Category: Lajme

Zëvendësministri i Punëve të Jashtme dhe Diasporës, Kreshnik Ahmeti akuzon Serbinë se është tërhequr nga Marrëveshja Bazë e Brukselit dhe aneksi i Ohrit.

Sipas tij, pas letrës së kryeministres, Ana Bërnabiq në Bashkimin Evropian në vitin e kaluar, Serbia praktikisht dhe formalisht tërhiqet nga ujdia. Ai për KosovaPress, thekson se tani është e nevojshme të dihet nëse tërhiqet letra ku theksohet se Serbia nuk do të zbatojë disa pjesë të marrëveshjes bazë dhe më pastaj të ketë nënshkrim dhe sekuencim të qartë e të balancuar të saj.

“Serbia është tërhequr nga marrëveshja ta kemi të qartë. Ngërçi është nga letra e 13 dhjetorit që e ka dërguar kryeministrja e Serbisë në BE, ku praktikisht dhe formalisht tërheqet Serbinë nga marrëveshja e 27 shkurtit. Duhet të kemi të qartë a kemi marrëveshje? A tërhiqet ajo letër dhe të kemi përsëri marrëveshje. Duhet të kemi nënshkrim dhe sekeuncim të marrëveshjes. Pra, unë mendoj se pikëpamja juaj është më optimiste sesa realiteti, pasi realiteti është shumë i vështirë nga kjo qasje e Serbisë”, thotë ai.

Ahmeti thekson se Serbia po të kishte qasje konstruktive, çështja e dinarit do të zgjidhej menjëherë, pasi do të mundësohej një formë e tranzicionit për mjetet e pagesës nga Serbia te qytetarët serbë të Kosovës.

“Unë besoj se po të ketë një qasje konstruktive nga Beogradi, kjo çështje zgjidhet menjëherë. Kur të them zgjidhet e them le të mundësohet një formë e tranzicionit, pasi rregullorja e BQK-së, është e qartë se është e panegociueshme, por po flasim për një fazë tranzitore. E rëndësishme është se dinari në Kosovë nuk mund të përdoret si mjet pagese”, shton Ahmeti.

Duke folur për sigurinë në veri, Ahmeti thekson se institucionet e vendit janë vigjilente, pasi mund të ketë rreziqe sikurse sulmi terrorist në Banjskë.

“Ku shkojnë, çfarë ndodh me 600 milionë është e paqartë. Një gjë dihet se sulmet terroriste sikur ajo në Banjskë kërkojnë mjete monetare për të organizuar, furnizuar me armatim dhe mbajt ata njerëz. Mund të ketë rrezik të tillë po të vazhdohej ajo mënyrë e sjelljes së dinarëve kesh me thasë. Po ashtu mund të përdorej Kosova sikur është përdorur deri në të kaluarën si një vend ku bëhej një shpëlarje parash”, thekson ai.

Në anën tjetër, Ahmeti është optimist se Kosova do të marrë dritën e gjelbër në Asamblenë Parlamentare dhe Komitetin e Ministrave për anëtarësim në Këshill të Evropës.

Ai shton se letra e tre krerëve të shtetit drejtuar raportueses për Kosovën në KiE, është një procedurë e rregullt për anëtarësim dhe se zotimet që janë marrë përsipër janë përcaktuar si çështje që do të adresohen pas anëtarësimit në këtë institucion ndërkombëtar.

Sipas tij, në ato zotime nuk thuhet ekskluzivisht për themelimin e Asociacionit, por kërkohet zhvillim i prekshëm në zbatimin e marrëveshjes së Brukselit dhe të Ohrit.

“Letrën që e kanë dërguar të tre krerët e shtetit është procedurë e rregullt përgjatë fazën së anëtarësimit, krerët e shtetit kanë marrë përsipër zotime që janë përcaktuar si çështje që duhet të adresohen pas anëtarësimit, të cilat janë përcaktuar nga Asambleja Parlamentare e Këshillit të Evropës. Askund në ato pika nuk thuhet ekskluzivisht çështja e Asociacionit, kur të bëhet publik raporti do të bëhet e qartë. Pika 14.2.2 e asaj pjese thotë se duhet të ketë zhvillim të prekshëm në zbatimin e marrëveshjes së Brukselit dhe aneksit të Ohrit, që përfshinë edhe Asociacionit. Është e qartë për të gjithë se kjo çështje ekziston që nga viti 2013 dhe se nuk ka asnjë zotim shtesë në këtë drejtim. Kjo përcakton se nuk është parakusht”, përfundon Ahmeti.

