Category: Lajme

Instituti i Kosovës për Drejtësi (IKD) ka vlerësuar se Kuvendi i Kosovës, në sesionin pranveror, nuk e ka përmbushur rolin e tij kushtetues, pasi që ka pasur shkelje të mëdha në raport me Kushtetutën, transparencën dhe llogaridhënien e Qeverisë përballë Kuvendit, raporton Ekonomia Online.

Mes tjerash, sipas IKD-së, Kushtetuta dhe aktgjykimi i Gjykatës Kushtetuese është shkelur edhe në Ligjin për Zyrtarët Publikë, për mos-respektimin e afatit prej gjashtë muajsh të vendosur nga Gjykata.

Hulumtuesi i lartë në IKD, Naim Jakaj, ka thënë se sasia e projektligjeve për të cilat pushteti po krenohet se i ka bërë – pjesa dërrmuese e tyre janë marrëveshje ndërkombëtare e një e treta, ligje të cilat ndryshojnë dhe plotësojnë ligje aktuale.

Ai ka thënë se premtimet elektorale, të cilat janë të parapara në Planin Kombëtar për Zhvillim në programin qeverisës 2021-2025, nuk janë miratuar, duke përmendur këtu Ligjin për Banimin Social të Përballueshëm e Ligjin për Punë.

“Gjatë sesionit pranveror deri në seancën e fundit, Kuvendi i miratoi në tërësi 36 projektligje, prej të cilave siç mund të shihet janë 21 të proceduara në vitin 2023 dhe 15 të proceduara në vitin 2024. Sasia e projektligjeve për të cilat pushteti politik po thotë dhe po krenohet se i ka bërë, pjesa dërrmuese e tyre marrëveshje ndërkombëtare, në fakt një e treta e tyre, në ndërkohë edhe pjesa tjetër, janë ligje të cilat ndryshojnë dhe plotësojnë ligje aktuale”.

“Ndërkohë premtimet elektorale, aktivitet të cilat janë të parapara në planin kombëtar për zhvillim në programin qeverisës në 2021-2025 nuk janë miratuar, Ligji për Banimin Social të Përballueshëm, Ligji për Punë, ligjet në reformën e drejtësisë – tashmë asnjëri nuk është në fuqi për shkak se u rrëzuan në Gjykatën Kushtetuese”, ka thënë ai.

Jakaj ka thënë se kjo legjislaturë përveç se ka shkelur Kushtetutën nuk ka zbatuar as aktgjykimet e Gjykatës Kushtetuese, siç ka qenë rasti me Ligjin për Zyrtarët Publikë, ligj i cili nuk është miratuar as në lexim të dytë.

Ai ka thënë se edhe tek Ligji për Pagat në Sektorin Publik, tanimë kanë kaluar katër ditë që Kuvendi ka shkelur aktgjykimin e Gjykatës Kushtetuese.

“Një kuvend që ka prodhuar në sasi projektligje, por në përmbajtje realisht nuk ka diçka që kishte me e veçuar jo vetëm në këtë sesion por në krejt legjislaturën. Masivisht ka pasur shkelje të Kushtetutshmërisë dhe përveç shkeljeve të Kushtetutshmërisë, pastaj kemi edhe mos zbatimin e aktgjykimeve të Gjykatës Kushtetuese, siç ka qenë rasti me Ligjin për Zyrtarët Publik ku ligji nuk është miratuar ende në lexim të dytë, por ai përmban të meta kushtetuese në ndërkohë ai nuk është miratuar as brenda afatit”.

“Ligji për Pagat në Sektorin Publik, ligj i cili tashmë kanë kaluar katër ditë kur Kuvendi është duke e shkelur Kushtetutën dhe aktgjykimin e Gjykatës Kushtetuese, por përveç Kuvendit edhe Qeveria. Kjo sepse nuk e zbatojnë brenda afatit prej gjashtë muajsh sa ka dhënë afat Gjykata Kushtetuese. Një afat prej gjashtë muajsh është afat optimal që si qeveri, si kuvend t’i ndërmarrin vendimet për t’i zbatuar aktgjykimet sipas kërkesave që janë të vendosura”, ka thënë ai.

