ATV

Category: Lajme

  • Krerët e partive politike bëjnë homazhe në Reçak

    Krerët e partive politike bëjnë homazhe në Reçak

    Përgatiti: Alma Hysenaj

    Të ftohtit e së mërkurës nuk i ndali mijëra qytetarë e personalitete publike për të bërë homazhe në nderim të viktimave të Masakrës së Reçakut.

    Në mesin e tyre ishin edhe liderët e partive politike në Kosovë, tashmë të përfshirë në fushatë zgjedhore.

    “E para që na duhet ta themi është se duam drejtësi, diçka që na takon me të drejtë për të kërkuar. Ende nuk ka drejtësi për Reçakun dhe për shumë masakra në Kosovë”, tha kryetari i AAK-së, Ramush Haradinaj.

    “Ky akt i rëndë, çnjerëzor, akt kundër njerëzimit ishte po ashtu pikë kthese për vëmendjen ndërkombëtare ndaj pasojave që populli i Kosovës i vuante nga regjimi i Millosheviqit”, tha kryetari i LDK-së, Lumir Abdixhiku.

    “Ky është një moment për secilin prej nesh e në radhë të parë për institucionet dhe për klasën politike që edhe një herë të zotohen se asnjë prej nesh nuk duhet të ndjehemi rehat, derisa të ketë drejtësi për secilën jetë të dhënë për lirinë e Kosovës”, tha kryetari i PDK-së, Memli Krasniqi.

    Në mëngjesin e 15 janarit të 1999-s ishin vrarë mizorisht fëmijë, të rritur e pleq, në mesin e të cilëve edhe një grua e moshuar, trupi i së cilës ende nuk është gjetur.

    I pari që më 1999 e pati alarmuar botën se në Reçak po kryhet krim kundër njerëzimit ka qenë ish-shefi i Misionit Verifikues të OSBE-së në Kosovë, William Walker.

    Ai e pati vizituar Reçakun një ditë pas masakrës dhe pasi ka parë trupat e civilëve të vrarë, ka thënë se “ky është një krim i rëndë kundër njerëzimit”.

  • Interesim i vogël i fëmijëve për tu vaksinuar kundër gripit sezonal

    Interesim i vogël i fëmijëve për tu vaksinuar kundër gripit sezonal

    Përgatiti: Pranvera Krasniqi

    Asnjë fëmijë nuk u vaksinua kundër gripit sezonal, në Qendrën Kryesore të Mjekësisë Familjare në Fushë-Kosovë.

    Kryeshefi i QKMF-së, Mustafë Gashi, thotë se vaksinën që nga muaji nëntor e morën vetëm personat e moshuar.

    “Nuk ka pas interesim, ka pas fluks të madh të pacientave por për tu vaksinuar vetëm personat e pensionuar kryesisht”, tha Gashi.

    Pavarësisht se gripi sezonal përhapet të personat e moshave të ndryshme, interesim për të vaksinuar fëmijet nuk kishte as në QKMF-në në Prishtinë.

    Prej muajit nëntor e deri tash u vaksinuan vetëm 15 fëmijë nga gjashtëmuajsh e deri në 15 vjeç. Këta fëmijë kishin rezultuar me imunitet shumë të dobët.

    “Shumë pak është kjo, as vitin e kaluar s’ka pas interesim fare”, tha Vjollca Beqiri, specialiste e Mjekësisë Familjare QKMF, Prishtinë.

    E nëse fëmijët janë me virozë e të pavaksinuar kërkohet që të shmanget dalja të mos transmetohet tek të tjerët.

    “Këta fëmijë apelohet të mos shkojnë madje as në shkollë në këto ditë kritike masi le teshtitje me prekje mund të transmetohen fare lehtë”, tha Beqiri.

    Thirrje për vaksinim ka bërë vazhdimisht edhe Instituti Kombëtar i Shëndetit Publik për të gjitha grupmoshat e sidomos personat që kanë sëmundje kronike.

  • Gjykimi për krime lufte ndaj Milorad Gjokoviq, dëshmon Rifat Morina

    Gjykimi për krime lufte ndaj Milorad Gjokoviq, dëshmon Rifat Morina

    Përgatiti: Arian Hajdaraj

    Këmbët me zor e mbajnë por, në karrige nuk pranon të ulet pa e përfunduar dëshminë në gjykimin për vëllanë e vrarë, Esatin.

    Në sytë e të akuzuarit për këtë vepër, Millorad Gjokovic, Morina tregoi për ditën kur e pa vëllain e gjallë për herë të fundit.

    “Kemi dalë nga shtëpia me gruan se e kemi pa situatën keq. Duke u largu, gruaja më ka thënë që e vrajtën Esati”, deklaroi Rifat Morina, vëllai i Esat Morinës.

    Meqenëse nga plumbat nuk mundi të kthehet prapa, vdekjen e vëllait e konfirmoi vetëm kur u lirua nga burgu i Serbisë, në nëntor të vitit 1999.

    “Kur jam kthy në shtëpi, më kanë thënë se e kanë vra esatin”, deklaroi më tej Morina.

    I akuzuari, refuzoi të shtrojë pyetje për të akuzuarin.

    “Ju e dini qëndrimin tim. Refuzoj të bëj pyetje në këtë procedurë ku po më shkelen të drejtat e mija”, tha Milorad Gjokoviq, i akuzuar për krime lufte.

    Kështu, me pyetje vazhdoi avokati i të pandehurit.

    “Kur e keni lajmëruar rastin në polici për vëllaun tuaj të vrarë?”, pyeti Dejan Vasiq, avokat i Milorad Gjokoviq.

    “E kena lajmëru menjëherë pas luftës. Policia na ka intervistu disa herë. Por, në atë kohë nuk ia kam ditë emrin. Diksuh i thojke Millorad, dikush Mico”, u përgjigj dëshmitari Morina.

