Category: Lajme

Policia e Kosovës, ka njoftuar se, ka arrestuar një person të dyshuar për veprën penale ‘’dhunë në familje’’.

Rasti, njofton Policia, ka ndodhur në mesnatë në Mitrovicën Veriore, ku gjatë patrullimit, policia ka vërejtur një person që ka sulmuar dy të tjerë, një femër e një mashkull, ku edhe e kanë arrestuar të dyshuarin.

‘’ Gjatë intervistimit të viktimave është kuptuar se i dyshuari dhe viktimat janë në lidhje familjare. I dyshuari pas testit të alkoolit ka rezultuar se ishte nën ndikim të alkoolit me 1.06 promil alkool në gjak’’, thuhet në raport.

Postimi:

Policia arreston një person të dyshuar për veprën penale “Dhunë në familje”

Mitrovicë Veri, 18 Qershor 2026

Më datë 18.06.2026 rreth orës 00:20, njësia policore e Stacionit Policor në Mitrovicë Veri gjatë patrullimit në rrugën “Zoran Gjingjiq” kanë vërejtur se një person i gjinisë mashkullore ishte duke i sulmuar dy viktimat njëra e gjinisë femërore dhe tjetri i gjinisë mashkullore. Njësitë policore menjëherë e kanë arrestuar të dyshuarin dhe te gjitha palët e involvuara ne rast janë sjellë ne stacion policor për procedura policore, viktimat kanë refuzuar të dërgohen për tretman mjekësor.

Gjatë intervistimit të viktimave është kuptuar se i dyshuari dhe viktimat janë në lidhje familjare. I dyshuari pas testit të alkoolit ka rezultuar se ishte nën ndikim të alkoolit me 1.06 promil alkool në gjak.

Lidhur ma rastin është njoftuar Prokurori i shtetit dhe në koordinim me të është iniciuar rasti “Dhunë në familje” ndërsa i dyshuari është ndaluar në ndalim policor për 48 orë.

Policia e Kosovës apelon që çdo rast i dyshuar i dhunës në familje të raportohet. Të gjitha rastet do të trajtohen me profesionalizëm dhe seriozitet, në përputhje me ligjin, me qëllim të mbrojtjes së viktimave dhe parandalimin e dhunës.

Qytetarët mund të kontaktojnë Policinë e Kosovës përmes:

📞 192 – numri emergjent

📞 0800 19 999 – linjë pa pagesë

📞 038/504 504 4800 – linjë pa pagesë

📞 038/504 504 4801 – linjë pa pagesë

📱 Aplikacioni “Lajmëro Policinë”

Departamenti Amerikan i Shtetit kanë thënë se bashkëpunimi në fushën e energjetikës është një prej shtyllave të bashkëpunimit ekonomik me partnerët evropianë.

Kështu kanë thënë nga Washingtoni, të pyetur lidhur me kërkesën e ShBA-së që Kosova të lidhet me rrjetin e gazit amerikan dhe qëndrimin e Qeverisë Kurti për të mos ndërtuar rrjet të LNG-së brenda Kosovës por për t’u kyçur në centralin e Vlorës.

Nga DASH thonë se bashkëpunimi në fushën energjetike rrit dhe sigurinë e Evropës.

“Eksporti i energjisë amerikane është një shtyllë qendrore në bashkëpunimin tonë ekonomik me partnerët evropianë. Eksportet e energjisë amerikane forcojnë sigurinë energjetike në Evropë”, kanë thënë nga Departamenti Amerikan i Shtetit.

