Category: Lajme

Presidentja e Komisionit Evropian (KE), Ursula von der Leyen, do t’i vizitojë gjashtë vendet e Ballkanit Perëndimor, përfshirë Kosovën, për të shprehur përkushtimin e saj dhe të komisionit për angazhim në afrimin e rajonit drejt Bashkimit Evropian.

Von der Leyen, e cila në verë u rizgjodh për një mandat të ri pesëvjeçar, ka paralajmëruar se procesin e zgjerimit e ka ndër prioritetet kryesore dhe për këtë e ka caktuar një komisionare, e cila do të merret vetëm me zgjerimin e bllokut.

Von der Leyen do ta nisë turneun e saj në rajon sot me ndalesën e parë Shqipërinë, ku do të takohet me presidentin, Bajram Begaj dhe kryeministrin, Edi Rama. Ajo do të marrë pjesë edhe në përurimin e Kampusit të Kolegjit Evropian në Tiranë.

Më 24 tetor, ajo do të shkojë në Maqedoninë e Veriut dhe në Bosnje e Hercegovinë. Në Bosnje, ajo do t’i vizitojë edhe zonat e goditura nga përmbytjet e 4 tetorit, dhe do të shpreh gatishmërinë e BE-së për të ndihmuar në përballje me pasojat.

Në Serbi, Von der Leyen do të qëndrojë më 25 tetor, ku do të takohet me presidentin serb Aleksandar Vuçiq.

Von der Leyen do të udhëtojë pastaj për vizitë në Kosovë të shtunën e 26 tetorit, ku do të takohet me presidenten, Vjosa Osmani dhe kryeministrin, Albin Kurti. Vizitën në rajon ajo do ta përfundojë me takimin me liderët e Malit të Zi, të shtunën në Podgoricë.

Sipas paralajmërimeve nga KE-ja, gjatë vizitës në rajon Von der Leyen do të përqendrohet më së shumti në ndihmën që BE-ja, po u jep vendeve të rajonit për përshpejtimin e reformave dhe përgatitjeve për përparim më të shpejtë në procesin e integrimeve evropiane.

Ish-presidenti i Shqipërisë Ilir Meta, sot në orën nëntë e gjysmë del para Gjykatës së Posaçme Antikorrupsion.

Së bashku me Metën do të dalin para gjykatës edhe Monika Kryemadhi, Piro Xhixho dhe Ema Çoku.

“Prokuroria e Posaçme kundër Korrupsionit dhe Krimit të Organizuar sot, me datë 22.10.2024 ka paraqitur pranë Gjykatës kërkesën me objekt: “Marrjen në pyetje dhe verifikimin e kushteve të zbatimit të masës së sigurimit për personat nën hetim Ilir Meta, Monika Kryemadhi, Piro Xhixho dhe Ema Çoku”.

Bazuar në nenin 248 pika 1 të K.Pr.Penale, seanca gjyqësore për shqyrtimin e kësaj kërkese do të zhvillohet më datë 23.10.2024 ora 09:30”, sipas njoftimit të GJKKO.

Ai u arrestua një ditë më parë në hyrje të Tiranës, ndërsa po kthehej nga Kosova./TCH/

Instituti Hidrometeorologjik i Kosovës ka njoftuar se sot do të mbajë mot me diell dhe vranësira të pjesshme.

Sipas institutit, temperaturat minimale do të lëvizin ndërmjet 0-2 gradë Celsius, ndërsa maksimalet e ditës parashihen të lëvizin ndërmjet 18-21 gradë Celsius.

Në mëngjes parashihet që në shumë vende, kryesisht viseve të larta dhe rreth lumenjve, të ketë mjegull. Do të fryjë erë nga drejtimi i juglindjes me shpejtësi 1-4/m/s.

Sot do të organizohet një konferencë për media me temën “Siguria kibernetike 360, dhe si të mbroni biznesin tuaj në epokën digjitale”.

