Category: Lajme

Një ngjarje e rëndë ka ndodhur të dielën në Spitalin Rajonal të Gjakovës, ku një fëmijë 3-vjeçar ka humbur jetën.

Lajmin për Dukagjinin e ka konfirmuar drejtori i Policisë së Kosovës për rajonin e Gjakovës, Lumni Graishta, i cili ka thënë se fëmija ka ndërruar jetë si pasojë e lëndimeve të shkaktuara nga rënia e dyerve të oborrit mbi të.

“Rasti ka ndodhur dje në Rahovec. Fëmija i moshës 3 vjeçar ka qenë duke luajtur në oborr ku disa dyer që kanë qenë jashtë përdorimit janë rrëzuar dhe i kanë rënë atij. I njëjti me urgjencë është sjellur në Spitalin e Gjakovës ku edhe ka ndërruar jetë”, ka thënë Graishta.

Ai ka shtuar se rasti është iniciuar si “shkaktim i rrezikut të përgjithshëm”.

Presidentja e vendit, Vjosa Osmani, u ka dërguar një mesazh mërgimtarëve përmes një videoje të postuar në Instagram, e cila shfaq disa pjesë të Kosovës.

Ajo thotë se ata që jetojnë në diasporë janë zemra dhe shpirti i Kosovës, e poashtu iu bëri thirrje të vijnë sa më shumë në atdheun e tyre.

“Kosova tani më shumë se kurrë ka nevojë për ju”, thotë presidentja ndër të tjera.

Ky është mesazhi i plotë i Osmanit:

Mërgatë e dashur, motra e vëllezër, sa herë të ktheheni në atdheun tuaj, ju ktheheni te familjet tuaja, të të dashurit tuaj, te kujtimet tuaja, te toka juaj. Kthimi juaj është ritakim dhe ribashkim që kapërcen distancën dhe kohën.

Bujaria dhe përkushtimi juaj për atdheun është i jashtëzakonshëm. Malli për Kosovën është një lidhje që na bashkon, kudo që të na çojë jeta. Kthimi juaj këtu forcon identitetin tonë kolektiv dhe na kujton shpirtin e qëndrueshëm të popullit tonë. Kosova tani më shumë se kurrë ka nevojë për ju. Përvojat, aftësitë dhe perspektivat tuaja janë tejet të çmueshme, ndërsa ne vazhdojmë ta ndërtojmë një të ardhme më të ndritshme për atdheun tonë të dashur. Ju ktheheni në vatrat tuaja Ju ktheheni në Kosovën tuaj, atdheun tuaj shpitëror. Dyert, zemrat dhe shtëpitë tona janë të hapura sepse ju jeni zemra dhe shpirti i Kosovës.

View this post on Instagram

A post shared by Vjosa Osmani (@vjosa.osmani)

Një flotë prej më shumë se njëqind kamionësh do të kërkonte 15 vjet për të pastruar Gazën prej gati 40 milionë ton rrënoja në një operacion që kushton midis 500 milionë ose 600 milionë dollarë, ka gjetur një vlerësim i OKB-së.

Përfundimet do të nënvizojnë sfidën e madhe të rindërtimit të territorit palestinez pas muajsh të një ofensive të ashpër izraelite që ka çuar në shkatërrim masiv të shtëpive dhe infrastrukturës, shkruan The Guardian, transmeton Klankosova.tv.

Sipas vlerësimit, i cili u publikua muajin e kaluar nga Programi i OKB-së për Mjedisin, 137 mijë e 297 ndërtesa ishin dëmtuar në Gaza, më shumë se gjysma e totalit. Nga këto, pak më shumë se një e katërta u shkatërruan, rreth një e dhjetë e dëmtuar rëndë dhe një e treta e dëmtuar mesatarisht.

Agjencia Kosovare e Privatizimit do të organizojë sot një aksion humanitar.

Ky organizim ka të bëjë me dhurimin e gjakut nga zyrtarët e kësaj agjencie.

Kjo ngjarje do të zhvillohet në zyrat qendrore të AKP-së.

Dollari amerikan këtë të hëne korriku, blihet me 91.7 lekë dhe shitet me 92.6 lekë.

Ndërkaq, monedha evropiane, euro vijon të qëndrojë në nivele të ulëta, ajo blihet me 100.0 lekë dhe shitet për 100.6 lekë, shkruan euronews.al.

Paundi britanik blihet me 118.6 lekë dhe shitet me 119.5 lekë.

Ndërkaq, franga zvicerane blihet me 102.1 lekë dhe shitet për 103.1 lekë.

Edhe gjatë së së hënës (sot) do të vazhdojë procesi gjyqësor që po mbahet në Hagës në rastin e krerëve të UÇK-së.

Dëshmitari me numër W04501 ka qenë i fundit që ka dëshmuar në Hagë.

Zyra e Prokurorit të Specializuar pretendon se Hashim Thaçi, Kadri Veseli, Rexhep Selimi e Jakup Krasniqi, kanë kryer krime lufte gjatë luftës së fundit në Kosovë.

Presidenti i Shteteve të Bashkuara, Joe Biden, u bëri thirrje amerikanëve që të refuzojnë dhunën politike dhe të riangazhohen për zgjidhje paqësore të mosmarrëveshjeve.

Biden foli nga Zyra Ovale një ditë pas atentatit kundër ish-presidentit republikan, Donald Trump, i cili pritet të jetë rival i tij në zgjedhjet presidenciale të nëntorit.

“Të shtënat në mitingun e Donald Trumpit në Pensilvani na bëjnë thirrje të gjithëve që të bëjmë një hap prapa”, tha Biden.

“Në Amerikë nuk ka vend për këtë lloj dhune – për asnjë lloj dhune”, theksoi ai.