Kompania për Distribuimin e Energjisë Elektrike në Kosovë (KEDS) ka njoftuar se të shtunën më 30.03.2024 do të kryhen punime të domosdoshme për siguri të sistemit energjetik.

Si i rezultat në disa lokalitete do të ketë ndërprerje të rrymës.

Ky është orari sipas rajoneve:

Prizren

Punime në projekte investive

1.

Nga TS 35/10[kV] Pirana do të ndërprehet:

Dalja 10kV Randobrava (kodi: 30034010) nga ora 09:00 dei 16:00.

Vendet: Randobravë, Retije e Ulët, dhe Retije e Epërme.

Arsyeja: Projekte investive, shtrirja e Bistekut të Tensionit të Mesme projektete Lot 16 në Randobravë.

Ferizaj

Punime në projekte investive

1.

Nga TS 110/35/10[kV] Ferizaj 1 do të ndërprehet:

LP 10kV J09 Drejtimi i Komogllavës (kodi: 40000009) nga ora 09:00 deri 18:00.

Vendet: fshatrat: Bibaj (4 konsumatorë), Fshati i Vjetër, Gërlicë, Komogllavë, Magjistralja Ferizaj-Kaçanik (një pjesë), Magjistralja Prishtinë – Ferizaj (1 konsumator) dhe Varosh.

Arsyeja: Projekte investive, vendosja në punë e Transformatorit te Ri, Ormanit 0.4kV në Komogllavë Abazët TS i Ri.

* * *

Punime nga palët e treta

1.

Nga TS 110/35/10[kV] Ferizaj 1 do të ndërprehet:

LP 10kV Fshatrat (kodi: 40000002) në dy termine nga ora 08:00 deri 09:00 dhe nga ora 16:00 deri në orën 17:00.

Vendet: Fshati i Vjetër, Dardania, Sojeva, Mirosala, Bibaj dhe Zllatari.

Arsyeja: Krijimi i kushteve të punës pa tension, largimi i urave të tensionit të mesëm.

2.

Nga TS 110/35/10[kV] Ferizaj 1 do të ndërprehet:

NS 10/0.4kV TS Kema Sojeve (kodi: 40000002189 ) ora 08:00 deri 17:00

Vendet: Fshati Sojevë.

Arsyeja: zhvendosja e trafostacionit 10(20)/0.4kV, sipas zgjidhjes teknike.

Mitrovicë

Punime nga palët e treta

1.

Nga TS 110/10[kV] Vushtrria 2 do të ndërprehet:

TS 10/04kV TS Shtruer (kodi: 73000004003) prej orës 09:00 deri në orën 14:00

Vendet: fshati Shtruher.

Arsyeja: Zhvendosja e rrjetit 0.4kV, sipas zgjidhjes teknike.

Gjilan

Punime nga palët e treta

1.

TS 35/10[kV] Lladovë do të ndërprehet:

LP 10kV Parteshi (kodi: 61066004) nga ora 09:30 deri 15:00.

Vendet: Parteshi, Budrika e Poshtme, Budrikë e Eperme, Nesale, Cerrnicë, Gumnishtë dhe Vrapqiq.

Arsyeja: Punët qe duhet te kryhen sipas pëlqimit elektro-energjetik dhe projektit të aprovuar, si dhe rekomandimeve nga komisioni i pranimeve teknike.

Bashkësia Islame e Kosovës ka dalë me një njoftim për qytetarët, meqë sonte pas mesnatës do të ndryshohet ora për 60 minuta.

Rrjedhimisht, do të ndryshohen edhe orari i syfyrit, iftarit dhe faljes së namazeve.

Në faqen zyrtare, BIK ka publikuar kohët e namazit për ditën e nesërme.

