I pari që hodhi beton në gurthemel ishte kryeministri Albin Kurti. Nga një lopatë material ndërtimor e hodhën edhe ministrja e Arsimit, Arbërie Nagavci, e kryetari i Prishtinës, Përparim Rama.
Por, ka kaluar me shumë se një vit dhe ndërtimi i çerdhes pranë gjimnazit “Eqrem Çabej” në kryeqytet, as që ka filluar.
Fajet që punimet nuk nisën as pas 400 ditësh nga vendosja e gurthemelit, sipas ministres Arbërie Nagavci, i ka Komuna e Prishtinës. Sipas Nagavcit, edhe pse bëri kërkesë për ndërtimin e çerdhes, Komuna nuk arriti ta sigurojë lejen e ndërtimit.
Teksa Komuna e Prishtinës nuk ka kthyer përgjigje, televizioni mëson se në kohën e aplikimit për lejen ndërtimore, dokumentacioni nuk ka qenë i kompletuar.
Ndryshe, çerdhja që planifikohet të ndërtohet në lagjen “Kolovica” kap vlerën e 743 mijë euro.
Dy javë nga djegia e zyrave, Instituti i Mjekësisë Ligjore ende nuk ka një raport final mbi atë se çfarë është djegur.
Krejt çka dihet është se dëshmi nuk kishte, por vetëm dokumente të ndryshme.
“Zjarri ka përfshirë zyrat ku janë dëmtuar dokumente, nuk ka pasur dëshmi nëpër zyra. Janë dëmtuar dokumente që lidhen me autopsinë, ekzaminime, dokumente personale, dokumente të administratës, d.m.th. krejt çka gjendet në zyrën e një mjeku ligjor”, tha u.d. i drejtorit të IML-së, Ditor Haliti.
Shumica prej tyre edhe mund të kthehen, pasi siç thotë u.d. i drejtorit, Ditor Haliti, janë të ruajtura edhe në mënyrë elektronike.
“Një pjesë e dokumentacionit ka fotografi, të cilat janë të ruajtura nëpër servera të ndryshëm, të cilat mund t’i nxjerrim përsëri, dhe sigurisht që mjekët një pjesë të dosjeve i kanë të ruajtura edhe nëpër USB apo kompjuterë privatë”, tha Haliti.
Haliti thotë se ende nuk është vërtetuar nëse mustaqet e Adem Jasharit dhe gishti i Isa Boletinit, kanë qenë brenda zyrave në kohën kur u përfshinë nga zjarri.
Raport zyrtar nuk ka as mbi shkaktarët e zjarrit, ndonëse dyshimet janë te rryma.
Detaje shtesë nuk dhanë as nga prokuroria themelore.
“Ju njoftojmë se rasti gjendet në fazën e grumbullimit të provave, andaj çdo informatë e dhënë në këtë fazë, do të mund ta cenojë integritetin e procedurës”, thuhet në përgjigjen nga Prokuroria Themelore në Prishtinë.
Ndryshe, kjo është hera e dytë që Instituti i Mjekësisë Ligjore përfshihet nga zjarri.
Në mars të këtij viti, zjarr pati në dhomat ku ruhen provat e vdekjeve të dyshimta, vrasjeve apo rasteve të tjera që janë nën hetim.
Në kuadër të fushatës 16 ditë të aktivizmit kundër dhunës me bazë gjinore, në kolegjin AAB u diskutua rreth rasteve të raportimeve të dhunës, për të cilat u tha se është rritur numri.
“Siç jemi duke e parë në rastet e fundit, këtu në Kosovë dhe në regjion në gjithashtu kemi parë një ndikim negativ shkatërrues dhe afatgjatë mbi komunitetet ku dhuna po zhvillohet. Kemi parë një ngritje të raportimit të rasteve këtu në Kosovë deri 18 për qind, vitin e kaluar dhe para vitit të kaluar”, tha ambasadori i OSBE-së në Kosovë, Michael Davenport.
“Roli i profesionistëve ligjorë i juve si juristë të ardhshëm është vendimtar, pasi që do të jetë instanca e fundit e qasjes në drejtësi për viktimat. Ju ftoj ta luftoni ngacmimin seksual, se ballafaqoheni me të çdo ditë, sepse është një formë e dënueshme”, tha zv.ministri i Drejtësisë, Vigan Qorrolli.
Duke folur për rëndësinë që kanë organet e rendit, nga rrejti i grave kërkuan trajtim më serioz, për raportimet e dhunës.
