Category: Lajme

Zyrtarët rusë thanë se Ukraina ka kryer sulme me dronë në orët e para të 1 shtatorit, duke shënjestruar disa rajone të shtetit, përfshirë edhe rafineri dhe infrastrukturë të energjisë në rajonet e Moskës dhe Tverit.

Ministria ruse e Mbrojtjes, sipas agjencisë shtetërore të lajmeve TASS, tha se 158 dronë janë shkatërruar nga sistemi i mbrojtjes ajrore. Kjo ministri shkroi në Telegram se numri më i madh i dronëve – 122 gjithsej – u rrëzuan mbi rajonet e Kurskut, Brianskut, Voronezhit dhe Belgorodit, që gjenden në kufi me Ukrainën.

Këto pretendime të Rusisë nuk mund të konfirmohen në mënyrë të pavarur, ndërkaq Ukraina nuk ka komentuar për këtë çështje.

Kjo breshëri sulmesh me dronë vjen disa ditë pasi infrastruktura e energjisë së Ukrainës u shënjestrua me mbi 200 dronë rusë dhe raketa, në një prej sulmeve më të mëdha të këtij lloji.

Po ashtu vjen një muaj që kur Ukraina nisi ofensivën e saj në rajonin rus të Kurskut, edhe pse trupat ruse raportohet se po bëjnë përparim në lindje të Ukrainës, veçmas në rajonin e Donjeckut.

Presidenti i Rusisë, Vladimir Putin, e dëgjon guvernatorin në detyrë të rajonit Kursk, Governor Alexei Smirnov, gjatë një videokonference në rezidencën shtetërore të Putinit pranë Moskës, më 8 gusht, dy ditë pasi forcat ukrainase e nisën inkursionin në Rusi.

Kievi po i bën thirrje Uashingtonit që të heqë kufizimet në mënyrë që të përdorë armët që ka pranuar nga aleatët për të sulmuar thellë brenda territorit të Rusisë. Kievi argumenton se sulme të tilla do të pengonin aftësinë e Moskës që të kryejë sulme ndaj Ukrainës.

Po ashtu, më herët gjatë 1 shtatorit u raportua për shpërthime të fuqishme në stacionin e energjisë Konakovo në rajonin Tver. Ky stacion është një prej prodhuesve më të mëdhenj të energjisë në rajon, sipas kanalit Baza në Telegram, që ka lidhje me shërbimet ruse të sigurisë.

Pesë dronë u shkatërruan mbi rajonin Tver, tha guvernatori rajonal, Igor Rudenya, i cili nuk përmendi dëme nga kjo ngjarje.

Kryetari i Moskës, Segei Sobyanin, tha se një dron i lëshuar nga Ukraina u shkatërrua afër rafinerisë së naftës të Moskës. Ai tha se nuk raportohet për dëme në këtë rafineri.

Kjo rafineri është në pronësi të Gazprom Neft, që është pjesë e gjigantit rus të gazit, Gazprom.

Sipas kreut të qytetit Kashira, Mikhail Shuvalov, Ukraina po ashtu ka tentuar të sulmojë me dronë centralin e energjisë Kashira.

Të paktën nën dronë u shkatërruan në Moskë dhe rajonin përreth, tha kreu i kryeqytetit rus.

Rreth 26 dronë të lëshuar nga Ukraina u shkatërruan në rajonin kufitar të Brianskut, tha guvernatori rajonal, Aleksandr Bogomaz. Ndërkaq, më shumë se dhjetë dronë u shkatërruan mbi rajonin Boronezh dhe disa të tjerë mbi Kursk, Lipetsk, Riazan dhe Tula, thanë guvernatorët e këtyre rajoneve ruse.

Zyrtarët rusë nuk kanë raportuar për viktima e as dëme nga këto sulme që pretendojnë se janë kryer nga Ukraina./ REL

Mali i Dajtit, vetëm 22.4 kilometra larg qendrës së kryeqytetit, 1 613 metra mbi nivelin e detit, është një tjetër atraksion i mrekullueshëm për turistët e huaj që vendosin të vizitojnë vendin tonë.

