Sot pas mesnatës rreth orës 01:07 është regjistruar një tërmet në Turqi me magnitudë 4.6 ballë të Rihterit.
Epiqendra e lëkundjeve ishte 40 kilometra në jug të Turhalit, sipas Qendrës Sizmologjike Evropiane Mesdhetare (EMSC), me një thellësi prej 10 kilometrash.
Derisa nuk raportohet për pasoja.
Delegacioni i Bankës Qendrore të Republikës së Kosovës, i kryesuar nga Guvernatori Ahmet Ismaili, është takuar me Zëvendës Ndihmës Sekretarin e Departamentit të Thesarit të Shteteve të Bashkuara të Amerikës, Luyen Tran dhe ekipin e tij të Zyrës se Asistencës Teknike në Washington D.C.
Në këtë takim u diskutua forcimi i bashkëpunimit ndërmjet dy institucioneve, në ngritjen e kapaciteteve të BQK-së.
Në takimin me Departamentin amerikan të Thesarit, Guvernatori Ismaili shprehu mirënjohjen e sinqertë për ndihmën e çmuar teknike të ofruar nga OTA-ja dhe rolin e tyre kryesor në mbështetjen e zhvillimit të infrastrukturës kritike.
“Kjo përfshinë mbështetjen në zhvillimin e Sistemit Qendror Depozitar të Letrave me Vlerë, krijimin e linjave të likuiditetit si dhe bashkëpunimin e suksesshëm në shumë projekte të tjera për mbikëqyrjen bankare dhe sigurimeve, si dhe në kornizën e luftimit të pastrimit të parave dhe financimit të terrorizmit, ndër të tjera”, thuhet në komunikatën e lëshuar nga BQK-ja.
Gjithashtu, u diskutuan mundësitë e reja të asistencave teknike dhe bashkëpunimit, me qëllim të forcimit të partneritetit me Departamentin e Thesarit të SHBA-së.
“Këto angazhime nënvizojnë përkushtimin e BQK-së për të kultivuar partneritet të qëndrueshëm me akterët kryesorë ndërkombëtarë, duke fuqizuar më tej misionin e institucionit për promovimin e stabilitetit financiar dhe zhvillimin të qëndrueshëm të vendit”, thuhet tutje.
Ministri i Punëve të Jashtme i Maqedonisë së Veriut, Bujar Osmani, ka thënë se ka fakte dhe informata lidhur me sulmin në Banjskë që pati ndodhur më 24 shtator të vitit të kaluar dhe se ato do t’i prezantojë në mbledhje të mbyllur të Qeverisë. Ai ka shtuar se do të shqyrtohet dhe vendoset nëse shteti duhet të qëndrojë në nismën “Ballkani i Hapur”.
Pas sulmit në Banjskë, ai nuk kishte marrë pjesë në takimet e “Ballkanit të Hapur”, megjithatë Osmani ka theksuar se tani Qeveria do të marrë vendimin përfundimtar për pjesëmarrjen e mëtutjeshme të Maqedonisë së Veriut në nismë.
“Kur ndodhi sulmi në Banjskë në Kosovë, pata deklaratë se kjo shkon në kundërshtim të idesë themelore të nismës – se është për pajtim. Dhe thashë – nëse ka përzierje të drejtpërdrejtë të Beogradit në Banjskë, atëherë me të vërtetë duhet të rishqyrtohet sepse i shkelë shtyllat e idesë themelore. Meqenëse tani kam më shumë informata se çka ka ndodhur në Banjskë, planifikoj më mbledhje të mbyllur ta informoj Qeverinë, ndërsa Qeveria do të vendosë se si do të veprojë më tutje”, ka thënë Osmani.
Sipas tij, nisma “Ballkani i Hapur” nuk është e plotë sepse nuk janë të gjitha vendet e Ballkanit Perëndimor.
