Category: Lajme

Kancelari i Austrisë, Karl Nehammer, ka thënë se do të japë dorëheqje në ditët në vijim si kancelar dhe si lider i partisë, pas dështimit të bisedimeve për të formuar një koalicion qeveritar.

Kancelari ka thënë se partia e tij, Partia Popullore konservative – dhe Social Demokratët, nuk janë pajtuar për çështjet kryesore.

Neoliberalët, një tjetër parti e përfshirë në bisedime, është tërhequr po ashtu të premten.

Në shtator, Partia e Lirisë – e së djathtës ekstreme – ka shënuar fitore të pashembullt në zgjedhjet e përgjithshme të Austrisë, mirëpo partitë tjera patën thënë se nuk formojnë koalicion me liderin e këtij subjekti politik, Herbert Kickl.

Kolapsimi i bisedimeve mund të rezultojë me nisjen e bisedimeve të konservatorëve me të djathtën ekstreme, apo edhe me organizim të zgjedhjeve të reja, vlerësojnë analistë.

Partia e Lirisë – miqësore me Rusinë – ka qenë më parë në pushtet. Ajo duket se do t’i mirëpriste zgjedhjet e reja, pasi sondazhet e opinionit publik sugjerojnë për rritjen e mëtejme të saj edhe pas shtatorit.

Kjo parti e ka kritikuar presidentin e shtetit, Alexander Van der Bellen për “kaosin e krijuar dhe kohën e humbur”.

Dalja në zgjedhjet e shtatorit ka qenë 77.3 për qind, ndërsa temat kryesore kanë qenë ato të migrimit, azilit dhe ekonomisë në kohën e luftës së Rusisë në Ukrainë.

Kickl pati premtuar se do të rikthente sigurinë për austriakët.

Partia që udhëheq ai është e ashpër për çështjet e migrimit dhe e promovon idenë e rimigrimit, që përfshin dërgimin e azilkërkuesve në shtetet e origjinës.

Partia e Lirisë është themeluar nga ish-nazistët në vitet ’50.

Dy ditë para zgjedhjeve të shtatorit, disa kandidatë janë zënë duke kënduar në një funeral këngë të nazistëve, ndonëse partia më vonë ka mohuar gjithçka. REL

Një vatër zjarri ka rrezikuar godinën e Mitropolisë Ortodokse në Gjirokastër. Rreth orës 11:05 të së dielës Shërbimi Zjarrfikës është njoftuar për një zjarr në godinën e Mitropolisë, në lagjen “11 Janari”.

Menjëherë në vendngjarje ka mbërritur grupi zjarrfikës me disa efektivë dhe automjetin mbështetës. Zjarri ishte shkaktuar nga lënia ndezur e qirinjve tek vendi i posaçëm i lutjeve fetare.

“Nga ndërhyrja e shpejtë dhe efikase u bë izolimi i zjarrit duke mos lejuar depërtimi e tij në pjesët e tjera, të cilat ishin me konstruksion dru dërrase dhe përfshirja në flakë mund të shkaktonte një zjarr masiv”, shprehet drejtuesi i zjarrfikësve Gramoz Llapi.

Nga zjarri i rënë u dogj vendi i qirinjve, disa libra dhe vendi i lutjeve.

Dëme të tjera në godinën e Mitropolisë Ortodokse fatmirësisht nuk pati. Euronews.al

Giorgia Meloni ka takuar Donald Trump, presidentin e zgjedhur të SHBA në rezidencën e tij në Mar a Lago, në Florida në orët e pasdites së 4 janarit. Mediat kanë publikuar edhe pamjet e para nga takimi i dy udhëheqësve.

Qëndrimi i kryeministres në rezidencën e manjatit zgjati disa orë, raporton La Repubblica. Në diskutimet mes dy liderëve konservatorë ka zënë vend rasti Sala, gazetarja italiane e arrestuar në Teheran nga regjimi iranian, por edhe çështje me karakter gjeopolitik dhe me interes të SHBA-së e Evropës.

Vizita kaq e shpejtë e Melonit për të takuar Donald Trump ka edhe një tjetër synim, për ta bërë kryeministren pikë referimi në Evropë, për administratën e re të republikanit.

Ministri Hekuran Murati ka bërë propagandë në Gjakovë kur ka thënë se rritja ekonomike në të kaluarën ka ardhur nga borxhet e marra nga shteti, thotë deputetja e LDK-së, Hykmete Bajrami, raporton Eo.

