Category: Lajme

Kabineti qeverisës në Prishtinë duket se është kompletuar, pas largimit të Partisë Demokratike të Kosovës nga koalicioni me Lidhjen Demokratike të Kosovës. Të enjten, kryetari Përparim Rama ka prezantuar edhe drejtorin e ri të Sportit, drejtori kjo që kishte mbetur e vetmja pa një drejtues të ri.

Në fillim të këtij shkurti u konfirmuan edhe mosmarrëveshjet e raportuara për një kohë të gjatë mes LDK-së e PDK-së në koalicionin e tyre ne kryeqytet.

Pas disa përplasjeve të njëpasnjëshme nëpër rrjete sociale, Partia Demokratike e Kosovës e kishte konfirmuar edhe zyrtarisht largimin nga koalicioni.

Kush janë drejtorët e rinj?

Fillimisht, siç kishte bërë të ditur më 5 shkurt vet Rama, ai kishte vendosur për një “restrukturim të kabinetit qeverisës”.

Kështu, drejtori i ri i Drejtorisë për Transformim do të jetë Ilir Murseli, arkitekt i njohur, sipas Ramës.

Rama ka bashkuar drejtorinë e Planifikimit dhe atë të Urbanizmit në një drjetori të vetme, duke e emëruar në krye të saj, Arbër Sadikin.

Drejtoria e Pronës dhe ajo e Kadastrit, po ashtu janë shkrirë në një drejtori të vetme dhe udhëheqëse e saj, tash është Doruntina Maloku.

Drejtori i ri i Shërbimeve Publike është Bekim Brestovci. Ndërkaq, Rama, me theks të veçantë kishte përmendur edhe shkarkimin e Donjeta Sahatçiut së PDK-së, të cilën e kishte akuzuar për ngecje në projektin e digjitalizimit.

Pozitën e saj, pra si nënkryetare e kryeqytetit, tash do të mbajë Jehona Lushaku – Sadriu, e cila njëherit do të jetë edhe ushturese e detyrës së Drejtores së Arsimit.

Gjatë kësaj jave, Rama konfirmoi se e ka emëruar në krye të Drejtorisë së Kulturës, Sibel Halimin. Halimi deri më tani, ka mbajtur pozitën si zëdhënëse politike e Lidhjes Demokratike të Kosovës.

“Jam i bindur se përvoja dhe përkushtimi i saj do të nxjerrin në pah potencialin e madh dhe pasurinë e shpirtit artistik të Prishtinës.” – kishte thënë Rama, derisa njoftoi për emërimin e saj.

Donjeta Dragusha në anën tjetër, e cila deri më tani ka qenë asambliste e LDK-së në kryeqytet, është emëruar Drejtoreshë e Zhvillimit Rural.

Rama njoftoi përmes një shkrimi në Facebook se e ka emëruar edhe drejtorin e Sportit, Bardh Krasniqi.

“Bardhi, një ish basketbollist i shquar në skenën vendore e ndërkombëtare vjen në këtë pozitë si profesionist për ta quar edhe më përpara fushën e sportit. Ai do të punojë në ndërtimin dhe përmirësimin e infrastrukturës sportive në kryeqytet, për të mundësuar zhvillimin e aktiviteteve të ndryshme e të shumta këtë vit në Prishtinën tonë, e shpallur “Qytet i Sportit”.” – tha kryetari i kryeqytetit.

Ministri i Punëve të Brendshme, z. Xhelal Sveçla ka pritur sot në takim ambasadorin jo rezident të Shtetit të Katarit në Kosovë, z. Jabor Ali Hussein Al Hawashela Al Dosari.

Ministri Sveçla e njoftoi ambasadorin Al Dosari për mandatin e Ministrisë së Punëve të Brendshme dhe prioritetet në sundimin e rendit dhe ligjit, administratës shtetërore efikase dhe shërbime për të gjithë qytetarët pa dallim.

Në takim u diskutua edhe për situatën e sigurisë dhe përkushtimin e institucioneve tona për të garantuar siguri dhe stabilitet në të gjithë territorin e Republikës së Kosovës.