Kjo ngjarje organizohet nga Oda Ekonomike Amerikane në Kosovë dhe mbahet në Klan Arena.

Përgatiti: Benita Zeneli

Komunat as gjatë vitit 2023, vlerësohet se nuk bënë progres sa i përket zbatimit të rekomandimeve të Zyrës Kombëtare të Auditimit.

Bazuar në të dhënat e raportit vjetor e duke i krahasuar me ato të vitit paraprak, rekomandimet u zbatuan vetëm 39 %.

“Sipas raportit vjetor të vitit 2023 vetëm 39 për qind e rekomandimeve të auditorit janë zbatuar. Kemi një masë prej 61 për qind të pazbatuar. Kjo është një rënie krahasuar me vitin 2022, kur kjo shkallë ka qenë në masë 46 për qind të zbatimit të rekomandimeve”, tha Ismet Kryeziu nga KDI.

Mirëpo ndryshe nga komunat, sipas Auditores së Përgjithshme, Vlora Spanca, qëndrojnë agjencitë e pavarura e niveli qendror.

“Në nivelin qendror ka zbatueshmëri më të lartë. Ka zbatueshmëri të rekomandimeve edhe të ndërmarrjeve publike dhe tek agjencitë e pavarura, por ngecja është te niveli lokal. Mënyra siç është i rregulluar sistemi i menaxhimit të financave publike, ndarja e detyrave dhe strukturat dallojnë prej nivelit qendror nga ai lokal”, tha Spanca.

Megjithatë, kryetarët e komunave nuk pajtohen me këtë.

Sipas kryetarëve të Rahovecit e Kamenicës, progresi në çështjen e kontratave kolektive është një nga rekomandimet e ZKA-së, që e kanë zbatuar.

“Jemi të vetëdijshëm se asnjë kryetar i komunave s’është nënshkrues i kontratave kolektive. S’është e ndershme, e ligjshme dhe njerëzore që të penalizohen komunat për shkak të një marrëveshje, e cila është dashur të gjendet një zgjidhje nga Ministria e Financave, Ministria e Arsimit dhe Ministria e Shëndetësisë”, tha kryetari i Komunës së Rahovecit, Smajl Latifi.

“Pasojat e një marrëveshjeje mund të vijnë edhe më pas, siç është rasti i kontratës kolektive. Apo siç është rasti kur ne pas dhjetë viteve, marrim një vendim nga Gjykatat se një kontratë e lidhur nga komuna e Kamenicës është tash e jashtëligjshme. Atë pasojë e bart kryetari aktual dhe ajo pasojë identifikohet në raport të auditimit dhe e bartim atë imazhin, jo shumë të mirë të një qeverisje ku merr një opinion të kualifikuar”, tha kryetari i Komunës së Kamenicës, Kadri Rrahimaj.

Sipas raporteve të Zyrës Kombëtare të Auditimit, një ndër gjetjet e përsëritura ndër vite te komuna është keqmenaxhimi i parasë publike.

Më shumë detaje i gjeni në Edicionin Qendror të lajmeve në videon më poshtë:

Përgatiti: Pranvera Krasniqi

Kolonë të veturave po thuajse në çfarëdo kohe mund të shohësh në Prishtinë.

E për qytetarët që ngecin në trafik, kryetari Përparim Rama rekomandoi të dalin nga vetura ose të lexojnë libra.

Por, kështu nuk bëri vetë ai, teksa erdhi të martën për t’i parë punimet në tunelin e “Kurrizit”.

“Hahaha, jo nuk kam lexuar libër sepse rrugës deri këtu nuk ishte kolonë, nuk pata mundësi…”, tha Rama.

Për rekomandimin që vetë e dha, nuk u përgjigj nëse e kishte njëmend apo jo.

Por teksa u pyet se a është kjo zgjidhje në reduktimin e kolonave në kryeqytet, kryetari përmendi disa hapa që u bënë, për të cilët tha se ndonëse joplotësisht, patën sukses në lehtësimin e trafikut.