“Dje, Hekuran Murati paska mbajtë një ligjëratë propaganduese në Gjakovë. Ai u mundua t’i bindë gjakovarët se rritja ekonomike në të kaluarën ka ardhur nga borxhet e marra nga shteti – sipas tij 1.5 miliardë euro. Madje po krenohet se qeveria e tij nuk po bën të njëjtën gjë.”, ka shkruar ajo.

Bajrami thekson se Qeveria nuk ka ndërtuar asgjë me paratë e marra borxh, pasi sipas saj nuk ka pasur investime kapitale.

“Politikat e qeverisë kanë futur qytetarët në borxh. Sipas Bankës Qendrore të Kosovës, kreditë në banka në fund të dhjetorit 2024 kanë arritur shumën pre 5.668 miliardë euro. Vetëm në vitin 2024 janë shtuar 768 milionë euro kredi të reja.”, ka thënë ajo duke shtuar se në të kaluarën shteti merrte borxh dhe ndërtonte infrastrukturë ndërsa sot qytetarët po marrin borxh për të mbijetuar.

Bajrami thekson se qeveria po përpiqet të mashtrojë me numra.

“Pra, në të kaluarën shteti merrte borxh dhe ndërtonte infrastrukturë për qytetarët. Sot, qytetarët janë ata që po marrin borxh për të mbijetuar, derisa qeveria merr me shumë tatime e taksa falë çmimeve të rrituara. Në katër vitet e fundit infacioni ka qënë 21.5%. Siç e ka thënë Ronald Reagan: “Nuk kemi inflacion sepse njerëzit po jetojnë shumë mirë, kemi inflacion sepse qeveria po jeton shumë mirë.” Qeveria ka bërë përpjekje të mashtroj me numra katër vite radhazi, por qytetarët e kanë të vërtetën e tyre, ata që e kanë jetuar atë. 9 shkurti është afër. Ndryshimi është afër”, ka shkruar Bajrami.

Qeveria e Kosovës e ka kundërshtuar idenë që për zgjidhjen e problemeve në veri të vendit të diskutohet me Serbinë në kuadër të dialogut në Bruksel. Partia në pushtet Vetëvendosje thotë se çështja e veriut ka të bëjë me zbatimin e ligjit dhe shtirjen e sovranitetit dhe integritetit territorial të Kosovës. Ndërsa, opozita e ka kritikuar Qeverinë se po e dërgon Policinë në veri për të lënë të kuptohet se do të ketë luftë. Analistët vlerësojnë se nëse nuk ka rezultate në dialogun e Brukselit nuk mund të ketë as zgjidhje të problemeve në veri të Kosovës.

Bashkimi Evropian, KFOR-i dhe SHBA-ja kanë kërkuar nga Kosova që për zgjidhjen e problemeve në veri të vendit të diskutohet në kuadër të dialogut Kosovë Serbi në Bruksel. KFOR-i ka paralajmëruar Qeverinë që të mos ndërmerr hapa të njëanshëm as për hapjen e urës mbi Lumin Ibër dhe që zgjidhjen ta gjejë në dialog. Por, Qeveria ka thënë se për veriun nuk pranojnë të diskutojnë me Serbinë duke e konsideruar si cështje të brendshme të Kosovës. Deputeti i LVV-së, Enver Gugolli, tha se Qeveria po ndërmerr veprime në veri të vendit për shtrirje të legjitimitetit.

“Jo çështja e veriut ka të bëjë me zbatimin e ligjit dhe shtirjen e sovranitetit dhe integritetit territorial të Kosovës. Ne nuk mund të tolerojmë një situatë ku mbizotëronte gjithçka përveç rendit dhe ligjit. Ne nuk do ta tolerojmë asnjëherë një situatë të tillë. Kjo nuk ka të bëjë aspak me çështjen e dialogut”, ka thënë Dugolli.

Partitë në opozitë kanë kritikuar Qeverinë se me ideologji dhe veprime nacionaliste po fusin frikën tek qytetarët e Kosovës se mund të ketë luftë në veri të vendit. Deputeti i PDK-së, Xhavit Haliti, tha se të dhënat nuk tregojnë se mund të ketë diçka të tillë. Sipas tij, Qeveria duhet t’i zbatojë obligimet e marrëveshjes së Brukselit duke dërguar draft-statutin e Asociacionit të komunave me shumicë serbe në Kushtetuese.

