Category: Lajme

Ministrja e Punëve të Jashtme dhe Diasporës, Donika Gërvalla, ka thënë se takimi me homologun e saj nga Luksemburgu ka qenë mundësia e thellimit dhe bashkëpunimit dypalësh.

“Vizita e tij është një dëshmi e qartë thellimit dhe bashkëpunimit dypalësh dhe për të forcuar marrëdhëniet tona më të ngushta. Ky është një hap i rëndësishëm drejtë bashkëpunimit të qëndrueshëm. Luksemburgu e ka ndihmuar Kuvendin për votimin elektronik”, tha ajo.

Gërvalla tha se javë më parë në OKB e ka theksuar rrezikun e një fshqinji të rrezikshëm dhe të një Rusie më agresive.

“Këshilli Evropian ka paralajmëruar kohëve të fundit një paralajmërim që thekson se nëse NATO dhe SHBA nuk ndërmarrin hapa të nevojshëm në këtë drejtim, ekziston mundësia e rikthimit të konfliktit në Ballkan”, ka thënë ajo./EO/

Ministri i Financave, Hekuran Murati ka njoftuar fillimin e pilotimit të skemës së reformuar së asistencës sociale.

Ai ka thënë se nga grupi i parë janë një mijë e 824 familje në nevojë që do të përfitojnë mbështetje financiare si pjesë e pilotimit të reformës së skemës së asistencës sociale.

“Nga grupi i parë, janë 1,824 familje në nevojë do të përfitojnë mbështetje financiare si pjesë e pilotimit të reformës së skemës së asistencës sociale. Përveç heqjes së kritereve diskriminuese, një gjë tjetër me rëndësi që po bëhet në kuadër të reformës është edhe kërkesa për të gjithë anëtarët e aftë për punë që të regjistrohen në Agjencinë e Punës si punëkërkues. Përmes këtij veprimi, do të sigurohemi që t’i mbështesim ata që të aktivizohen në tregun e punës, dhe familja të krijojë vetëqëndrueshmëri financiare në afatgjatë”, ka shkruar Murati në Facebook.

Komisioni Qendror i Zgjedhjeve njofton se është duke vazhduar periudha e aplikimit për regjistrimin e votuesve jashtë Kosovës për votim në Zgjedhjet për Kuvendin e Kosovës, e cila ka filluar më 29 gusht dhe do të përfundojë më 26 dhjetor 2024.

KQZ thotë se gjatë kësaj periudhe, të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës. Aplikimin e tyre mund ta bëjnë përmes platformës elektronike http://diaspora.kqz-ks.org ose përmes postës në kutinë postare të KQZ-së.

“Po ashtu, gjatë kësaj periudhe, në momentin e regjistrimit votuesit mund të përcaktohen individualisht për mënyrën e votimit: Të votojë fizikisht në njërën nga përfaqësitë diplomatike të Republikës së Kosovës; duke dërguar fletëvotimin përmes postës në kutinë postare të KQZ në Kosovë; duke dërguar fletëvotimin përmes postës në një nga kutitë postare të hapura nga KQZ jashtë Kosovës. Në rast të plotësimit të numrit maksimal të votuesve në përfaqësi diplomatike, sipas parimit të kohës së aplikimit, aplikuesi do të udhëzohet për regjistrim për mënyrat e tjera të votimit përmes postës. Informacionet më të detajuara janë publikuar në ueb faqen e KQZ-së: Shërbimet e KQZ-së > Shërbimet për Votuesit > Votimi jashtë Kosovës, ose në vegzën direkte: https://kqz-ks.org/votimi-jashte-kosoves/. Komisioni Qendror i Zgjedhjeve inkurajon të gjithë shtetasit e Kosovës që jetojnë jashtë vendit që të shfrytëzojnë të drejtën e tyre kushtetuese për t’u bërë pjesë e procesit zgjedhor në Republikën e Kosovës, fillimisht duke u regjistruar si votues jashtë Kosovës dhe më vonë duke votuar”, thuhet në komunikatën e KQZ-së.

Shefi i Grupit Parlamentar të Lidhjes Demokratike të Kosovës, Arben Gashi tha se partia në pushtet e ka shkatërruar besimin ndaj RTK-së. Për këtë arsye, Gashi shtoi se kanë marrë vendim që të mos marrin pjesë në programacionin e transmetuesit publik.

Në seancë plenare ku po diskutohet për shkarkimin e anëtarëve të bordit të RTK-së, ai theksoi se transmetuesi publik do të duhej të mbronte dhe përfaqësonte interesin e qytetarëve.