“Për kohët e syfyrit, iftarit dhe namazit ju lutem informohuni nga takvimi zyrtar i Bashkësisë Islame të Kosovës”, thuhet në njoftim.

Është arrestuar një burrë në Gjakovë, i cili dyshohet që në gjendje të dehur ka sulmuar vajzën e tij.

Viktima nuk e ka pranuar trajtim mjekësor, ndërsa i dyshuari është dërguar në mbajtje.

“Është arrestuar i dyshuari mashkull kosovar, për shkak se në gjendje të dehur kishte sulmuar vajzën e tij. Viktima e ka refuzuar trajtimin mjekësor, ndërsa i dyshuari me urdhër të prokurorit është dërguar në mbajtje”, njofton policia.

Masat e Bashkimit Evropian, rënia e eksporteve, zbehja e raporteve me Shtetet e Bashkuara të Amerikës, janë disa nga faktorët që kanë ndikuar jashtëzakonisht shumë në dëmtimin e ekonomisë së Kosovës. Kështu vlerëson kryetari i Odës Ekonomike (OEK), Lulzim Rafuna, i cili i bën thirrje Qeverisë së Kosovës të punojë në këtë drejtim, dhe të koordinohet me miqtë ndërkombëtarë për çdo vendim që merr, në të kundërtën vendi po humb miliona euro.

Rafuna konsideron se moskoordinimi me komunitetin ndërkombëtar lë gjurmë për vendin dhe dëmton imazhin e Kosovës.

“Nuk është mirë që nuk jemi të harmonizuar me komunitetin ndërkombëtar, për imazhin e Kosovës kjo nuk është e mirë. Pa dyshim që lë gjurmë dhe nuk është mesazh i mirë moskoordinimi me miqtë tanë ndërkombëtar, sidomos me ata që kanë qenë pjesë e historisë së suksesit të zhvillimit të shtetit tonë të Kosovës. Kërkesa jonë si odë është që para çdo vendimi që merret të ketë koordinim dhe bashkëveprim me gjithë miqtë tanë ndërkombëtar, duke filluar me ShBA-të dhe ato të BE-së. Kemi nevojë të ndryshojmë imazhin e Kosovës, dhe nuk mund ta bëjmë këtë duke kundërshtuar, por vetëm duke qenë të harmonizuar me miqtë tanë, të cilët janë edhe më meritoret që Kosova ka arritur deri në këtë zhvillim”, thotë Rafuna.

Në anën tjetër, sfidë për vendin, Rafuna thotë se përveç projekteve kapitale të cilat janë paraparë me ligjin e buxhetit, është edhe pengesa shumë e madhe me pezullimin e projekteve, shuma e të cilave ka shkuar mbi 300 milionë, që kanë ardhë si rezultat i masave ndëshkuese që ka marrë Kosova.

“Përveç projekteve kapitale të cilat janë paraparë me ligjin e buxhetit, ne kemi edhe një pengesë shumë të madhe, e cila është bllokimi ose pezullimi i projekteve që ka shkuar vlera tani mbi 300 milionë, që kanë ardhë si rezultat i masave ndëshkuese që ka marrë Kosova. Ne po jemi të goditur jo vetëm nga ana e projekteve ndërkombëtare që kanë qenë të parapara për investime kapitale dhe për ngritjen e mirëqenies sociale të qytetarëve, por ne po jemi biznesi, sektori privat edhe nga qeveria për shkak të mos shpenzimit të së paku atyre projekteve që janë të parapara në ligjin e buxhetit dhe të cilat kanë kaluar me ligj nëpërmjet Kuvendit. Kjo kish me qenë infuzion i madh për sektorin privat, për bizneset tona. Kështu, duhet Qeveria me urgjencë së paku projektet të cilat janë të parapara në buxhet të vitit 2024, t’i implementojë në mënyrë sa më efikase dhe në përputhje me gjitha dispozitat ligjore”, thotë Rafuna.

Për t’i ndihmuar bizneseve, Rafuna thotë se si odë po punojnë që të sjellin sa më shumë tregje të huaja në vend. Ai thotë se për këtë, janë përqendruar edhe tek vendet arabe dhe me tregun e ShBA-ve. Nëpërmjet këtyre vizitave, ai thotë se po mundohen të përçojnë mesazh te investitorët që duan të investojnë këtu, që Kosova nuk është vend i luftës, por i paqes.