Kryeministri i Shqipërisë, Edi Rama publikoi sot në rrjetet sociale pamje nga Parku Kombëtar i Malit të Dajtit, ‘një mozaik i natyrës që i rri mbi krye Tiranës duke ofruar mundësi për aktivitete të llojllojshme dhe peizazhe të jashtëzakonshme’.

“…dhe me Parkun Kombëtar të Malit të Dajtit, një mozaik i natyrës që i rri mbi krye Tiranës duke ofruar mundësi për aktivitete të llojllojshme dhe peizazhe të jashtëzakonshme, ju uroj një të diel të qetë”, ka shkruar kryeministri Edi Rama.

Mali i Dajtit me peizazhet pyjore të ahut, dushkut, gështenjave, qershive, frashërit, pishave të zeza, të fton të shkëputesh tërësisht nga jeta urbane e Tiranës për t’u bërë pjesë me natyrën.

Me rreth 26 lloje drurësh dhe shkurresh pyjore, të cilat mbulojnë rreth 80 % të territorit, bimësh e barishtore, kafshët dhe shpendët e egra, dy majat dominuese, “ballkonet”, që qëndrojnë mbi shkëmbinjtë e pjerrët, kjo zonë është kthyer në një atraksion për turistët e huaj, që pëlqejnë natyrën dhe aventurën.

Vizitorët mund të shijojnë edhe pamjet spektakolare të perëndimit të diellit që në mbi 1000 metra lartësi ofrojnë një spektakël të mahnitshëm, duke u shoqëruar dhe nga një pafundësi dritash vezulluese të Tiranës.

Drejtori i Institutit të Kosovës për Drejtësi (IKD), Ehat Miftaraj, ka thënë se përkundër kërkesave të shumta, brenda dhe jashtë vendit, Këshilli Prokurorial i Kosovës (KPK) nuk po shpreh vullnet politik për të hapur konkursin për Kryeprokurorin e Shtetit.

Fatkeqësia më e madhe, siç ka thënë Miftaraj në një intervistë për Ekonomia Online, qëndron se kjo situatë mund të vazhdojë me vite të tëra, sepse të gjitha kompetencat i ka vetë KPK-ja, e cila nuk ka filluar ende as me procedurat e para për zgjedhjen e Kyreprokurorit.

Ai ka theksuar se ligjet e Kosovës i japin një pavarësi aq të madhe KPK-së, “e cila ka vendosur që të mos jetë llogaridhënëse as ndaj Kushtetutës, as ndaj ligjit, as ndaj publikut”, andaj, Këshilli mund të vazhdojë në pafundësi me shkelje të këtij obligimi kushtetues dhe ligjor pa pasoja.

Miftaraj ka thënë se është shumë e rëndësishme që të dëshmohet integriteti i këtij institucioni dhe vullneti i tij që kjo pozitë të plotësohet me një person i cili i ka të gjitha kompetencat, siç e parasheh edhe Kushtetuta.

“Instituti i Kosovës për Drejtësi e ka potencuar së paku në vitin e fundit që KPK-ja pas kthimit të procesit në pikën zero do të duhej që menjëherë të fillonte me procedurat e plotësim-ndryshimit të rregullave të brendshme dhe me shpalljen e konkursit për Kryeprokuror të Shtetit. Kjo kërkesë është po ashtu e bërë edhe në raportin e fundit të progresit për Kosovën dhe ka pasur kërkesa nga të gjithë akterët relevante ndërkombëtare si ambasadat e zyrat e BE-së që KPK-ja të procedojë me konkursin. Fatkeqësisht nuk ka vullnet politik nga ana e KPK-së që ky proces të vazhdojë me tutje dhe kemi ardhur në një situatë ku jemi me ushtrues detyre të Kryeprokurorit për një kohë jashtëzakonisht shumë të gjatë”.

Miftaraj ka shtuar se i mbetet KPK-së në dorë që t’i ndryshojë aktet nënligjore për shpalljen e konkursit, pasiqë as Zyra e Presidentes nuk ka asnjë kompetencë për këtë proces “të kthyer në pikën zero”.

