Category: Lajme

Kryeprokurori i Ukrainës ka thënë të hënën se ka informata se presidenti i Rusisë, Vladimir Putin, mund të marrë pjesë në samitin e G20-ës në Brazil muajin e ardhshëm, prandaj u bëri thirrje autoriteteve atje ta arrestojnë atë nëse shfaqet.

Gjykata Ndërkombëtare Penale (GJNP) në Hagë lëshoi fletarrestim për Putinin në mars 2023, rreth një vit pasi Rusia e nisi pushtimin e plotë të Ukrainës, duke e akuzuar atë se ka kryer krime lufte duke dëbuar fëmijë.

Rusia i mohon akuzat për krime lufte dhe Kremlini e ka hedhur poshtë fletarrestimin e ICC-së si “të pavlefshëm”.

I pyetur nëse Putini ka vendosur të marrë pjesë në takimin e 20 ekonomive më të mëdha të botës, zëdhënës i Kremlinit, Dmitry Peskov, tha për gazetarë të hënën: “Jo. Do t’ju njoftojmë kur ta kemi një vendim”.

Prokurori i përgjithshëm i Ukrainës, Andriy Kostin, tha për Reuters se “është e rëndësishme që bashkësia ndërkombëtare të jetë e bashkuar dhe ta mbajë përgjegjës Putinin”.

“Për shkak të informatave që Putini mund të marrë pjesë në samitin e G20-ës në Brazil, dua ta përsëris se autoritetet braziliane janë të detyruara, si shtet anëtar i Statutit të Romës, ta arrestojnë atë, nëse ai ka guxim të vijë”, tha Kostin, duke iu referuar traktatit që e themeloi GJNP-në.

“Shpresoj vërtet se Brazili do ta arrestojë atë, duke e ritheksuar statusin e vet si demokraci dhe si një shtet që qeveriset mbi sundimin e ligjit”, tha ai.

Dështimi për ta bërë këtë rrezikon ta vendosë një precedent, sipas të cilit, liderët e akuzuar për krime mund të udhëtojnë pa u ndëshkuar.

Brazili ia dërgoi Putinit një ftesë standarde për samitin e 18-19 nëntorit në Rio de Zhaniero, por nuk ka pranuar ndonjë shenjë se ai ka ndër mend të marrë pjesë, sipas dy zyrtarëve të Qeverisë braziliane.

Pavarësisht fletarrestimit të GJNP-së, Putini ishte në një vizitë shtetërore në Mongoli në shtator. Ukraina e kritikoi dështimin e saj për ta arrestuar Putinin si goditje ndaj drejtësisë ndërkombëtare.

Vitin e kaluar, megjithatë, Putini nuk ishte i pranishëm në takimin e vendeve të BRICS-ut në Afrikën e Jugut, duke marrë pjesë online./REL

Një sulm ajror izraelit në oborrin e një spitali në Rripin e Gazës ka lënë të vrarë të paktën katër persona dhe ka nxitur një zjarr që ka përfshirë një kamp me tenda ku strehohen personat e zhvendosur nga lufta. Dhjetëra persona kanë pësuar djegie të rënda, sipas mjekëve palestinezë.

Ushtria izraelite tha se ka shënjestruar militantët që fshihen në mesin e civilëve, por nuk ofroi asnjë dëshmi për këtë pretendim. Në muajt e fundit, Izraeli vazhdimisht ka sulmuar strehimoret dhe kampet me tenda, duke pretenduar se ato përdoren nga luftëtarët e Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – për të nisur sulme ndaj Izraelit.

Në spitalin Martirët e Al-Aksës, në qytetin Deir al-Bala veçse ka një numër të madh të të plagosurve, pasi më herët gjatë të hënës Izraeli sulmoi një shkollë, ku strehohen palestinezët e zhvendosur, duke vrarë të paktën 20 persona. Disa shpërthime janë dëgjuar pas sulmit izraelit, megjithatë ende është e paqartë nëse shpërthimet u shkaktuan nga armët apo nga shpërthimi i depozitave të karburanteve.