“Kishim delegacionin nga Arabia Saudite, jemi përqendruar edhe nga vendet arabe sepse është një treg i cili është duke u hapur më të madhe dhe tani do ta kemi shumë shpejtë edhe një delegacion prej Katarit, Bahrain, por do të kemi edhe prej Dubai që do t’i sjellim në Kosovë. Qëllimi i vetëm nuk është t’i takojmë me biznesin, ai është strategjik dhe primar, por qëllimi është edhe ta promovojmë Kosovën, të vinë të shohin që në Kosovë nuk është një vend ku zhvillohet luftë, por një vend i qetë, e stabil dhe i sigurtë për të bërë investime. Nëpërmjet kësaj edhe po përçojmë mesazh te investitorët tjerë që nuk kanë mundësi me qenë prezent këtu, mirëpo mund të vinë dhe të investojnë…13:50 Përveç me tregun e vendeve arabe, jemi duke punuar edhe me ShBA-të, dhe tani së fundmi kemi lidhur një marrëveshje me Odën e Richengemit, ku do ta kemi një delegacion në muajin qershor të bizneseve prej ShBA-ve, që do vinë për të parë mundësinë që të investojnë në Kosovë, por edhe për të bashkëpunuar me bizneset tona”, vijon Rafuna.

Ndërsa, sa i përket rënies së eksportit, Rafuna thotë se duhet të merren masa që të ndihmohet prodhimtaria. Ai kërkon nga institucionet përgjegjëse që të ngrisin zërin si në rajon, por edhe në tregun e BE-së, në mënyrë që produktet të depërtojnë sa më shumë.

“Duhet të merren masa që të ndihmohet prodhimtaria, duhet të ndihmohet edhe nëpërmjet ministrave, dikastereve të ndryshme që të lobojnë por edhe të ngrisin zërin si në rajon, po ashtu edhe në tregun e BE-së, në mënyrë që produktet tona të depërtojnë sa më shumë. Duhet Kiesa, Ministria e Punëve të Jashtme, edhe Agjencioni për promovimin e investimeve, që ende nuk është bërë i plotë, funksional, duhet të bëjnë punën e tyre sa më mirë që është e mundur në mënyrë që të promovohen sa më shumë produktet tona, por edhe të lobojmë që të gjejmë treg të ri”, thotë Rafuna.

Sipas statistikave të Agjencisë së Statistikave të Kosovës, eksporti i mallrave në muajin janar 2024, kishte vlerën 60.3 milionë euro, ndërsa importi 380.0 milionë euro, që është një rënie prej -3.0 për qind për eksport, si dhe një rritje prej 7.4 për qind për import, krahasuar me periudhën e njëjtë të vitit 2023.

Një burrë nga Gjilani ka raportuar në Polici se i është zhdukur vajza e tij e mitur.

Sipas raportit 24-orësh të Policisë, ai ka njoftuar se vajza e tij ka dalë nga shtëpia për të shkuar në shkollë dhe se nuk dihet për vendndodhjen e saj

“Fsh. Vërbicë e Zhegocit, Gjilan 29.03.2024 – 07:00. Ankuesi mashkull kosovar, ka njoftuar policinë se vajza e tij e mitur ka dalë nga shtëpia për të shkuar në shkollë dhe nuk dihet për vendndodhjen e saj. Rasti në hetime”, thuhet në raport.

Ambasadori i ShBA-së në Beograd, Christopher Hill, ka thënë se qeveria e ShBA-së pret që Kosova t’i përmbushë të gjitha obligimet e dala nga marrëveshjet e Brukselit.

Në një intervistë për gazetën serbe “Blic”, Hill ka thënë po ashtu se Kosova dëshiron të anëtarësohet në BE, mirëpo për ta bërë këtë, duhet “ta kalojë gjithë procesin”.