Jakaj ka thënë se në këtë sesion puna e Kuvendit nuk ka dalluar nga vitet e kaluara e se ajo është përcjellur nga mungesa e thellë e transparencës.

Ai ka thënë se puna e Kuvendit është përcjellur edhe nga vendimmarrja në kundërshtim me Kushtetutën e Kosovës, siç ka qenë tek ligji i Komisionit të Pavarur për Media, tek kundërligjshmëria e komisioneve hetimore e deri tek mbikëqyrja e dobët parlamentare.

“Kuvendi i Kosovës nuk e ka përmbushur rolin e tij kushtetues gjatë këtij sesioni pranveror edhe në rastet kur ajo është përmbushur teknikisht ka pasur shkelje të mëdha në raport me kushtetutshmërinë, transparencën dhe llogaridhënien e Qeverisë përballë Kuvendit. Sikurse në vitet paraprake edhe në këtë sesion puna e Kuvendit nuk ka dalluar nga vitet e kaluara, puna e tij është përcjellur nga mungesa e thellë e transparencës në raport me ta zëmë votimin elektronik. Do të mbahet mend ky kuvend që nuk ka prodhuar votimin elektronik për deputetë. Pastaj, puna e Kuvendit është përcjellur edhe nga vendimmarrja në kundërshtim me Kushtetutën e Kosovës siç ka qenë tek Ligji i Komisionit të Pavarur për Media. Tek kundërligjshmëria e komisioneve hetimore, tek mbikëqyrja e dobëte parlamentare, ka tashmë një fenomen të ri që deputete kur parashtrojnë pyetje nuk janë aty të pranishëm. Po përmbi 40 për qind e pyetjeve parlamentare mbesin shumë herë pa u parashtruar për shkak se mungojnë deputetët, më herët ka qenë se kanë munguar vetëm ministrat tani mungojnë edhe deputetët me të madhe”, ka thënë ai.

Hulumtuesi i IKD-së ka shtuar se Kuvendi është përballur edhe më punë të dobët të Komisioneve Hetimore Parlamentare, duke shtuar se shumica parlamentare është bërë pengesë që hetimet të shkojnë sipas kërkesë që është vendosur sipas vendimit për themelim të Komisionit Hetimor.

“Kemi pastaj edhe gjetjen sa i përket komisioneve hetimore parlamentare ku shumica parlamentare është bërë pengesë që hetimet të shkojnë sipas kërkesës që është vendosur, sipas vendimit për themelim të komisionit hetimor. Në anën tjetër kemi pasur edhe mungesë ose udhëheqje të dobët të disa komisioneve hetimore nga radhët e opozitës. Puna e dobët e komisioneve hetimore është karakterizuar fillimisht prej shumicës parlamentare, prej pengesës së tyre në drejtim të plotësimit të kuorumit ose të votimit të çështjeve të cilat kanë qenë në rend dite sikurse ta zëmë lista e dëshmitarëve, lista e materialeve ose kërkesave që do të duhej t’i dorëzohej ose afatit kur është paraqitur apo koha se kur do të duhej të hetohej”, ka thënë ai për EO.

PËRGATITI: DRITON SADIKU 

Qeveria vazhdon të heshtë karshi minatorëve që nuk iu pagua djersa e punës, për dy muaj rresht.

Thirrjet e tyre për një të drejtë bazë siç është paga, kanë hasur në vesh të shurdhër, sa që kanë thelluar krizën, si te minatorët, ashtu edhe te gjiganti metalurgjik.
Nga sindikata thonë se tashmë është rënduar edhe gjendja psikike e minatorëve, por edhe ajo shëndetësore.

“Gjendja është shumë e rëndë, qe dy muaj e gjysmë minatorët nuk kanë marrë paga, është rëndu gjendja edhe psikike, edhe problemi më i madh është mungesa e financave për çështjet mjekësore dhe te minatorët ka filluar me u rëndu gjendja tej mase. Nuk kemi pasur asnjë takim me qeverinë përveç me drejtorin e njësisë dhe kryeshefin ekzekutiv, por nuk ka konkrete asgjë”, deklaroi kryetari i Sindikatës së minatorëve, Ibrahim Januzi.

