Category: Lajme

Presidentja e Kosovës, Vjosa Osmani, tha se në dy ditët e ardhshme pritet të ketë një siç tha dakordim për çështjen e dinarit, pasi me vendimin e Bankës Qendrore të Kosovës që nga nesër e ndalon përdorimin e dinarit serb në vend.

Osmani tha se është pro zbatimit të plotë të këtij vendimi, teksa përmendi edhe nenin 11-të Kushtetutës që Kosova në qarkullim dhe në përdorim ta ketë vetëm një valutë.

“Unë jam për atë që zbatimi të jetë i plotë, e jo vetëm në letër. Dhe të gjithë e dinë se për të pasur zbatim të plotë na duhet edhe përkrahja e aleatëve tanë, në mënyrë që të kemi qëndrueshmëri. Pra, mund të bëhen edhe njëra, edhe tjetra. Jam i bindur që njëra nuk e përjashton tjetrën. Mund të ruhen edhe Kushtetuta, edhe aleatët tanë”, tha Osmani.Për këtë çështje, ajo tha se nuk ka mundur të diskutojë dje me emisarin europian, Miroslav Lajçak.

“Tani, sa i përket kësaj çështje, neni 11 i Kushtetutës kërkon që Kosova në qarkullim dhe në përdorim ta ketë vetëm një valutë. Është për keqardhje që kjo nuk është zbatuar deri tash. BQK e ka kryer punën e vet… Sa i përket zbatimit në praktikë, janë duke u diskutuar një sërë opsionesh, të cilat në njërën anë do ta respektonin nenin 11 të Kushtetutës, por në anën tjetër do të lënë një kohë për informimin e qytetarëve dhe bartjen e tyre, të themi, në llogari të reja, e të tjera, në mënyrë që të mund të zbatohet pa asnjë problem dhe me përkrahjen e plotë të shteteve aleate, sepse siç e dini për secilën çështje që ka të bëjë me veriun e Kosovës, me shtrirjen e sovranitetit dhe me sigurinë e shtetit tonë, ne sa herë i kemi aleatët tanë në krah, atëherë tejkalohen këto sfida dhe realizohet mbrojtja e Kushtetutës sonë në tërësi”, tha Osmani para gazetarëve, pas homazheve te shtatorja e heroit Zahir Pajaziti.

“Një shembull i tillë është çështja e targave”, tha Osmani, duke kujtuar se ndërkombëtarët “patën kërkuar të shtyhet” vendimi.

“Dhe siç po e shihni sot, gati të gjithë qytetarët që jetojnë në veri kanë transferuar targat e tyre në targa të Republikës së Kosovës”, tha Osmani.

Ushtruesi i detyrës së kryetarit të OVL-UÇK-së, Faton Klinaku, ka reaguar ndaj zhvillimeve të fundit në Hagë, ku avokati kryesor i Hashim Thaçit pritet të largohet për shkak të moskryerjes se pagesës.

Ai ka bërë me dije se vazhdimisht po dëshmohet se në Gjykatën Speciale po bëhet një “luftë” në mes të shërbimit sekret serb dhe Ushtrisë Çlirimtare të Kosovës.

Në profilin e tij në “Facebook”, Klinaku ka shkruar se në këtë “luftë” shteti i Kosovës po hesht.

“Shumë tema e skandale të vazhdueshme. Po dëshmohet vazhdimisht se në Gjykatën Speciale me seli në Hagë bëhet luftë në mes të shërbimit sekret serb dhe Ushtrisë Çlirimtare të Kosovës. E, shteti heshtë (përveç kur është aktiv rreth publikimit të pagesave për avokatët mbrojtës); Krekoseshin se nuk kemi koalicion me listën serbe, por vetëm ministra e zv.ministra të tyre. E tash, kinse ne po e luftojmë Serbinë me serbë tjerë në qeveri, por a e kuptuan se i kanë të njëjtë, sepse ata punojnë për interesat e tyre e jo të Kosovës. Bile bile u pa se më keq po shajnë këta se ata”, ka shkruar Klinaku.

Ambasadorja e Izraelit në Kosovë, Tamara Ziv thotë se heqja e vizave për qytetarët nga Kosova është hap i rëndësishëm për të dy vendet. Sipas saj, udhëtimi pa barriera do të mundësojë marrëdhëniet diplomatike, ekonomike e kulturore. Ambasadorja nga Izraeli në intervistën për KosovaPress thekson se kjo tashmë është procedurë e dy ministrive të jashtme, por që pret që shumë shpejt vendimi të hyjë në fuqi. Sa i përket gjendjes pas shpërthimit të luftës në Gaza, diplomatja hebreje thekson se Izraeli është në situatë të vështirë, e që sipas saj fajtor është Hamasi.