“Sa i përket dëshirës së Kosovës dhe aplikimit të saj në Këshillin e Evropës, do të flitet shumë, do të ketë një debat të gjallë dhe në një farë mënyre e gjitha është e lidhur me Marrëveshjen e Ohrit. Marrëveshja e Ohrit vendos disa detyrime e kërkesa nga të dyja palët, kështu që ne duhet të shohim se si do të shkojë, por sigurisht që ata duan të anëtarësohen në Bashkimin Evropian, mendoj se kjo është e qartë për të gjithë ne, por ata duhet ta kalojnë të gjithë procesin”.

“Sa i përket Kosovës, unë mund të flas vetëm në emër të Qeverisë sime, sepse ka shumë diskutime për këtë temë në Quint. Por qëndrimi i Qeverisë sime është se Kosova duhet t’i përmbushë obligimet e saj nga Marrëveshja e Brukselit dhe nëse nuk e bën, sigurisht që komplikon interesin e saj për të qenë pjesë e Bashkimit Evropian dhe organizatave të tjera”, tha Hill në këtë intervistë.

Duke u ndalur te Asociacioni, diplomati amerikan tha se kjo do të ndodhë. Ky organizëm, tha Hill, do është i nevojshëm si për të ardhmen e Serbisë, ashtu edhe të Kosovës.

“Mendoj se do të ndodhë, se Asociacioni i Komunave (me Shumicë, shën.red.) Serbe është shumë i arsyeshëm – një zgjidhje për të gjithë. AKS-ja do të ndihmonte në tejkalimin e shumë problemeve dhe vështirësive aktuale që ka komuniteti serb në Kosovë. Mendoj se AKS-ja është e nevojshme për të ardhmen e Serbisë, dhe mendoj për të ardhmen e Kosovës, kështu që besoj se do të ndodhë. Është një proces negociues që është i vështirë. Shumë lëvizje luajnë rol në këtë, por mendoj se ajo që është thelbësore, e kam thënë tashmë shumë herë, është se është e rëndësishme për komunitetin serb në Kosovë se cila do të jetë e ardhmja e tyre dhe cila do të jetë e ardhmja e fëmijëve të tyre, dhe mendoj se AKS është mënyra më e mirë për ta arritur atë”, theksoi ambasadori amerikan në Beograd, Christopher Hill.

Zvarritjet në procedurat gjyqësore përbëjnë numrin më të madh të ankesave të pranuara duke u mohuar qytetarëve të drejtën për gjykim të drejtë.

Kështu thuhet në raportin e Avokatit të Popullit për vitin 2023, dërguar Kuvendit të Kosovës.

Raporti paraqet gjendjen e të drejtave të njeriut në vend dhe punën e Institucionit të Avokatit të Popullit, si dhe ofron një analizë dhe vlerësim të situatës në lidhje me forma të caktuara të shkeljes së të drejtave të individëve apo të grupeve të caktuara shoqërore.

“Në vitin 2023, Avokati i Popullit ka pranuar 1660 ankesa nga qytetarët e Republikës së Kosovës, me pohime ankimore për shkelje të të drejtave dhe të lirive të njeriut nga autoritetet publike në Republikën e Kosovës. Nga rastet e shqyrtuara gjatë këtij viti, autoriteteve u janë adresuar 836 rekomandime, nga të cilat 300 janë rekomandime nga hetimet e përfunduara në këtë vit, ndërsa 536 janë rekomandime janë të bartura nga viti paraprak, me afat zbatimi në vitin për të cilin raportohet.

Zvarritjet në procedurat gjyqësore përbëjnë numrin më të madh të ankesave të pranuara duke u mohuar qytetarëve të drejtën për gjykim të drejtë. Ankesat tjera kanë të bëjnë me të drejtën për mjete juridike, me të drejtën e punës dhe ushtrimit të profesionit, me mbrojtjen shëndetësore dhe sociale, me mbrojtjen e pronës, me barazinë para ligjit, me të drejtat e të akuzuarit, me të drejtat e fëmijës etj”, thuhet në njoftim.

Gjithashtu raporti përmban rekomandime për autoritetet përgjegjëse për çështjet që janë trajtuar nga Avokati i Popullit por edhe opinione dhe propozime për ndërmarrjen e masave për të kontribuar dhe vetëdijesuar në ngritjen e respektimit të të drejtave të njeriut.