Sa më shpejt që kjo të bëhet, është më mirë për shtetin, ka theksuar ai.

“Tani nuk ka as një kompetencë në dorë Zyra e Presidentes për këtë proces sepse procesi është kthyer në pikën zero. Kështu që i mbetet KPK-së për të ndryshuar aktet nënligjore për të shpallur konkursin. Kur mungon ky vullnet nga ana e KPK-së, atëherë mund të mbesim në këtë gjendje edhe me vite të tjera”,

“Ne e kemi të qartë se Kryeprokurori i Shtetit nuk është që ka kompetenca shumë të mëdha në Sistemin Prokurorial. Por për shtetin, për Republikën, për institucionet është e rëndësishme të dëshmohet integriteti i KPK-së, vullneti i tyre që kjo pozitë të plotësohet me një person i cili i ka të gjitha kompetencat e autorizimet në bazë të Kushtetutës dhe ligjit. Ndaj, sa më shpejt që kjo bëhet, është më mirë për sundimin e ligjit në Kosovë. Ligjet e Kosovës i japin një pavarësi aq të madhe KPK-së, të cilët do të thotë kanë vendosur që të mos janë llogaridhënës as ndaj Kushtetutës, as ndaj ligjit, as ndaj publikut. Andaj, mund të vazhdojnë në pafundësi me shkelje të këtij obligimi Kushtetues dhe ligjor dhe të mos kenë pasojë. Vetë qasja e kulturës së pandëshkueshmerisë në këtë sistem ka ndërtuar një sistem i cili nuk i raporton pothuajse askujt dhe kështu që kemi mbetur në një situatë që varet nga ata nëse duan që ta përmbushin këtë obligim ose jo”,

Njëjtë është shprehur edhe avokati Xhevdet Smakiqi, i cili ka thënë se është hera e parë prej pavarësisë së Kosovës që kandidati i propozuar nga Këshilli Prokurorial i Kosovës nuk dekretohet për këtë pozitë.

Siç ka thënë Smakiqi për Ekonomia Online, ky është një rast i “paprecedentë” që e dëmton rëndë sistemin prokurorial të Kosovës.

Ai ka shtuar se Ushtruesi i Detyrës së Kryeprokurorit të Shtetit nuk i ka kompetencat e plota siç do t’i kishte Kryeprokurori.

“Fatkeqësia është që për herë të parë, prej që është shpallur pavarësia e Kosovës asnjë qeveri dhe asnjë president nuk ka refuzuar që ta dekretojë kandidatin të cilin është duke e propozuar Këshilli Prokurorial i Kosovës që është organ kushtetues. Sipas Kushtetutës së Kosovës edhe Ligjit për Këshillin Prokurorial dhe Ligjin për Prokurorin e Shtetit ruan dhe i garantohet pavarësia. Është një rast i paprecedentë dhe kjo në sytë e ndërkombëtareve edhe të monitoruesve siç janë nga BE-ja, nga organizatat e tjera ndërkombëtare shihet si një dështim dhe dobësim i sistemit prokurorial të Kosovës. Sepse nuk kemi kompetenca të plota si me një ushtrues detyre, si me një kandidat të cilin veç e ka propozuar KPK-ja”.

Smakiqi ka thënë se do të kishte suksese më të mëdha sikur të mos ishte kjo krizë institucionale, siç e ka quajtur ai.

“Siç e keni parë edhe në këtë refuzim Blerim Isufaj, si kandidat i ka rezistuar presionit politik dhe ka pasur shumë suksese edhe sa i përket edhe arrestimit të anëtareve të bandës së Rajdoqicit, të cilët tashmë pritet që të ju ngritet aktakuza. Të gjitha këto sikur të ishte kandidat i përzgjedhur nga presidentja. Ju e dini edhe kryeministri në Kuvendin e Kosovës ka thënë se sa të jem unë kryeministër nuk do të zgjedhet. Kjo e dobëson krejt sistemin edhe juridik edhe politik edhe është fatkeqësi sepse do të kishte suksese me të mëdha sikur të mos ishte kjo krizë institucionale”, ka thënë avokati për EO.