“Radio Televizioni i Kosovës dështoi që të ofronte shërbimin e vet si institucion publik, dhënien e lajmit dhe programacionit në interes publik. Si rezultat i këtij dështimi, politizimi dhe kapje nga LVV dhe personi kontrollues që kontrollohet nga Lëvizja Vetëvendosje, Lidhja Demokratike e Kosovës mori vendim dhe refuzoi çdo pjesëmarrje në debate dhe emisione të RTK-së në institucion publik. Duke pasur parasysh se ky institucion është institucion publik dhe ka për qëllim mbrojtjen e interesit publik, pra është pronë e qytetarëve të Kosovës do të duhej të mbronte dhe përfaqësonte interesin e qytetarëve të Kosovës. Kur si rezultat i ndërhyrjes së LVV-së, kapjes së bordit, kapjes së politikës redaktuese dhe dhënies së lajmeve të pavërteta u dëmtua interesi publik, u politizua institucioni, u shkatërrua besimi, ne refuzuam të jemi pjesë e kësaj ndërmarrje”, deklaroi Gashi.

Më tej, shefi i deputetëve të LDK-së shtoi se “RTK prodhoi informacione të rrejshme kundër kolegëve të tyre”. /kp

Deputeti i Aleancës për Ardhmërinë e Kosovës, Pal Lekaj tha se që katër vjet “nuk është Radiotelevizioni i Kosovës, por Radio Televizioni i Kurtit. Ai theksoi se duhet të shkarkohet bordi i RTK-së dhe se sipas tij, asnjëherë transmetuesi publik nuk ka qenë më i kontrolluar.

Deputeti i Aleancës për Ardhmërinë e Kosovës, Pal Lekaj tha se partia në pushtet shkarkoi padrejtësisht bordin e RTK-së në vitin 2021.

“Kurrë RTK-ja nuk ka qenë më e dobët. Po ju rikujtojmë që kurrë RTK-ja nuk ka qenë më e kontrolluar nga politika dhe Lëvizja Vetëvendosje. Po ju rikujtojmë që kurrë raportet e auditimit se kanë nxjerr më keq RTK-në se në qeverinë Kurti. Po ju rikujtojmë që kurrë punëtorët e RTK-së s’kanë qenë më të nëpërkëmbur e pa të drejtat e tyre. Po ju rikujtojmë që kurrë gratë punëtore të RTK-së s’kanë pasur më shumë presion, gjuhë kërcënuese dhe seksiste. Po ju rikujtojmë që RTK-ja nuk po punon me program të vet por me program të Lëvizjes Vetëvendosje… Po ju rikujtojmë që RTK është televizioni i propagandës së Lëvizjes Vetëvendosje dhe nuk është i qytetarëve të Kosovës. Po ju rikujtojmë që katër vjet nuk është Radioteleviozioni i Kosovës por është Radiotelevizioni i Kurtit ”, tha Lekaj.

Deputeti i Lëvizjes Vetëvendosje, Valon Ramadani deklaroi se transmetuesi publik nuk është kapur nga partia në pushtet, por siç theksoi ai, është ç’kapur nga Partia Demokratike e Kosovës. Kërkesë e kësaj partie për shkarkimin e bordit të RTK-së, Ramadani e konsideroi të pa sinqertë, ku tha se po tentohet të shkarkohen ata që kanë dhënë dorëheqje. Pas kësaj deklarate ka reaguar shefi i GP-së së PDK-së, Abelard Tahiri, i cili tha se “këtë margaritar s’duhet me hjek prej foltores”.

Deputeti i Lëvizjes Vetëvendosje, Valon Ramadani tha se “opozita po tenton të luaj rolin e shenjtorit”.

“PDK po dëshiron të shkarkojë një bord të RTK-së, ku prej shtatë anëtarëve tre kanë dhënë dorëheqje, ndërsa dy prej tyre ju skadon mandati dhe tashmë konkursi është i hapur për ta. LDK si zakonisht pas PDK-së. Pra, sinqeriteti në këtë kërkesë është zero. Dëshirojnë t’i shkarkojnë ata që kanë dhënë dorëheqje. Nuk bëhet opozita kështu o kolegë. Po e shoh që keni nevojë për vite të tjera të kuptoni se si bëhet opozita, por ne ju mirëkuptojmë. Zgjedhjet janë afër e më në fund do të tentuar të bëhen të zëshëm disi me çfarëdo teme që ju vjen dorësh. Ajo çfarë ne nuk lejojmë ju të bëni është të shiteni si shenjtorë këtu dhe të ngrisni tema tek të cilat halli i juaj është krejt diku tjetër”, deklaroi Ramadani.

Ramadani tha se halli i Partisë Demokratike e Kosovës është se ju ka humbur kontrolli mbi RTK-në dhe mundësia që të keqpërdorin me kontrata.