Izraeli hoqi vizat për Kosovën, për çka qytetarëve u mundësohet lëvizja e lirë gjatë udhëtimit në këtë shtet, e për këtë ajo thotë se është hap i rëndësishëm për marrëdhëniet e të dyja vendeve.

“Mendoj se marrëdhënia midis një vendi bazohet në faktin që njerëzit e secilit vend të takohen me tjetrin lehtësisht dhe sa më shumë që të jetë e mundur. Pra, heqja e nevojës për vizë dhe mundësimi i qytetarëve të Kosovës që të vijnë dhe të vizitojnë lehtësisht Izraelin është një hap shumë i rëndësishëm në marrëdhëniet që do të mundësojë më shumë shkëmbim ndërmjet njerëzve, turizmit, marrëdhënieve ekonomike, marrëdhënieve kulturore. Çdo lloj shkëmbimi mes popujve të Izraelit dhe Kosovës tani do të bëhet shumë i lehtë”, deklaron ajo për KosovaPress.

Kurse sa i përket asaj se kur do të fillojë së zbatuari ky vendim, diplomatja hebreje pret se një gjë e tillë të ndodh muajve në vijim.

“Tani po hyjmë në proces, ka një marrëveshje që duhet të nënshkruhet midis vendeve. Pra, kjo është një çështje ligjore mes dy ministrive të punëve të jashtme. Ata duhet të finalizojnë tekstin e marrëveshjes dhe të vendosin datën në të cilën ajo do të hyjë në fuqi. Besoj se do të ndodhë në muajt e ardhshëm”, shton Ziv për KosovaPress.

Në tre-vjetorin e marrëdhënieve diplomatike me Kosovën, ambasadorja Ziv foli për raportet me Kosovën dhe vizitat gjatë kësaj kohe. Ajo tha se gjatë 3 viteve prej se kur janë vendosur marrëdhëniet diplomatike mes dy vendeve, ka pasuar shumë vizita në të dy shtetet, përfshirë fushat e ekonomisë, kulturës e artit.

“Në thelb, unë mendoj se ne kemi një marrëdhënie të shkëlqyer. Ne kemi vendosur marrëdhënie diplomatike gati tre vjet më parë. Në shkurt, ne do të festojmë përvjetorin e tretë të marrëdhënieve dhe jam shumë e lumtur që për këtë përvjetor të tretë arritëm në marrëveshjen për të hequr dorë nga nevoja për viza… Kemi pasur shumë vizita dypalëshe të nivelit të lartë në Izrael, në Kosovë, të ministrave të fushave të ndryshme. Kemi pasur disa delegacione ekonomike nga Kosova që kanë vizituar Izraelin. Kemi pasur jo pak shkëmbim kulturor të artistëve nga të dyja palët që kanë ardhur, kanë përformuar, kemi pasur trajnime në fusha të ndryshme. Kështu që unë mendoj se për tre vjet ne kemi bërë vërtet shumë, kemi arritur shumë dhe ne mezi presim të arrijmë shumë më tepër”, thekson ambasadorja e Izraelit në Kosovë.

Duke folur për gjendjen pas fillimit të luftës në Gaza, ambasadorja izraelite thotë se Kosova po mbështet vendin e saj edhe në situatën e vështirë që po kalon nga viti i kaluar. Ziv tha ushtria e Izraelit ka vendosur t’i kundërpërgjigjet sulmit terrorist të Hamasit të 7 tetorit, ku kishin mbetur të vrarë 1200 persona e mbi 5000 të tjerë të plagosur.