“Po i dërgojnë Policinë në veri për të lënë të kuptohet se do të ketë luftë, por të dhënat nuk tregojnë se mund të ketë diçka të tillë. Zgjidhja politike për veriun ka ndodh. Marrëveshja e Brukselit duhet të filloj të zbatohet dhe të dërgohet draft-statusi për Asociacionin në kushtetuese”, ka thënë Haliti.

Profesori universitar, Ibrahim Gashi, vlerëson se zgjidhja për veriun varet nga suksesi që ka dialogu midis Kosovës dhe Serbisë në Bruksel.

“Zgjidhja në veri do të ndodh me automatizëm nëse ka një zgjidhje apo sukses në dialog. Nëse palët fillojnë të lëvizin, që për Serbinë nuk jam optimist që do të lëvizë në dialog në përmbushjen e pikave të marrëveshjes së pikave të marrëveshjes”, ka vlerësuar Gashi.

Por, profesori Gashi thotë se zgjidhja për veriun varet edhe nëse zbatohet themelimi i Asociacionit të komunave me shumicë serbe.

“Tendencat e Serbisë janë që me shndërruar veriun sa cështje po litike sa cështje të sigurisë për të mbajtur njëfarë lloj tensioni atje apo konflikti të ngirë atje dhe normalisht kjo nuk i konvenon Kosovës”, ka shtuar ai.

Veriu i vendit është përballur disa herë me sulme e trazira nga sic janë quajtur bandat kriminale duke kulmuar me sulmit terrorist në Banjkë dhe atë në kanalit e ujit në Zubin Potok./RTV21

Fotografi biometrike, barkode, hologramë, mikroçipa: pasaporta e sotme është pa dyshim një pjesë e teknologjisë moderne. Për disa ajo hap portën e botës, e cila për të tjerët – pa pasaportën e duhur – mbetet e mbyllur. Por si kanë qenë fillimet, si lindi dokumenti kryesisht katror?

Fillimet e pasaportës
Që në shekullin e 14-të ka pasur diçka të ngjashme me një dokument udhëtimi. Në atë kohë murtaja bënte kërdinë në Evropë dhe qytete si Venecia kërkonin zgjidhje për të frenuar sëmundjen. Kështu lindi letra e murtajës – një vërtetim, që duhej ta tregonte secili, që hynte në vend. Nëse vinte nga një rajon i murtajës, nuk lejohej që të hynte në qytet në Lido. Në atë kohë dokumenti i udhëtimit nuk lidhej me shtetësinë, por me vendbanimin. Lidhja midis kombësisë dhe pasaportës erdhi më vonë – në shekullin e 20-të.

Futja e pasaportave standarte
Menjëherë pas Luftës së Parë Botërorelindi ideja e një standardi global për pasaportat. Kjo detyrë iu besua Lidhjes së Kombeve të sapothemeluar, organizatës paraardhëse eKombeve të Bashkuara.

Sipas Hermine Diebolt, e cila punon në bibliotekën dhe arkivat e Kombeve të Bashkuara në Gjenevë, (Zvicër), pasaportat, siç i njohim ne sot, ekzistojnë prej gati 100 vjetësh.

Lidhja e Kombeve, e themeluar në vitin 1920, duhej të siguronte paqen pas Luftës së Parë Botërore. Gjatë kësaj kohe ranë perandoritë e vjetra koloniale. Lindën shtete të reja kombëtare. Gjatë luftës shumë njerëz u dëbuan dhe shpesh ata kishin vetëm dokumente lokale, për të vërtetuar identitetin e tyre. Vende si Gjermania, Franca, Mbretëria e Bashkuar dhe Italia kërkonin që gjatë luftës, që njerëzit nga vendet armike të paraqisnin dokumente zyrtare identifikimi, për t`u lejuar të hynin në vend.

Pas vitit 1918, kur shumë njerëz ishin në arrati, policët në kufij kishin vështirësi të kontrollonin dokumentet e shumta të ndryshme të udhëtimit. Ishte e vështirë të kuptohej, nëse një pasaportë ishte e vërtetë apo jo. Prandaj edhe për këtë duhej gjetur një zgjidhje.