Kriza në Trepçë vetëm sa shkon e thellohet, andaj ish-drejtori i saj, Ferat Shala, thotë se dikush duhet të japë llogari.

“Fatkeqësisht kjo ka kosto të rëndë financiare, jo vetëm për ndërmarrjen, por edhe për buxhetin e shtetit. Qeveria do të duhet të jetë transparente dhe në rend të parë të kërkojë llogari për këtë periudhë menaxheriale katërvjeçare, për dështimet jashtëzakonisht të larta me pasoja ekonomike dhe nëse themi do të dilet nga kjo situatë, tashmë çmimi është edhe më i lartë”, tha Shala

Minatorët janë të vendosur që të mos hyjnë në nëntokë për aq kohë sa nuk i marrin pagat.

Derisa e premtja shënon ditën e 31-të që minatorët janë në grevë.

Një ditë mospunë në Trepçë llogaritet rreth 40 mijë euro humbje./atvlive.tv/

Për më shumë ndiqni videon e mëposhtme:

PËRGATITI: ARIAN HAJDARAJ 

Nga Skenderaj, Shehrije Hajrizi arriti në Institutin e Mjekësisë Ligjore. Këtu e pret një punë e vështirë: ta identifikojë kufomën që dyshohet të jetë e djalit të saj.

Nënës nuk iu desh shumë kohë që ta identifikojë trupin e birit të saj, Fatonit.

Pas konfirmimit nga familja, Institutit të Mjekësisë Ligjore iu hap rruga që ta nisin autopsinë e 39–vjeçarit.

Identifikimi i viktimës u konfirmua edhe nga Prokuroria Themelore e Mitrovicës së Veriut.

Gjithë procedura e autopsisë pritej të zgjaste disa orë, që pastaj trupi t’i dorëzohet familjes.

Puna për ta sjellë trupin e pajetë në Kosovë, sipas avokatit që u angazhua në këtë drejtim, nuk ishte fare e lehtë.

Pas autopsisë që pritet të përfundojë gjatë të premtes, trupi i pajetë pritet që familjes t’i dorëzohet të shtunën më së largu.

Faton Hajrizi më 6 korrik u arratis nga burgu i Smrekonicës.

Gati dy javë më vonë ai dyshohet se u vra në Lloznicëtë Serbisë. Paraprakisht, sipas autoriteteve serbe ,ai dyshohet ta ketë vrarë një polic./atvlive.tv

Për më shumë ndiqni videon e mëposhtme:

https://youtu.be/YcuHgKJfBH8?si=GXjhlLRHZBdeY2og

PËRGATITI: DRITON SADIKU

Hapja e bizneseve të reja në komunat në veri, por edhe punësimi i rreth dy mijë punëtorëve, do të subvencionohet nga Qeveria e Kosovës.

Kështu të paktën ka njoftuar ministri i Financave, Hekuran Murati, i cili mes tjerash tha se bizneset, një nga lehtësirat që do të përfitojnë, është subvencionimi i pagës së punëtorëve.

“Me rivendosjen e rendit dhe ligjit në katër komunat veriore të vendit, tani po shohim dita-ditës edhe hapjen e bizneseve të reja dhe shtimin e aktivitetit afarist në atë pjesë. Qeveria po i mbështet të gjitha bizneset e reja dhe ato ekzistuese në katër komunat në veri për hapjen e deri në dymijë vendeve të reja pune, përmes subvencionimit të pagës për punëtorët”, tha Murati.

Megjithëse, e ka cilësuar si të vonuar, sipas Betim Osmanit, asamblist në Komunën e Mitrovicës së Veriut, një vendim i tillë po mirëpritet, pasi që siç thotë, veriu ka nevojë për investime.
“Besoj që në këto tri vite kanë munguar investimet në veri të institucioneve tona. Besoj që edhe kështu ka pak biznese në veri dhe shumica prej tyre nuk kanë qenë të regjistruara në republikën e Kosovës, tash kanë shprehur interes që të regjistrohen. Këto mbështetje do të ishin të mirëseardhura dhe kjo do të tregojë që institucionet e Kosovës e kanë seriozisht këtë punë”, deklaroi Osmani.