“Situata aktuale është e vështirë. Siç e dini të gjithë, më 7 tetor, organizata terroriste Hamas filloi një sulm të tmerrshëm terrorist kundër Izraelit. Një sulm në të cilin në një ditë u vranë më shumë se 1200 njerëz, 5000 njerëz u plagosën, 240 njerëz u rrëmbyen dhe u morën peng në Rripin e Gazës, po flasim për foshnjat duke filluar nga nëntë muajsh deri te të moshuarit dhe të mbijetuarit e Holokaustit që janë 85 vjeç, 86 vjeç. Më 27 janar ne përkujtuam Ditën Ndërkombëtare të Holokaustit dhe fakti që të mbijetuarit e Holokaustit duhej të kalonin këtë tmerr, dhe u rrëmbyen dhe u morën peng në Rripin e Gazës, vuajtën dhe po vuajnë, është i tmerrshëm. Pra, si rezultat i kësaj në fakt shkakton luftën që Hamasi i shpalli Izraelit. Ushtria izraelite është kundërpërgjigjur. Ka qenë vendimi i Qeverisë së Izraelit që të punojë për të çmontuar aftësitë ushtarake të Hamasit dhe për të liruar pengjet tona, me shpresë për të krijuar një situatë në të cilën të gjithë qytetarët izraelitë të zhvendosur, që janë më shumë se 200.000 izraelitë, të cilët janë zhvendosur nga shtëpitë e tyre si rezultat i kësaj situate, si në Rripin e Gazës ashtu edhe në Veri, i cili kufizohet me Libanin në Hizbullah, të mund të kthehen në shtëpi dhe të jenë të sigurt”, deklaron ajo.

Teksa shpreson se do të mund të rikthehet qetësia për të jetuar, ajo fajëson Hamasin për luftë. Ziv tha se deri para 7 tetorit, ka pasur afër 18 mijë punëtorë palestinezë që hynin çdo ditë në Izrael e që kontribuonin në ekonominë e Rripit të Gazës.

“Mendoj se është 100% e qartë se është 100% përgjegjësi e Hamasit. Më duhet të them se para 7 tetorit, Izraeli gabimisht mendoi se ne mund të jetojmë në një lloj situate armëpushimi me Hamasin. Ne kishim 18.000 punëtorë palestinezë që hynin në Izrael çdo ditë, që është një kontribut i jashtëzakonshëm për ekonominë e Rripit të Gazës. Ne ishim të angazhuar në përpjekjet për të avancuar projekte për të përmirësuar ekonominë brenda Rripit të Gazës për mirëqenien e njerëzve atje. Ne po merrnim pacientë për të marrë trajtim mjekësor në Izrael dhe vërtet gabuam plotësisht për qëllimet e tyre dhe shpresojmë të krijojmë një lloj situate të të jetuarit krah për krah në qetësi”, thekson më tej ajo.

Diplomatja hebreje në intervistën KosovaPress thotë se Hamasi është zotuar ta përsërisë 7 tetorin, për çka shton se bashkëjetesa në paqe është zgjidhja më e mirë.

“Idealisht, ne do të ishim të lumtur të jetonim në një situatë në të cilën Rripi i Gazës është i çmilitarizuar dhe nuk përbën kërcënim për Izraelin, sepse Hamasi është zotuar të përsërisë 7 tetorin vazhdimisht, kështu që t’u mundësohet atyre çdo lloj aftësie për ta bërë këtë është e pamundur nga këndvështrimi ynë. Por duke supozuar se Hamasi është i çmilitarizuar dhe ka një lloj menaxhimi civil i Rripit të Gazës nga palestinezët që kërkojnë bashkëjetesë, së bashku me komunitetin ndërkombëtar mendoj se do të ishte një zgjidhje e mirë, sepse ne do të donim të bashkëjetojmë krah për krah në paqe pa u kërcënuar asnjëra nga tjetra”, përfundon Ziv.

Lufta në mes të Izraelit dhe Hamasit ka nisur më 7 tetor 2023 pas sulmeve të grupit Hamasit ku mbetën të vrarë rreth 1 mijë e 300 njerëz ndërsa u morën peng 250 të tjerë. Ndërsa sipas Ministrisë palestineze të Shëndetësisë, lufta në Rripin e Gazës ka vrarë mbi 26 mijë palestinezë.

Banka Qendrore e Kosovës (BQK), ka organizuar  të mërkurën takimin e Forumit të Rithemelimit të Këshillit Kombëtar të Pagesave në funksion të mbështetjes së reformave në fushën e pagesave, përmes zgjerimit të përfshirjes dhe rritjes së bashkëpunimit në mes të akterëve të ekosistemit të tregut të pagesave në Kosovë, raporton Ekonomia Online.

Aty u tha se qëllimi i kësaj ngjarje është riorganizimi dhe funksionalizimi i Këshillit Kombëtar të Pagesave (KKP), përditësimin mbi zhvillimet e infrastrukturës ligjore dhe teknike në fushën e pagesave dhe përcaktimin e një plani kombëtar për përfshirjen financiare dhe reduktimin e përdorimit të parave të gatshme.