VOX: Adelina Berisha nga RRGK
“Kemi raste kur për shkak të punës së keqe të prokurorit janë vra gratë, për shkak që gjyqtarit fjala juaj ka një peshë të madhe se fjala juaj do të shpëtojë një jetë ose jo”, tha Adelina Berisha nga RRGK.
Shumë studentë, profesorë e mysafirë specialë erdhën për të dëgjuar edhe rreth Konventës së Stambollit, pjesë e së cilës është Kosova.
Ky diskutim, do të shërbej në ngritjen e studentëve për çështjen kaq të ndjeshme, do të ndikojë që punën e tyre nëpër institucione shtetërorë ta bëjnë si duhet në të ardhmen…”, tha Mentor Leci, dekan i Fakultetit Juridik.
Në kuadër të fushatës ”16 ditët aktivizmit kundër dhunës me baza gjinore” janë organizuar rreth 80 aktivitete.
Gratë e mbijetuara nga dhuna do të ndihmohen me masa të veçanta për punësim.
Nëpërmjet masës së punësimit të prezantuar nga Qeveria, 70 për qind e pagës së tyre për gjashtë muaj do të subvencionohet.
“Ajo çfarë duhet të bëjnë është të drejtohen në Zyrën e Punësimit në komunën e tyre përkatëse. Pas regjistrimit, këshilltarët e punësimit do të sigurohen se ato ndërmjetësohen në biznese të regjistruara, të cilat ofrojnë pozitat të lira të punës”, tha kryeministri i Kosovës, Albin Kurti.
Pavarësimi ekonomik, sipas ministres së Drejtësisë, Albulena Haxhiu, mund të ndikojë që të dhunuarat të mos heshtin më.
“Sfida më e madhe e tyre është mungesa e një vendi të punës sikurse edhe e strehimit. Dhe sot lansohet masa për punësimin e të mbijetuarave të dhunës, ndërsa ne urojmë shumë shpejt që Gjykata Kushtetuese të japë vendimin edhe për Ligjin për Byronë për Konfiskimin e Pasurisë së Pajustifikueshme”, tha Haxhiu.
Ministri i Financave, Hekuran Murati, ka thënë se identiteti i grave që aplikojnë, do të ruhet me konfidencialitet të plotë.
“Përmes një procesi të mirë dizajnuar, që ka marrë kohë derisa e kemi gjetur atë mënyrën se si ta ruajmë edhe konfidencialitetin, por edhe identitetin e këtyre grave duke e ditur që biznese të caktuara, apo pjesëtarë të tjerë të shoqërisë nëse e kuptojnë që kemi të bëjmë me një grua, e cila është viktimë e dhunës në familje, mund të ketë pra edhe më tej raste ku mund të ketë keqtrajtim apo abuzim, apo sjellje ndoshta që nuk do të bëhej në një rast tjetër”, tha Murati.
Lansimi i kësaj mase është bërë në kuadër të “16 Ditëve të Aktivizmit Kundër Dhunës me Bazë Gjinore”. /atvlive.tv
Tash e një muaj është emëruar drejtor ekzekutiv i Institutit për Krime Lufte. Në deklarimin e tij të parë, Atdhe Hetemi tha se ky Institut ka për mision mbledhjen, arkivimin, hulumtimin dhe dokumentimin e krimeve të luftës.
Hetemi, bashkë me kryeministrin Albin Kurti, pjesëtarë të organizatave joqeveritare e zyrtarë të tjerë, morën pjesë në takimin e parë zyrtar të hapur lidhur me Institutin për Hulumtimin e Krimeve të Kryera gjatë Luftës, që pritet të funksionalizohet shpejt.
I pari i ekzekutivit i cili tha se puna e këtij Instituti nuk është fare e lehtë, por, sipas tij, krimet e luftës do të dokumentohen dhe adresohen.
Sipas tij, 24 vjet pas luftës, Kosova ende nuk e di dëmin ekonomik, emocional dhe psikologjik që ia ka shkaktuar lufta.
Diskutimin rreth institutit e mirëpresin edhe në Fondin për të Drejtën Humanitare, organizatë kjo e pavarur, e cila i dokumenton krimet e luftës tash e më shumë se 20 vjet.
Dokumentimin e krimeve të luftës, Instituti i rithemeluar do ta bëjë nga aspekti historik, ushtarak, ekonomik, juridik, ekologjik, kulturor, mjekoligjor dhe sociologjik dhe do ta krijojë fondin arkivor, si dhe përgatitjen e të dhënave statistikore.
Ministri për Komunitete, Nenad Rasiq, njoftoi për mediat në vend se INTERPOL-i ka lëshuar urdhër arrest për Milan Radojiçiqin.
Ai tha se njoftimi është lëshuar pas kërkesë së Kosovës, përmes UNMIK-ut.
Por, Prokuroria, Policia, Ministria e Punëve të Brendshme, misioni i OKB-së në Kosovë dhe INTERPOL-i, zyrtarisht, nuk konfirmuan këtë informacion.
Me arsyetimin se nuk komentojnë individët, Organizata Ndërkombëtare Policisë – INTERPOL sqaroi se nuk lëshon flet-arreste, por “njoftime të kuqe”.
Deri në publikimin e kronikës, Milan Radojçiq nuk ishte në këtë listë publike të INTERPOL-it.
Zyrtarisht, “Njoftimi i kuq” është alarm për të arrestuar përkohësisht persona të kërkuar për ekstradim, dorëzim ose veprime të njëanshme ligjore.
“Njoftimi i kuq” iu referohet personave të kërkuar nga një shtet ose nga tribunali ndërkombëtar, por jo nga INTERPOL-i dhe nuk është fletë-arrest tipik.
Pasi tregoi se njoftimi i kuq ndryshe njihet si fletë-rreshtim i kuq, profesori Fatmir Çollaku, sqaroi se ai është një instrument nënkupton gatishmërinë për të arrestuar personin nëse ai haset në vendkalime apo shtete të ndryshme.
“Për shembull fletë-rreshtimi i gjelbër, fletë-rreshtimet tjera, janë krejtësisht për faza tjera, në kuptimin e identifikimit të kryerësve të mundshëm të veprave penale për të cilët ekziston dyshimi i bazuar. Kurse në rastin konkret nuk kemi të bëjmë me dyshim, sepse bëhet fjalë për fletë-rreshtimin e kuq, që veç janë konsumuar nivelet e dyshimit, sepse personi në fjalë, i dyshuari e ka marrë përsipër atë vepër dhe nuk ka më asgjë tjetër pos arrestimit të tij”, tha profesori Çollaku.
Edhe pse vlerësoi se fletë-rreshtimi ia kufizon lirinë e lëvizjes Radojçiqit, profesori përmendi rolin e kufizuar të Kosovës për të sjellë atë para drejtësisë.
“Çka mund të bëjë Kosova këtu? Asgjë nuk mund të bëjë Kosova, sepse në Serbi nuk ka ingirenca, Kosova nuk është anëtare e INTERPOL-it. Por, është një solidarizim, është një gatishmëri e institucioneve ndërkombëtare që të jenë në frekuenca dhe në favor të sundimit të ligjit dhe luftimit të kriminalitetit”, tha Çollaku.
Milan Radojçiq mori përgjegjësinë për përgatitjen edhe udhëheqjen e sulmit terrorist-paramilitar më 24 Shtator, në Banjskë, në të cilin mbeti i vrarë rreshteri i Policisë së Kosovës, heroi Afrim Bunjaku. Pas sulmit, Radojçiq u strehua në Serbi.
Parlamenti i Danimarkës e ka ndaluar “trajtimin joadekuat” të teksteve fetare – projektligj që në këtë shtet njihet si ligji për Kuranin.
Shkelësit tani përballen me gjoba apo burgim prej dy vjetëve.
Projektligji është miratuar me 94 vota për dhe 77 kundër.
Dokumenti është miratuar pas një serie të djegieve të librit të shenjtë në Islam, veprime që kanë nxitur tensionet në shtetet myslimane.
Danimarka dhe Suedia fqinje, kanë regjistruar së fundi disa protesta, për shkak të këtyre incidenteve, çka ka rritur shqetësimet për sigurinë në Skandinavi.
Përgjatë debatit të së enjtes në parlament, shumë deputetë të opozitës janë deklaruar kundër projektligjit.
“Historia do të na gjykojë ashpër për këtë gjë, dhe me arsye… në fund do të ketë rëndësi nëse kufizimet në liri të shprehjes janë të përcaktuara prej nesh, apo nëse janë të diktuara prej jashtë”, ka thënë Inger Stojberg, lidere e demokratëve të Danimarkës.
Mirëpo, koalicioni qeveritar i qendrës së djathtë, i kryeministres Mette Frederiksen, ka thënë se kritikat ndaj fesë do të jenë ligjore, pasi ligji do të ketë vetëm ndikim margjinal.