Sa i përket Kosovës, nga DASH kanë thënë se SHBA është e gatshme për të bashkëpunuar me industrinë energjetike amerikane dhe Qeverinë e Kosovës për një të ardhme të sigurt energjetike përmes diversifikimit të furnizimit me energji elektrike, ku përfshihet edhe Gazi i Lëngshëm Natyror (LNG)

“Shtetet e Bashkuara janë të gatshme të bashkëpunojnë me industrinë energjetike të SHBA-së dhe Qeverinë e Kosovës për të siguruar të ardhmen energjetike të Kosovës përmes diversifikimit të furnizimit me energji, duke përfshirë edhe LNG-në amerikane”, kanë thënë nga Departamenti Amerikan i Shtetit për Gazetën Express.

Kërkesa që Kosova t’i bashkohet rrjetit amerikan të gazit ka pasur edhe nga Ambasada e SHBA-së në Kosovë. E ngarkuara me Punë në Ambasadën amerikane, Annu Prattipati, e ka bërë një gjë të tillë përmes një shkrimi autorial të botuar ditë më parë.

Edhe zyrtari për çështje ekonomike në Ambasadën Amerikane në Prishtinë, Micah Savidge, ka thënë se Kosova rrezikon të humbasë mundësi të rëndësishme investimi, nëse nuk siguron furnizim të qëndrueshëm me energji.

Ai ka kërkuar madje që Kosova të ndërtojë një central të gazit. Këto deklarime kanë ardhur pas qëndrimit të kryeministrit, Albin Kurti, se Kosova mund të lidhet në centralin e Vlorës dhe nga atje të importojë energji elektrike.

Projekti i gazit amerikan kishte qenë temë edhe në vitin 2021 kur MCC kishte vendosur fonde në dispozicion që Kosova të lidhet me gazsjellësin amerikan. Megjithatë ai projekt nuk ishte përzgjedhur nga Qeveria Kurti dhe ishte vendosur që ato fonde të shpenzoheshin për projektin e baterive për ruajtjen e energjisë elektrike.

Zyra Kombëtare e Auditimit (ZKA) ka publikuar raportin e auditimit për Pasqyrat Financiare Vjetore të Komunës së Mitrovicës së Veriut për vitin 2025. Edhe pse Auditore e Përgjithshme, Vlora Spanca, ka dhënë një opinion të pamodifikuar për pasqyrat financiare dhe pajtueshmërinë, raporti nxjerr në pah një varg parregullsish financiare, dobësi në menaxhimin e pasurisë dhe një shkallë mjaft të ulët të realizimit të buxhetit.

Në total, auditimi ka rezultuar me gjashtë rekomandime, prej të cilave dy janë të reja, dy pjesërisht të përsëritura dhe dy të përsëritura plotësisht nga viti paraprak.

Realizimi i buxhetit në nivelin kritik prej 53%
Gjatë vitit 2025, Komuna e Mitrovicës së Veriut kishte në dispozicion një buxhet final prej 6,151,761 €. Nga kjo shumë, institucioni ka arritur të shpenzojë vetëm 3,290,371 €, që paraqet një normë realizimi prej vetëm 53%.

Sipas raportit të ZKA-së, kjo ngecje e theksuar ka ndodhur kryesisht në dy kategori kryesore ekonomike:

Pagat dhe mëditjet: Nga 2,891,670 € të buxhetuara, janë shpenzuar vetëm 1,356,472 € (rreth 47%), për shkak të mosplotësimit të pozitave të parapara.
Investimet kapitale: Nga 2,330,040 € në buxhetin final, janë realizuar vetëm 1,295,978 € (rreth 56%), si pasojë e moskontraktimit të projekteve sipas planifikimit.
Në anën tjetër, komuna ka shënuar tejkalim drastik në mbledhjen e të hyrave vetjake jo-tatimore, duke inkasuar 202,047 € nga 106,157 € sa ishin planifikuar.