Guvernatori i Bankës Qendrore të Kosovës (BQK), Ahmet Ismaili, tha se një sistem i zhvilluar i pagesave siguron mbrojtjen e integritetit të sistemit financiar dhe të valutës euro dhe zvogëlimin e efekteve negative nga dukuria e falsifikimit të parave.

Efekt tjetër pozitiv sipas tij është edhe zvogëlimi i efekteve nga aktivitetet e pastrimit të parave dhe financimit të terrorizmit.

“Një sistem i shëndoshë dhe efikas i pagesave mbështetë zhvillimin e mëtejshëm të ndërmjetësimit financiar dhe rritjen e stabilitetit financiar duke krijuar kështu një klimë në të cilën investitorët mund të zgjerojnë bizneset e tyre. Një sistem i zhvilluar financiar i pagesave ku pagesat realizohen me kosto të arsyeshme dhe me efikasitet në kohë e bëjnë tregtinë më të lirë dhe mundësojnë që bizneset konkurruese të rriten dhe t’u ofrojnë konsumatorëve qasje më të lehtë në mallra dhe shërbime. Njëkohësisht, një sistem i zhvilluar i Pagesave siguron mbrojtjen e integritetit të sistemit financiar dhe të valutës euro, zvogëlimin e efekteve negative nga dukuria e falsifikimit të parave, mbrojtjen e konsumatorit dhe avancimin e praktikave të tregut, zvogëlimin e efekteve nga aktivitetet e pastrimit të parave dhe financimit të terrorizmit, qasjen e shtuar në shërbimet financiare dhe gjithëpërfshirjen financiare”, tha Ismaili.

“Në linjë me Marrëveshjen për Stabilizim Asocimin dhe Procesin e Berlinit, procesi i reformave dhe avancimi i Sistemit të Pagesave përmes Zhvillimit të Pagesave të shpejta lokale dhe integrimi i sistemit të pagesave në nivel të rajonit do të përshpejtojnë edhe qasjen në Zonën e Vetme të Pagesave në Euro të Bashkimit Evropian e njohur si SEPA. Kjo ka për detyrë të sjellë në mënyrë efektive pagesat e brendshme dhe ndërkufitare brenda BE-së në të njëjtin nivel të kostos, efikasitetit në kohë dhe sigurisë si dhe qasjen në Sistemin e Pagesave të Shpejta të BE-së të njohur si TIPS që është pjesë e Eurosistemit nga viti 2018. Kjo u mundëson ofruesve të shërbimeve të pagesave të ofrojnë transfere të fondeve për klientët e tyre në kohë reale dhe gjatë gjithë kohës, çdo ditë të vitit, pra, ku individët dhe bizneset mund të transferojnë para ndërmjet njëri-tjetrit brenda disa sekondave, pavarësisht nga ora e punës së bankës së tyre lokale. Edhe vet rregullorja e fundit për operacionet me para të gatshme, shënon një avancim shumë të madh në aspekt të përafrimit me kërkesat dhe standardet për anëtarësim në SEPA, si dhe TIPS”, tha tutje Ismaili.

Ministri i Financave, Hekuran Murati, tha se digjitalizimi i pagesave ka shumë përparësi, pasi parandalon edhe financimin e aktiviteteve ilegale.

Ai tha se kjo formë po ashtu e zvogëlon edhe barrën administrative dhe eliminon përdorimin e parave fallso.

Murati tha se si ekzekutiv janë të gatshëm që ndihmojnë këtë sistem që të zhvillohet sa më shpejt.

“Digjitalizimi si i tillë ka shumë përparësi dhe shumë përfitime. E para do të thosha që sa i përket aspektit ekonomik e zvogëlon barrën administrative, e dyta pastaj e zvogëlon edhe koston e operimit dhe e treta i jep një dozë të integriteti çdo transaksioni duke qenë se është e sigurti që po bëhet këmbim apo transaskioni me para të vërteta dhe eliminohet kjo çështja e parave false dhe të manipuluara dhe në anën tjetër e parandalon edhe financimin e aktiviteteve ilegale apo edhe shpëlarjen e parave dhe ekonominë informale”, tha ai.