Ndërkaq, ekonomisti Fidan Qerimi thotë se Qeveria do të duhej të bënte investime kapitale me qëllim bashkëpunimin ndëretnik, si rrugë e vetme që Veriu të integrohet.

“Është krijimi i një parku industrial që do të përfshijë një pjesë të Mitrovicës së veriut dhe një pjesë të jugut dhe këtu do të kishin përparësi bizneset që kishin me qenë me pronësi të përzier dhe kjo do të krijonte një mundësi dhe një potencial ekonomik dhe po ashtu të bashkëpunimit ndëretnik”, tha Qerimi.

Gjë tjetër fitimprurëse thotë se do të ishte edhe zhvillimi i turizmit.
“Ne e dimë që ka shumë manastire në atë pjesë dhe këto manastire janë në interes të turistëve, sidomos të atyre ndërkombëtarë dhe kjo do të krijojë një potencial krijimit të bizneseve të vogla”, shtoi tutje Qerimi.

Megjithatë, disa biznese vetëm se kanë nisur të hapen në këtë pjesë të vendit, kryesisht markete e kafene./atvlive.tv/

Për më shumë ndiqni videon e mëposhtme:

Ministria e Punëve të Jashtme të Francës përmes një reagimi ka thënë se dënon ashpër shumëfishimin e veprimeve të njëanshme të institucioneve të Kosovës në Veri, veprime të cilat MPJ-ja franceze thotë se ndikojnë në jetën e përditshme të komunitetit serb.

Parisi zyrtar bën thirrje që palët të përmbahen nga veprimet e njëanshme dhe t’i kthehen dialogut dhe zbatimit të marrëveshjes Bruksel-Ohër.

“Franca u bën thirrje autoriteteve kosovare që të përmbahen nga çdo veprim i ri i njëanshëm, i cili do të kontribuonte më tej në përshkallëzimin e tensioneve”, përfundon reagimi.

Të enjten, autoritetet kosovare kryen inspektime në urban mbi lumin Ibër në një fazë testimi para rihapjes së synuar të saj, ndërsa në fillim të javës ato i mbyllën nëntë objekte të Postës së Serbisë në veri të Kosovës.

Qeveria e Kosovës ka thënë se synon të rihapë për qarkullim të automjeteve urën mbi Ibër, që ndan Mitrovicën e Jugut me shumicë shqiptare, dhe atë të Veriut me shumicë serbe.

Pjesëtarët e komunitetit serb protestuan të mërkurën kundër rihapjes së urës mbi Ibër.Vendet e QUINT-it – pjesë e së cilit është Franca bashkë me Shtetet e Bashkuara, Britanin e Madhe, Gjermaninë dhe Italinë – më 2 gusht deklaruan se nuk e mbështesin hapjen e urës në këtë moment.

Sipas Francës, veprimet e autoriteteve kosovare i rrezikojnë përpjekjet për normalizimin e marrëdhënieve të Kosovës me Serbinë, “që është parakusht për realizimin e perspektives evropiane për të dyja vendet”.

Ndërkohë, misioni paqeruajtës i NATO-s në Kosovë, KFOR, paralajmëroi përsëri se është i gatshëm t’i ndërmarrë “të gjitha masat e nevojshme” për t’i luftuar zhvillimet të cilat mund ta cenojnë sigurinë dhe stabilitetin rajonal, pas zhvillimeve të fundit në veri të Kosovës.

Në periudhën pasluftës, ura mbi lumin Ibër, ishte simbol i trazirave dhe barrikadave të ngritura nga serbët e Kosovës për t’i kundërshtuar përpjekjet e Kosovës për të vendosur autoritetin në veri.

Ura, aktualisht, është e hapur vetëm për këmbësorë, edhe pse në kuadër të dialogut mes Kosovës dhe Serbisë është rënë dakord që të hapet edhe për qarkullimin e automjeteve.

Ushtarët italianë të KFOR-it ndodhen në urën mbi lumin Ibër, ndërsa afër ndodhen edhe pjesëtarët e Policisë së Kosovës.

KFOR-i tha të premten se “nuk duam të spekulojmë për ndonjë skenarë në të ardhmen” nëse institucionet e Kosovës i kërkojnë që të largojë praninë e saj nga ura mbi lumin Ibër.