Në anën tjetër ambasadori Al Dosari shprehu mbështetjen e plotë të shtetit të Katarit në ngritjen dhe forcimin e institucioneve tona dhe gatishmërinë për shkëmbimin e përvojave më të mira mes zyrtarëve tanë. Me theks të veçantë palët diskutuan edhe për potencialin dhe mundësitë e investimit në fushën e sigurisë në Republikën e Kosovës.

Ministri Sveçla dhe ambasadori Al Dosari u dakorduan për bashkëpunim të ngushtë dhe konkret mes ministrive të shteteve tona.

Koordinimi ndërinstitucional, mungesa e komunikimit në kohë reale, po konsiderohen si pengesë për zbatim të reformave evropiane, nga disa ministra të kabinetit qeveritar, raporton Ekonomia Online.

Në prezantimin e Barometrit të Reformave Evropiane nga Grupi për Studime Juridike dhe Politike (GLPS) dhe Instituti i Kosovës për Politika Evropiane (EPIK), ministrja e Arsimit, Shkencës, Teknologjisë dhe Inovacionit, Arbërie Nagavci, tha se nga zbatimi i reformave evropiane, veçohet aftësimi i arsimit profesional. Këtë, tha Nagavci po i japin shumë prioritet.

“Nëse flasim për zbatimin e reformave evropiane, ndonëse ne kemi bërë hapa konsideroj të vlerësuar, në aftësinë e arsimit profesional i cili për herë të parë po implementohet në shkolla tona edhe në këtë pikë mbetemi të kufizuar prej vullnetit komunal përtej angazhimit me kompani dhe biznese. Synimi jonë është të rrisim numrin e profileve më sfiduese se kjo mbetet plotësimi. Rritja e përfshirjes së fëmijëve në edukimin e hershëm edhe këtu mbetemi në sfida serioze në raport me komuna buxheti nuk ka munguar ne nuk kemi asnjë kërkesë nga komuna dhe ajo që po ndodh është se komuna për arsye të llojllojshme nuk arrin të përmbush kërkesa që janë bazike”, tha Nagavci.

E para e arsimit, tha se prioritet po i japin edhe Qendrave për komunitete, me ç’rast kanë ndarë shuma të mëdha të mjeteve.

“E gjitha qe duhet të bëjnë komunat është të sjellin kërkesa në Ministri dhe lejet urbanistike. Në Prishtinë nevojat për ndërtim të çerdheve janë të mëdhaja, e njëjta nuk mund të vazhdojë ndërtimin sepse komuna. Digjitalizimin ne si ministri e kemi ndarë buxhetin në këtë linjë po besojmë se do kemi një avancim përpara por edhe këtu përtej angazhimit nuk dihet si do ec, investimet e viteve paraprake, nuk kemi mund të nisim diçka nga fillimit por pastaj kemi parë se ka ngecje. Në Batometrin që pash janë dy fusha që kemi pas lëvizje konkrete, kemi ndarë nga 200 mijë euro për Qendar e komuniteteve të cilët kanë pas mundësi të barabarta me fëmijët nga komunitetet kemi ndarë për ta edhe bursa nga 1 mijë. euro për të gjithë”, tha Nagavci.

E ministri i Mjedisit, Planifikimit Hapësinor dhe Infrastrukturë, Liburn Aliu, tha se reformat evropiane duhet t’i përkthejnë për vete. Tha se në të kaluarën Kosova nuk ka pasur plan për kushte klimatike.

“Ministria që unë jam i angazhuar e ka mjedisin dhe infrastrukturën. Koordinim kanë me ministritë tjera, kjo ka sjell bashkëpunimin e parë që nuk ka qenë i lehtë. Reformat evropiane duhet t’i përkthejmë për veten tonë jo për integrim ose diçka që ta shpëtojmë botën por bëjmë diçka për gjeneratën tani. Këto situata që Kosova ka qenë në të shkuarën i kanë heq planet se ne duhet të mëremi me kushte klimatike. Fati i mirë është se me qeverisjen tani përdorimi i kushtet klimatike është përmirësuar por ende është sfidë bashkëpunimi me ministritë tjera. Të bëhet një gjë e tillë duhet të ngritët një temë të përfshihemi të gjithë, në aspektin e ventilimit që kemi qenë të suksesshëm dhe ky ka ardh si rezultat i bashkëpunimit me Ministrinë e Ekonomisë”, tha Aliu.