Gabimet financiare dhe taksat e pallogaritura në urbanizëm
Auditori ka identifikuar lëshime serioze administrative brenda Drejtorisë për Urbanizëm, të cilat i kanë kushtuar buxhetit komunal mijëra euro:

Përllogaritja e gabuar e tarifës për leje ndërtimi: Për ndërtimin e një objekti banesor kolektiv me sipërfaqe prej 12,580 m², komuna ka aplikuar tarifa të gabuara në kundërshtim me rregulloren komunale në fuqi. Në vend të vlerës reale prej 38,621 €, janë inkasuar vetëm 20,883 €, duke shkaktuar një humbje direkte financiare prej 17,738 €.
Mungesa e lejes mjedisore: Po për të njëjtin projekt me vlerë investive prej 3,774,180 €, Drejtoria për Urbanizëm nuk ka kërkuar pajisjen me Leje Mjedisore Komunale. Si rrjedhojë, nuk është faturuar dhe as inkasuar taksa prej 0.2% e vlerës së projektit, që kap shumën prej 7,548 €.
Kaos me menaxhimin e pasurisë dhe mosndërtim i mekanizmave të kontrollit
Një tjetër fushë ku janë evidentuar mangësi të rëndësishme është menaxhimi i pasurisë jo-financiare. Komuna ka dështuar të regjistrojë blerjet e pasurive nën 1,000 € në sistemin “e-pasuria”, duke nënvlerësuar pasurinë jo-kapitale për 68,288 €. Për më tepër, projektet e finalizuara që nga viti 2021 në vlerë prej 1,764,555 € vazhdojnë të mbeten të h窮ura si “investime në vijim”, duke pamundësuar amortizimin e tyre të rregullt.

Gjithashtu, procesi i inventarizimit të fundvitit është kryer vetëm për administratën qendrore, duke anashkaluar plotësisht Drejtorinë e Shëndetësisë dhe atë të Arsimit.

Për sa i përket auditimit të brendshëm, Komuna e Mitrovicës së Veriut ka dështuar sërish të themelojë Njësinë e Auditimit të Brendshëm (NJAB). Edhe pse ishte shpallur një konkurs, pozita nuk u plotësua për shkak të mungesës së interesimit nga kandidatët e kualifikuar.

Menaxhmenti pajtohet pa vërejtje me gjetjet
Kryetari i Komunës së Mitrovicës së Veriut, Milan Radojevic, përmes një letre zyrtare të konfirmimit të datës 9 qershor, ka deklaruar se pajtohet plotësisht me të gjitha gjetjet dhe rekomandimet e prezantuara në këtë raport. Ai ka konfirmuar se brenda 30 ditëve do të dorëzojë një plan të detajuar veprimi për zbatimin e plotë të tyre.

Deputetja e zgjedhur nga radhët e Aleancës, Teuta Haxhiu ka shprehur mirënjohje për rikthimin e saj në Kuvendin e Kosovës.

Përmes një postimi në Facebook, Haxhiu iu drejtua qytetarëve se kjo fitore nuk është e saja, por e popullit.

Më lejoni të shpreh mirënjohjen time më të thellë për secilin prej jush që besuat dhe trasuat rrugëtimin tonë të përbashkët, krah Aleancës dhe vizionit të saj kombëtar e shtetndërtues. Fitorja nuk është e imja, është 100% e juaja, prandaj publikisht me gjithë shpirt ua dedikoj JU, dhe zotohem se në çdo situatë do të jem pranë jush për të dëgjuar hallin dhe zërin tuaj, në mënyrë që të njëjtin ta përcjellë me përkushtim, ndershmëri dhe transparencë në Kuvendin e Kosovës. E bekuar nga Zoti, të jem njëra prej jush!”, ka shkruar ajo në Facebook.

Kandidati për deputet i Lidhjes Demokratike të Kosovës, Paris Guri, ka goditur disa nga bashkëpartiakët e tij të cilët po kërkojnë reforma të brendshme në këtë subjekt politik.

Guri me anë të një shkrimi në ‘Facebook’ ka thënë se ata që po kërkojnë reforma në LDK, siç u shpreh ai, i dëgjon nëpër qoshe duke folur me pesimizëm për partinë.