“Kemi punuar tek unaza qendrore, kemi punuar edhe tek rruga A, kështu duke u munduar ta lehtësojmë trafikun…”, tha Rama.

Ndërkaq, qytetarët e konsideruan tallje deklaratën e Ramës.

Të njëjtin mendim ndan edhe opozita. Madje, qasjen e tij e cilëson arrogante.
Sipas shefit të asamblistëve të PDK-së, Leutrim Retkoceri, gjendja në trafik është rënduar edhe më shumë prej kur Rama është në qeverisje.

“Deklarimi i kryetarit është tallje, janë ka e vujnë qytetarët çdo ditë, ka mbyllur shumë rrugë pa analiza të fizibilitetit, ka blloku pa alternativa të tjera, andaj jemi në këtë pozicion”, tha Retkoceri.

Në vitin 2022, kur Komuna e Prishtinës bëri testimet për rrjedhën e qarkullimit të veturave, kishte rezultuar se rreth 130 mijë vetura hyjnë në Prishtinë çdo ditë nga rajonet tjera.

Më shumë detaje i gjeni në Edicionin Qendror të lajmeve në videon më poshtë:

Përgatiti: Kastriot Tahiri

Mbi 200 mijë euro u ndanë, me qëllim që për 60 ditë këtë pamje ta merrte rruga që lidh disa fshatra të Fushë-Kosovës.

Por kur ka kaluar një vit, në rrugën Bardh i Madh – Sllatinë e Vogël, projekti nuk është as afër përfundimit.

Përveç një kilometri asfalt, rruga nuk ka shteg për ecje e as për biçikleta.

Asamblisti i AAK-së, Hasan Ismajli, akuzon komunën për ndryshime në projekt.

“Duke e pa që është një projekt i mirë, e që parasheh tri korsi, për vrapim e për ecje, por ka pasë devijim nga projekti, dhe është një rrugë që gjerësia është 3.60 dhe skajoret anëve, nuk e di pse janë ikë nga projekti”, tha Ismajli.

Plani parashikonte që në rrugë të bëhej mihje e dheut deri në 70 cm e më pas shtrimi i saj me tri shtresa zhavorr.

Por Auditori i Brendshëm në komunë, ka konstatuar se pas mihjes vetëm 30 nga 85 centimetra sa ishte paraparë, është me zhavorr.

Për vonesën dhe për mosrealizimin e projektit siç ishte paraparë, ATV-ja tentoi të bisedojë me kryetarin e komunës, Burim Berisha, megjithatë, nga kabineti i tij përmes telefonit, i thanë televizionit se nuk merren me akuzat e opozitës komunale.
Sido që të jetë, banorët e kësaj zone po kërkojnë që punimet të përfundojnë sa më parë.

“Po del problem jo ky, jo ai, po shumë është ma mirë për neve me u kry me kohë. Me bujqësi, me qeto punë ka shpija e çdo gjë që kryhet me kohë ish kanë më mirë”, tha Ymer Jashanica, banor i Bardhit të Madh.

Projekti në fjalë, kishte paraparë edhe krijimin e një pushimoreje gjatë shtegut për ecje. Megjithatë, asnjë e tillë deri më tani nuk është vendosur askund gjatë rrugës.

Më shumë detaje i gjeni në Edicionin Qendror të lajmeve në videon më poshtë:

Përgatiti: Krenare Mulliqi

Nga 1 nëntori i këtij viti asnjë punëtor në Kosovë nuk mund të ketë pagën më të ulët se 350 euro.

Por, vendimi i Qeverisë që hyri në fuqi më 1 tetor, sipas Kryetarit të Sindikatës së Pavarur të punëtorëve të sektorit privat rrezikon të mos zbatohet.

Sipas Jusuf Azemit, asnjë kompani nuk ka ftuar për diskutim apo edhe nënshkrim të kontratës së re punëtorët që kanë pagën nën minimale.