“Ajo kishte dy qëllime – pajtimin për krijim të parakushteve për mbyllje të kontestit kosovaro-serb dhe për njohje të ndërsjelltë dhe liberalizim të tregut sepse u vlerësua se 80 për qind të kohës kamionët në Ballkan e kalojnë në vendkalime kufitare, ndërsa 20 për qind në rrugën drejt destinacionit të vet. Kuptohet, ato ishin qëllime fisnike në të cilat ne morëm pjesë. Por ajo është nismë në tentim sepse, derisa nuk janë të gjashtë vendet, nuk është nismë e kompletuar”, ka thënë ai./ TvKlanMK
Një raport i ri i publikuar nga UNFPA, Fondi i Kombeve të Bashkuara për Popullsinë, paralajmëron se pabarazitë e vazhdueshme në shoqëri pengojnë zhvillimin dhe, siç argumenton drejtoresha rajonale e UNFPA, Florence Bauer, e bëjnë më të vështirë menaxhimin e ndryshimeve demografike për vendet në Evropën Lindore.
Disa njerëz mendojnë se mënyra për të rregulluar nivelet e ulëta të lindjeve në Evropën Lindore është t’u bëhet presion grave që të kenë më shumë fëmijë. Qeveritë ofrojnë stimuj financiarë ose madje përpiqen të kufizojnë zgjedhjet e grave mbi trupin e tyre.
Por nuk ka asnjë provë që masa të tilla krijojnë një rritje të qëndrueshme të nivelit të lindjeve. Në vend të kësaj, kufizimi i të drejtave të grave rrezikon të ndryshojë progresin e bërë në dekada drejt barazisë gjinore dhe mund të ketë pasoja të rënda.
Jetë të dëmtuara: Kur zgjedhjet e grave kufizohen, mirëqenia e tyre zvogëlohet dhe potenciali i tyre mbytet. Shtatzënitë e padëshiruara mund të prishin arsimin dhe karrierën. Mungesa e autonomisë së trupit mund t’i mbyllë gratë në cikle varfërie dhe varësie, shpesh të shoqëruara me dhunë në familje. Kur gratë kanë kontroll mbi trupin e tyre dhe akses në kontracepsion, ato mund të planifikojnë familjet e tyre dhe të zgjedhin të kenë fëmijë në momentin e duhur të jetës së tyre.
Dëmi ekonomik: Vendet që përballen me rënien e popullsisë nuk mund të përballojnë të bllokojnë gjysmën e popullsisë së tyre. Për të ndërtuar ekonomi dhe shoqëri elastike, ata kanë nevojë për kontributin e plotë të të gjithë qytetarëve të tyre. Fuqizimi i grave dhe vajzave ka kuptim ekonomik: rrit produktivitetin, inovacionin dhe mirëqenien e përgjithshme.
Në vitin 1994, në Konferencën Ndërkombëtare për Popullsinë dhe Zhvillimin në Kajro, komuniteti ndërkombëtar bëri një angazhim historik për të mbrojtur të drejtat seksuale dhe riprodhuese të të gjithë njerëzve. Sot, tridhjetë vjet më vonë, raporti i UNFPAsë Gjendja e Popullsise se Botes tregon se është bërë shumë progres, por gjithashtu nxjerr në pah pabarazitë e thella që vazhdojnë ende.
Të dhënat janë të habitshme. Një në katër gra, në vendet ku kemi të dhëna, nuk kanë autonomi të trupit – të drejtë për të vendosur për kujdesin e tyre shëndetësor, kontracepsionin dhe nëse ose kur të bëjnë seks. Më shumë se dy në tre gra në Evropën Lindore dhe Juglindore kanë përjetuar një formë të dhunës me bazë gjinore, shpesh nga partneri ose dikush tjetër në familje. Miliona gra duan të përdorin kontraceptivë modernë, por nuk mund të kenë akses në furnizimet, informacionin dhe shërbimet e planifikimit familjar.