“Interesante se si, për tri palë zgjedhje radhazi, sapo përfundon procesi zgjedhor, më të zëshmit bëhen pikërisht ata që nuk i sheh askund gjatë fushatës. Nuk i sheh në terren, nuk i sheh në organizim, nuk i sheh në asnjë betejë politike. Përkundrazi, i dëgjoje nëpër qoshe duke folur me më shumë pesimizëm për LDK-në sesa vetë kundërshtarët tanë”, ka thënë ai.

Guri thotë se LDK’ja u rrit “kur shumë të tjerë kishin zgjedhur vetëm të komentonin dhe të prisnin fundin e procesit për t’i bërë publike po ato komente”.

Deputetja e Shkodrës, Marjana Koçeku, e cila në ditët e fundit është bërë protagoniste për largimin nga gjiri i Partisë Socialiste dhe për vendimin për të vijuar si deputete e pavarur, ka reaguar sërish në rrjetet sociale.

Këtë herë ajo flet në lidhje me ngjarjet e vjetshme në Theth, ku IMT ndërmori një operacion të gjerë për shembjen e ndërtimeve pa leje. Ajo shprehet se në atë kohë ka qarë më shumë se kur ka humbur babain e saj.

“I kërkoj falje prej zemre Thethit. Ajo ngjarje ka kenë ndër goditjet ma të mëdha emocionale që kam marrë n’jetën teme.

Unë nuk kjaj, por njato ditë kam kja ma shumë se kur m’ka vdekë baba. Betohem në 7 shenjtorët që besoj ma shumë se tash kam me ju përfaqësue si duhet. S’ka me i fye kush ma ato male siç i kanë fye”, shprehet Koçeku.

Një person është gjetur pa shenja jetë në banesën e tij.

Sipas raportit 24 orësh të Policisë së Kosovës bëhet e ditur se rasti ka ndodhur të mërkurën rreth orës 14:11 në rrugën “Agim Ramadani”, në Mitrovicë.

Tutje bëhet e ditur se me rekomandim të prokurorit dhe kërkesën e familjarëve, trupi i pajetë i viktimës u është liruar familjarëve për ceremoni mortore.

“Rr. Agim Ramadani, Mitrovicë 17.06.2026 – 14:11. Viktima mashkull kosovar, është gjetur pa shenja jete në banesën e tij. Me rekomandim të prokurorit dhe kërkesën e familjarëve, trupi i pajetë i viktimës u është liruar familjarëve për ceremoni mortore”, thuhet në raport.

Kreu i Grupit parlamentar të Partisë Socialiste, Taulant Balla reagoi ndaj fjalës së kryedemokratit Sali Berisha në Kuvend i cili kërkoi ndryshimin e rendit të ditës dhe dorëheqjen e kryeministrit duke iu referuar kërkesave të protestuesve.

Balla i kërkoi Berishës të dilte në protestë nëse mundej, raporton euronews.al

“Më qesharaku këtu që flet për protestën është ky pelikani në foltore. Sali Berisha të sfidoj, dil sot në protestë po ta mbajti”, tha Balla.

Deputeti i zgjedhur Artan Behrami ka kërkuar nga Prokuroria që të zhvillojë një hetim të plotë lidhur me pretendimet për parregullsi gjatë procesit të numërimit të votave të diasporës.

Behrami ka deklaruar se gjatë gjithë procesit ka pranuar ankesa nga numëruesit për zarfa të hapur, zarfa të dyshimtë dhe dyshime për mundësi manipulimi të votave.

Ai ka ftuar të gjithë personat që kanë parë, verifikuar apo posedojnë informacione për parregullsi të mundshme që t’i raportojnë ato tek institucionet kompetente.

Sipas tij, integriteti i procesit zgjedhor duhet të mbrohet dhe çdo dyshim duhet të sqarohet përmes një hetimi transparent.