E ministrja e Ekonomisë, Artane Rizvanolli, tha se sfidë e dikasterit të saj ka qenë energjia, ndërsa thekson se prioritet do t’i japin reformave evropiane për energji të ripërtritshme.

Ajo përmendi edhe paketën financiare të Bashkimit Evropian për Kosovën.

“Jemi përballë me një krizë deri në vitin e dytë të mandatit jemi marrë me adresimin e kësaj duke marrë masa shtesë, kjo ka pas edhe një të mirë në këtë aspekt, ka qenë përkrahja e Qeverise dhe pakoja e BE-së ka qenë një buxhet në kushte normale, kjo na ka mundësi të kemi financa mangësitë kanë qenë më shumë nga kapacitetet institucionale. Koordinimi ndërinstitucional, mungesa e komunikimit në kohë reale është sfidë jo si pengesë për zbatim të reformave por është diçka që don përpjekje. Jo domosdo përcillet jo tek të gjithë ky është aspekt se duhet të punojmë të gjithë por kur është çështja për vendime strategjike kisha thënë se koordinimi nuk mungon është formal përtej komunikimit të përditshme, aty votojmë për projekte që do financohen qoftë nga Qeveria apo BE”.

Videot që duket se shfaqin grupe të burrave vetëm në të brendshme në temperatura afër zeros dhe duke u detyruar nga Serbia që të kthehen në Maqedoni të Veriut janë dëshmi e keqtrajtimit në eskalim të emigrantëve në kufijtë evropianë, sipas grupeve për të drejtat e njeriut.

Dy video që i janë treguar gazetës “The Guardian” nga organizata joqeveritare maqedonase, “Legis”, shfaqin një rresht të burrave gjysmë të zhveshur në një rrip rruge afër kufirit Serbi – Maqedoni e Veriut, raporton gazeta “The Guardian”.

Organizata “Legis” thotë se videot ishin incizuar nga një person lokal afër fshatit Lojane, afër kufirit me Serbinë, dhe iu dorëzua më 10 shkurt. Gazeta “The Guardian” nuk i ka vërtetuar videot në mënyrë të pavarur.

Sipas kësaj organizate, ky incident është i dyti prej dy kthimeve “degraduese” dhe abuzuese për një periudhë 24-orëshe, kur organizata pretendon se mbi 50 persona ishin detyruar që të zhvisheshin deri në të brendshme nga autoritetet serbe para se të detyroheshin që të ktheheshin në Maqedoni të Veriut.

Organizata “Legis” thotë se stafi lokal më vonë arriti që të bisedonte me këta burra, të cilët e identifikuan veten si sirianë.

Jasmin Redjepi, president i Legis, tha se kthimet “shqetësuese dhe degraduese” erdhën menjëherë pas një samiti të bashkëpunimit kufitar BE-Serbi, që synonte forcimin e kufirit serb kundër operacioneve të kontrabandës me njerëz.

“Këto incidente ndodhin kur BE përgatit kufizime për emigrantët në rrugë, dhe në këtë rast vetëm disa ditë pas një samiti të bashkëpunimit kufitar BE-Serbi. Më pas shohim ndikimin dhe pasojat e drejtpërdrejta”, tha Redjepi.

Edhe pse ka pasur raportime për zhveshjen e emigrantëve në kufijtë e tjerë evropianë, Redjepi thotë se kjo është hera e parë që raportohet në kufirin ndërmjet Serbisë dhe Maqedonisë së Veriut.

Rados Gjuroviç, drejtor ekzekutiv në Qendrën për Mbrojtjen e Azilit në Serbi tha se stafi i saj kishte parë një rritje të llogarive të kthimit nga Serbia në Maqedoninë e Veriut që nga fillimi i vitit. “Mund të themi se tani është një praktikë e rregullt,” tha ai.

