Category: Lajme

Sezoni i katërt i projektit NLB Korniza e Mbështetjes fillon sot. Grupi NLB po ofron mundësi për kompanitë rajonale të cilat – si ne – po përdorin idetë e tyre për të krijuar gjurmë më të mira. Projekti, i cili ka përfshirë qindra kompani rajonale në tre sezonet e fundit, këtë herë është në kërkim të kompanive të vogla dhe të mesme nga rajoni ynë, që po trajtojnë çështje urgjente sociale me idetë, risitë dhe operacionet e tyre të biznesit.

Në Grupin NLB, ne besojmë se sfidat kryesore me të cilat po përballemi sot mund të adresohen vetëm së bashku. Secili prej nesh duhet të marrë pjesë dhe të kontribuojë në mënyrë aktive në zgjidhjen e tyre. Por për ta bërë këtë, së pari duhet të krijojmë kushtet sociale në të cilat secili mund të përmbushë potencialin e tij.

Kjo është arsyeja pse NLB Korniza e Mbështetjes këtë vit po kërkon kompani dhe projekte inovative që përmirësojnë dhe pasurojnë shoqërinë tonë dhe trajtojnë sfida të tilla si: përdorimi i tepërt i teknologjive digjitale tek të rinjtë, dhuna, shkeljet e të drejtave të njeriut, barazia gjinore, varfëria, si dhe sfidat e paraqitura nga demenca apo sëmundjet e tjera të moshuarve.

NLB Korniza e Mbështetjes është për entuziastët rajonal, vizionarët dhe optimistët e palëkundur që besojnë në rajonin tonë, në njerëzit dhe në një cilësi më të mirë të jetës.

“Zhvillimi i qëndrueshëm ka pasur një rëndësi të veçantë për Grupin NLB vitet e fundit. Ne po përpiqemi ta integrojmë atë në mënyrë kuptimplote në aktivitetet dhe programet tona – në operacionet tona të përditshme, në zgjidhjet që hartojmë për klientët tanë, në kujdesin që japim për punonjësit tanë dhe në vendimet tona të biznesit. Ne jemi të vetëdijshëm për përgjegjësinë tonë dhe duam të japim shembull, kjo është arsyeja pse ne po hapim dhe promovojmë çështje të qëndrueshmërisë në rajon me projekte të tilla si NLB Korniza e Mbështetjes,” theksoi Blaž Brodnjak, CEO në NLB, në fillimin e sezonit të katërt të projektit. “Pasi kemi trajtuar çështjet mjedisore intensivisht në vitet e fundit, çështjet sociale kanë qenë një sfidë në rritje, dhe kjo është arsyeja pse ato meritojnë më shumë vëmendje dhe mbështetje. Idetë dhe projektet me të cilat jemi njohur deri më tani përmes Kornizës së Mbështetjes gjithmonë na kanë bërë përshtypje. Është vërtetë e mahnitshme se sa shumë potencial dhe energji fshihet në rajonin tonë, të cilin ne po e kthejmë gjithashtu në një shtëpi plot me mundësi përmes projekteve të tilla”, shtoi ai.

Aplikimi është i hapur deri më 10 Mars

Kompanitë me projekte të suksesshme, si dhe ato kompani që janë ende duke zhvilluar idetë e tyre inovative në fushën e biznesit të qëndrueshëm, ftohen të aplikojnë deri më 10 mars 2024. Formulari i aplikimit me udhëzime gjendet këtu: www.nlb-kos.com/korniza

Dhjetë idetë më të mira të biznesit nga secili treg ku operon Grupi NLB, Sllovenia, Kosova, Banja Lluka, Bosnja dhe Hercegovina, Mali i Zi, Maqedonia e Veriut dhe Serbia, do të përzgjidhen për raundin final. Finalistët në secilin treg do të përfitojnë kushte preferenciale për financim dhe shërbime tjera bankare. Gjithashtu, për finalistët do të ofrohet edhe mbështetje në komunikim.

Fituesit e sezonit të katërt të projektit NLB Korniza e Mbështetjes do të shpallen dhe do të prezantohen më 9 maj në Ditën e Investitorëve të Grupit NLB në Lubjanë. Projekti më i mirë do të shpërblehet me një çmim prej 50,000€, projekti në vendin e dytë me 30,000€ dhe projekti në vendin e tretë me 20,000€.

