Category: Lajme

Zyrtari i LDK-së, Muhamet Hamiti, ka reaguar pas vendimit të Qeverisë në detyrë për ndarjen nga 100 euro për disa kategori të shoqërisë.

Ai ka bërë me dije se Albin Kurti dhe VV-ja po e bëjnë rrush e kumbulla buxhetin për pushtet të vetin.

Në profilin e tij në Facebook, Hamiti ka shkruar se pushteti aktual nuk bën buxhet zhvillimi sepse nuk dinë ta zhvillojë Kosovën.

“Po e bëjnë rrush e kumbulla buxhetin për pushtet të vetin. Për pushtet të vetin e bëjnë edhe korrupsionin masiv qeveritar. Mijëra tenderë njëburimorë për këtë hesap i japin. Kurti me VV-në e tij të majtë nuk bëjnë buxhet zhvillimi sepse as dinë as duan ta zhvillojnë Kosovën, siç u pa në këto 5-6 vitet e tyre në pushtet. Kosova e varfër është baza e pushtetit të tyre. I varfërojnë dhe i indoktrinojnë njerëzit për t’i nënshtruar dhe sunduar. Në prag të zgjedhjeve – për ta ruajtur pushtetin e vet – u japin lëmoshë. Kjo është teknologjia e tyre e pushtetit”, ka shkruar ai, duke dhënë detaje tjera.

“Qytetarët tanë le t’i marrin paratë që prej buxhetit të shtetit Qeveria e Vetëvendosjes po ua jep me synimin që ta marrë në këmbim votën e tyre. Mirëpo, për mirëqenien e vet afatgjatë, për të mirën e shtetit të vet, qytetarët duhet t’ua refuzojnë votën përbuzësve të Kosovës që e duan pushtetin por jo shtetin. Do t’u kujtohet qytetarëve sigurisht që Vetëvendosja e Kurtit është i vetmi formacion politik shqiptar që nuk e ka festuar shpalljen e pavarësisë së Kosovës më 17 shkurt 2008”, ka shkruara ai.

Kryetar i Aleancës për Ardhmërinë e Kosovës (AAK), Ramush Haradinaj ka mbështetur banorët e Rugovës, duke kundërshtuar ndalimin e transportit të materialit ndërtimor në Bjeshkët e Nemuna.

Përmes një postimi në Facebook, ai tha se vendimi dëmton jetën e banorëve dhe pengon zhvillimin e tyre.

“Qëndroj në mbështetje të plotë të kërkesave të drejta të banorëve të Rugovës, të cilët me të drejtë po kundërshtojnë vendimin absurd për ndalimin e transportit të materialit ndërtimor në Bjeshkët e Nemuna. Nuk mund të mbrohet natyra duke dënuar njerëzit që jetojnë aty brez pas brezi, duke ua pamundësuar ndërtimin e shtëpive, zhvillimin e bizneseve familjare dhe përmirësimin e kushteve të jetesës.

Rugova nuk është një zonë e zbrazët në hartë. Është një trevë e gjallë, me 13 fshatra, me familje punëtore që jetojnë çdo ditë me sfidat e mungesës së infrastrukturës dhe kërkojnë vetëm mundësinë për të zhvilluar pronën dhe jetën e tyre”.

Qeveria në detyrë e Republikës së Kosovës ka mbajtur sot mbledhjen e rregullt, në të cilën ka miratuar një sërë vendimesh që përfshijnë politika sociale, ekonomike dhe administrative.

Në këtë mbledhje, ekzekutivi ka miratuar Raportin vjetor mbi Inspektimet, i cili sipas Qeverisë pasqyron angazhimin për forcimin e sistemit inspektues, rritjen e efikasitetit dhe profesionalizmit, si dhe përmirësimin e koordinimit ndërmjet institucioneve inspektuese në nivel qendror dhe lokal.

Po ashtu, është miratuar vendimi për emërimin e Komisionit të Pranimit për pozitën e Drejtorit Ekzekutiv të Agjencisë së Investimeve dhe Eksportit.

Qeveria në detyrë ka miratuar edhe kërkesën për shpalljen me interes publik të bartjes së pronës komunale në pronësi të Ministrisë së Industrisë, Ndërmarrësisë, Tregtisë dhe Inovacionit, me qëllim zhvillimin e Parkut Industrial dhe Teknologjik në Komunën e Gjilanit.

Në kuadër të masave sociale, është miratuar ndarja e 1 milion eurove për zbatimin e Masës 3.4 – Kuponë ushqimi për familjet në nevojë, pjesë e Pakos së Ringjalljes Ekonomike.