Ministrja e Drejtësisë, Albulena Haxhiu, ka thënë se bashkëpunimi dhe angazhimi i shoqërisë është thelbësore për të krijuar një shoqëri me të drejte dhe të barabarta. Me këtë rast, Haxhiu ka kërkuar që të jenë bashkërisht që të jenë në mbrojtje të grave të cilët janë cak i sulmeve në bazë gjinore, raporton EO.

Në kuadër të konferencës “Parlamentarizmi dhe Rezoluta 1325”, Haxhiu tha se në luftën kundër këtyre dukurive duhet të jenë të bashkuar.

“Sigurisht që angazhimi jonë i përbashkët kundër luftës në baza gjinore është edhe një detyrim moral edhe shoqërisë që nuk duhet të jetë me kufizime kulturore apo etnike. Përtej dallimeve e etniteteve ky angazhim është i domosdoshëm për të garantuar respektim dhe mbrojte të të drejtave të grave e të gjithë personave qe janë të prekur”.

“Në një realitet ku dhuna e grave është ende një problem i hapur, bashkëpunimi e angazhimi i të gjithë individëve dhe shoqërive është thelbësore për të krijuar një shoqëri me të drejte dhe të barabarte për gjithë, duke refuzuar që të pranojmë dhunën në bazë gjinore dhe ta përforcojmë mesazhin se çdo individ meriton të jetojë në një mjedis të sigurt duke respektuar pavarësisht origjinës së tyre kulturore apo etnike në këtë kontekst promovimi edukimit dhe ndërgjegjësimit është etik për të arritur një shoqëri të drejt po ashtu të barabarte”, u shpreh Haxhiu.

Anëtarët e Komisionit të Pavarur për Medie (KPM), kanë raportuar sot në Komisionin parlamentar për Medie, për të tretën herë me radhë, në lidhje me vendimin e tyre për kthimin e kanaleve të “Arena Sport”-it në platforma kabllore.

Gjatë diskutimit nga deputetët opozitarë u ngritën shqetësime për ndërhyrje në pavarësinë e KPM-së, gjë e cila u mohua nga deputetët e pushtetit.

Në anën tjetër, u shpërfaqën edhe dallime brenda anëtarëve të KPM-së, ku mes tyre u tha se ka pasur kërkesa që çështja e “ArtMotion” dhe “DigitAlb” do të duhej dërgohej në Prokurori, por se kështu nuk kishte vepruar KPM-ja.

Anëtari i komisionit, deputeti i AAK-së, Besnik Tahiri, tha se nuk duhet të rrezikohet pavarësia institucionale të KPM-së, derisa përmendi edhe reagimin e Bashkimit Evropian.

Megjithatë, kryetari i komisionit, deputeti i LVV-së, Valon Ramadani tha se është i bindur se nuk është shkelur pavarësia e KPM-së, në bazë të raportimit të anëtarëve të tyre në legjislativ.

Në debat u përfshi edhe deputeti tjetër i LVV-së, Armend Muja, i cili nuk është anëtar i këtij komisioni, por që theksoi se KPM-ja duhet të sqarojë si e ka licencuar “ArenaSport” në Kosovë, kur e njëjta e njeh Kosovën si pjesë të Serbisë.

Në anën tjetër, anëtarja e KPM-së, Luljeta Aliu, tha se për këtë çështje ka pasur parregullsi dhe mungesë të transparencës edhe brenda KPM-së.

Sipas saj, çështja “ArtMotion” dhe “Digitalb” do të duhej të shkonte në Prokurori. Këtë kërkesë tha se ka mbështetur edhe anëtari tjetër i KPM-së, Fitim Veliu.

Megjithatë, në mungesë përkthimit të materialeve të dërguara, deputetët vendosën që kjo çështje të diskutohet edhe në mbledhjen e radhës të komisionit.

Pjesë e mbledhjes së sotme ishte edhe kryetari i Bordit të Autoritetit Rregullativ të Komunikimeve Elektronike dhe Postare (ARKEP), Nazim Rrahimi, i cili foli për shkeljet e kushteve të kontratave nga operatorët kabllorë.