Ju mund të lexoni më shumë për kushtet e përgjithshme këtu.

Emisari i Bashkimit Evropian për dialogun Kosovë – Serbi, Miroslav Lajçak, në Beograd të Serbisë është takuar me presidentin e këtij vendi, Aleksandër Vuçiq.

Presidenti serb, Aleksandër Vuçiq takimin me Lajçakun e ka vlerësuar si konstruktiv dhe shumë korrekt.

“Vura në dukje domosdoshmërinë për formimin e Asociacionit të komunave me shumicë serbe, për mbajtjen sa më të shpejtë të zgjedhjeve lokale në veri të Kosovës dhe kërkova mbështetjen e BE-së në ndalimin e provokimeve të mëtejshme që vijnë nga Prishtina. Ritheksova gatishmërinë e Republikës së Serbisë për të përmbushur detyrimet e saj, në përputhje me marrëveshjet ligjore ndërkombëtare, duke respektuar Kushtetutën e Republikës Serbe dhe Kartën e OKB-së”, ka shkruar në Vuçiq në Facebook.

Komisioni Qendror i Zgjedhjeve (KQZ), tashmë e ka filluar procesin e verifikimit të nënshkrimeve në peticionin e organizuar në katër komunat veriore, ku kërkohet shkarkimi i kryetarëve aktual.

Zëdhënësi i KQZ-së, Valmir Elezi, për Dukagjinin ka thënë se po verifikohet nëse personat që janë nënshkruar kanë të drejtë vote në komunën përkatëse.

“Komisioni Qendror i Zgjedhjeve ka filluar procesin e verifikimit të nënshkrimeve të mbledhura në peticionin e organizuar në komunat: Mitrovicë e Veriut, Zveçan, Leposaviq dhe Zubin Potok. KQZ, në përputhje me legjislacionin në fuqi, do të verifikojë këto lista me nënshkrime, pra nëse personat që kanë nënshkruar janë qytetarë me të drejtë vote në komunën përkatëse”, tha ai.

Elezi tha se ende nuk dihet se kur do të përfundoj procesi i verifikimit, derisa shtoi se në momentin që përfundohet do ta njoftojnë Ministrinë, kryesuesit e kuvendeve komunale, kryetarët e komunave dhe grupet nismëtare.

“Sigurisht se ky proces do të na marrë kohë pasi të dhënat që i kemi pranuar janë të mbledhura në format fizik, andaj nuk mund të jap ndonjë datë të saktë, por pas përfundimit të tij, do të njoftojmë Ministrinë, Kryesuesit e Kuvendeve Komunale, Kryetarët e Komunave dhe Grupet Nismëtare. Natyrisht se përgjigja e KQZ-së do të bëhet edhe publike”, tha ai.

Qeveria e Bullgarisë propozoi heqjen e tarifave të shkollimit për studentët ende të pa diplomuar dhe studentët e doktoraturës në universitetet shtetërore të regjistruar në vendet e subvencionuara nga shteti. Për këtë qëllim, ndryshimet në Aktin e Arsimit të Lartë do të nisin dhe do të ngarkohen për diskutim publik në strategy.bg më vonë gjatë ditës, tha të hënën zyra e shtypit e qeverisë. Heqja e tarifave do të lehtësojë aksesin në arsimin e lartë për të gjithë qytetarët bullgarë, pavarësisht nga statusi i tyre social dhe mundësitë financiare.

Shpenzimet e shkollimit do të sigurohen nga shteti, shpjegoi më vonë gjatë ditës kryeministri Nikolaj Denkov. Ndryshime të tilla janë duke u bërë prej disa vitesh, shtoi ai.

Arsimi ka qenë gjithmonë prioritet kombëtar dhe me ndryshimet e fundit kushtetuese është shpallur vlerë kombëtare, thuhet në komunikatë. Masa është një vazhdimësi e politikës së synuar të qeverisë për të siguruar arsim të aksesueshëm, gjithëpërfshirës dhe cilësor. Masa gjithashtu mbështet luftën e qeverisë kundër krizës demografike.

Heqja e tarifave të shkollimit në universitetet shtetërore do t’i bënte ato më tërheqëse për studentët që hezitojnë nëse duhet të vazhdojnë shkollimin jashtë vendit apo në Bullgari.

