Category: Lajme

Ministri i Jashtëm ukrainas Dmytro Kuleba dëshiron të marrë mbështetje për heqjen e kufizimeve ndaj sulmeve me rreze të gjatë ndaj objektivave ushtarake në Rusi në një takim jozyrtar të ministrave të jashtëm të BE-së.

Këtë ai e ka thënë në një intervistë për Politico, përcjell Ukrinform.

“Unë dua që ata të kthehen në kryeqytetet e tyre … për të marrë mbështetje për të hequr përfundimisht kufizimet mbi sulmet me rreze të gjatë në të gjitha objektivat legjitime ushtarake në Rusi”, tha Kuleba.

Ministri i Jashtëm theksoi se bindja e aleatëve për të lejuar përdorimin e armëve nga Perëndimi kundër objektivave thellë në Rusi është prioriteti kryesor i Kievit.

“Sigurisht, ky vendim i takon kryesisht Shteteve të Bashkuara dhe Britanisë së Madhe, por edhe Franca është palë dhe pjesë e BE-së”, shtoi ai.

Kuleba vuri në dukje se ai do të përdorte takimin në Bruksel për të lobuar në Evropë dhe për të bindur Uashingtonin të ndryshojë pozicionin e tij: “Bashkimi Evropian është një shtyllë thelbësisht e rëndësishme në koalicionin në mbështetje të Ukrainës dhe mund dhe duhet të luajë një rol për të bindur Shtetet e Bashkuara që të ndodhë ky vendim.”

Kreu i diplomacisë ukrainase pranoi se presidenti francez Emmanuel Macron kishte deklaruar më parë se Ukraina duhet të lejohej të godiste bazat ushtarake thellë në Rusi dhe nuk vuri në dyshim synimet e tij, por ” fakti është se Ukraina ende nuk mund të qëllojë”.

Kuleba tha se do t’u kërkojë gjithashtu ministrave të lejojnë përdorimin e aftësive të mbrojtjes ajrore në vendet e BE-së, veçanërisht në Poloni, për të mbrojtur një pjesë të hapësirës ajrore të Ukrainës.

Siç raportoi më herët Ukrinform, ministri i Jashtëm Dmytro Kuleba do të enjten për një vizitë pune në Belgjikë, ku do të marrë pjesë në një takim jozyrtar të ministrave të jashtëm të BE-së.

Presidenti i Francës, Emmanuel Macron, ka deklaruar se personalisht do të mbetet i angazhuar në zbatimin e Marrëveshjes së Ohrit, e para së gjithash në krijimin e një Asociacioni të komunave me shumicë serbe.

“Në vitin 2019, kur fola për çështjen e Kosovës, fola për guximin e nevojshëm për të arritur një kompromis. Të bindur se ky guxim ekziston në Serbi, ne, së bashku me Gjermaninë dhe partnerët tanë evropianë, me mbështetjen e Shteteve të Bashkuara të Amerikës, donim të ndihmonim rajonin të shmangte lëvizjet e njëanshme, deklaratat e pamatura, ngritjen e tensioneve, viktimat kryesore të të cilave janë njerëzit që jetojnë në terren, veçanërisht minoriteti serb në Kosovë”, ka thënë ai për gazetën serbe “Politika”, transmeton KosovaPress.

Ai, ka thënë se rruga që propozuan drejt normalizimit të nevojshëm ruan thelbin: mundësinë që serbët të jetojnë në Kosovë duke respektuar ligjin, por pa hequr dorë nga identiteti apo lidhjet e tyre natyrore me Serbinë; por edhe ekzistenca e garancive në lidhje me ruajtjen e trashëgimisë kulturore dhe fetare serbe.

“Kjo rrugë është e trasuar: çdo gjë që ngadalëson përparimin në atë rrugë është në kurriz të njerëzve që jetojnë atje. Jam i bindur se ky kompromis është në përputhje me interesat e Serbisë dhe, duke pasur parasysh ndjenjat e forta të serbëve për këtë çështje, duke i respektuar ata, ftoj Serbinë dhe ftoj të rinjtë në Serbi të zgjedhin paqen dhe të zgjedhin të ardhmen. Personalisht do të mbetem e angazhuar, pasi jam i sigurt se BE-ja në tërësi do të mbetet në zbatimin e Marrëveshjeve të Ohrit dhe, para së gjithash, në krijimin e asociacionit të komunave me shumicë serbe”, ka shtuar Macron.

Kreu i shtetit francez do të qëndrojë për vizitë zyrtare në Serbi sot dhe nesër.

Me propozim të kryetarit të Gjykatës Komerciale të Kosovës, Mahir Tutuli, Këshilli Gjyqësor i Kosovës ka caktuar gjyqtarin Hasan Kryeziu nënkryetar të Gjykatës Komerciale.