Ai tha se në rregulloren e re i kanë dhënë të drejtë konsumatorit të shkëput kontratën, në rast se operatori ka ndryshim të kanaleve.

Edhe kryetari i Bordit të KPM-së, Jeton Mehmeti, ka thënë se në fillim të këtij viti kanë pranuar 340 ankesa se janë ndryshuar kanalet.

Ai ka thënë se konsumatori duhet të njoftojë 30 ditë më herët nëse ndryshojnë pakon operatorët.

Policia e Kosovës ka shqiptuar 2314 gjoba në trafik gjatë 24 orëve të fundit.

Ndërkaq aksidente me të lënduar në këto 24 orë janë gjithsej 18.

Kurse 30 aksidente janë shkaktuar me vetëm dëme materiale.

Ka përfunduar seanca e së premtes në Gjykatën Themelore në Prishtinë, në rastin ku kryetari i Kuvendit të Kosovës, Glauk Konjufca akuzohet për hedhje të gazit lotsjellës në Kuvend, raporton EO.

Kështu, fjala përfundimtare do të mbahet të hënën në ora 15:00.

Në aktakuzë thuhet se në Kuvendin e Kosovës në 10 gusht 2016, në cilësi të deputetit, Konjufca ka hedhur gaz lotsjellës në sallë, me ç’rast është pamundësuar qëndrimi në sallë, raporton “Betimi për Drejtësi”.

Në seancën e 25 tetorit 2023, gjykatësja Çanta tha se Konjufcës i është parashkruar vepra penale “Pengim i pengim i personit zyrtar gjatë kryerjes së detyrave zyrtare”.

Prokuroria Themelore në Prishtinë, më 3 shkurt 2017, ka ngritur aktakuzë kundër Glauk Konjufcës, të cilin e ngarkon me dy vepra penale.

Sipas aktakuzës, i pandehuri Konjufca po akuzohet se më 10 gusht 2016, gjatë mbajtjes së mbledhjes në sallën e Kuvendit të Republikës së Kosovës, ku merrnin pjesë kryetari i Kuvendit, Kadri Veseli, deputetët Adem Grabovci, Ismet Beqiri, Sabri Hamiti, Pal Lekaj, Valdete Bajrami dhe Sllobodan Petroviq, i njëjti në cilësinë e deputetit, në kundërshtim me ligjin ka përdorur armë, ashtu që gjatë kësaj mbledhje ka hedhur gazin lotsjellës në këtë sallë.

Aktakuza thotë se si pasojë e kësaj, qëndrimi i pjesëmarrësve është pamundësuar nga tymi që ka shkaktuar gazi lotsjellës dhe të njëjtit janë detyruar të braktisin sallën, me çka i pandehuri Konjufca ka rënë ndesh me nenin 9.1 të Rregullores nr.04/12 për armëmbajtje në Republikën e Kosovës, ku ndalohet përdorimi i armëve.

Me këtë, Konjufca po akuzohet se ka kryer veprën penale “Përdorimi i armës apo mjetit të rrezikshëm” nga neni 375, paragrafi 1 të Kodit Penal, vepër e cila dënohet me burgim prej një deri në tetë vjet.

Ndërsa, sipas dispozitivit të dytë të kësaj aktakuze, me datë, në kohë dhe vend të përshkruar si në dispozitivin e parë të kësaj akuze, i pandehuri Konjufca gjatë përdorimit të gazit lotsjellës ka penguar personat zyrtarë si kryetarin e Kuvendit, Kadri Veseli, deputetët Adem Grabovci, Ismet Beqiri, Sabri Hamiti, Pal Lekaj, Valdete Bajrami dhe Sllobodan Petroviq në kryerjen e detyrave zyrtare, ç’rast të gjithë personat zyrtarë janë detyruar ta ndërpresin mbledhjen dhe të largohen nga salla.

Për këtë, Konjufca po akuzohet se ka kryer veprën penale “Pengimi i personit zyrtar gjatë kryerjes së detyrave zyrtare” parashikuar nga neni 409, paragrafi 1 të Kodit Penal, vepër e cila dënohet me burgim prej tre muaj deri në tre vjet.