Sipas të dhënave të spitalit, katër persona u vranë dhe 40 të tjerë u plagosën gjatë sulmit ajror izraelit në kampin me palestinezët e zhvendosur. Njëzet e pesë persona janë transferuar në spitalin Naser në jug të Gazës, pasi kanë pësuar djegie të rënda, tha spitali Martirët e Al-Aksës.

Izraeli po vazhdon të kryejë përditë sulme në mbarë Rripin e Gazës, teksa lufta ka nisur mbi një vit më parë.

Lufta nisi pasi Hamasi sulmoi jugun e Izraelit më 7 tetor 2023, duke vrarë afër 1.200 persona – shumica civilë – dhe duke rrëmbyer afër 250 të tjerë. Edhe afër 100 persona ende mbahen brenda Gazës, teksa një e treta e tyre besohet se kanë vdekur.

Si pasojë e ofensivës hakmarrëse të Izraelit, në Gazë janë vrarë më shumë se 42.000 palestinezë, sipas Ministrisë së Shëndetësisë në Gazë. Sipas kësaj ministrie, mbi gjysma e viktimave ishin gra dhe fëmijë.

Rreth 90 për qind e popullsisë së Gazës prej 2.3 milionë banorësh janë zhvendosur si pasojë e luftës, shpesh disa herë./REL

Gjykata Themelore në Prishtinë ka shpallur aktgjykim lirues ndaj ish-ministres së Integrimeve Evropiane Dhurata Hoxha, si dhe Ekrem Tahirit, Fitim Mustafës dhe Gëzim Dushit, lidhur me akuzën për keqpërdorim të detyrës zyrtare.

Aktgjykimi u shpall të hënën nga kryetari i trupit gjykues, Vesel Ismaili, raporton “Betimi për Drejtësi”.

Ish-ministrja Hoxha akuzohej se kishte përdorë kontratën e MIE-së për të promovuar fushatën në zgjedhjet parlamentare të vitit 2019, përderisa kjo kontratë shërbente për të informuar qytetarët rreth procesit të liberalizimit të vizave.

Bashkë me të akuzoheshin Fitim Mustafa, Gëzim Dushi dhe Ekrem Tahiri.

Dhurata Hoxhaj, Fitim Mustafa dhe Gëzim Dushi akuzoheshin për keqpërdorim të detyrës zyrtare, ndërsa Ekrem Tahiri akuzohej për veprën penale të ndihmës në kryerjen e veprës penale të keqpërdorimit të detyrës zyrtare.

Sipas këtij aktgjykimi, nuk është provuar se të akuzuarit kanë kryer veprën penale e cila iu vihej në barrë.

Gjykatësi Veseli tha se pas dëgjimit të dëshmitarëve, ekspertëve financiarë dhe administrimit të provave materiale e personale, trupi gjykues vlerësoi të gjitha këto prova dhe erdhi në përfundim se nuk janë provuar faktet konkrete të cilat përbëjnë elemente kryesore të figurës së veprës penale që iu binte në barrë të akuzuarve.

Andaj, Gjykata nuk ka mundur të vërtetojë përtej gjykimit të bazuar se të akuzuarit kanë kryer veprën penale për të cilën janë akuzuar dhe ka marrë aktgjykim lirues.

Palët e pakënaqura kanë të drejtë të ushtrimit të ankesës në Gjykatën e Apelit në afatin ligjor prej 30 ditësh.

Shpenzimet procedurale bien në barrë të Gjykatës, ndërsa Qeveria e Kosovës udhëzohet në kontest juridiko-civil.

Ish-ministrja dhe mbrojtësi i saj, avokati Florent Latifaj nuk ishin të pranishëm në shpallje të këtij aktgjykimi. Po ashtu, mungoi edhe prokurorja Ilirjana Çollaku-Tafaj.

Ndryshe, ish-ministrja Dhurata Hoxha akuzohej se kishte përdorë kontratën e MIE-së për të promovuar fushatën në zgjedhjet parlamentare të vitit 2019, përderisa kjo kontratë shërbente për të informuar qytetarët rreth procesit të liberalizimit të vizave.

Prokuroria Speciale e Republikës së Kosovës më 12 maj 2022, kishte ngritur aktakuzën ndaj Hoxhës dhe tre të tjerëve Ekrem Tahiri, Fitim Mustafa dhe Gëzim Dushi, duke i ngarkuar me veprën penale “Keqpërdorimit të pozitës apo autoritetit zyrtar”.

Ndryshe, lidhur me rastin tjetër ku akozhej ish-ministrja Hoxha, Gjykata e Apelit më 26 shtator 2024 e ka vërtetuar aktgjykimi lirues të Gjykatës Themelore në Prishtinë, ndaj ish-ministres së Integrimeve Evropiane, Dhurata Hoxha, dy ish-sekretarëve të ministrisë, Demush Shasha dhe Kushtrim Cukaj, si dhe Fitim Mustafës e Nuhi Osmanit, të cilët akuzoheshin për korrupsion. /BetimipërDrejtësi

Deputeti i Partisë Demokratike të Kosovës, Bekim Haxhiu i ka bërë thirrje prokurorisë për hetim, me pretendimet siç thekson ai ‘për hajni brenda Ministrisë së Mbrojtjes’. Sipas tij, 16 pjesëtarë të ushtrisë janë dërguar në Komision Disiplinor, meqë të njëjtit janë ushqyer jashtë kazermës. Kështu u shpreh ai në seancë të jashtëzakonshme ku po diskutohet për çështjen e ushqimit në Forcën e Sigurisë së Kosovës.

Në seancën e cila është bojkotuar nga Lëvizja Vetëvendosje, Haxhiu i bëri thirrje edhe ish-ministrit të Mbrojtjes, Armend Mehaj që të tregojë arsyen e vërtetë të dorëheqjes.

“Hajnia e ka lënë ushtrinë pa bukë. Ushtarët sot janë detyruar të dalin të hanë bukë jashtë kazermës dhe 16 prej tyre janë dërguar në Komision Disiplinor, pse kanë dalë të ushqehen jashtë kazermës sepse ushqimi brenda ka qenë i pa përballueshëm dhe i pamjaftueshëm për ta. Kjo është vetëm një pjesë e asaj që është bërë publike e hajnisë, por ka këtu hajni edhe më shumë që asnjëherë nuk është bërë publike. Prandaj e ftoj Prokurorinë të merret me këto dhe e ftoj ish-ministrin, Armend Mehaj të bëjë publike arsyen e vërtetë të dorëheqjes së tij. Fondi për ushtrinë që është krijuar nga Qeveria Kurti asnjëherë nuk është bërë publik, jo sa mjete kanë qenë por as se si u shpenzuan. Qytetarët dhanë mjetet e tyre për të kontribuar për Ushtrinë e Kosovës, e këta shkojnë vjedhin edhe në pasul edhe bukë të ushtarëve. Por kanë vjedhur edhe në armatim, këtë përgjigje duhet të na ja jap ministri Armend Mehaj me arsyen e vërtetë pse ai ka dhënë dorëheqje dhe konfliktin që ka pasur brenda Ministrisë së Mbrojtjes me këta eksponentë kriminal”, deklaroi Haxhiu. /KP

Të gjashtë kryeministrat e rajonit të Ballkanit Perëndimor kanë nënshkruar planin e ri të veprimit për treg të përbashkët në kuadër të Procesit të Berlinit, si pjesë integrale të Planit të Rritjes së BE-së për Ballkanin Perëndimor.

Plani i ri i Veprimit për një treg të vetëm rajonal për periudhën 2025-2028 u nënshkrua nga kryeministri i Kosovës, Serbisë, Maqedonisë së Veriut, Malit të Zi, dhe Shqipërisë, si dhe kryesuesi i Këshillit të Ministrave të Bosnjë-Hercegovinës.

Ndërkohë, Komisionari Evropian për Zgjerim dhe Fqinjësi, Oliver Varhelyi, tha se Ballkani Perëndimor për BE-në është prioritet gjeopolitik.

“Po punojmë me të gjitha instrumentet tona për të përshpejtuar këtë proces në mënyrë që ta arrijmë atë në të ardhmen e afërt”, tha Varhelyi.

Presidenti ukrainas, Volodymyr Zelensky, pretendoi se Koreja e Veriut ka dërguar ushtarë dhe armë në Rusi për të mbështetur luftën e Moskës në Ukrainë.

Mediat ukrainase së fundi kanë raportuar se gjashtë pjesëtarë të personelit ushtarak të Koresë së Veriut u vranë në një sulm ajror ukrainas në rajonin ukrainas të Donjeckut – të pushtuar nga Rusia – më 3 tetor.

Raportimet e mediave ukrainase nuk kanë mundur të verifikohen në mënyrë të pavarur, por gjatë adresimit të tij në orët e vona të 13 tetori, Zelensky për herë të parë përsëriti këtë pretendim.

“Kjo më nuk është çështje vetëm e transferimit të armëve. Tashmë ka të bëjë me transferimin e njerëzve nga Koreja e Veriut për te forcat e ushtrisë okupuese”, tha ai.

Zelensky nuk ofroi dëshmi për të mbështetur këtë pretendim, por spekulimi mbi rolin e Koresë së Veriut në konflikt është rritur në mesin e shenjave se Moska po forcon lidhjet me shtetet sikurse Koreja e Veriut dhe Irani, pas pothuajse 32 muajsh që kur Rusia nisi pushtimin në shkallë të plotë të Ukrainës.

Instituti për Studim të Luftës, me seli në Uashington, së fundi ka raportuar se qindra trupa të Koresë së Veriut kanë arritur në Rusi dhe po përgatiten që të dislokohen në Ukrainë.

Koreja e Veriut raportohet se i ka ofruar Moskës armë dhe municion, që Rusia i përdor kundër Ukrainës.

Shërbimi i inteligjencës së Koresë së Jugut ka pretenduar se Pheniani e ka furnizuar Moskën me municione të artilerisë dhe raketa me rreze të shkurtër veprimi. Kremlini ka hedhur poshtë këto pretendime, por nuk ka komentuar lidhur me deklaratën e Zelenskyt.

Zelensky tha se dislokimi vë në pah nevojën e Ukrainës për “më shumë mbështetje” nga partnerët e saj perëndimorë për të “rritur presionin ndaj Rusisë” dhe për të parandaluar “një luftë më të madhe”.

Presidenti ukrainas javën e kaluar vizitoi Britaninë, Gjermaninë, Francën dhe Italinë dhe u kërkoi partnerëve të Kievit që të vazhdojnë mbështetjen ushtarake për Kievin.

Situata në Ukrainë dhe Lindjen e Mesme pritet të jetë në krye të agjendës gjatë takimit mes presidentit amerikan, Joe Biden, dhe udhëheqësit gjerman, Olaf Scholz, gjatë vizitës në Berlin më vonë gjatë javës. /REL

Deri më 13 tetor të këtij viti, në platformën elektronike të Komisionit Qendror të Zgjedhjeve, janë pranuar mbi 7 mijë e 200 kërkesa për regjistrim për votim jashtë vendit, prej të cilave janë aprovuar mbi 6 mijë e 600, ndërsa 593 të tjera janë refuzuar.

Në mbledhjen e sotshme të KQZ-së, drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala ka thënë se në shumicën e rasteve të refuzuara, aplikuesit nuk janë fotografuar, duke mbajtur njëkohësisht në dorë dokumentin e identifikimit.

Ndërsa, për ndërrimin e Qendrës së Votimit brenda komunës, deri më tani janë pranuar 892 kërkesa për ndërrim të qendrës.

Buzhala, ka shtuar se prej tyre, janë aprovuar 866 kërkesa, ndërsa 26 të tjera janë refuzuar.

Deputeti i Lidhjes Demokratike të Kosovës, Avdullah Hoti ka komentuar njoftimin e autoriteteve vendore se gjatë vikendit ushtria serbe ka lëvizur trupat e saj rreth 50 metra afër vijës kufitare me Kosovën. Ai deklaroi se kryeministri Albin Kurti ngriti alarmin, teksa vet bëri fushatë në Gjermani.

Në seancën e jashtëzakonshme ku po diskutohet për çështjen e furnizimit me ushqim për FSK-në, Hoti e ka quajtur absurditet situatën e tillë. Ai përmendi edhe Fondin e Sigurisë për mbledhjen e mjeteve për FSK-në, për çka tha se nuk ka informacione se sa mjete janë mbledhur.

“Në fillim të këtij mandati qeverisës me pompozitet është promovuar Fondi i Sigurisë për mbledhjen e mjeteve për pajisje ushtarake për Ushtrinë e Kosovës. Unë nuk jam i sigurt, as anëtarët e komisionit përkatës parlamentar që mbikëqyrin Forcën e Sigurisë që e dinë sa mjete janë mbledhur në këtë fond edhe sa prej tyre janë shpenzuar dhe sa është pajisur FSK me mjete bazuar në mjetet që janë mbledhur në këtë fond të sigurisë”, deklaroi ai.

Ish-kryeministri, Avdullah Hoti tha se shefi i ekzekutivit ngriti alarmin në vikend për lëvizjen e trupave të ushtrisë serbe, ndërkohë që Albin Kurti ishte duke bërë fushatë në Gjermani.

“Gjatë vikendit ka pasur zhvillime tjera. Ne kemi pasur një informatë të dhënë nga institucionet e Kosovës edhe të promovuar edhe nga kryeministri i vendit për ushtrinë serbe që ka ardhur afër kufirit me Kosovën dhe kryeministri ngriti alarmin. Por, në të njëjtën kohë ai ishte pjesë e fushatës zgjedhore të tij në Gjermani. Tash imagjinoni, e ngrit alarmin për një vend fqinj me tendencë armiqësore ndaj Kosovës që po e afron ushtrinë afër kufirit të Kosovës, vet bën fushatë në Gjermani edhe ushtrinë e ka pa ushqim. Nuk ka më koment tjetër për situatën tragjik-komike që është krijuar në këto ditë në Kosovë”, deklaroi Hoti. /KP

Deputetja e AAK-së, Time Kadrijaj, ka thënë sot në seancë se FSK-ja duhet të trajtohet në mënyrë të dinjitetshme.

Gjatë fjalës së saj, në seancën për mungesën e ushqimit në FSK, ajo tutje tha se ushtarët, pos ushqimit duhet të kenë paga më të mirë e pajisje individuale.

Më tej, Kadrijaj u shpreh se është e turpshme mospjesëmarrja e VV-së në debatin e sotëm parlamentar.

“Ikja e kësaj mazhorance për të mos dashur të ballafaqohen me realitetin është e turpshme, se di ku janë ose ku po fshihen pas këtyre skandaleve, por sigurisht janë nëpër zyra t’u hongër plazma sepse tash kemi mjaft. Shqetësuese kjo që po diskutojmë sot, s’kishim dashtë asnjë me diskutu për këtë sepse është e turpshme çka po ndodh në këtë vendin tonë. Në këtë qeveri po degradohen institucionet e sigurisë. Sot një kryeministër po shkatërron gjithçka që është ndërtuar me mund që 25 vjet, por pa të rrejtë Albin Kurti nuk mundesh me ditë çka është rrena. Po shihet që kjo qeveri ka ardh në pushtet me rrena dhe mashtrime. Policia është e Kosovës, Ushtria po ashtu. Ata duhet të trajtohen në mënyrë të dinjitetshme, duhet të kenë paga më të mira, pajisje individuale të cilat nuk i kanë shumica prej ushtarëve të FSK-së”, tha ajo.

LEXONI EDHE:

Haradinaj: Tradhtar është ai që e lë ushtrinë pa bukë, Kurti është spiun i Serbisë