Ministria e Mbrojtjes dhe Forca e Sigurisë së Kosovës (FSK) do të organizojnë konferencën vjetore ndërkombëtare “FSK dhe Partnerët 2024”.
Konferenca do të mbahet duke filluar nga ora 09:00.
“Pjesëmarrësit do të përfshijnë përfaqësues të lartë shtetërorë, nga Ministria e Mbrojtjes dhe FSK, ambasadorë, atashe të mbrojtjes të Kosovës, si dhe përfaqësues të tjerë diplomatikë dhe atashe ushtarakë nga shtetet partnere”, thuhet në njoftim.
Qindra zjarrfikës dhe vullnetarë në jugun e Greqisë kanë luftuar një zjarr masiv për të tretën ditë radhazi, që ka vrarë dy persona dhe ka shkatërruar një zonë të madhe pyjore, duke nxitur premtime për ndihmë nga vende të tjera të Bashkimit Evropian.
Tre avionë për shuarjen e zjarreve me ujë pritet të mbërrijnë nga Italia dhe Kroacia më vonë të martën, pasi Greqia kërkoi ndihmë përmes mekanizmit të emergjencave civile të bllokut evropian.
Shërbimi grek i zjarrfikësve tha se më shumë se 400 zjarrfikës, të ndihmuar nga 20 avionë, ishin angazhuar në luftën kundër zjarreve në malet e Korinthisë, në rajonin e Peloponezit.
Autoritetet u shprehën optimiste pasi fronti kryesor i zjarrit ishte shuar, duke lënë një numër të madh zjarresh më të vogla të shpërndara. Megjithatë, mbetet e paqartë nëse ky sukses do të vazhdojë kur erërat të rriten sërish, duke rrezikuar përhapjen më të madhe të flakëve sërish.
Zëdhënësi i qeverisë, Pavlos Marinakis, tha se puna e zjarrfikësve ishtë vështirësuar fillimisht nga terreni i vështirë dhe rrjeti i dobët rrugor.
“Gjatë fazës së parë, vendimtare të zjarrit, zjarrfikësit patën vështirësi të mëdha për të arritur zjarrin për shkak të rrugëve të ngushta”, tha ai. “Shumë gryka dhe erërat e forta që frynin atë ditë penguan shumë përpjekjet e zjarrfikësve”, shtoi Marinakis.
Zyrtarët urdhëruan që një fshat tjetër të evakuohej si masë paraprake të martën, një ditë pasi dhjetëra urdhra të ngjashëm ishin dhënë në zona të tjera.
Zjarri shkatërroi një kishë historike në male dhe raportohet se dëmtoi edhe ndërtesa jashtë fshatrave të rrezikuara, por shërbimi i zjarrfikësve nuk dha më shumë detaje.
Dy viktimat u identifikuan si banorë vendas që mbetën të bllokuar të dielën mbrëma nga flakët që u shpërndanë me shpejtësi.
Greqia, ashtu si vendet e tjera të Evropës Jugore, përballet çdo verë me zjarre shkatërruese pyjore që janë përkeqësuar nga ngrohja globale. Gjatë muajve të fundit, shërbimi i zjarrfikësve është përballur me më shumë se 4.500 zjarre pyjore.
Kjo verë ishte cilësuar si sezoni më i rrezikshëm për zjarret në dy dekadat e fundit, pasi terreni ishte tharë nga një thatësirë e gjatë dhe valët e nxehtësisë në fillim të verës.
Megjithatë, investimet e mëdha të Greqisë në avionë të shtuar për shuarjen e zjarreve me ujë, dronë për paralajmërim dhe pajisje të tjera, kanë bërë që shumica e zjarreve të shuhen pak pasi kanë shpërthyer./REL
Gara më prestigjioze për klube në Evropë, Liga e Kampionëve do të rikthehet sonte me nëntë ndeshje të xhiros së dytë.
Do të ketë përballje mjaftë interesante, por vëmendja kryesore do të jetë në Londër, aty ku Arsenali e pret gjigantin francez, Paris-Saint-Germain, ndeshje qe fillon në ora 21:00
Skuadra e Artetas e nisi me barazim ndaj Atalantës këtë garë, kurse PSG triumfoi ndaj Gironas me rezultat 1-0.
Ndeshje tejet interesante pritet të jetë edhe ajo ndërmjet Bayer Leverkusenit dhe Milanit.
Derisa skuadra e Granit Xhakës shkatërroi Feynordin me rezultat 4-0, Milani e nisi keq duke u mposhtur nga Liverpooli me rezultat 1-3. Edhe kjo ndeshje fillon prej ores 21:00.