Deputeti i Lidhjes Demokratike të Kosovës, Avdullah Hoti kritikon qeverinë aktuale se ka dështuar në implementimin e projekteve të mëdha ekonomike dhe mos përmbushjen e angazhimeve në arsim dhe shëndetësi.

Në një intervistë për KosovaPress, Hoti thotë se veprimet e Qeverisë Kurti kanë qenë të pakta dhe larg çdo standardi për përmirësimin e kushteve në sektorët kyç.

Ai po ashtu thotë se as projektet që janë lënë në gjysmë nga qeveritë kaluara nuk kanë shkuar përpara. Ish-kryeministri Avdullah Hoti tha se të ardhurat për kokë banori kanë rënë rreth 67 për qind krahasuar me vitet e kaluara kur kanë qenë rreth 74 për qind.

Ndërsa sa i përket ligjit të punës, Hoti gjithashtu kritikon mungesën e dialogut social dhe thotë se kjo barrë financiare duhet t’i ngarkohet buxhetit të shtetit.

Ish-ministri i Financave, Avdullah Hoti shprehet se Kosova është shndërruar në një vend me probleme të sigurisë, duke përmendur sanksionet e BE-së dhe mungesën e investitorëve të jashtëm.

Një fëmijë ka vdekur aksidentalisht pasditen e djeshme në Suharekë.

Kështu ka bërë të ditur Policia e Kosovës në raportin 24 orësh.

Viktima ishte dërguar në emergjencë, por mjeku kujdestar kishte konstatuar vdekjen e saj dhe me vendim të prokurorit i ishte dorëzuar familjarëve.

Njoftimi i policisë:

VDEKJE AKSIDENTALE

Suharekë / 31.08.2024-19:45. Viktima femër kosovare fëmijë, ka humbur jetën aksidentalisht. Viktima është dërguar në emergjencë, por mjeku kujdestar ka konstatuar se viktima ka ndërruar jetë. Në konsultim me prokurorin, trupi i pajetë u dorëzohet familjarëve.

Nënkryetari i Prishtinës, Alban Zogaj, ka shprehur pakënaqësitë e tij për mungesën e bashkëpunimit me nivelin qendror, teksa për jetësimin e projekteve kapitale e mendojnë financimin edhe përmes partneritetit publiko-privat.

Në një intervistë për Ekonomia Online, numri dy i Prishtinës ka thënë se Qeveria e udhëhequr nga Albin Kurti ka bllokuar shumë projekte kapitale. Përmend bllokimet e projektit të rrugës “Agim Ramadani” dhe ndërtimin e “Unazës së Jashtme”.

Zogaj ka thënë se përpos mjete që i takon me ligj, Prishtina nuk ka marrë asnjë cent shtesë.

“Mundem të them me liri të plotë dhe siguri që kemi pasur një bashkëpunim shumë të mangët me nivelin qendror qeveritarë. Jam i dëshpëruar me të gjithë këtë marrëdhënie ose dinamikë qe e kemi pasur në mes vete është e pakuptimtë si mungon një bashkëpunim mes nivelit qendror dhe kryeqytetit. Prishtina është kryeqytet krejt institucionet qendrore punojnë në Prishtinë, këtu e zhvillojnë jetën ditën dhe aktivitet e tyre dhe nëse e shihni qasjen e nivelit qendror ndaj Prishtinës është e pa besueshme. Asnjë cent nuk iu është ndarë Prishtinës shtesë për çka i takon me ligj, atë që na takon me ligj nuk mundet me na mohuar askush edhe normalisht që e alukojnë për neve por asnjë cent shtesë nuk iu është dhënë Prishtinës. Në vend se me na ndihmuar dhe me na mbështet ne po shohim në vazhdimësi bllokada edhe barriera në procese të cilat i pengojnë projektet e kryeqytetit”, ka thënë Zogaj, teksa përmend në detaje projektet që kanë mbetur për “fajin” e Qeverisë së Albin Kurtit.