Diskriminimi është më i rëndë për gratë që tashmë përballen me disavantazhe të ndryshme, shpesh të mbivendosura. Në Shqipëri, për shembull, një studim i vitit 2017 zbuloi se 74 për qind e grave rome raportuan vështirësi serioze në aksesin e kujdesit shëndetësor, krahasuar me vetëm 35 për qind të grave shqiptare. Ndërsa aksesi në kujdesin shëndetësor u përmirësua gjatë dekadës së fundit për të dy grupet, përfitimet ishin shumë më të ngadalta për më të pafavorizuarit.
Këto pabarazi përfaqësojnë tragjedi individuale, por ato shkaktojnë edhe dëme më të gjera. Kur grave u mohohet kujdesi thelbësor shëndetësor, familjet dhe komunitetet e tyre vuajnë. Kur pengesat strukturore ose stigma sociale i pengojnë gratë të arrijnë potencialin e tyre, ekonomitë humbasin.
Vendet që përballen me ndryshime demografike kanë nevojë për politika të mirëmenduara që investojnë te gratë dhe vajzat. Kjo nënkupton sigurimin e aksesit universal në arsim, kujdes shëndetësor cilësor, mundësi ekonomike dhe mbrojtje kundër dhunës me bazë gjinore. Do të thotë gjithashtu respektim i të drejtës themelore të grave për të kontrolluar trupin e tyre dhe për të marrë vendime për jetën e tyre.
Rruga drejt shoqërive të shëndetshme dhe të begata nuk është përmes kontrollit të trupave të grave. Ajo qëndron në çmontimin e barrierave që i pengojnë gratë dhe vajzat të lulëzojnë – për hir të tyre dhe për mirëqenien e komuniteteve dhe kombeve të tyre.
Sot në Bruksel do të zhvillohet takimi i radhës në nivel kryenegociatorësh mes Kosovës dhe Serbisë.
I dërguari special i BE-së në dialogun Kosovë-Serbi, Miroslav Lajçak të hënën tha se pret që të dyja palët t’i shkojnë në takim në Bruksel me mendje të hapur dhe qasje të orientuar drejt zgjidhjes.
“Në fund të kësaj jave, do të pres kryenegociatorët e Kosovës dhe Serbisë për një raund tjetër bisedimesh për të gjetur një zgjidhje të përkohshme për njerëzit e prekur nga vendimi i Bankës Qendrore të Kosovës. Pres që të dyja palët të vijnë në takim me një mendje të hapur, fleksibilitet dhe një qasje të orientuar drejt zgjidhjes bazuar në idetë e paraqitura gjatë takimeve të mëparshme”, ka shkruar Lajçak në Facebook.
Të enjten e 4 prillit, ishte takimi i fundit në Bruksel për çështjen e dinarit, e që përfundoi pa marrëveshje.
Zëvendëskryeministri Besnik Bislimi pas takimit të enjten e kaluar, tha se pala kosovare është pajtuar me propozimin e emisarit të BE-së, sa i përket çështjes së dinarit, por pala serbe ka kërkuar kohë shtesë.
“Duke parë pamundësinë e arritjes së një kompromisi, Lajçak ka nxjerrë një propozim të konsoliduar për të cilën ne besojmë se është konstruktiv dhe në rrugën e duhur për të gjetur zgjidhje, e cila më së shumti i shkon për shtati qytetarëve serb në Kosovë. Pala serbe nuk ka qenë e gatshme të reflektojë këtë propozim dhe ka kërkuar kohë shtesë. Takimi i radhës pritet të mbahet pas dy javëve në Bruksel”, ka deklaruar Bislimi.