Në vitin 1920 Lidhja e Kombeve mblodhi liderët botërorë në Paris, për të negociuar rregullore standarde për dokumentet e udhëtimit. U vendos që pasaportat të duken kudo njëlloj dhe të përmbajnë të njëjtin informacion. Që tani e tutje pasaportat duhet të kishin përmasat 15,5 me 10,5 centimetra, duhet të përmbanin 32 faqe dhe në pjesën e përparme të kishin emrin e vendit dhe stemën. Ky format përdoret edhe sot.

Liri për disa, pengesë për të tjerë
Që në atë kohë kishte kritikë të pasaportës. Argumenti i tyre: Dokumenti i shërben më pak lirisë së udhëtarëve dhe më shumë kontrollit të tyre. “Disa krerë shtetesh dhe qeverish preferuan më mirë, që gjithçka të mbetej si më parë, kur mund të lëvizje lirshëm, pa pasur dokumente me vete. Edhe në opinionin publik dhe në shtyp pasaporta ishte e padëshirueshme. Njerëzit mendonin se pasaportat kufizojnë lirinë e tyre dhe shkelin privatësinë. “Përvec kësaj pasaporta kishte të bënte me shumë burokraci dhe investim”, thotë Hermine Diebolt.

Një artikull i New York Times në vitin 1926 i referohej pasaportës si “The passport Nuisance”. Gazeta shkruante: “A duhet të mbahen pasaportat si një element i përhershëm i udhëtimit? Sistemi, që është në modë që nga lufta, është i komplikuar, i bezdisshëm dhe pengon qarkullimin e lirë midis kombeve”.

Por ishte tepër vonë për të ndaluar zhvillimin. Anëtarët e Lidhjes së Kombeve nuk mundën të binin dakord, se si duhet të duket një botë pa kontrolle kufitare dhe pasaporta. Kështu që pasaporta mbeti.

Pasaporta moderne dhe pabarazia globale
Deri më sot, një pasaportë udhëtimi, një copë letër e thjeshtë, mund të ketë një ndikim të madh në jetën e një njeriu. Shtetësia përcakton, se ku ai mund të udhëtojë dhe të qëndrojë. Në varësi të vendit të origjinës, një pasaportë mund t’i japë bartësit të saj privilegje ekstreme – ose edhe të shkaktojë dëshpërim.

Klasifikimet e pasaportave tregojnë, se sa vende mund të vizitohen pa vizë me një pasaportë të caktuar. Sipas “Global Passport Power Rank 2024” shteti i pasur me naftë Emiratet e Bashkuara Arabe është në vendin e parë. Qytetarët e tyre mund të udhëtojnë në shumë vende, ndërsa njerëzit me pasaportë siriane kanë përvojën e kundërt. Një tjetër klasifikim, Indeksi i Pasaportave Henley, i jep vendin e parë Singaporit, i ndjekur menjëherë nga Franca dhe Gjermania.

Po njerëzit që nuk kanë as shtetësi e as pasaportë? Rreth dhjetë milionë njerëz në botë janë pa shtetësi. Një arsye mund të jetë diskriminimi ndaj grupeve etnike. Sipas Institutit Amerikan për Diplomaci dhe të Drejtat e Njeriut, rreth 70 për qind e romëve dhe sinti në Gjermani janë pa shtetësi.

Një disavantazh i pasaportave del në pah vazhdimisht. Pasaportat janë ndër artikujt më të kërkuar të tregtimit, jo vetëm në tregun e zi. Disa vende kanë hapur kufijtë e tyre edhe vullnetarisht për ofertuesit më të lartë, siç është ishulli mesdhetar i Qipros. Vendi filloi të lëshojë pasaporta dhe viza “të arta” pas krizës ekonomike në 2013. Shitja e pasaportave të tij ishte një biznes fitimprurës për Qipron – derisa raportet kritike televizive zbuluan se politikanë të rangut të lartë ishin të përfshirë në këto makinacione. Praktika e “pasaportave të arta” u ndërpre zyrtarisht.BalkanWeb

ashkëpunëtor i Komitetit të Helsinkit për të Drejtat e Njeriut, Aleksandër Sekuloviq, tha se reagimi i autoriteteve serbe dhe retorika e tyre politike në lidhje me incidentet në Kosovë janë banale, sa që pothuajse çdo fjalë mund të parashikohet paraprakisht Sekuloviq ka thënë se këto incidente janë përpjekje për të destabilizuar Kosovën.