Në fund të gushtit, kur Qeveria i ka propozuar ndryshimet, ka thënë se dëshiron të dërgojë sinjal te bota.
Edhe Qeveria në Stokholm ka thënë se është duke shqyrtuar projektligj të ngjashëm.
Si Danimarka, ashtu edhe Suedia, i kanë shfuqizuar që një kohë ligjet për blasfeminë./REL
Këto janë pamjet nga megaoperacioni i policisë i shtrirë në të gjithë vendin kundër lojërave të fatit i cili ka çuar në pranga 116 persona.
Aksioni policisë është zhvilluar me dy faza, ku krahas sendeve të nevojshme për organizimin e lojërave të fatit janë sekuestruar dhe kanabis, armë zjarri dhe municione luftarak.
Për operacionin reagoi dhe ministri i brendshëm, Taulant Balla i cili përmes një postimi përgëzoi punën e policisë.
Sipas tij kjo ishte një goditje dhe për grupet kriminale, pasi për ministrin Balla organizimi i paligjshëm i lojërave të fatit ka qenë dhe mbetet një burim financimi për elementët kriminal.
Korporata Energjetike e Kosovës (KEK), të enjten ka marrë me shqetësim lajmin për çështjet e adresuara nga Kompania Kosovare për Distribuim dhe Furnizim (KEDS) dhe Kompania Kosovare për Furnizim me Energji Elektrike (KESCO), përmes njoftimit në mjetet e informimit, në lidhje me obligimet kontraktuale ndërmjet palëve dhe KEK-ut.
Lidhur me këtë çështje, KEK ka bërë me dije se kjo kompani sipas marrëveshjes për furnizim me shumicë krijon obligim kontraktual, përkatësisht të nominojë (deklarojë), siç thuhet vetëm njësitë gjeneruese që ka në dispozicion në baza ditore dhe atë një ditë para.
“Tutje, për hirë të korrektësisë dhe qartësimit të opinionit, KEK rithekson se bazuar në kushtet e licencave të gjenerimit, obligimi i KEK-ut mbetet vetëm prodhimi i energjisë elektrike, ndërsa obligimi i KESCO është FURNIZIMI i konsumatorëve me energji elektrike. Andaj, konsiderojmë se adresimi i KESCO dhe KEDS përmes mjeteve të informimit përveç se nuk ka pasqyruar gjendjen reale, ka shkaktuar edhe huti në opinion”, thuhet në reagim.
Më tej thuhet se, KEK-u në vazhdimësi dhe me përkushtim është duke bërë përpjekje për të përmbushur planin e prodhimit të cilin e ka deklaruar paraprakisht edhe pse në përditshmëri hasim në vështirësi të shumta për shkak të vjetërsisë së njësive gjeneruese.
“Në rrethana të tilla vazhdimisht i mbajmë të informuar palët përkatëse për çdo ndryshim që identifikohet gjatë operimit me njësitë gjeneruese. Kjo për arsye se është në interesin e KEK-ut që përveç kontributit në sigurinë e furnizimit me energji elektrike, gjithashtu edhe në sigurimin e të hyrave nga shitja e energjisë elektrike për të përmbushur buxhetin e planifikuar”, thuhet në fund të reagimit.
Ndërkaq, gjatë ditës KEDS dhe KESCO përmes një njoftimi për media kanë njoftuar se po importojnë energji elektrike mbi 1 milion euro në ditë.
Në komunikatën e KEDS dhe KESCO, thuhet se gjatë këtyre ditëve, me ftohjen e temperaturave është rritur edhe konsumi i energjisë elektrike.
“Fatkeqësisht, paralel me këtë ka ndodh edhe reduktimi i prodhimit vendor”, thuhet në njoftim.
Më tej thuhet po ashtu se “Për ta mbuluar këtë gep, pra sasinë e munguar në mes të prodhimit dhe kërkesës, KEDS dhe KESCO po detyrohen të blejnë energji elektrike në vlerë mbi 1 milion euro në ditë. Në aspektin sasior të dy kompanitë bashkërisht po importojnë mbi 7500 megavat brenda 24 orëve ose deri në 400 megavat në orë”, thuhet në komunikatë.
Po ashtu sipas KEDS dhe KESCO kjo po ndodh pasi kërkesa ka arritur në mbi 1100 megavat në orë, ndërsa prodhimi vendor nuk mund të tejkalojë më tepër se 700 megavat në orë.