“Atyre iu është bërë e qartë që takimi i radhës mund të mbahet vetëm nëse ata janë të gatshëm të vijnë me ide për kompromis. Edhe sot kemi pasur dallime të mëdha, përderisa pala kosovare ka diskutuar për opsionet se si qytetarët serb mund të marrin mbështetjen financiare edhe më tej nga Serbia. Pala serbe ka funksionuar si avokate e ‘Postanska bankës’ dhe gjithë kohën ka diskutuar se si të rregullohet licencimi i kësaj banke, e cila nuk është as kompetente, as në interes të palëve të involvuara”, kishte deklaruar tutje Bislimi.
Në anën tjetër, Lajçak tha pas takimit se pati përafrim të qëndrimeve mes propozimeve të palëve.
“Arritëm të përafrojmë qëndrimet mes dy propozimeve të palëve. Planifikoj të vazhdoj diskutimet shumë shpejt bazuar në idetë e BE-së për kompromis”, shkroi ai në X, që më herët njihej si Twitter.
Për takimin, emisari evropian foli edhe gjatë forumit “BE takon Ballkanin”, ku theksoi se në pesë javët e fundit kanë zhvilluar katër takime me të dyja palët dhe se siç tha ai nuk duhet të jenë qytetarët ata që duhet të “pagujnë çmimin”.
“Në pesë javët e fundit kemi pasur katër takime mes dy delegacioneve dhe javën e ardhshme do të ketë një takim tjetër. Ne përsëri u gjendëm në situatën që duhet të përballemi me pasojat e një vendimi dhe të mos diskutojmë para se të marrim vendimin”, tha Lajçak në forum.
Emisari evropian tha gjatë forumit se ka përpjekje nga palët për të gjetur zgjidhje, dhe shpreson që ajo të arrihet në takimin e javës së ardhshme.
“Pra, ajo që dua të them është se diskutimet janë ndërtuar, palët po vijnë, atmosfera është më konstruktive se zakonisht, do të thosha. Dhe ka një përpjekje për të gjetur një zgjidhje. Kështu që ne bëmë herën e fundit, të enjten e kaluar”.
“Dhe për të shpëtuar janë paraqitur propozimet e palëve. Uh, ne përpiqemi të arrijmë këto propozime. Nuk ishte shumë e mundur. Kështu që herën e fundit ne si Bashkim Evropian i kemi prezantuar idetë tona dhe ato janë pranuar nga të dyja palët. Pra, po, por ne do të takohemi javën e ardhshme, dhe shpresojmë ta finalizojmë. Marrëveshja, në bazë të ideve të paraqitura nga Bashkimi Evropian”, tha Lajçak.
Për takimin e katër prillit, u deklaruan edhe nga Qeveria e Kosovës, ku sipas komunikatës së tyre, pala kosovare, ka cilësuar si konstruktiv propozimin e BE-së për gjetjen e një zgjidhje për dinarin, megjithatë Qeveria e Kosovës akuzon palën serbe për mungesë të bashkëpunimit duke kërkuar kohë shtesë dhe duke insistuar në licensimin e një etniteti ilegal, si “Postanska Banka”.
“Ky ishte takimi i tretë në nivel të kryenegociatorëve për gjetjen e një zgjidhjeje për pranimin e mbështetjes financiare të Serbisë nga komuniteti serb në Kosovë. Propozimet tona për zgjidhje kanë qenë që nga fillimi brenda Rregullores së BQK-së dhe në pajtim me legjislacionin e Republikës së Kosovës e gjithashtu dhe propozimi i BE-së konsiderohet nga ana e jonë si propozim konstruktiv dhe në drejtimin e duhur”, thuhej në komunikatën e Qeverisë.
Rregullorja e re e BQK-së ka hyrë në fuqi që nga 1 shkurti, ku përcakton euron si valutë të vetme zyrtare në Kosovë, gjë e cila ka ngritur reagime edhe nga faktori ndërkombëtar, duke kërkuar që të shtyhet zbatimi i këtij vendimi.
Të enjten mbi Kosovë parashihet të mbajë mot me vranësira të shpeshta dhe intervale të shkurta me diell.