Bashkëpunëtor i Komitetit të Helsinkit për të Drejtat e Njeriut dhe nënkryetar i Aleancës së antifashistëve të Serbisë, Aleksandër Sekuloviq në një intervistë për The Geopost, ka theksuar se nëse merret parasysh pamja e përgjithshme e klero-nacionalizmit serb në rajon, jo vetëm në Kosovë, “si dhe pritshmëria e autoriteteve serbe që administrata Trump do ta mbështesë këtë politikë ‘muskujsh’, atëherë mendoj se periudha në vazhdim do të sjellë një përshkallëzim të mëtejshëm të tensioneve dhe konflikteve”.

Duke komentuar regaimet e Serbisë zyrtare, sulmin terrorist në Banjskë dhe sulmin e fundit në kanalin Ibër-Lepenc, Sekuloviq ka thënë se reagimi i autoriteteve serbe dhe retorika e tyre politike lidhur me incidentet në Kosovë është aq banale saqë pothuajse çdo fjalë mund të parashikohet paraprakisht.

“Sipas tyre, pala serbe nuk ka lidhje me ato ngjarje dhe fajtor për gjithçka është kryeministri Kurti. Ata gjoja distancohen nga ato ngjarje dhe në thelb i perceptojnë si të tyret, gjë që më së miri shihet nga fakti se në Serbi u shpall zi kombëtare për shkak të rënies së disave në Banjskë, si dhe nga fakti se ata që vdiqën, në mediat qeveritare cilësohen si ‘heronjtë serbë’”, ka thënë ai.

Sekuloviq ka thënë se incidentet janë përpjekje për të destabilizuar Kosovën.

“Interesi jetik i asaj politike perverse dhe të paarsyeshme është të tregojë se Kosova është politikisht dhe kulturalisht “minore”, e paaftë për jetë të pavarur, se autoritetet e saj nuk mund të garantojnë paqen dhe stabilitetin, që do të thotë se duhet të kthehet nën kujdesin e Serbisë”, ka deklaruar ai për The Geopost.

Forcat e agjencive të zbatimit të ligjit dhe të sigurisë në Uashington dhe në zonën përreth po mobilizojnë përforcime, ndërsa përgatiten për sigurimin e tre aktiviteteve të rëndësishme në kryeqytetin e vendit. Këto zhvillime vijnë pas sulmit në ditën e Vitit të Ri në Nju Orlins dhe shpërthimit në kamionin Cybertruck, të kompanisë Tesla, përpara Hotelit Ndërkombëtar Trump në Las Vegas.

Aktiviteti i parë do të mbahet të hënën, kur Kongresi i ri mblidhet për të certifikuar rezultatin e zgjedhjeve presidenciale, katër vite pas trazirave të 6 janarit 2021 në Kapitol.

Aktiviteti i dytë do të jetë funerali shtetëror për ish-Presidentin Jimmy Carter, duke filluar me ceremoni që fillojnë të martën dhe përfundojnë të enjten.

Aktiviteti i fundit do të jetë më 20 janar, kur do të inaugurohet Presidenti i zgjedhur Donald Trump.

“Nuk ka ndodhur ndonjëherë më parë. Kemi tre aktivitete (të veçanta të sigurisë kombëtare) brenda një periudhe prej 15 ditësh”, u tha të premten gazetarëve Matt McCool, nga zyra në Uashington e Shërbimit Sekret.

“Por, dua t’ju them se u përshtatemi nevojave. Kemi punuar prej vitesh për aktivitete të tilla. Kështu që do të jemi të përgatitur”, tha ai.

Megjithë shqetësimet e krijuara pas sulmit në Nju Orlins dhe shpërthimin në Las Vegas, zyrtarët e sigurisë deri më tani kanë besim se aktivitetet në Uashington do të zhvillohen të sigurta.

“Nuk kemi ndonjë kërcënim të besueshëm apo konkret në lidhje me këto aktivitete”, tha David Sundberg, ndihmës drejtor në zyrën e FBI-së në Uashington.

Agjencitë e zbatimit të ligjit dhe të sigurisë kanë marrë masa të shtuara, duke patur parasysh se qyteti dhe rajoni po përballen me një mjedis me rrezikshmëri të shtuar.

Shërbimi Sekret tha të premten se po sillte agjentë nga i gjithë vendi për të rritur praninë, e cila ishte sidoqoftë në nivelin më të lartë të tre viteve të fundit.

Departamenti Metropolitan i Policisë së Uashingtonit tha se ka shtuar rreth 4 mijë policë nga departamente të ndryshme nga mbarë vendi.

Garda Kombëtare e kryeqytetit konfirmoi se ka miratuar kërkesa për mbështetje të mëtejshme, përfshirë vendosjen në dispozicion të 500 anëtarëve të tjerë të gardës, për certifikimin e zgjedhjeve në 6 janar dhe oficerët ndërlidhës për funeralin shtetëror.

Po shqyrtohet edhe një kërkesë shtesë për 7,800 ushtarakë të tjerë nga garda për sigurimin e inaugurimit të Presidentit të zgjedhur Trump.

“Një mori masash sigurie, të dukshme dhe të padukshme, do të merren në koordinim, për t’u siguruar mirëfunksionimi i planit gjithëpërfshirës”, tha agjenti i Shërbimit Sekret, McCool.

Policia e Uashingtonit njoftoi se masat e rritura të sigurisë hyjnë në fuqi të dielën. Oficerë të specializuar do të dislokohen në mbarë qytetin për të qenë në gatishmëri në rast të ndonjë emergjence.

Policia e Kapitolit, e cila ka 2,400 oficerë dhe punonjës civilë që janë përgjegjës për mbrojtjen e Kapitolit dhe anëtarët e Kongresit, njoftoi se është tashmë më e përgatitur për emergjencat, krahasuar me katër vite më parë.VOA

Me vendim të Qeverisë, varrimi i Kostas Simitis do të bëhet me shpenzime publike. Në të njëjtën kohë, vendi do të nderojë kujtimin e tij me katër ditë zie kombëtare.

Ministri i Brendshëm, Thodoris Livanios, me rastin e ndarjes nga jeta të ish-kryeministrit Kostas Simitis shpreh mirënjohjen e shtetit për kontributin e tij të rëndësishëm në Greqi.

“Kostas Simitis ishte një politikan, i cili u nderua dy herë nga populli grek me detyrën e kryeministrit. Ai u përpoq, herë me shumë sukses, herë me më pak, të ndryshojë vendin, duke iu përgjigjur sfidave të kohës”, z. Livanios, duke nënvizuar përkushtimin e të ndjerit në detyrën e tij.

Ministri vlerësoi personalitetin e Kostas Simitis, duke folur për një akademik me vepër të pasur dhe top-formë të luftës kundër diktaturës. Profesor universiteti me një punë të pasur akademike, personalitet drejtues i luftës antidiktaturë, u soll gjithë këto vite me dashamirësi dhe etikë”, theksoi ai.

z. Livanios iu referua të dyja arritjeve historike që mbajnë vulën e Kostas Simitis, pra integrimit të Greqisë në Eurozonë dhe hyrjes së Qipros në Bashkimin Evropian. “Ne ruajmë mbi të gjitha dy arritjet historike, të cilat kanë vulën e tij personale: integrimin e vendit në Eurozonë dhe hyrjen e Qipros në Bashkimin Evropian”, theksoi ai. Thodoris Livanios i shprehu ngushëllimet e sinqerta familjes së Kostas Simitis: “Ngushëllime të sinqerta bashkëshortes, vajzave dhe të afërmve të tij”.

Njoftimi

“Kostas Simitis ishte një politikan, i cili u nderua dy herë nga populli grek me detyrën e kryeministrit. Ai u përpoq, herë me shumë sukses, herë me më pak, të ndryshojë vendin, duke iu përgjigjur sfidave të kohës.

Profesor universiteti me një punë të pasur akademike, figurë drejtuese në luftën kundër diktaturës, gjatë gjithë këtyre viteve është sjellë me dashamirësi dhe etikë.

Mbajmë mend mbi të gjitha dy arritjet historike, të cilat kanë vulën e tij personale, integrimin e vendit në Eurozonë dhe hyrjen e Qipros në Bashkimin Evropian.

Me vendim të Qeverisë, varrimi i tij do të jetë shpenzim publik, do t’i bëhen nderime kryeministrit në detyrë dhe do të shpallet katër ditë zie kombëtare.

Ngushëllime të sinqerta bashkëshortes, vajzave dhe të afërmve të tij”, thuhet në njoftim.Balkanweb