“Pra, po importohet në kohë piku mbi 35 për qind e energjisë elektrike që konsumohet nga konsumatorët”, thuhet në njoftim.
Është mbajtur takimi i parë zyrtar i Institutit për hulumtimin dhe dokumentimin e krimeve të kryera gjatë luftës në Kosovë. I njëjti u tha se qëllim primar do të ketë ballafaqimin me të kaluarën dhe verifikimin, dokumentimin, arkivimin dhe hulumtimin e krimeve të kryera gjatë luftës në Kosovë.
Kryeministri Albin Kurti, tha se paqja kërkon drejtësi dhe rehabilitim. Sipas tij, në Kosovë ende nuk ka ndodhur asnjëra dhe viktimat e luftës i meritojnë që të dyja.
“Qëllimi i të gjithë neve është i përbashkët, krijimi i kujtesës kolektive e cila nuk do të na shërbejë vetëm neve, por të gjitha gjeneratave që do të vijnë pas nesh. Historia është e mbushur me mësime të dhimbshme, por mbase pjesa më e rëndësishme për t’u mbajtur në mend është se paqja kërkon drejtësi por edhe rehabilitim. Në Kosovë nuk ka ndodhur asnjëra dhe viktimat e luftës i meritojnë që të dyja”, tha Kurti.
Në anën tjetër, drejtori i Institutit për hulumtimin dhe dokumentimin e krimeve të kryera gjatë luftës në Kosovë, Atdhe Hetemi, tregoi objektivat kryesore për adresimin e krimeve të kryera gjatë luftës në Kosovë.
Ai tha se ka arritur marrëveshje edhe me Agjencinë Shtetërore të Arkivave për thellim të bashkëpunimit dhe për arkivimin digjital.
“(Instituti) Ka për mision mbledhjen, arkivimin, hulumtimin dhe dokumentimin e krimeve të kryera gjatë luftës në Kosovë. Instituti do të punojë në shërbim të paqes dje drejtësisë, andaj do të sigurohet që krimet e kryera gjatë luftës në Kosovë të mos kalohen pa u dokumentuar. Kjo është detyra e institutit karshi viktimave dhe shoqërisë në përgjithësi. Për të realizuar këtë mision, Instituti do të bashkëpunojë ngushtë me institucione dhe organizata lokale dhe ndërkombëtare që kanë rol në dokumentin dhe hulumtimin e krimeve të kryera gjatë luftës. Misioni është që të kontribuoj ndjeshëm në krijimin e një shoqërie të ndërgjegjshme që themelin e paqes e ka të bazuar mbi vlerat e drejtësisë dhe përgjegjësisë për krimet e kryera gjatë luftës. Një shoqëri të vendosur drejt një të ardhme të ndritur, pasi pasojat për krimet e luftës janë të njohura dhe përgjegjësitë për to janë dënuar në përputhje me ligjin. Kjo rrugë siguron fuqizimin e mëtejmë të Kosovës si shtet demokratik”, theksoi Hetemi.
Megjithatë, kryeministri Albin Kurti tha se do të jetë e vështirë për dokumentimin e krimeve të kryera gjatë luftës në Kosovë, pasi, sipas tij, njerëzit janë të lodhur, viktimat kanë humbur besimin në sistem dhe se gjeneratat po vdesin përditë dhe kështu po humbet kujtesa parësore e luftës.
“Askush nuk duhet dhe nuk mund të pretendojë se lehtësisht mund të arrijmë të zgjidhim krejt problemet që janë shkaktuar që 24 vite. Do të jetë e vështirë, shumë e vështirë. Njerëzit janë të lodhur, viktimat kanë humbur besimin në sistem, gjeneratat po vdesin përditë dhe kështu po humbet kujtesa parësore e luftës. Ky është një rrezik i madh që na kanoset dhe të cilën nuk guxojmë të lejojmë të ndodh. Duhet të sigurohemi që të bëjmë më të mirën që mundemi që të adresojmë të gjithë atë çka ka ndodhur gjatë luftës së fundit në Kosovë”, tha Kurti.
Pas fjalimeve kryesore, ky takim vazhdoi i mbyllur për medie, ku të pranishëm ishin edhe ministrja e Drejtësisë, Albulena Haxhiu, ministri i Kulturës, Hajrulla Çeku dhe përfaqësues të tjerë.
Kryeministri Albin Kurti së fundmi e ka emëruar drejtor të Institutit për hulumtimin dhe dokumentimin e krimeve të kryera gjatë luftës në Kosovë, Atdhe Hetemin.