Gjithashtu, është miratuar vendimi për emërimin e Komitetit për Partneritet Publiko-Privat, si dhe është shqyrtuar kërkesa e Ministrisë së Industrisë, Ndërmarrësisë, Tregtisë dhe Inovacionit për shpronësimin e pronave ish-shoqërore “Virgjinia” dhe “Metaliku”, të cilat preken nga ndërtimi i “Zonës Industriale” në Komunën e Gjakovës.

Një nga vendimet kryesore të mbledhjes ishte miratimi i Pakos për Përballje me Inflacionin 2.0, e cila parasheh disa masa mbështetëse për kategori të ndryshme të qytetarëve.

Sipas vendimit, pakoja përfshin mbështetje të njëhershme për përfituesit e skemave pensionale, mbështetje për fëmijët përfitues të shtesave për fëmijë, si dhe mbështetje për të punësuarit me të ardhura mujore nën 1,000 euro, të deklaruar në muajin prill dhe që nuk janë pjesë e listës së pagave të institucioneve buxhetore.

Në këtë kategori përfshihen të punësuarit në sektorin privat, organizatat joqeveritare, ndërmarrjet publike dhe kategori të tjera jashtë organizatave buxhetore.

Po ashtu, mbështetje parashihet edhe për studentët aktivë dhe të rregullt në vitin akademik 2025/2026 në institucionet e arsimit të lartë në Kosovë, të cilët plotësojnë kriteret e përcaktuara.

Me pankarta në duar dhe me mesazhe si “Stop padrejtësive ndaj trevës së Rugovës”, “Prona është e shenjtë” dhe “Rugova jashtë parkut”, qytetarë kanë nisur protestën në Prishtinë para objektit të Ministrisë së Mjedisit dhe Planifikimit Hapësinor.

Protesta, e cila nuk është e para e këtij lloji, po mbahet në shenjë kundërshtimi ndaj vendimit për pezullimin e punimeve dhe shërbimeve ndërtimore në Rugovë.

Organizator i protestës është Idriz Kurtbogaj, ndërsa pjesëmarrësit janë ftuar që protesta të zhvillohet në mënyrë të qetë dhe dinjitoze, me synim mbrojtjen e të drejtave të banorëve të Rugovës.

Kryeministri në detyrë Albin Kurti ka emëruar Driton Hysenin në pozitën e zëvendësministrit në Ministrinë e Mjedisit dhe Planifikimit Hapësinor.

“Kryeministri në detyrë Kurti e uroi z. Hyseni për detyrën e re dhe i dëshiroi suksese në përmbushjen e përgjegjësive të reja”, tha Zyra e Kryeministrit në njoftim.

Oda Ekonomike Amerikane në Kosovë ka shprehur shqetësim lidhur me, siç e quan, varësinë në rritje nga masat e njëhershme të mbështetjes financiare si përgjigje ndaj sfidave ekonomike dhe presioneve të inflacionit, duke vlerësuar se këto masa ofrojnë lehtësim të përkohshëm dhe nuk adresojnë faktorët strukturorë për zhvillim të qëndrueshëm.

Në një reagim të publikuar më 22 maj 2026, Oda Amerikane thotë se, ndonëse mbështetja e kategorive të cenueshme dhe ruajtja e fuqisë blerëse janë objektiva të rëndësishme, pagesat e përkohshme nuk sjellin efekt afatgjatë.

“Masat e përkohshme financiare ofrojnë vetëm lehtësim afatshkurtër dhe nuk adresojnë faktorët e nevojshëm strukturorë për zhvillim të qëndrueshëm ekonomik”, thuhet në deklaratë.

Oda Amerikane vlerëson se masat e fokusuara kryesisht në stimulimin e konsumit afatshkurtër mund të kenë ndikim të kufizuar, sidomos në një ekonomi si ajo e Kosovës, ku rritja e konsumit shpesh përkthehet në rritje të importeve.

“Masat të cilat fokusohen kryesisht në stimulimin e konsumit afatshkurtër rrezikojnë të prodhojnë ndikim të kufizuar afatgjatë ekonomik… ku një pjesë e konsiderueshme e rritjes së konsumit përkthehet në rritje të importeve, e jo në shtim të prodhimit vendor dhe të investimeve”, thekson Oda.

Sipas saj, masat e tilla mund të kufizojnë edhe hapësirën buxhetore për iniciativa dhe investime me ndikim më të madh ekonomik dhe me përfitime më të gjera e më afatgjata.

Në vend të pagesave të njëhershme, Oda Amerikane kërkon zhvendosje të fokusit drejt investimeve në infrastrukturë dhe politikave që forcojnë sektorin privat, duke përmendur infrastrukturën e transportit dhe energjisë, infrastrukturën digjitale, arsimin dhe zhvillimin e fuqisë punëtore.

“Investimet strategjike… krijojnë kushte që u mundësojnë bizneseve të zgjerojnë aktivitetet e tyre dhe të rrisin produktivitetin”, thuhet më tej.