Ndërkohe, Sparta e Pragës, aty ku aktivizohen reprezentuesit e Kosovës, Amir Rrahmani dhe Ermal Krasniqi, do të përballet me Stuttgartin, takim ky që nis nga ora 18:45.
Në takimet tjera përballen:
Salsburg-Brest
Shtutgart-Sparta Prague
Barcelona-Young Boys
Dortmund-Celtic
Inter-Crvena Zvezda
PSV-Sporting
Slovan Bratislava-Manchestr City
Ambasadori i Gjermanisë në Kosovë, Jorn Rohde, ka replikuar mbi postimin që presidentja e vendit, Vjosa Osmani, e bëri në “X”, për takimin e saj me ministren e Jashtme gjerman, Annalena Baerbock.
Rohde tha se partneriteti i Gjermanisë do të vazhdojë të zhvillohet me Kosovën, dhe se shteti gjerman do t’i qëndrojë pranë atij kosovar.
“Partneriteti ynë i ngushtë do të vazhdojë të zhvillohet dhe Gjermania do të vazhdojë të qëndrojë pranë Kosovës si një mike dhe partnere e besueshme, e palëkundur dhe e ndershme”, shkroi Rohde.
Në takimin që pati me Baerbockun, Osmani tha se e informoi atë se procesi i integrimit të serbvë po pengohet nga presidenti serb, Aleksandar Vuçiq.
Të paktën tetë persona u vranë dhe disa të tjerë u plagosën nga sulmet ruse mbi rajonet ukrainase të Hersonit, Zaporizhjas dhe Sumyt më 1 tetor, kur Ukraina shënoi Ditën e Mbrojtësve mes një situate gjithnjë e më të vështirë në fushëbetejë në pjesën lindore të vendit, ku ofensiva e Moskës po bën përparime graduale.
“Një sulm rus në Herson, pikërisht në qendër të qytetit. Deri tani, janë konfirmuar gjashtë vdekje”, shkroi presidenti i Ukrainës, Volodymyr Zelensky, në X, duke shtuar se gjashtë persona të tjerë u plagosën.
Vdekjet u shkaktuan kur predhat ruse goditën një treg në qendër të qytetit Herson, ndërsa të tjerët u plagosën në një sulm tjetër mbi një stacion autobusi në qytetin jugor, tha guvernatori rajonal, Oleksandr Prokudin, në Telegram.
Qyteti i Hersonit u çlirua nga trupat ukrainase në nëntor të vitit 2022, duke i detyruar ushtarët rusë të tërhiqeshin drejt lindjes përtej lumit Dnjepër. Por, Rusia vazhdoi ta godasë Hersonin rregullisht nga përtej lumit, duke shkaktuar shumë viktima civile dhe duke dëmtuar infrastrukturën civile dhe atë energjetike.
Në Zaporizhja, Rusia sulmoi ndërtesa apartamentesh, duke vrarë një person dhe plagosur gjashtë të tjerë, tha guvernatori rajonal, Ivan Fedorov.
Ndërkohë, Ministria e Energjisë e Ukrainës raportoi më 1 tetor se trupat ruse sulmuan nënstacionin kryesor dhe ndërprenë një linjë energjie drejt centralit bërthamor të Zaporizhzjas – më i madhi në Evropë – i cili ishte në prag të një ndërprerjeje totale.
Në Sumy, një rajon verilindor që kufizohet me Rusinë, sulmet ajrore vranë një grua dhe plagosën dy burra në komunitetin Esman, raportoi zyra e prokurorit rajonal.
Në mbarë Ukrainën, në orën 9 të mëngjesit sipas kohës lokale, u mbajt një minutë heshtje në kujtim të të gjithë ukrainasve që kanë dhënë jetën duke mbrojtur pavarësinë e vendit të tyre.
Në një mesazh në Telegram, komandanti më i lartë ushtarak i Ukrainës, gjenerali Oleksandr Syrskiy, përgëzoi ushtarët ukrainas, të cilët i quajti “luftëtarë të pathyeshëm”, të cilët përballuan forcat pushtuese ruse dhe gjatë 2 vjetëve e gjysmë të fundit “i dhanë betejë të ashtuquajturës ‘ushtria e dytë e botës’ dhe e ndaluan atë”.
Ministri i Mbrojtjes, Rustem Umerov, gjithashtu lëshoi një deklaratë duke falënderuar çdo ushtar ukrainas për unitetin, guximin dhe qëndrueshmërinë e tyre.