Gjyqtari Hasan Kryeziu është caktuar nënkryetar i Gjykatës Komerciale, me mandat të njëjtë sikurse mandati i Kryetarit të Gjykatës Komerciale.

“Në rolin e nënkryetarit, z. Kryeziu do të mbështesë kryetarin e gjykatës në përmbushjen e përgjegjësive institucionale, duke promovuar standardet më të larta të profesionalizmit dhe etikës gjyqësore”, thotë gjykata.

Në vijim gjeni biografinë e gjyqtarit Kryeziu, sipas njoftimit të kësaj gjykate.

Hasan Kryeziu është gjyqtar në Dhomat e Shkallës së Parë – Departamenti për Çështje Ekonomike në Gjykatën Komerciale. Gjyqtari Kryeziu ka diplomuar në Fakultetin Juridik – Universiteti i Prishtinës në vitin 2014. Praktikën profesionale e kreu në Gjykatën Themelore në Prishtinë deri në vitin 2015, ndërsa provimin e jurisprudencës e ka përfunduar në vitin 2016. Nga viti 2016 deri në vitin 2018, ka punuar Zyrtar Ligjor në Gjykatën Themelore në Prishtinë përmes programit të USAID-it – Checchi Consulting and Co. Nga gushti i vitit 2018 ka ushtruar pozitën e bashkëpunëtorit profesional në një avokaturë në Prishtinë, për të kaluar më pas si jurist për përfaqësime në KEDS sh.a. Hasan Kryeziu më 18.01.2021 është emëruar gjyqtar në Gjykatën Themelore në Gjakovë – Dega në Malishevë, ndërsa më 23.06.2022 është emëruar gjyqtar në Gjykatën Komerciale të Kosovës.

Kryeministri i Kosovës, Albin Kurti, ka thënë se punësimi në Kosovë është rritur për 45 për qind dhe se kjo i ka ndihmuar mbështetja qeveritare, raporton Ekonomia Online.

Në ceremoninë e nënshkrimit të kontratave me përfituesit nga Programi për Zhvillim Rajonal të Balancuar, shefi i ekzekutivit ka thënë se mbështetja e bizneseve ka qenë e vazhdueshme dhe e lartë.

“Qeveria e Republikës së Kosovës është e përkushtuar të mbështet sektorin privat i cili është faktor i përkushtimit dhe zhvillimi e bizneseve në vend. Buxheti shtetëror është rritur për 35 për qind më i lartë, pa dyshim që ky ka ndikuar në rritjen e fitimit dhe zgjerimit të aktivitetit të zhvillimit rajonal. Në vitin 2024, Bruto Produkti Vendor është më i lartë për 45 për qind e që kjo është përkthyer edhe me punësim, ku në Kosovë është rritur punësimi. Kemi ndarë 5.5 milionë euro për bizneset e vogla për t’i përkrahur nga sfidat lokale”, u shpreh Kurti.

Ministri i Zhvillimit Rajonal, Fikrim Damka, ka thënë se kanë arritur t’i mbështesin bizneset me makineri të reja të rrisin kapacitetet e tyre prodhuese. Ai ka thënë se që nga hapja e thirrjes, kanë qenë mbi shtatë mijë aplikime, ndërsa vlera e projektit është 6 milionë e 875 mijë euro.

“Në këtë ceremoni të rëndësishme ne po nënshkruajmë kontratat e përfituesve dhe ky është një moment që reflekton angazhimin tonë, duke bërë çdo cep të vendit tonë një vend më të mirë për të punuar dhe jetuar. Me këtë program ne po investojmë në të gjithë vendin. Kryeministri ka qenë gjithmonë mbështetës në udhëheqjen e tij dhe ne kemi arritur një rezultat konkret për të zhvilluar vendin”.

“Ju përfitues jeni shembull që mund të arrini me përkushtim sepse ata përfaqësojnë potencialin e madh. Gjithmonë kemi qenë të gatshëm të mbështetim bizneset. Kemi arritur të krijojmë e të mbështesim bizneset me makineri të reja, si dhe të rrisim kapacitetet e tyre dhe për të krijuar mundësi që të krijojnë bizneset e tyre. MZHR gjatë kësaj periudhe kanë pranuar 7 mijë e 564 aplikime nga aplikantët potencial në vlerë prej 6 milionë e 875 mijë euro”, ka thënë Damka.

Komisioni Qendror Zgjedhor do të mbajë sot mbledhjen e radhës.

Në këtë mbledhje që do të mbahet në ora 11:30, do të diskutohet për miratimin e listës së qendrave të votimit jashtë Kosovës, numrin e vendvotimeve dhe numrin maksimal të votueseve.