“RTK-në nuk e kemi kapur ne, nuk e ka kapur askush por vetëm e kemi ç‘kapur nga ju. Puna nuk është kapje, puna ka produkt dhe shihet në dritë të diellit. Për këtë arsye ju shqetësimet e juaja mund të ja thoni njëri-tjetrit, por ne nuk jemi të interesuar që të dëgjojmë ato. E besa as qytetarët nuk janë. Prandaj ne po shkojmë tek ta e ju vajtoni mes vete pse nuk e keni të kapur RTK-në. Në emër të Grupit Parlamentar të LVV-së ju përshëndesim dhe mirë u takofshim në seancat e ardhshme ”, tha ai.

Pas fjalimit të tij ka reaguar shefi i Grupit Parlamentar të Partisë Demokratike të Kosovës, Abelard Tahiri, i cili tha se “këtë margaritar nuk duhet me hjek prej foltores”.

“Me mujt ja kisha shtuar edhe 10 minuta këtij me fol. Këtë margaritar nuk duhet me hjek prej foltores. Ky është përfaqësuesi më i mirë, më i denjë i kësaj mendësie që udhëheq sot Republikën e Kosovës. Ky sot gjithë ditën duhet me lënë në këtë foltore me nejt, me pa qytetarët e Kosovës çfarë mendësie na udhëheq, çfarë mentaliteti dhe çfarë strukture politike dhe çfarë mendimi politik. Por, ke kohë e shkurtër tetë minuta sa foli u desh me nejt, me fol edhe të bëjë replikë edhe pas kësaj”, replikoi Tahiri.

Të paktën 10 persona janë vrarë pasi një vullkan shpërtheu në Indonezi, duke dërguar hirin e dendur në ajër dhe duke rënë shi mbi shtëpitë aty pranë.

Shpërthimi në malin Lewotobi Laki Laki, në ishullin Flores, pak pas mesnatës të së hënës, hodhi hirin e trashë në ngjyrë kafe deri në 2,000 metra (6,500 këmbë) në qiell.

Disa shtëpi morën flakë, duke përfshirë një manastir murgeshash katolike, tha zyrtari lokal Firman Yosef.

Ekipet e shpëtimit po kërkojnë më shumë trupa nën shtëpitë e shembura.

Të vrarët deri më tani, përfshirë një fëmijë, u gjetën me një rreze prej 2.4 milje të kraterit.

Të paktën 10,000 njerëz janë prekur nga shpërthimi në gjashtë fshatra të rrethit Wulanggitang dhe katër në rrethin Ile Bura.

Pushteti vendor po përgatitet të përdorë shkollat si strehimore të përkohshme për të prekurit.

Niveli i rrezikut u rrit në nivelin më të lartë dhe zona e përjashtimit u dyfishua.

Një murgeshë në fshatin Hokeng vdiq dhe një tjetër ishte zhdukur, konfirmoi kreu i fondacionit Saint Gabriel Agusta Palma.

Fotot dhe videot e shpërndara në rrjetet sociale treguan mbeturina vullkanike që mbulonin shtëpitë deri në çatitë e tyre në fshatra si Hokeng.

Ky është shpërthimi i dytë vullkanik në Indonezi në dy javë.

Mali Marapi në Sumatrën perëndimore, një nga vullkanet më aktivë të vendit, shpërtheu më 27 tetor, por nuk u raportua për viktima. /Sky News/

Lëvizja Vetëvendosje përmes deputetëve të saj të pranishëm në Kuvend i është kundërvënë propozimit të PDK-së, për shkarkimin e anëtarëve të bordit të RTK-së, raporton EO.

Deputeti i VV-së, Valon Ramadani, ka thënë se me ardhjen e kësaj partie (LVV) në pushtet RTK-ja, sipas tij është “çkapur” nga keqpërdorimet që janë bërë në të (RTK).

Ai ka thënë se më herët në RTK kanë qenë të punësuar mbi 1100 veta e tani, siç ka deklaruar ai, janë 740.

“PDK po dëshiron që të shkarkoj një bord i cili prej 7 anëtareve, 3 kanë dhënë dorëheqje, ndërsa dy prej tyre ju skadon mandati dhe tashmë konkursi është i hapur për ta. Dëshiron që t’i shkarkoj ata që kanë dhënë dorëheqje. Halli është që këtyre ju ka humbur kontrolli mbi RTK-në që e kanë pasur me vitet të tëra. E kanë hallin që në RTK tani punësohen me meritokraci. Më herët në RTK kanë qenë mbi 1100 persona, tani janë 740, këta kanë qenë militant partiake që janë shërbyer për angazhimin e tyre duke u paguar nga taksat e këtij vendi. Asnjë prej tyre s’ka bërë ankesë për shkëputje të kontratave. E vërteta është që ne e kemi çkapur RTK-në, e për ju çkapja është kapje”, ka thënë ai.