Duke hequr totalisht tarifat e doktoratës, më shumë të rinj do të zgjidhnin të ndiqnin një karrierë në shkencë dhe të ndërtonin një karrierë akademike.

Masa do të hyjë në fuqi këtë vit akademik. Ndryshimet e propozuara parashikojnë gjithashtu që Këshillat Akademikë të universiteteve shtetërore të vazhdojnë të përcaktojnë tarifat e aplikimit, por ato nuk do të duhet më të miratohen me vendim të Këshillit të Ministrave./BTA/

Prodhimet e dhjetë kompanive nga Kosova do të promovohen në panairin “Stockholm Furniture Fair”, në Suedi.

Ministria e Industrisë, Ndërmarrësisë dhe Tregtisë njofton se prodhimet nga industria e drurit të dhjetë kompanive nga Kosova nga data 06 – 10 shkurt 2024, do të promovohen në Panairin ndërkombëtar “Stockholm Furniture Fair”, që do të mbahet në Stockholm të Suedisë.

“Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), në bashkëpunim me Shoqatën e Përpunuesve të Drurit në Kosovë (SHPDK) dhe projektin Fostering Employment and Groëth Opportunities (FEGO), kanë siguruar hapësirën ekspozuese 290 m2 në këtë panair për kompanitë vendore pjesëmarrëse nga industria e drurit. Ky panair është një mundësi e mirë për kompanitë kosovare që krahas promovimit të produkteve, të njihen me trendet e industrisë ndërkombëtare dhe të lidhin marrëveshje bashkëpunimi me kompani të jashtme, me synim rritjen e eksportit. Prodhimet e dhjetë kompanive nga Kosova nga industria e drurit në Panairin “Stockholm Furniture Fair” do të jenë të ekspozuara në shtandin C07:42, C07:43”, thuhet në njoftim.

Kryeministri i Kosovës, Albin Kurti, i shoqëruar nga ministrja e Arsimit, Shkencës, Teknologjisë dhe Inovacionit, Arbërie Nagavci, ministrja e Industrisë, Ndërmarrësisë dhe Tregtisë, Rozeta Hajdari dhe ministri i Kulturës, Rinisë dhe Sportit, Hajrulla Çeku, së bashku me deputetë të Kuvendit e aktivistë, vizitoi për ngushëllime familjen e profesorit dhe akademikut të ndjerë, Feriz Krasniqi.

Duke shprehur ngushëllimet e tij, kryeministri Kurti tha se profesor Feriz Krasniqi jetoi për arsimin dhe shkencën.

“Ai do të kujtohet gjithmonë me ndjenja të thella respekti dhe mirënjohje që me aq përkushtim i udhëhoqi proceset e ndërtimit dhe ngritjes së Universitetit të Prishtinës në dekadën e parë të tij, dhe me mbresa pozitiviteti dhe dashamirësie, si një akademik me integritet dhe dinjitet të lartë”, citohet Kurti në komunikatën e Zyrës së Kryeministrit.

Pas mbarimit të dëshmisë së dëshmitarit të 42-të, në Dhomat e Specializuara të Kosovës (DhSK) në Hagë, ka filluar dëshminë dëshmitari i 43-të i Zyrës së Prokurorit të Specializuar (ZPS), cili mban kodin W04870 në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Ndonëse seanca ishte private, DhSK ka njoftuar se dëshmia e këtij dëshmitari ka të bëjë me vrasjen e paligjshme të një viktime, e cila pretendohet se është bërë pas arrestimit dhe mbajtjes nga anëtarë të UÇK-së në zonën e Llapit, raporton “Betimi për Drejtësi”.

Ky dëshmitar është me masa mbrojtëse dhe është duke u marrë në pyetje nga përfaqësues të Zyrës së Prokurorit të Specializuar.

Para se të niste dëshmia e këtij dëshmitari, avokati i Veselit, Ben Emmerson kërkoi që të kalohet në seancë private për të diskutuar një çështje që ndërlidhet me dëshmitarin, i cili do të dëshmojë pas këtij të tanishmit.

Pas kësaj, e vetmja gjë që u bë në seancë publike ishte prezantimi i disa dokumenteve nga ZPS-ja, ku iu kërkua dëshmitarit që të konfirmojë se a qëndron prapa atyre përmbajtjeve.