Temperaturat minimale do të lëvizin prej një dhe katër gradë Celsius, ndërsa ato maksimale prej 10 deri në 13 gradë.
Era do fryjë drejtimesh të ndryshme, e cila kohë pas kohe pritet të jetë e fuqishme, me shpejtësi prej 15 deri në 41 km/h.
Sot me fillim nga ora 09:00 në sallën “1 tetori” do të mbahet ceremonia e diplomimit të gjeneratës së 59-të të Policisë së Kosovës.
Në këtë ceremoni pritet të marrin pjesë personalitete të larta shtetërore dhe ndërkombëtare, familjarë të zyrtarëve policorë që do të diplomojnë dhe eprorë të Policisë së Kosovës.
Nga menaxhmenti i Policisë së Kosovës do të iu drejtohen të pranishmeve me nga një fjalë rasti.
Po ashtu, do të shpërndahen edhe certifikatat për të diplomuarit.
Një person është arrestuar lidhur me rastin tragjik të vdekjes së 23-vjeçares ukrainase, O.K., në autostradën “Arbën Xhaferi”, në muajin shkurt. Personi që u prangos dyshohet se natën kritike ka qenë me viktimën në veturën e tij.
Sinjali raporton se i arrestuari nën dyshimin se ka kryer veprën penale “Mos evitimi i rrezikut” është H.G 36-vjeçar. Ndaj tij, Prokurori i Shtetit tashmë ka lëshuar urdhër për ndalim policor.
Burimet e Sinjalit kanë bërë me dije se si rezultat i hetimit të nisur nga Hetimet Rajonale në Ferizaj në koordinim me Prokurorin e Shtetit, u zbulua se i dyshuari e kishte lënë viktimën në autostradë dhe më pas të njëjtën e ka goditur një automjet.
Përgatiti: Armand Hoti
Rrugët në qendër të Pejës u bllokuan, mesditën e së mërkurës. Këtu po protestohet për Gjyljeta Ukellën, e cila u vra një ditë më parë nga ish-bashkëshorti i saj, në banesë.
Grupit i prin vajza e viktimës. Bashkë me gjithë protestuesit, u shkojnë derë më derë institucioneve, për të kërkuar drejtësi për 43-vjeçaren, por këtë e bëjnë përmes heshtjes, pa bërë ndonjë thirrje.
“Fajin e kemi secili prej neve, pastaj pjesa e dytë është pjesa e institucioneve, sidomos ato të drejtësisë. Për atë arsye sot vizituam policinë dhe gjykatën në heshtje. Mendojmë që kjo heshtje t’i shurdhojë ata për shkak se do të duhej të vepronin shumë më shumë, në rastet të cilat kanë pasur një element iniciues sikur rasti ky i fundit”, tha Veton Muja, protestues.
Protestuesit i bëjnë thirrje shtetit që të kujdeset për fëmijët tashmë jetim të së ndjerës.
“Bëjmë thirrje nga këtu që të gjithë shërbimet shtetërore t’iu ofrohen fëmijëve të së ndjerës, varësisht prej shërbimeve që kanë nevojë dhe ne si organizatë do të jemi afër familjes dhe fëmijëve të së ndjerës. Familjes do t’i lëmë si kujtim edhe pse është ditë e hidhur, kjo foto e bukur e Gjyljetës ta keni ju familjarë si shenjë kujtimi”, tha organizatori i protestës.
Dikush erdhi nga larg, me të vetmin qëllim për t’iu bashkuar marshit.
“Kam ardhë nga Maqedonia e Veriut, nga Struga, nga diaspora se jetoj në Zvicër, enkas për këtë protestë… Më vjen shumë keq për qytetin e Pejës, për Kosovën, që po ndodhin këto vrasje, nënat tona, motrat tona përditë po vriten, kur ne ende kemi jetimë prej lufte”, tha Hatixhe Kelmendi.