“Sa i përket zbatimit të rekomandimeve të Avokatit të Popullit nga ana e autoriteteve, raporti gjen se niveli i zbatimit është 28 për qind, dukshëm më i lartë se sa në vitet e kaluara, por megjithatë kërkohet më shumë angazhim dhe përkushtim për rritjen e zbatimit deri në arritjen e nivelit kur zbatohen të gjitha rekomandimet.

Avokati i Popullit mirëpret shqyrtimin e Raportit vjetor nga Kuvendi i Republikës së Kosovës, në një seancë plenare sikurse është e paraparë në nenin 29, paragrafi 3, të Ligjit nr. 05/L-019 për Avokatin e Popullit”, thuhet më tej në njoftim.

Drejtoria për Hetimin e Krimeve Ekonomike dhe Korrupsionit ka realizuar mbrëmë operacion policor për parandalimin e futjes së parave të falsifikuara në Kosovë, ku ka arrestuar një 54 vjeçar me inicialet I.D, shtetas i Maqedonisë së Veriut.

Ai është arrestuar në flagrancë nga hetuesit policor gjatë tentimit të tij për të vënë në qarkullim një sasi të madhe të dollarëve amerikan që dyshohet se janë të falsifikuara. Sipas Policisë, i dyshuari 100 $ dollarë të falsifikuara, i shiste për 40 euro, raporton Express.

Gjatë realizimit të operacionit policor, janë konfiskuar: 960 copë kartëmonedha nga 100 $ në total 96 mijë dollarë amerikan, një automjet i përdorur në rast nga i dyshuari dhe një telefon celular.

“Drejtoria për Hetimin e Krimeve Ekonomike dhe Korrupsionit është pjesë e operacionit ndërkombëtar të udhëhequr nga EUROPOL-i për luftimin e dukurisë së prodhimit dhe shpërndarjes së parave të falsifikuara. Të gjitha veprimet hetimore janë ndërmarr në koordinim me prokurorin nga Prokuroria Speciale e Kosovës. I dyshuari është intervistuar në prezencën e avokatit mbrojtës të caktuar sipas detyrës zyrtare. Me aktvendim të prokurorit, i dyshuari dërgohet në mbajtje për 48 orë”, thuhet në komunikatë.

Komunikata e plotë:

Drejtoria për Hetimin e Krimeve Ekonomike dhe Korrupsionit, përkatësisht Sektori për Hetimin e Krimeve Ekonomike, më 29.03.2024, në orët e mbrëmjes, në bashkëpunim me institucionet e tjera të sigurisë, kanë realizuar me sukses Plani Operativ për parandalimin e futjes në Republikën e Kosovës të parave të falsifikuara.

Pas një pune operative-hetimore, rreth orës 23:00 (29.03.2024) është zhvilluar një operacion policor në Han të Elezit. Paraprakisht ishin siguruar informata konkrete se personi I dyshuar I. D., (viti i lindjes 1970, shtetas i Maqedonisë së Veriut), është duke futur në Kosovë para të falsifikuara, konkretisht dollar amerikan. I dyshuari është arrestuar në flagrancë nga hetuesit policor gjatë tentimit të tij për të vënë në qarkullim një sasi të madhe të dollarëve amerikan që dyshohet se janë të falsifikuara. I dyshuari 100 $ dollarë të falsifikuara, i shiste për 40 euro.

Gjatë realizimit të operacionit policor, janë konfiskuar: 960 copë kartëmonedha nga 100 $ në total 96,000.00 (nëntëdhjetë e gjashtë mijë) dollarë amerikan, një automjet i përdorur në rast nga i dyshuari dhe një telefon celular. Drejtoria për Hetimin e Krimeve Ekonomike dhe Korrupsionit është pjesë e operacionit ndërkombëtar të udhëhequr nga EUROPOL-i për luftimin e dukurisë së prodhimit dhe shpërndarjes së parave të falsifikuara.

Të gjitha veprimet hetimore janë ndërmarr në koordinim me prokurorin nga Prokuroria Speciale e Kosovës. I dyshuari është intervistuar në prezencën e avokatit mbrojtës të caktuar sipas detyrës zyrtare.

Me aktvendim të prokurorit, i dyshuari dërgohet në mbajtje për 48 orë.