Këto material,e u pranuan si prova me urdhër të kryetarit të trupit gjykues, Charles Smith III.

Me arsyetimin që të mbrohet identiteti i dëshmitarit, seanca kaloi sërish në sesion privat dhe si e tillë është duke vazhduar.

Kryetari i Prishtinës, Përparim Rama, nga ky muaj do ta marr pagën me rritje.

Paga e tij mujore do të rritet për 75 euro.

Me hyrjen në fuqi të koeficientit të ri të pagave prej 110 euro, kryetari Rama do të marr pagë mujore 1 mijë e 650 euro.

Deri më tani paga e Ramës ishte 1 mijë e 575 euro.

Ish-kryeministri i Kosovës, Isa Mustafa, thotë pezullimi i Rregullores për ndërprerjen e përdorimit të dinarit serb tani është një sfidë shtesë për Qeverinë.

Mustafa thekson se valutat e tjera përdoren në Kosovë, por të konvertuara në euro dhe, sipas tij, kjo është rregullore që ka ekzistuar kohë më parë.

“Valutë zyrtare në Kosovë është euro. Valutat tjera përdoren, por të konvertuara në euro. Kjo rregull nuk është se është përcaktuar tani nga Bordi i Bankës Qendrore të Kosovës, por ka ekzistuar edhe më parë”, thotë Mustafa.

Mustafa e quan paradoksale pjesën kur thuhet se në një pjesë të vendit mundet edhe euro edhe dinari të jenë mjet pagese.

“Pezullimi i Rregullores për ndërprerjen e përdorimit të dinarit serb tani është një sfidë shtesë për Qeverinë, sepse është paradoksale të thotë se në një pjesë të vendit mundet edhe euro edhe dinari të jenë mjet pagese”, tha Mustafa.

Ndërsa për kërkesën e shteteve të QUINT-it, Mustafa thotë se nuk ka qenë e nevojshme të bëhej.

Sipas tij, çështja e dinarit s’ka vend as në Bruksel në tryezën e bisedimeve.

“As QUINT s’do duhej ta shtronte një kërkesë të tillë. Mënyra e zbatimit është çështje që do duhej kordinuar me partnerë. Por mendoj se nuk ka vend që kjo çështje të diskutohet në Bruksel”, tha Mustafa për GazetaBlic.

Kujtojmë se, ditë më parë, Bordi i Bankës Qendrore të Kosovës ka miratuar rregulloren e re për Operacionet me Paratë e Gatshme.

Sipas kësaj rregulloreje, valuta e vetme që lejohet të përdoret për kryerje të transaksioneve të pagesave me para të gatshme dhe në sistemin e pagesave në Kosovë është euro.

Pas shumë reagimeve për këtë rregullore që ndalon dinarin serb në Kosovës, shtetet e QUINT-it kanë kërkuar pezullim e zbatimit të kësaj rregulloreje.

“Pas një shkëmbimi për këtë çështje me Kryeministrin të premten, QUINT-i kërkon pezullimin e zbatimit të rregullores për të mundësuar një periudhë mjaft të gjatë tranzicioni dhe për komunikim të qartë dhe efektiv publik. Çështja duhet të diskutohet më tej në kuadër të Dialogut të Lehtësuar të BE-së”, thuhej në njoftim.

Policia turke ka arrestuar dy persona në lidhje me sulmin me armë të mëngjesit të së dielës në kishën katolike të Shën Mërisë në një periferi të Stambollit, ku një person mbeti i vrarë dhe disa u plagosën.

Të dyshuarit janë nga Taxhikistani dhe Rusia dhe besohet se janë të lidhur me ISIS-in, sipas agjencisë së lajmeve Anadolu duke cituar ministrinë e brendshme.

Ministria tha se në total policia turke ka kryer 30 bastisje dhe ka kapur 47 persona të dyshuar për përfshirje në sulm.

Të dielën në mëngjes dy persona të armatosur të maskuar thuhet se hynë në kishën në periferi të Stambollit të Büyükdere gjatë meshës dhe qëlluan në ajër përpara se të drejtonin armët e tyre ndaj një shtetasi turk të identifikuar vetëm si C.T. i cili ishte ngritur për të protestuar. /ANSA/