Gjyljeta u vra nga ish-bashkëshorti i saj, Edmond Lajçi, me të cilin kishin tre fëmijë.
Ndaj dorasit, të martën është caktuar masa e paraburgimit prej një muaji.
Edmond Lajçi ishte paraqitur në polici nga ish-bashkëshortja e tij, në vitin 2021, për dhunë psikike. Por pavarësisht se Gjykata fillimisht i shqiptoi atij dënim në kohëzgjatje prej 3 muajsh, atij iu mundësua lirimi me 300 euro pagesë.
Përgatiti: Fatlum Jashar
Pasditen e së mërkurës, kryetari i Kuvendit të Kosovës dhe nënkryetari i Lëvizjes Vetëvendosje, Glauk Konjufca, u përfshi direkt në fushatën zgjedhore në Maqedoninë e Veriut.
Në Çarshinë e Shkupit, ai takoi krerët e partive që njihen si opozita shqiptare.
Për vizitën nuk ishte e njoftuar Ministria e Punëve të Jashtme e shtetit fqinj.
Përveç kryepalamentarit, në fushatë do të përfshihet direkt edhe kryeministri Albin Kurti, i cili, sipas një njoftimi të koalicionit VLEN, të premten, do të marrë pjesë në takim me mërgatën në Berlin.
Krahas konstatimit se shoqëria shqiptare në Maqedoninë e Veriut është e politizuar, opinionisti Albert Musliu sqaroi dy pikëvështrimet kryesore në raport me këtë përfshirje të kryeministrit dhe kryetarit të Kuvendit të Kosovës.
“Sigurisht përshëndetet nga ata që e përbëjnë opozitën, ata që e përbëjnë shumicën aktuale prej frontit evropian, gjithsesi se nuk shihet mirë. Dhe, mendoj se efekti më i madh do të jetë në marrëdhëniet ndërmjet elitave politike, sa që do të ketë efekt realisht edhe në terren”, tha Musliu.
Referuar nivelit jo të mjaftueshëm të pjekurisë politike të shoqërisë, Musliu nuk përjashtoi efektet negative nga kjo përfshirje.
“Devotshmëria e subjekteve politike shqiptare në Maqedoni, në periudhën që vijon, d.m.th pas zgjedhjeve ne kemi prapë jetë normale, dhe ajo hatërmbetja sigurisht se do të ngelë dhe më vjen keq që kjo ndodhë. Realisht shqiptarët e Maqedonisë janë të afërt me popullin e Kosovës, janë të afërt me popullin e Shqipërisë, ndërsa politikanët jo çdoherë kujdesen që të mos ndërhyhet në këto marrëdhënie, të mos ndërhyhet te qytetarët”, tha Musliu.
Angazhimi i krerëve të partisë në pushtet në Kosovë në fushatën në Maqedoninë e Veriut, në vlerësimin e gazetarit Naser Selmani nuk është ndërhyrje e as nuk përbën problem.
“Ju kujtohet kur kryetari Thaçi pati ardhur këtu në Maqedoni dhe pati ndarë mirënjohje për njerëzit e Ali Ahmetit, kjo atëherë nuk ishte ndërhyrje; Z. Bujar Osmani, inçizon spote publicitare me kryeministrin e Shqipërisë, ku thotë se Bujar Osmani është super dhe kjo nuk është ndërhyrje; Ose nëse Ali Ahmeti shpallet qytetar nderi i Prizrenit, kjo nuk është ndërhyrje; Ama nëse Konjufca dhe Kurti vijnë në Maqedoni kjo është ndërhyrje, mendoj se kjo është retorikë antishqiptare”, tha Selmani.
Në gusht të vitit 2023, me ftesë të Bilall Kasamit, njërit nga liderët e koalicionit VLEN, kryeministri Albin Kurti qëndroi për vizitë në Maqedoninë e Veriut, duke shpërfillur institucionet qendrore dhe partitë shqiptare në pushtet.