Kujtojmë se KQZ ka filluar me përgatitjet pas caktimit të datës së zgjedhjeve të cilat pritet të mbahen më 9 shkurt 2025.

Rendi i ditës:

Hyrje: z.Kreshnik Radoniqi, Kryesues i mbledhjes së KQZ-së

Raport i Këshillave të KQZ
2.1.Këshilli për Operacione Zgjedhore

– Shqyrtimi dhe miratimi i listës së qendrave të votimit jashtë Kosovës, numrit të vendvotimeve dhe numrit maksimal të votuesve;

Të ndryshme

“Tërë ditën u vonua dhe nuk erdh”, rrëfen Aliu për vëllain e tij të cilin e pret që nga 28 marsi i vitit 1999. Vuajtjet që ka përjetuar këto 25 vjet, ai thotë se nuk ja uron as armikut. Me sy të përlotur rrëfen për vëllain 29 vjeçar, Skender Havollin, të cilin për herë të fundit e pa Ditën e Bajramit. Aliu rrëfen se për të nuk ka pasur më festa e as gëzime, megjithatë thekson se shpresat nuk i ka humbur. Në rrëfimin për KosovaPress, burri rreth të shtatëdhjetave flet i zhgënjyer me punën që kanë bërë autoritetet vendore në procesin e zbardhjes së fatit të të pagjeturve. Komisioni Qeveritar për Persona të Zhdukur thotë se po insistojnë që Serbia të jap informacione, megjithatë kryetari Andin Hoti thotë se dyshon që Bashkimi Evropian e ka seriozisht çështjen e personave të zhdukur.

Ali Havolli nga Fushë Kosova çdo ditë pret ndonjë informacion për vëllain e tij, i cili u morr nga tre serbë të maskuar.

“Ka qenë 28 mars, dita e Bajramit apo nata e Bajramit nuk më kujtohet, këtu shtëpia nuk ka pas krejt thatë ka qenë. Kanë filluar banorët e Fushë Kosovës me ik me u tërheq komplet, në ditën e tretë që ka rënë NATO-ja, vëllai tha po dal po shikoj qysh është situata a me ik, a me ndejt ende. Ka dalë te hekurudha, kur ka shkuar te hekurudha aty e kanë marrë tre serbë të maskuar. Një fqinj e ka shtëpinë më poshtë i ka parë që tre persona e kanë marrë të maskuar, por ai u frikua vet edhe nuk është interesuar, e ka shpëtuar vetën e ka ik. E pas luftës e kemi marrë vesh që te hekurudha tre persona të maskuar e kanë marrë. Pas luftës jemi kthyer menjëherë, kemi qenë refugjatë në Maqedoni”, rrëfen Havolli mes-lotësh për KosovaPress.

Për 25 vjet ai nuk rreshti së kërkuari vëllain e tij, të cilin e quante “Kendi”. Pas luftës ka informuar Kryqin e Kuq Ndërkombëtar e ka dhënë monstrat, por ende është në pritje.

“Tërë ditën u vonua dhe nuk erdh e ditëm që diçka e gjet, thash hajt mos po vjen, se ne ikëm shkuam në Dardhishtë, krejt banorët u larguam…06:25…Nuk kam dëshirë në këtë botë me i pas këto vuajtje. Unë as nuk e di kur është festa, festat bëhen unë iki. Diku çmallna, familja sytë mi hetojnë. Në lëkurë temën, tonën në përgjithësi çka kemi të zhdukur, hasmin inshAllah nuk e shoh kurrë. Se di… Po presim, presim, shpresat nuk bën me i humb”, shprehet Havolli mes lotëve.

Me zhgënjim flet edhe për punën e institucioneve vendore, derisa në duar mban fotografinë e Skenderit, si të vetmen shenjë nga ai.

“Një pllakë përkujtimore në Fushë Kosovë nuk e kemi, një pllakë bre një emër, një emër të tyre (të pagjeturve) nuk e kemi. Mund ta bëjë edhe vet, qe ku është trualli në fillim, i tij është (vëllait), mund ta bëjë një përmendore sikur Albin Kurti që e ka bërë në Podujevë, por nuk ja vlen vet duhet shteti. Nuk ki asgjë, veç qit fotografi e kom. Qit fotografi e kom, nganjëherë e fshehi mos ta shohin këta tjerët. Gjema diçka që qeveria ka bërë për personat e zhdukur?”, thekson ai mes tjerash.

Për mbi 1600 të zhdukurit, Ahmet Grajqevci nga Këshilli Koordinues i Familjarëve të Personave të Pagjetur, thotë se Serbia i dinë vendndodhjet e tyre.

