Category: Lajme

Ambasada amerikane në Prishtinë ka uruar të gjithë besimtarët që festojnë Fitër Bajramin në Kosovë dhe në mbarë botën.

Ambasada, mes gjuhëve që ka uruar, ka shkruar edhe në gjuhën shqipe.

“Urimet më të përzemërta për të gjithë ata që festojnë Bajramin në Kosovë dhe në mbarë botën: Me Fat Fitër Bajrami, Bajram Šerif Mubarek Olsun, Bayramınız Kutlu Olsun, Eid Mubarak!”, shkroi ambasada amerikane në X.

Kryeministri i Republikës së Kosovës, Albin Kurti, ka pritur mbrëmë në takim ish të burgosurit politikë të Kosovës, të cilët ishin mbajtur në burgjet serbe edhe gjatë luftës në Kosovë.

Duke kthyer në kujtesë periudhën e përbashkët të kaluar si të burgosur politik, në këtë bashkëbisedim, sipas njoftimit të Kryeministrisë. u fol në veҫanti për torturat e tmerrshme dhe dhunën sistematike që ushtrohej në burgjet serbe ndaj të burgosurve politikë shqiptarë.

“Rikujtuan ngjarjet e qershorit 1999, kur forcat serbe u tërhoqën nga Kosova më 10 qershor, dhe kur mbi dy mijë shqiptarë u transferuan në burgjet në Serbi. Biseduan për këtë periudhë ndërmjet qershorit e korrikut 1999, kur konsideroheshin të zhdukur, pasi familjet e tyre nuk kishin asnjë informatë për vendndodhjen apo fatin e tyre. Ish të burgosurit politikë evokuan edhe kujtimet për shokët e burgut të cilët nuk jetojnë më dhe për ata që nuk ishin në takimin e sotëm”, thuhet në njoftim.

Në takimin e përbashkët me Drejtorin e Institutit për Krimet e Kryera gjatë luftës, u diskutua edhe për përgjegjësinë institucionale e shoqërore për ruajtjen e memories kolektive dhe dokumentimin e krimeve të kryera nga Serbia gjatë luftës 1998-99, si dhe domosdoshmërinë e angazhimit të sistemit të drejtësisë.

Komisioneri Evropian për Zgjerim, Oliver Varhelyi, ka reaguar pas miratimit të raportit për liberalizimin e vizave për serbët e Kosovës të cilët kanë pasaporta të Serbisë.

Varhelyi tha se ky është një lajm i mirë për serbët e Kosovës dhe hap i madh drejt arritjes së lëvizjes pa viza për të gjithë Ballkanin Perëndimor.

“Propozimi ynë për ta lejuar udhëtimin pa viza për mbajtësit e pasaportave serbe për serbët e Kosovës u mbështet nga Parlamenti Evropian, Komisioni i Parlamentin Evropian për Liritë Qytetare, Drejtësinë dhe Çështjet e Brendshme”.

“Është një hap i madh drejt arritjes së regjimit pa viza për të gjithë Ballkanin Perëndimor kur udhëtoni në BE”, tha Varhely.

Komisioni për Liri Qytetare dhe Punë të Brendshme i Parlamentit Evropian miratoi të martën raportin për liberalizimin e vizave për bartësit e pasaportave të Serbisë që jetojnë në territorin e Kosovës.

Raporti, i përpiluar nga deputeti slloven, Matjazh Nemec, u miratua me 34 vota për, 7 kundër dhe 12 abstenime.

Ministri i Tregtisë së Brendshme dhe të Jashtme i Serbisë, Tomislav Momiroviq, u ka dërguar një letër ankese të gjithë ministrave të tregtisë së Bashkimit Evropian, Britanisë së Madhe, SHBA-së dhe CEFTA-s, lidhur me masën e sigurisë që ka vendosur Kosova ndaj mallrave me origjinë nga Serbia, qysh nga qershori i vitit të kaluar.

Kosova e kishte marrë këtë vendim pasi Serbia rrëmbeu tre pjesëtarë të Policisë së Kosovës, që po ruanin kufirin. Ditën që policët u rrëmbyen, Dogana e Kosovës u urdhërua që ta ndalojë hyrjen e të gjitha mallrave serbe në Kosovë.

Siç raporton Kossev, Ministri serb e ka quajtur këtë “politikë kriminale”, derisa ka përmendur edhe çështjen e dinarit.

“Të gjithë ata që tolerojnë veprime të tilla, të ashtuquajturat Autoritetet e Kosovës duhet të jenë të vetëdijshme se po bëhen bashkëfajtorë në një krim të madh kundër popullit serb, në shkaktimin e qëllimshëm të krizës humanitare, sepse popullata serbe në Kosovë varet nga produktet ushqimore bazë që dërgohen nga Serbia qendrore”, ka deklaruar ai.