“Nuk ka asnjë kompani që i ka ftuar për ndonjë ndryshim në kontratë, madje as Qeveria nuk i ka thirrë kompanitë publiko-private që me i subvencionu pjesën tjetër të parave”, tha Azemi.

Por, ai paralajmëron se punëtorët që në muajin nëntor marrin pagë më të ulët se 350 euro, do ta ndërpresin punën dhe do t’iu drejtohen gjykatave.

“Nuk mund këta punëtorë të presin më gjatë se 6 nëntor është data e fundit, pas kësaj ne do të vazhdojmë me padi, sepse kemi diçka që na takon me ligj”, tha Azemi.

E njohës të fushës së drejtësisë janë të bindur se këto raste do të fitohen në gjykata, pasi thonë se kontratat ishte dashur të paktën të përtërihen para se vendimi të hyjë në fuqi.

“Kontrata duhet të nënshkruhen më sa largu një ditë para se ligji të hyjë në fuqi, punëtorët kanë të drejtë plotësisht t’i bëjnë paditë dhe do ta fitojnë të drejtën e tyre”, tha Emrush Kastrati, avokat.

Në fund të gushtit, Qeveria mori vendim që pagën minimale nga 264 euro bruto, ta bëjë 350 euro. Nga ky vendim u prekën më shumë se 10 mijë punëtorë në vend.

Më shumë detaje i gjeni në Edicionin Qendror të lajmeve në videon më poshtë:

Përgatiti: Driton Sadiku

Shifra të ndryshme janë prezantuar së fundi rreth shkallës së papunësisë në vend.

Derisa në raportin e Bankës Botërore, thuhet se vetëm 37 për qind e fuqisë punëtore në Kosovë është e punësuar, sipas Qeverisë, papunësia ka rënë në 10.7 për qind.

Të dyja këto institucione për bazë kanë marrë të dhëna të ndryshme, por të cilat sipas profesorit të ekonomisë, Medain Hashani, në rastin e Qeverisë janë të pasakta.

“ASK-ja të gjitha të dhënat statistikore që i publikon nuk janë të sakta dhe kanë diskrepancë të madhe në raport me realitetin që është duke ndodhë, prandaj edhe institucionet prestigjioze në momentin kur i shohin të dhënat të papërditësuara, ata nuk iu besojnë këtyre të dhënave, prandaj ata e kanë gjetur rrugën më të mirë dhe tani i bëjnë të gjitha rezultatet vetë”, tha Hashani.

Andaj të dhënat e Agjencisë së Statistikave të cilave edhe iu referohet Qeveria vlerësohet se nuk qëndrojnë.

“Ato janë të dhëna që janë marrë në entin e punësimit nëpër regjione, sepse secili regjion e ka entin e punësimit dhe nuk d.t.th që të gjithë të papunët janë të lajmëruar në entin e punësimit, pra vetë raporti që 67 për qind dhe 10.7 për qind e raportit të qeverisë del se diku mbi 50 për qind e të aftëve për punë nuk janë fare të regjistruar në entin e punësimit”, tha Hashani.

Por, në një përqindje të caktuar besohet se shifrat u keqkuptuan.

“Sa u përket keqkuptimeve apo moskuptimeve në nivelin e duhur për 37 për qind të raportit të Bankës Botërore aty nuk e shpreh që është papunësia në Kosovë, por vetëm thotë se shfrytëzimi i fuqisë punëtore aktive në tregun e punës në Kosovë është 37 për qind”, tha Jakup Bellaqa, ekonomist.

Një tjetër e dhënë e raportit të Bankës Botërore, të titulluar “Ruajtja e Ritmit të Rritjes” tregon se raporti më i ulët i popullsisë që merr pjesë në tregun e punës është në Kosovë, vetëm 42.7 për qind.

Më shumë detaje i gjeni në Edicionin Qendror të lajmeve në videon më poshtë: