Një burrë i moshuar është goditur nga një veturë te ‘Lesna’ në Prishtinë.
ATV-ja raporton se i lënduari është dërguar në QKUK për tretman mjekësor, ndërkaq sipas burimeve të ATV-së, shoferi i veturës ka ikur nga vendi i ngjarjes.
Në pamjet e siguruara nga vendi i ngjarjes, shihet se Policia po kryen ekzaminimet e nevojshme.
ATV-ja do t’iu mbajë të informuar me detajet e reja nga Policia e Kosovës.
Presidentja e Kosovës Vjosa Osmani ka pranuar një telegram urimi për 16-vjetorin e Pavarësisë nga presidenti i Shteteve të Bashkuara të Amerikës, Joseph R.Biden Jr.
Me këtë rast, presidenti Biden ka konfirmuar se Kosova dhe Shtetet e Bashkuara ndajnë një miqësi dhe partneritet të qëndrueshëm të përforcuar nga vizioni i përbashkët për një rajon më paqësor, më të sigurt dhe më prosperues.
Në letër thuhet se SHBA-ja mbështet fuqishëm një Kosovë multientik dhe integrimin e saj në institucionet europiane edhe euroatlantike, por edhe dialogun e lehtësuar nga BE-ja, transmeton Zeri.info.
Në vijim gjeni letrën e plotë të urimit, e dërguar nga presidenti Biden:
Në margjinat e Konferencës së Sigurisë në Mynih, Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, Donika Gërvalla, ka mbajtur një takim bilateral me Sekretarin për Marrëdhëniet me Shtetet në Sekretariatin e Shtetit të Selisë së Shenjtë të Vatikanit, Imzot Paul Richard Gallagher.
Përparimi i dukshëm në marrëdhëniet mes Republikës së Kosovës dhe Vatikanit dhe bashkëpunimi në fushat me interes të përbashkët ishin temat kyçe të takimit mes Ministres Gërvalla dhe Sekretarit, Imzot Gallagher.
Gjatë këtij takimi Ministrja Gërvalla e njoftoi Sekretarin Gallahgher rreth progresit të Kosovës në zhvillimin e demokracisë, sundimin e ligjit, respektimin e të drejtave dhe lirive të qytetarëve, zhvillimin ekonomik, situatën në Ballkanin Perëndimor si dhe proceset integruese nepër të cilat po kalon Republika e Kosovës.
Shefi i diplomacisë së Bashkimit Evropian, Josep Borrell, tha se në Munih do të zhvillojë takime të ndara me kryeministrin e Kosovës, Albin Kurti, dhe presidentin e Serbisë, Aleksandar Vuçiq. Por, një takim i përbashkët i liderëve me ndërmjetësin evropian të dialogut, nuk është në agjendë.
Kurti dhe Vuçiq janë në mesin e dhjetëra udhëheqësve nga e mbarë bota që po marrin pjesë në Konferencën e Sigurisë në Munih, që nis punimet më 16 shkurt.
“Nuk është në planifikimet e mia, nuk është në agjendën time, por nëse do të ishte i mundur, ne do të ishim të lumtur. Në të kundërtën, unë duhet të tentoj ta arrij këtë [takimin Kurti-Vuçiq] diku tjetër”, tha Borrell në Munih.
Pjesëmarrja e Kurtit dhe Vuçiqit në Munih po ndodh në një kohë kur janë rritur tensionet mes dy shteteve të tyre, për shkak të vendimit të Kosovës për të ndaluar dinarin serb për kryerjen e pagesave me para të gatshme.
Bashkimi Evropian ka kërkuar që për rregulloren e Bankës Qendrore të Kosovës, Kosova dhe Serbia të diskutojnë në Bruksel, në kuadër të dialogut të ndërmjetësuar nga blloku evropian.
Kjo rregullore hyri në fuqi më 1 shkurt dhe autoritetet kosovare thanë se ajo po zbatohet përmes një faze lehtësuese tranzitore, e cila do të zgjasë jo më shumë se tre muaj.
Shtetet e Bashkuara kanë kritikuar rregulloren e BQK-së – e cila parasheh që vetëm euroja të jetë valuta për pagesa me para të gatshme – dhe kanë kërkuar shtyrjen e zbatimit të saj. Ambasadori amerikan në Prishtinë, Jeff Hovenier, ka deklaruar se mospërmbushja e kërkesës amerikane, veçse ka ndikuar në raportet mes Uashingtonit dhe Prishtinës.
Serbia e ka kritikuar ashpër rregulloren e BQK-së, duke e interpretuar si synim të Qeverisë së Kosovës për dëbim të serbëve. Shteti serb ndan miliona euro për serbët në Kosovë pasi ua paguan atyre – përmes një sistemi paralel – rrogat, pensionet dhe ndihmën shtesë.
Banka Popullore e Serbisë i ka dërguar prej vitesh dinarët në një kasafortë në komunën e Leposaviqit, në veri të Kosovës, dhe ato më pas janë transportuar nga kompania ndërkombëtare Henderson.
BQK-ja ka thënë se një praktikë e tillë është e paligjshme, pasi vetëm ajo mund të bëjë eksport dhe import të monedhave dhe kartëmonedhave brenda territorit të Kosovës.
Kushtetuta e Kosovës përcakton që duhet të ekzistojë vetëm një valutë për kryerje të pagesave me para të gatshme.
Kosova përdor euron si valutë të saj që nga viti 2002, pavarësisht se nuk është pjesë e Eurozonës.
Pjesëtari i Policisë së Kosovës, Afrim Karakushi, është ndarë sot nga jeta.
Kështu ka njoftuar Sindikata e Policisë së Kosovës, duke i shprehur ngushëllime familjes së të ndjerit.
“Me rastin e vdekjes së pjesëtarit të policisë Afrim Karakushi, familjes, miqve dhe kolegëve të Policisë së Kosovës, ju shprehim ngushëllimet më të sinqerta!”, thuhet në njoftimin e Sindikatës.
Greqia është bërë shteti i parë me shumicë ortodokse që ka legalizuar martesat e së njëjtës gjini.
Çiftet e të njëjtës gjini tani do të lejohen ligjërisht të birësojnë fëmijë pas votimit në Parlamentin grek.
Kryeministri Kyriakos Mitsotakis ka thënë se ligji i ri do të largojë “një pabarazi serioze” që ishte më parë.
Por, kjo ka ndarë vendin, me rezistencën e ashpër nga Kisha e fuqishme Ortodokse. Mbështetësit e saj kanë mbajtur një protestë në Athinë, raportoi BBC.
Shumë prej tyre shfaqën pankarta, mbajtën kryqe, lexuan lutje dhe kënduan vargje nga Bibla.
Ndërsa, nga ana tjetër ligji është mirëpritur nga organizatat e komuniteteve LGBTQ në Greqi.
“Ky është moment historik”, ka thënë Stella Belia, drejtuese e grupit “Rainbow Families”.
15 nga 27 anëtaret e Bashkimit Evropian tashmë kanë legalizuar martesat e gjinisë së njëjtë. Në botë janë të lejueshme në 35 shtete.
Çmimet e shitjes me shumicë në Gjermani u ulën për 2.7% me një ritëm vjetor në muajin janar, duke shënuar muajin e 10-të radhazi të rënies, sipas të dhënave zyrtare të publikuara të premten.
Shifra pasoi një rënie prej 2.6% në dhjetor 2023, treguan të dhënat nga zyra e statistikave Destatis.
Ashtu si në muajt e mëparshëm, kjo ka ardhur kryesisht nga rënia vjetore prej 7.2% e çmimeve të produkteve të naftës minerale, thuhet aty.
“Çmime më të ulëta të shitjes me shumicë nga viti në vit u regjistruan edhe për drithërat, duhanin e papërpunuar, farat dhe ushqimet e kafshëve (-20,3%), produktet kimike (-16,3%), metalet dhe mineralet metalike (-12,7%), dhe mbetjet dhe skrapin (-6.4%)”, thuhet në njoftim.
Nga ana tjetër, nga viti i kaluar janë rritur çmimet për pemët, perimet dhe patatet (11.8%), sheqerin, ëmbëlsirat dhe produktet e bukës (7%), pijet (6.5%) dhe produktet e duhanit (5.1%).
Në baza mujore, çmimet me shumicë u rritën me 0.1% në janar, duke u zhvendosur nga një rënie prej 0.6% në dhjetor 2023./AA
Brenda këtij fillimviti, 20 mjekë e kanë kërkuar dokumentacionin e nevojshëm pranë Odës së Mjekëve të Kosovës për largim drejtë shteteve perëndimore, kryesisht në Gjermani. Kështu tha të premten, kryetari i OMK-së, Pleurat Sejdiu për EO.
Sejdiu tha se ky trend është i njëjtë dhe se për këtë kërkohen të ndërmerren masa për ta parandaluar këtë ikje, në të kundërtën brenda dy vitesh do të vërehet mungesa e tyre në nivelin terciar.
Ndonëse numri i atyre që kërkojnë të punësohen jashtë Kosovës është i madh, 440 mjekë tjerë sipas Sejdiut janë të papunë. Për këtë Sejdiu kërkon të sistemohen sa më shpejtë.
“Këto një muaj e gjysmë të këtij viti janë 20 kolegë tanë të cilët vetëm se kanë marr dokumentacionin e duhur që të nënshkruajnë kontrata me shtetet e perëndimit këtë rast shumica në Gjermani. Disa prej tyre janë në ditët e fundit apo javët e fundit në largim. Trendi është i njëjtë si vitet e kaluar që fatkeqësisht mund të them që brenda dy viteve do të ndihet mungesa e tyre në nivelin terciar, në nivelin primar vetëm se është duke u ndjerë. Është një problem menaxherial gjithashtu edhe politik, ne i kemi afër 440 mjek të pa punë të cilët presin të punësohen, sistemi primar nuk e bënë atë që duhet bërë t’i pranonte ata në punë e t’i shpërndanë ata. Momentalisht mjeku është në pozitë të keqe, nuk ka vende pune, janë në presion të largohen nga Kosova nga vetvetja flasë, nuk shohin një perspektivë”, tha Sejdiu gjatë shënimit të Ditës Përkujtimore të Profesionistëve Shëndetësorë.
Në obeliskun e ndërtuar para hyrjes kryesore të Qendrës Klinike Universitare të Kosovës, u tha se kontributi i profesionistëve shëndetësorë ndër vite ka qenë i madh, raporton Ekonomia Online.
Kryetari i OMK-së tha se sot odat e profesionistëve shëndetësor në Kosovë përkujtojnë sakrificat e punëtorëve shëndetësor ndër shekuj.
Kosova sipas tij, sfidë të madhe e ka ikjen e profesionistëve shëndetësor dhe se vetëm këtë fillimvit, 20 profesionistë shëndetësor kanë marr dokumentacionin e duhur për punësim në shtetet perëndimore.
“Jo rrallë herë profesioni jonë është stigmatizuar por ne prapëseprapë kemi vazhduar punën përkundër luftës politikes ndaj neve që është bërë në të kaluarën, kundër stigmës që është bërë ndaj neve. Por ne çdo here si punëtorë shëndetësor kemi kryer punën tonë dhe vazhdojmë ta kryejmë punën tonë pa marr parasysh ambientin ku jemi”, tha Sejdiu.
“Sfidat kryesore tani që i kemi është kushtet e punës të cilat përkundër përmirësimeve ndër vite nuk janë ato të cilat punëtori shëndetësor do të ishte në gjendje të jap maksimumin e tij në anën kualitative. Sfida më e re që e kemi tani largimi i mjekëve të ri të cilët do të duheshin ta ndërrojnë gjeneratën tonë, ta përtërijmë sistemin, fatkeqësisht viteve të fundit kemi trend i cili pak a shumë na tremb”, deklaroi ai.
Odat e Profesionistëve Shëndetësor në shkurt të viti 2022 pat nxjerrur vendimin që Data 16 të shkurt shpallet ditë Përkujtimore e profesionistëve shëndetësor në Republikën e Kosovës.
OPSH-të këtë datë të çdo viti kalendarik, e ka shënuar përmes aktiviteteve të ndryshme shkencore dhe profesionale.
Kryetari i Bashkimit Demokratik për Integrim (BDI), Ali Ahmeti deklaron se Kosova duhet të veprojë në koordinim me komunitetin ndërkombëtar. Sipas tij, shtetet në vazhdimësi janë ndërtuar me aleanca, për çka konsideron se të njëjtën gjë duhet ta bëjnë edhe institucionet vendore. Teksa flet për vendimin e Kosovës për ndalimin e dinarit dhe ndikimin në marrëdhëniet me ShBA-të, Ahmeti vlerëson se miqësitë duhet të zgjerohen e jo të ketë kundërshtime në këshillat e komunitetit ndërkombëtar.
Kryetari i BDI-së nga Maqedonia e Veriut, thekson se Kosova duhet të vazhdojë komunikimin me Uashingtonin dhe Brukselin.
“Kosova ka autoritetet e veta, Kosova ka subjektivitet edhe ndërkombëtar. Por, Kosova ka arritur deri këtu në komunikim, bashkëpunim me komunitetin ndërkombëtar, në veçanti me Shtetet e Bashkuara të Amerikës, Bashkimin Evropian dhe NATO-n. Prandaj ky komunikim duhet të jetë në vazhdimësi, sepse historikisht shtetet janë ndërtuar me aleanca, shtetet janë ndërtuar me miq dhe ne akoma kemi nevojë aleancat t’i ruajmë dhe t’i forcojmë. Ne akoma kemi nevojë për miq dhe miqësitë t’i zgjerojmë dhe jo të izolohemi dhe të bijmë në kundërshtim me komunikimin, bashkëpunimin dhe me kërkesat, këshillat e komunitetit ndërkombëtar”, deklaron Ahmeti për KosovaPress.
Teksa komenton situatën aktuale në Kosovë në 16-vjetorin e shpalljes së Pavarësisë së Kosovës, Ali Ahmeti konsideron se shteti ynë vit pas viti duhet të shënojë përparim.
“Kosova vit pas viti duhet të shënojë përparim, përparim në zhvillim ekonomik, përparim në politikat e jashtme, përparim në sundimin e ligjit në vend. Sigurisht duke sunduar ligji, lehtësisht apo i lehtësohet rruga krimit dhe korrupsionit për ta luftuar. Kështu që jo vetëm Kosova por i tërë Ballkani Perëndimor ka vështirësitë e veta në avancimin e demokracisë, në sundimin e ligjit për këtë arsye ne si shtete të Ballkanit Perëndimor, kemi detyra shtëpie nëse duam të jemi pjesë e Evropës duhet të instalojmë standarde të mirëfillta në drejtim të sundimit të ligjit dhe luftës kundër krimit dhe korrupsionit”, përfundon ai.
Ndihmëssekretari amerikan i Shtetit, James O’Brien tha të martën se Kosova po e rrezikon partneritetin me Shtetet e Bashkuara të Amerikës, pas vendimit për ndalimin e dinarit serb.
Një ditë më pas, kryeministri Albin Kurti u shpreh se Kosova nuk ka partner, aleat e as mik më të rëndësishëm se Shtetet e Bashkuara të Amerikës.
Ndërkaq, dje ambasadori amerikan, Jeff Hovenier deklaroi se vendimi i Kosovës për ta zbatuar rregulloren e Bankës Qendrore të Kosovës për ndalimin e dinarit serb, ka ndikuar në cilësinë e marrëdhënieve mes Shteteve të Bashkuara dhe Qeverisë së Kosovës. /kp
Presidenti i Serbisë, Aleksandër Vuçiq, ka reaguar ndaj deklaratës së kryeministrit shqiptar Edi Rama, i cili në emisionin “Context”, në ATV deklaroi se “çdo sulm ndaj Kosovës është sulm ndaj Shqipërisë”.
Vuçiq tha se Serbia nuk ka ndërmend të sulmojë askënd.
“Sot u dëgjua nga një shtet fqinj se nëse dikush sulmon Kosovën, edhe pse nuk e di kush do të sulmonte, Shqipëria nuk do ta lejojë dhe do të jetë në atë anë. Pas një deklarate kaq të tmerrshme, dëgjohej vetëm një heshtje e madhe, aq e fortë saqë heshtja ishte e pakëndshme. Për sa i përket neve, nuk kemi nevojë të sulmojmë askënd dhe nuk do ta bëjmë”, tha Vuçiq gjatë ceremonisë së Ditës së Shtetit.
Vuçiq shtoi se Serbia do të mbrojë marrëdhëniet e saj me Evropën, por edhe se “nuk do t’i shkelë marrëdhëniet e saj me Rusinë, Kinën dhe askënd tjetër”./ATVLIVE.TV/