Biden tha se Partia e tij Demokratike dhe republikanët mund të konkurrojnë fuqishëm mbi vizione të ndryshme politike, por se këtë duhet ta bëjnë në një mënyrë të qytetëruar.

Në Amerikë, tha ai, “ne i zgjidhim mosmarrëveshjet në kutitë e votimit, e jo me plumba”.

Sipas tij, “fuqia për të ndryshuar Amerikën, duhet të qëndrojë gjithmonë në duart e njerëzve, e jo në duart e vrasësve të mundshëm”.

“Urrejtja nuk duhet të ketë një port të sigurt”, tha Biden.

Politika, sipas tij, duhet të jetë “një arenë për debat paqësor”.

“[Ajo] nuk duhet të jetë kurrë një fushë beteje dhe – Zot na ruaj – një fushë vrasjesh. Pavarësisht se sa të forta janë bindjet tona, ne kurrë nuk duhet të rrëshqasim në dhunë”, sipas presidentit amerikan.

Ai kërkoi nga amerikanët që të mbështesin demokracinë, ku “argumentet bëhen me mirëbesim” dhe ku “respektohet shteti i së drejtës”.

“Një demokraci amerikane, ku mirësjellja, dinjiteti dhe loja e ndershme nuk janë thjesht nocione të çuditshme, por realitete të gjalla. Ua kemi borxh këtë atyre që erdhën para nesh, vetes, fëmijëve tanë dhe nipërve tanë”, tha Biden në fjalimin rreth 6-minutësh.

Kjo ishte hera e tretë që ai e shfrytëzoi Zyrën Ovale për të komentuar çështje me rëndësi të madhe për amerikanët, që kur mori pushtetin në vitin 2021.

Tetorin e kaluar, ai mbajti një fjalim për konfliktet në Gazë dhe në Ukrainë, ndërsa në qershor të vitit 2023 iu drejtua amerikanëve për një marrëveshje me republikanët lidhur me buxhetin.

Këtë herë, adresimi u bë më pak se katër muaj para zgjedhjeve të 5 nëntorit.

Biden nuk i adresoi kritikat e bëra ndaj tij nga disa republikanë, të cilët e akuzuan për përforcim të retorikës përçarëse kundër rivalit të tij, Donald Trump.

Më herët, Trump, i cili u qëllua në vesh gjatë një tubimi në Pensilvani të shtunën, u bëri thirrje amerikanëve që të “qëndrojnë të bashkuar”.

Ai do të marrë pjesë në Konventën Kombëtare Republikane, e cila nis të hënën dhe zgjat katër ditë.

Shërbimi Sekret tha se “nuk po parashikon asnjë ndryshim operacional” për sigurinë.

Sulmuesi i dyshuar i Trumpit, Thomas Crooks, 20 vjeç, u qëllua dhe u vra nga Shërbimi Sekret, por motivi i tij mbetet i paqartë.

Nga të shtënat u vra një spektator, ndërsa dy të tjerë u plagosën rëndë./REL/

Ambasadori i Shteteve të Bashkuara në Republikën e Kosovës, Jeffrey Hovenier do të vizitojë sot Gjakovën, ku së bashku me kryetarin e kësaj komune, Ardian Gjini, do të mbajnë një konferencë për media.

Konferenca do të mbahet në njërin nga hotelet e qytetit, duke nis nga ora 12:50.

Instituti Hidrometeorologjik i Kosovës ka njoftuar se sot do të mbajë mot kryesisht me diell.

Sipas njoftimit, temperaturat minimale do të lëvizin ndërmjet 15-19gradë Celsius, ndërsa maksimalet e ditës parashihen të lëvizin ndërmjet 34-38 gradë Celsius. Do të fryjë erë kryesisht nga jugperëndimi me shpejtësi 1-4m/s.

“Këto temperatura të parashikuara në vende urbane do të jenë për 2-3 gradë më të larta, varësisht nga ekspozimi i materjeve të metalta, asfaltit, materjeve inerte dhe pozitës së objekteve ndaj kupës së qiellit. Parashihen edhe netë tropike në këto vende urbane , ku merkuri në termometër edhe gjatë natës dhe orëve të hershme nuk do të bie nën 20 gradë Celsius. Indeksi UV do të jetë shumë i lartë , parashihen rreth 64 orë me diell, prandaj kujdes kontaktit direkt me rrezet e diellit”, thuhet në njoftim.

Instituti rekomandon se personat me sëmundje kronike t’iu shmangen këtyre rrezeve, ose të bartin masa mbrojtëse, syze kapelë, rroba me ngjyrë të lehta.

“Një kujdes i veçantë edhe pjesëmarrësve në komunikacion, sepse ky mot me vapë shkakton shqetësime, dobëson reflekset e ngasjes, gjithashtu në raste të veçanta mund të humbin edhe kontrollin. Konsumimi i shpeshtë i ujit të freskët është i këshillueshëm”, ka njoftuar instituti.

Sot mbushen tetë vjet nga përpjekja për grusht-shtet ushtarak në Turqi.

Përpjekja për grusht-shtet u zhvillua në natën ndërmjet 15 dhe 16 korrikut të vitit 2016, ku përgjegjës të organizimit ishin pjesëtarë të ushtrisë turke.

Me urdhër ushtarak në rrugë u nxorën tanket, u sulmua Parlamenti turk, si dhe u tentua të arrestohet edhe presidenti Recep Tayyp Erdogan.

Pas dështimit të puçit ushtarak, janë arrestuar dhjetëra-mijëra ushtarë, policë, zyrtarë të shërbimeve shtetërore, profesorë, mjekë dhe përkrahës të Lëvizjes Gylen.

Turqia zyrtarisht përgjegjës për tentim grusht-shteti e ka bërë klerikun Fetaullah Gylen./KP/