moska për pushtimin e Ukrainës dhe Pheniani për programin e saj të armëve bërthamore dhe raketave balistike.

Kremlini tha të enjten se Putini kishte pranuar ftesën e Kim për të vizituar Korenë e Veriut dhe se ministri i Jashtëm rus Sergey Lavrov do të vizitonte gjithashtu vendin në tetor, sipas zëdhënësit Dmitry Peskov.