Ai e ka quajtur këtë “presion të paparë ekonomik”, derisa ka thënë se bie në kundërshtim me të gjitha standardet evropiane të qarkullimit të lirë të njerëzve dhe mallrave.

“Është krejtësisht kundër parimeve themelore të BE-së dhe është më se e qartë se pas kaq kohësh qëllimi i vetëm është frikësimi dhe dëbimi i popullit serb nga territori i Kosovës dhe Metohisë”, tha Momiroviq.

Ministrja e Arsimit, Arbërie Nagavci ka deklaruar se pret nga Këshilli i Etikës që t’i trajtojë pa vonesa rastet e ngacmimeve seksuale brenda Universitetit të Prishtinës.

Ajo në një postim në Facebook ka shkruar se ditëve të fundit ka pasur reagime të shumta në lidhje me denoncimin në Këshillin e Etikës të Universitetit të Prishtinës, të disa rasteve për pretendime të ngacmimeve seksuale.

“Rastet e pretenduara, me të drejtë paraqesin shqetësim, po aq sa edhe janë dëshmi se në Universitetin e Prishtinës tashmë janë krijuar kushtet e domosdoshme për raportim ashtu si dhe kërkesat e domosdoshme që secili pjesëtar i stafit akademik dhe punonjës të tjerë të UP-së, të udhëhiqen nga prirja, detyrimi dhe domosdoshmëria e pakontestueshme e respektimit të kodit të etikës, sjelljes akademike dhe kontributit për krijimin e një mjedisi të sigurt për të gjithë”, ka shkruar ajo.

Nagavci ka thënë se pret nga UP-ja dhe të gjitha institucionet arsimore, të rrisin masat e parandalimit e të avancojnë mekanizmat e trajtimit konfident, të shpejtë dhe profesional të këtyre rasteve.

“Si ministre e Arsimit pres nga Këshilli i Etikës si instancë kompetente dhe e pavarur statutare, që pa vonesë dhe në mënyrë meritore të trajtojë këtë rast dhe të gjitha pretendimet e ngjashme për sjellje që bien ndesh me normat e kodit etik dhe kuadrin normativ”, ka shkruar Nagavci.

Interneti satelitor Starlink ka mbërritur edhe në territorin e Shqipërisë, ka njoftuar kompania amerikane.

Në rrjetin social X, Starlink njoftoi se interneti me shpejtësi të lartë tashmë është në dispozicion.

Në hartën e shtrirjes së internetit satelitor figuron edhe Shqipëria, si zonë aktive me këtë internet. Starlinku është kompani që udhëhiqet nga miliarderi Elon Musk.

Edhe disa vende të rajonit si Maqedonia e Veriut dhe Kroacia posedojnë këtë rrjet interneti.

Si funksionon Starlinku?

Rrjeti Starlink lëshohet në hapësirë nëpërmjet antenave satelitore, e përdoruesi obligohet që të paguajë një antenë shpërndarëse dhe llogarinë për qasje në internet.

Ky internet mbulon një fushë shumë të madhe gjeografike të shpërndarjes.

Musk ia pati mundësuar ushtrisë së Ukrainës të shfrytëzonte internetin satelitor pa pagesë në luftë me Rusinë.

Kryesuesi i radhës i OSBE-së, Ministri i Punëve të Jashtme, Çështjeve Evropiane dhe Tregtisë së Maltës, Ian Borg, do ta vizitojë Kosovën më 11 prill për të diskutuar rreth angazhimit të OSBE-së dhe për t’u takuar me liderët politikë.

Sipas njoftimit, Borg do të takohet me Presidenten Vjosa Osmani-Sadriu, Kryeministrin Albin Kurti dhe Zëvendëskryeministren dhe Ministren e Punëve të Jashtme Donika Gërvalla-Schëarz.

Ai gjithashtu do të mbajë takime me Shefin e Misionit të OSBE-së në Kosovë, Michael Davenport, dhe stafin e misionit, dhe do të takoj pjesëmarrëse nga Akademia e Dialogut e OSBE-së.

“Kryesuesi Borg do të udhëtojë në Qendrën Rajonale të OSBE-së në Gjilan për t’u takuar me organizatat lokale të shoqërisë civile dhe përfaqësuesit e komuniteteve nga komuna të ndryshme për të diskutuar rreth të drejtave të komuniteteve, angazhimin e të rinjve dhe fuqizimin e grave. Ai do të takohet edhe me kryetarët e komunave që përfaqësojnë komunitete të ndryshme për të diskutuar lidhur me bashkëpunimin ndër-komunal të mbështetur nga OSBE. Ministri Borg do të takohet edhe me Peshkopin Teodosije nga Kisha Ortodokse Serbe”, thuhet në njoftim.

Borg do të ketë edhe një prononcim të shkurtër për media në selinë e Misionit të OSBE-së në Kosovë në Prishtinë në orën 16:30.