BQK ka nisur ndërmarrjen e veprimeve në kuadër të Planit Strategjik 2024-2028 për aktivitetet të cilat janë planifikuar dhe që lidhen me fushën e sistemit të pagesave siç janë:

Avancimi i infrastrukturës ligjore dhe teknike të BQK-së për anëtarësim në Skemën e Pagesave SEPA dhe qasje në Sistemin e Pagesave të Shpejta të BE (TIPS); Zhvillimi i infrastrukturës teknike për mundësimin e pagesave të shpejta 24/7, krijimi i QR Kodit kombëtar dhe standardizimi i API-së për ndërlidhje të sistemeve; Reduktimi i pagesave me para të gatshme si dhe promovimi i pagesave elektronike.

Policia e Kosovës ka arrestuar një shtetas të Serbisë të martën në Prishtinë, pasi që i njëjti dyshohet se ka kryer veprën penale vjedhje më 24 dhjetor të vitit të Kaluar në rrugën Lidhja e Prizrenit në Prishtinë.

Policia në raportin 24 orësh njofton se i njëjti pas intervistimit me vendim të prokurorit është dërguar në mbajtje.

“VJEDHJE Rr. Lidhja e Prizrenit, Prishtinë 24.12.2023-15:00. Lidhur me rastin me 30.01.2024 është arrestuar i dyshuari mashkull shtetas i Serbisë, dhe i njëjti pas intervistimit me vendim të prokurorit dërgohet në mbajtje”, njofton policia.

Presidenti i Serbisë, Aleksandar Vuçiq, ka mbajtur një takim urgjent me disa ministra të Qeverisë serbe mbrëmjen e së martës, lidhur me vendimin e Bankës Qendrore të Kosovës që vetëm valuta euro të përdoret në Kosovë për operacione me para të gatshme, raportoi Tanjug.

Shtetet e Bashkuara të Amerikës, Bashkimi Evropian dhe shtetet e QUINT-it i kanë bërë thirrje Kosovës që të shtyjë zbatimin e rregullores së BQK-së, që është paraparë të hyjë në fuqi më 1 shkurt.

Serbët në Kosovë e kanë kundërshtuar këtë vendim, duke thënë se ai do të pamundësojë që ata të përdorin dinarin serb për të kryer pagesa me para të gatshme.

Në takimin që u mbajt në Presidencës serbe, Vuçiq dhe ministrat serbë kanë diskutuar për hapat e mëtejmë që do të ndërmarrë Beogradi lidhur me vendimin e BQK-së.

Më 29 janar, Vuçiq gjatë një takimi në Beograd me të dërguarin e BE-së për dialogun Kosovë-Serbi, Mirosllav Lajçak, kërkoi anulimin e vendimit të BQK-së.

Qeveria Kosovës ka argumentuar se vendimi i BQK-së është në përputhje me Kushtetutën e Kosovës, por Shtetet e Bashkuara dhe vendet e tjera të QUINT-it – Italia, Gjermania, Britania dhe Franca – kanë thënë se ky vendim “ngre shqetësime në lidhje me ndikimin në veçanti në komunitetet me shumicë serbe”.

Lista Serbe – partia kryesore e serbëve në Kosovë, që gëzon mbështetjen e Serbisë – ka thënë se vendimi i BQK-së rrezikon mbijetesën e serbëve në Kosovë.

Në Kosovë, në të gjitha vendbanimet me shumicë serbe, popullsia përdor dinarin serb për të kryer pagesa dhe ata që punojnë në institucionet serbe në Kosovë, i marrin edhe pagat me dinarë.

Me dinarë paguhen edhe pensionet, sipas sistemit serb, si dhe shtesat për fëmijë dhe ndihmat sociale.

Në objektet tregtare, në zonat ku banojnë serbët në Kosovë, përveç euros, përdoret edhe dinari./REL/

Është arrestuar shoferi i cili dyshohet se shkaktoi dje aksidentin fatal në hyrje të Fushë Kosovës, ku mbeti i vdekur këmbësori F.A.

F.A., ishte një i burgosur i cili në kohën e aksidentit tragjik ishte duke punuar jashtë institucionit korrektues.

Sipas policisë, aksidenti ka ndodhur në mes dy veturave dhe një këmbësori, i cili ishte i burgosur në Qendrën Korrektuese të Smrekonicës por që i lejohej të punonte gjatë ditës.

“Si pasojë e aksidentit që ka ndodhur mëngjesin e së martës në Fushë Kosovë, këmbësori nga lëndimet e marra ka ndërruar jetë. Me vendim të prokurorit trupi i pajetë është dërguar në Institutin e Mjekësisë Ligjore për obduksion, ndërsa njëri nga vozitësit mashkull kosovar është arrestuar dhe dërguar në mbajtje”, thuhet në njoftimin e policisë.