“Qeveritë e mëparshme por edhe tek kjo kanë bërë ngapak punë por nuk e kanë bërë të duhurën, nuk është bërë sa është dashur. Sensibilizimi i çështjes së personave të zhdukur ka mbetur nën hije pikërisht nga qeveria jonë, nga qeveritë tona në përgjithësi. Sensibilizim nuk ka bërë, nuk ka bërë ekspozita, nuk ka mbajtur konferenca ndërkombëtare të cilat duhet të sensibilizohen. Sepse ne e kemi një armik që nga gjenocidi ka kaluar deri në kanibalizëm. Çdo gjë Serbia e ka të shënuar në mënyrë të mirë dhe të rregullt dhe për atë kërkohen që të hapen arkivat. Në momentin që hapen arkivat, atëherë çdo gjë del në shesh”, shprehet Grajqevci.

Për tërë këto vite pritje, Grajqevci shton se familjarët po përjetojnë ankth e traumë.

“Kjo pritje kaq e gjatë që 25 vite shkakton ankth, stres, traumë. Vetëm brenda 24 orëve nëse një fëmijë apo një familjar nuk lajmërohet apo është i zhdukur duhet të lajmërohet apo ta kuptoj se çfarë traume është për 24 orë, jo për 24 vite. Kjo për familjarët është çështja më e rëndë që mund të ekzistojë ndonjëherë”, shton ai.

Më shumë se një vit janë bërë prej miratimit të deklaratës për personat e pagjetur, por kryesuesi i Komisionit Qeveritar për Personat e Pagjetur, Andin Hoti deklaron se nuk është ndërmarrë asnjë hap i vetëm.

“Ka më shumë se një vit që është miratuar deklarata për persona të zhdukur dhe është miratuar prej dy shteteve, diqysh janë zotuar të dy palët për të zbatuar dhe asnjë hap i vetëm nuk është bërë dhe këtë ja kam thënë edhe zotëri Lajçak në takimin e fundit që e kemi pasur me të. Por përveç kësaj kam kërkuar që të themelohet një komision i përbashkët që është në kuadër të deklaratës dhe që ajo e monitoron pastaj zbatimin e deklaratës, por as këtë nuk e ka bërë. Dhe meqë as këtë nuk e ka bërë po dyshoj nëse e ka kaq shumë seriozisht Bashkimi Evropian çështjen e personave të zhdukur. Mendoj që ka qenë çështje ditësh së paku të themelohet komisioni i përbashkët, jo çështje një vit e gjysmë sa ka kaluar tani”, thekson Hoti për KosovaPress.

Mbi 1600 persona konsiderohen ende të zhdukur nga lufta e fundit në Kosovë. /kp

Një ngjarje e rëndë raportohet të ketë ndodhur në fshatin Penuh të Podujevë.

Sipas Sinjalit, një fëmijë rreth 2 vjeçe humbi jetën tragjikisht në shtëpi.

Siç raporton sinjali, sipas informacioneve që posedojnë organet e rendit, vajza dyshohet se është rrotulluar teksa ishte në djepin ku ishte vendosur për përkundje.

Dyshohet se fëmija ishte në gjumë dhe në momentin që djepi është rrotulluar, dyshohet se është ngufatur nga lidhësja me të cilën ka qenë e lidhur.

Në vendin e ngjarjes janë kryer ekzaminimet e nevojshme, ndërsa trupi i pajetë është dërguar në IML për obduksion.

Me urdhër të Prokurorit të Shtetit, rasti është iniciuar “Hetim i vdekjes”.

Fluks jo shumë i madh i automjeteve vërehet sot në pikat kufitare. Sipas Qendrës Kombëtare për Menaxhimin Kufitar, mërgimtarët po vazhdojnë më shumë ta përdorin për dalje nga territori i Kosovës pikën kufitare te Dheu i Bardhë dhe atë në Merdarë.

Sipas përditësimit të fundit, pritjet në Merdarë mëngjesin e sotëm janë deri mbi një orë. Pritje pak më të vogla, deri në gjysmë ore ka te Dheu i Bardhë.

Në pikat tjera kufitare, pritjet nuk janë më shumë se 10-15 minuta.

Posta e Kosovës sot ka hapur degën e saj në Mitrovicë të Veriut.

Dega e Postës është hapur në sheshin “Car Lazar”.

Në vendin e ngjarjes kishte edhe Policë të Kosovës.

Ndërkohë, Ttë pranishëm në hapjen e kësaj dege ishin edhe ministrja e Ekonomisë, Artane Rizvanolli dhe ministri i Administrimit të Pushtetit Lokal, Elbert Krasniqi.