Ai ka thënë se për t’i jetësuar këto projekte kanë alternativa tjera. Përmend financimin përmes partneritetit publiko-privat.

“Rastin e fundit e kemi me nënkalimin ‘Agim Ramadani’, ne e kemi proceduar në tenderim kurse niveli qendror e bllokon me letra përmes gjykatave që mos me filluar një projekt i cili është një prej projekteve më të mëdha të Prishtinës. E kemi planin B i cili është i orientuar në sektorin privat, ne dëshirojmë të hymë në partneritet publiko-privat për me ndërtuar ‘Unazën e Jashtme’ që nënkupton që ne i japim sektorit privat asete të Prishtinës që ata me i zhvilluar një prej ideve ka qenë stacioni i autobusëve, pastaj sektori privat na ndërton neve unazën e jashtme. Edhe tek rasti i ‘Unazës së Jashtme’ është e tmerrshme qasje e qeverisë ndaj këtij projekti. ‘Unaza e Jashtme’ nuk është vetëm projekt i Prishtinës por është projekt i krejt Kosovës, sepse i lidh qytetet e Kosovës me Kryeqytetin dhe i jep një qasje shumë më të lehtë, e zhbllokon komunikacionin e liron Prishtinën në tërësi”, ka thënë Zogaj.

Kur kanë mbetur edhe një vit deri në përfundim të mandatit, nënkryetari i Prishtinës është shprehur optimist se do t’i realizojnë të gjitha premtimet. Disa ka thënë se janë në proces të nisjes së punimeve, e disa veçse kanë filluar.

“Ne jemi në vitin e tretë të mandatit, do të thotë e kemi edhe një vit të plotë para nesh për me i realizuar të gjitha premtimet. Një pjesë të madhe i kemi realizuar kurse një pjesë tjetër është në proces dhe disa projekte të mëdha kapitale të kampanjës sonë po i fillojmë edhe gjatë këtij viti. Për shembull bulevardi ‘Xhorxh Bush’ e kemi në proces prokurimi, platforma ndërlidhëse të lagjes Arbëria me Qendrën e kemi në proces të prokurimit, nënkalimin në rrugën ‘Agim Ramadani’ e kemi në proces po ashtu. Rruga A po vazhdon një projekte më të mëdha kapitale të krejt Kosovës është në vazhdim e sipër. Konsideroj që ky mandat ka qenë mjaftë i suksesshëm janë bërë shumë punë dhe shumë pritet që të fillojnë gjatë këtij viti në vazhdim”, ka deklaruar Zogaj, teksa përmend edhe tri prioritetet për këtë vit.

“Prioritet i kemi këto projekte e mëdha kapitale të cilat i përmenda. Ta fillojmë sa më shpejtë projektin për bulevardin ‘Xhorxh Bush’, të vazhdojmë me ndërtimin e rrugës ‘A’, projektin e autobusëve jemi duke e prit për të blerë të rinjtë. Mobilitetin me zhvilluar në kryeqytetet, Tregun e Gjelbër do ta fusim në proces shumë shpejtë, janë këto projekte që presin të përfundohen në këtë fund vit të mandatit tonë”, u shpreh Zogaj.

Një burrë në Ferizaj është gjetur pa shenja jete në banesën e tij përgjatë ditës së shtunë.

Lajmin e ka bërë të ditur Policia e Kosovës përmes raportit ditor. Në raport PK’ja bën të ditur se viktima jetonte në banesë me djalin dhe gruan e tij.

“Ferizaj / 31.08.2024 – NN. Një mashkull kosovar është gjetur pa shenja jete në banesën e tij. Vdekjen e viktimës e ka konstatuar ekipi mjekësor në vendin e ngjarjes. Viktima jetonte në banesë me djalin dhe gruan e tij. Në konsultim me prokurorin trupi i pajetë është dërguar në IML për obduksion”, thuhet në njoftim.

Policia po e heton rastin.