Oda Amerikane thekson se fuqizimi i sektorit privat ka ndikim më të gjerë dhe më të qëndrueshëm, pasi një sektor privat më konkurrues, sipas saj, krijon vende të reja pune, ndikon në rritjen graduale të pagave dhe përmirësimin e kushteve të punës.

Në përfundim, Oda rithekson se prosperiteti i qëndrueshëm, sipas saj, arrihet përmes politikave që rrisin konkurrueshmërinë dhe krijojnë mjedis më të favorshëm për zhvillimin e bizneseve, punësim të qëndrueshëm dhe standard më të mirë jetese.

Një studim i ri global ka zbuluar se afro 1.2 miliardë njerëz në mbarë botën kanë jetuar me çrregullime mendore gjatë vitit 2023, duke shënuar një rritje prej mbi 95 për qind krahasuar me vitin 1990.

Sipas hulumtimit të publikuar në revistën prestigjioze “The Lancet”, ankthi dhe depresioni janë çrregullimet më të përhapura dhe me rritjen më të madhe në dekadat e fundit. Studiuesit paralajmërojnë se krizat globale, pasiguria ekonomike, konfliktet, pandemia Covid-19 dhe izolimi social kanë ndikuar ndjeshëm në përkeqësimin e shëndetit mendor.

Studimi analizoi të dhëna nga 204 shtete dhe territore, duke përfshirë 12 lloje të çrregullimeve mendore, si depresioni, ankthi, bipolariteti, skizofrenia, autizmi dhe ADHD.

Ekspertët theksojnë se të rinjtë, veçanërisht grupmosha 15 deri në 19 vjeç, po preken më shumë se kurrë më parë. Sipas tyre, kjo periudhë është vendimtare për zhvillimin emocional dhe social, ndërsa ndikimi i stresit, rrjeteve sociale dhe pasojave të pandemisë vazhdon të jetë i madh.

Autorët e studimit kanë bërë thirrje për investime urgjente në shërbimet e shëndetit mendor dhe qasje më të lehtë në trajtim, duke paralajmëruar se sistemet shëndetësore nuk po ecin me ritmin e rritjes së rasteve.

Ministri për Evropën dhe Punët e Jashtme, Ferit Hoxha, ka njoftuar se aktivisti shqiptar Baki Goxhaj, pjesëmarrës në flotiljen “Global Sumud” dhe që ishte ndaluar nga Izraeli është tashmë rrugës për në Shqipëri.

Përmes një postimi në platformën X, Hoxha bëri të ditur se institucionet shqiptare kanë ndjekur çështjen që nga momenti i parë i sinjalizimit, në koordinim me autoritetet izraeliteSipas ministrit, strukturat e Shërbimit të Jashtëm, në bashkëpunim me institucionet e tjera shqiptare, kanë qenë në komunikim të vazhdueshëm për garantimin e të drejtave të shtetasit shqiptar.

“Ky rast është një tjetër dëshmi e përkushtimit të përditshëm dhe e punës profesionale të Shërbimit të Jashtëm, përfshirë #përfaqësive tona #diplomatike dhe #konsullore, për t’u gjendur pranë qytetarëve shqiptarë në çdo kohë dhe në çdo rrethanë, me përgjegjësi, profesionalizëm dhe përkushtim të plotë institucional”, shkruan ministri Hoxha.

Postimi i ministrit

Shtetasi shqiptar, z. Baki Goxhaj, pjesëmarrës në flotiljen “Global Sumud”, është tashmë rrugës për në atdhe.

Që në momentin e parë të sinjalizimit, strukturat e #Shërbimit të Jashtëm, në bashkërendim me institucionet e tjera shqiptare kanë ndjekur pa ndërprerje çështjen, në komunikim të vazhdueshëm me autoritetet izraelite.

#Shqipëria ka qenë e qartë dhe konsistente në kërkesën e saj për respektimin e plotë të të drejtave të shtetasit shqiptar, në përputhje me të drejtën ndërkombëtare dhe normat humanitare, duke reaguar kundër çdo forme trajtimi të papranueshëm.

Ky rast është një tjetër dëshmi e përkushtimit të përditshëm dhe e punës profesionale të Shërbimit të Jashtëm, përfshirë #përfaqësive tona #diplomatike dhe #konsullore, për t’u gjendur pranë qytetarëve shqiptarë në çdo kohë dhe në çdo rrethanë, me përgjegjësi, profesionalizëm dhe përkushtim të plotë institucional.

Ky është misioni ynë: të përfaqësojmë e mbrojmë interesat e Republikës së Shqipërisë dhe ato kombëtare, të jemi pranë #qytetarëve shqiptarë, veçanërisht në momentet kur ata kanë më shumë nevojë për mbështetjen, kujdesin dhe angazhimin e shtetit të tyre.