“Ne e dimë për çfarë po luftojmë: për shtëpinë tonë, për të afërmit tanë që ëndërrojnë për një qiell të qetë. Për qytetet dhe fshatrat që presin çlirimin. Për brezat e ardhshëm që do të jetojnë në tokën e tyre pa frikë. Dhe për kujtimin e atyre që gjatë shekujve dhanë jetën për lirinë tonë. Nder i përjetshëm bijve dhe bijave të Ukrainës, të cilët sakrifikuan jetën e tyre për shtetin tonë”, tha Umerov në fjalimin e tij.
Ndërkohë, Umerov njoftoi shkarkimin e tre zëvendësministrave të tij. Ai tha në rrjetet sociale se kishte kërkuar nga qeveria që të lironte nga detyra Stanislav Haider, Oleksandr Serhiy dhe Yuriy Dzhygyr, si zëvendësministra të mbrojtjes, si dhe Lyudmyla Darahan si sekretare e ministrisë.
“Kam vendosur që të përfundoj procesin e pastrimit të sistemit të prokurimeve në bashkëpunim të ngushtë me organet e zbatimit të ligjit dhe autoritetet anti-korrupsion”, tha Umerov.
Data 1 tetor u shpall Dita e Mbrojtësve në vitin 2014, disa muaj pasi Rusia pushtoi ilegalisht Gadishullin e Krimesë dhe pjesë të rajoneve lindore të Donjeckut dhe Luhanskut. Kjo ditë zëvendësoi një festë të mëparshme të shënuar më 23 shkurt, e cila ishte caktuar në kohët sovjetike.
Më herët në mëngjes, forcat ajrore të Ukrainës thanë në një deklaratë në Telegram se mbrojtjet e tyre ajrore kishin rrëzuar 29 nga 32 dronë të nisur nga ushtria ruse në shtatë rajone ukrainase.
Më 30 shtator, Zelensky përsëri pranoi situatën “shumë, shumë të vështirë” me të cilën ushtria po përballet në lindje, ku forcat ruse kanë tentuar për muaj të tërë të kapin qendrën logjistike të Pokrovskut në rajonin e Donjeckut./REL/
Kryeministri Albin Kurti e ka uruar Mark Rutten, me marrjen zyrtarisht të detyrës së sekretarit gjeneral të NATO-s.
I pari i qeverisë kosovare ndër tjera ka shprehur gatishmërinë për bashkëpunimin e mëtejmë me aleancën veriatlantike.
”Urime Mark Rutte për fillimin zyrtar të rolit tuaj në krye të NATO-s. Ne në Kosovë ju dëshirojmë suksese të mëdha dhe mezi presim të vazhdojmë bashkëpunimin tonë në kapacitetin tuaj të ri”.
LEXONI EDHE:
Osmani uron Rutten: Nën udhëheqjen tuaj, partneriteti me NATO-n do të forcohet
Presidentja Vjosa Osmani është takuar sot me ministren e Jashtme gjermane Annalena Baerbock, në Gjermani.
Në një postim në Facebook, ajo ka thënë se e rikonfirmuan partneritetin e fortë ndërmjet Kosovës dhe Gjermanisë.
“Gjermania mbetet aleate kyçe për rrugëtimin tonë euro-atlantik si dhe për çështjet politike, të sigurisë dhe ekonomike, ndaj puna jonë e përbashkët është rruga që shpie drejt sukseseve”, ka thënë Osmani.
Policia e Shtetit ka bërë të ditur se ndaj 23 deputetëve të Kuvendi të Shqipërisë kanë ngritur vepra penale ” Shkatërrimi i pronës me zjarr” dhe “Goditjet për shkak të detyrës”.
Krejt kjo pasi dje këta deputetë gjatë zhvillimit së seancës plenare, dyshohen në Kuvendin e Republikës së Shqipërisë, kanë kryer veprime të dhunshme duke dëmtuar foltoren e Kuvendit, kanë thyer një karrige dhe kanë hedhur në drejtim të kryetares së Kuvendit, Elisa Spiropali, dhe anëtarëve të kabinetit qeveritar, sende të forta (pjesë të karriges së thyer).
Gjithashtu kanë djegur disa karrige, në ambientet e jashtme të Kuvendit të Republikës së Shqipërisë.
Në njoftimin e lëshuar thuhet se materialet i kaluan Prokurorisë së Posaçme kundër Korrupsionit dhe Krimit të Organizuar.
Deputetët në fjalë në njoftimin e lëshuar i kanë vetëm inicialet dhe moshën dhe vendin nga vijnë, si dhe veprën penale që rëndon ndaj tyre:
– F. N., 53 vjeç, banues në Tiranë, për veprat penale “Shkatërrimi i pronës me zjarr” dhe “Goditjet për shkak të detyrës”, parashikuar nga nenet 151 dhe 237 të Kodit Penal;
– G. B., 38 vjeç, banues në Tiranë, për veprën penale “Goditjet për shkak të detyrës”, parashikuar nga neni 237 të Kodit Penal;
– B. N., 39 vjeç, banues në Tiranë, për veprën penale “Shkatërrimi i pronës me zjarr” parashikuar nga nenet 151 i Kodit Penal;
– Dh. Ç. (T)., 51 vjeçe,
– F. H., 56 vjeç,
– Xh. M., 57 vjeç,
– L. G., 52 vjeç,
– A. Gj., 50 vjeç,
– I. Zh., 37 vjeçe,
– L. M., 47 vjeçe,
– D. S., 59 vjeç,
– L. B., 61 vjeç,
– L. H., 57 vjeç,
– A. D., 57 vjeç,
– E. B., 51 vjeç,
– E. Xh., 39 vjeçe,
– S. K., 40 vjeçe,
– S. K., 43 vjeç,
– E. S., 66 vjeç,
– K. M., 62 vjeç,
– V. D., 56 vjeç,
– M. K., 50 vjeçe,
– I. Ç., 60 vjeç, të gjithë banues në Tiranë, për veprën penale “Shkatërrimi i pronës”.
Përshkak të skadimit të mandatit të ushtruesit të detyrës së Drejtorit të Përgjithshëm të Thesarit ende s’është bërë bërë ekzekutimi i pagave në sektorin publik, përkundër se afati ligjor ka kaluar dje.
Gazeta Online Reporteri.net merr vesh se Ministria e Financave ka emëruar, të martën, Xhevat Zejnullahun në pozitën e u.d. të Drejtori të Thesarit, ndërsa ekzekutimi i pagave pritet të bëhet gjatë ditës së sotme.
Mirëpo, sipas Ligjit për Pagat dita e djeshme ka qenë e fundit për ekzekutimin e pagave për punëtorët në sektorin publik.
Sipas këtij Ligji, neni 7, paragrafi 4 thotë se paga paguhet për çdo muaj dhe më së voni në ditën e fundit të punës së muajit.
Por, edhe Ligji për Zyrtarët Publik, neni 35 thotë se Ushtrues Detyre s’mund të ketë më shumë se një vit.
“Zyrtarja/i publik nuk mund të caktohet si ushtruese/i detyre më gjatë se gjashtë (6) muaj. Kur pozita nuk mund të plotësohet brenda afatit gjashtë (6) mujor, ky afat mund të zgjas më së shumti edhe për gjashtë (6) muaj të tjerë”, thuhet në paragrafin 3 të këtij ligji.
“Pozita e lirë nuk mund të zëvendësohet me ushtrues detyre për më gjatë se afati i përcaktuar në paragrafin 3. të këtij neni”, është thënë në paragrafin 4 të nenit 25.
Mosekzekutimi i pagave shkaktoi reagime të shumta nga opozita, të cilët e cilësuan qeverinë si të papërgjegjshme dhe shpërfillëse ndaj mijëra punëtorëve të këtij sektori.
Për PDK-në, LDK-në dhe AAK-në mosekzekutimi në kohë i pagave ka shkelur dinjitetin e shumë familjeve që mezi ia dalin muajit.
Ambasada e Shteteve të Bashkuara të Amerikës në Shqipëri ka reaguar me shqetësim në lidhje me incidentet e dhunshme që u regjistruan në seancën e fundit të Kuvendit të Shqipërisë, ku opozita mes të tjerash ndezi dhe zjarr në oborrin para godinës për të djegur karriget e tyre.
Përfaqësia e diplomacisë amerikane iu bën thirrje të dyja palëve kryesore në Kuvend që të rikthehen tek dialogu konstruktiv.
“Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën”.
“Akte të tilla dëmtuese dhe potencialisht lënduese nuk kanë vend në procesin demokratik. Nxisim të gjitha palët e përfshira të ushtrojnë vetëpërmbajtje, të angazhohen në dialog konstruktiv si dhe të përqafojnë vlerat e respektit dhe qytetarisë”.
“Mbështesim diskutimet paqësore dhe bashkëpunuese lidhur me negociatat për anëtarësimin e Shqipërisë në BE si dhe do të vazhdojmë të qëndrojmë krah institucioneve shqiptare teksa punojnë për ta sjellë Shqipërinë më pranë bashkësisë euro-atlantike”, shkruhet në reagimin e SHBA.