    Milorad Gjokovic u arrestua në qershor të 2022-ës në fshatin Vitomiricë, ku kishte shkuar për vizitë, meqenëse aso kohe punonte në Mal të Zi.

  • Fëmijët e Milloshevës s’dihet se kur do ta gëzojnë çerdhen e përuruar

    Fëmijët e Milloshevës s’dihet se kur do ta gëzojnë çerdhen e përuruar

    Përgatiti: Kastriot Tahiri

    Gati nuk qe por shiritin ia preu.

    “Inventarizimi do të përfundoj në fillim të javës së ardhshme”, kishte deklaruar ministrja e Arsimit, Arbërie Nagavci.

    Kjo ishte përgjigja e ministres, Arbërie Nagavci pak minuta pasi përuroi çerdhen e re në fshatin Milloshevë të Obiliqit, ndonëse ishte në dijeni që punimet s’janë kryer.

    Pavarësisht se kaluan gati një javë gjendja në këtë objekt vazhdon të jetë e njëjtë… shtretër pa dyshekë, e dhoma të zbrazëta.

    Në javën që tha jo veç as në janar nuk dihet nëse inventari do të kompletohet.

    “pjesa e parë e inventarit mund të them që dy tri klasë janë pajis me inventor që nga ajo kohë nuk ka asnjë lëvizje, as te invetari as te kuzhina dhe nuk kemi asnjë informatë se a do të përfundojë në janar”, tha drejtoresha e Arsimit në Obiliq, Fitore Hashani.

    Që nuk po mund ta shfrytëzojnë çerdhen, të revoltuar janë edhe banorët.

    Pas shkollave në Viti e Malishevë, çerdhja e Milloshevës ishte një tjetër projekt i ministrisë së Arsimit që u përurua pa përfunduar punimet.

  • Dështon takimi i përbashkët i Komisionit për të Pagjeturit

    Dështon takimi i përbashkët i Komisionit për të Pagjeturit

    Përgatiti: Krenare Mulliqi

    Për të kuptuar për fatin e më shumë se 1 mijë e 600 personave të zhdukur gjatë luftës së fundit në Kosovë, në Bruksel ishte paraparë të mbahej takimi i parë i Komisionit të Përbashkët për Personat e Pagjetur.

    Por takimi nuk u mbajt sipas Emisarit të Bashkimit Evropian për dialogun Kosovë-Serbi, Miroslav Lajçak, pasi Serbia nuk mori pjesë në të.

    Megjithatë Lajçak konfirmoi se palët i takoi ndaras dhe pala kosovare i paraqiti para tij prioritetet.

    “Jam takuar veçmas me të dyja palët. Kosova prezantoi prioritetet e saj. Serbia ka njoftuar për mospjesëmarrje në një takim të përbashkët për shkak të zhvillimeve në Kosovë”, ka thënë Lajçak.

    Arsyeja e largimit nga bisedimet, sipas kryenegociatorit serb Petar Petkoviq, ishte aksioni i Policisë së Kosovës me ç’rast u mbyllën strukturat paralele në dhjetë komuna.

    Por sipas Kryetarit të Komisionit Qeveritar për të Pagjeturit Andin Hoti, prania e Petkoviqit në takimin në të cilin as nuk ishte i ftuar ishte e qëllimshme për të dështuar bisedimet.

    Ndërkaq nga Fondi për të Drejtën Humanitare vlerësojnë se arsyetimi i palës serbe është vetëm për t’iu shmangur bisedimeve.

    Në takimin e fundit trepalësh në kuadër të dialogut Kosovë-Serbi që u mbajt në dhjetor palët janë dakorduar për zbatim të marrëveshjes për të zhdukurit derisa u miratua edhe formimi i Komisionit të Përbashkët që do të mbikëqyrë zbatimin e Deklaratës për Personat e Zhdukur.

    Sipas marrëveshjes, komisioni, në 6 muaj e parë, duhet të mbajë çdo muaj takime.

  • Akademi përkujtimore për Masakrën e Reçakut

    Akademi përkujtimore për Masakrën e Reçakut

    Përgatiti: Alma Hysenaj

    Udhëheqës të institucioneve e personazhe të shumta u mblodhën në Reçak për akademi përkujtimore pas homazheve në Kompleksin Memorial.

    Me këtë rast, presidentja, Vjosa Osmani tha se tragjedia e Reçakut nuk lidhet vetëm me fshatin dhe banorët e tij, por është dëshmi e vuajtjeve të gjata të popullit.

    “Në kohën kur Reçaku dhe Kosova kërkojnë drejtësi për viktimat e pafajshme të luftës, ajo që shohim në Serbi është vazhdimësi e viteve të 90-ta, mendësi kjo që shkaktoj mbi 100 mijë civil të vrarë në këtë pjesë të Evropës. Kur njerëzit e Reçakut masakroheshin, në Serbi propagandën për arsyetimin e masakrave të tilla e bënte ministri për Informacionin ,me emrin Aleksander Vuçiq”, tha Osmani.

    Derisa sipas kryeministrit, Albin Kurti lufta për çlirim ka mbaruar beteja për drejtësi ende vazhdon.

    “Ajo që duhet të ndodh për pasojë është drejtësi, gjykimi dhe ndëshkimi i krimineleve qoftë edhe në mungesë. Në vitit 1998 dhe 1999 thuhej se përfundoj beteja, por jo edhe lufta. Në raport me Serbin tash duhet të thuhet e kundërta, ka përfunduar lufta, por jo edhe beteja. Ka mbaruar lufta për çlirim, por jo edhe beteja për drejtësi”, tha Kurti.

    I pranishëm në akademi përkujtimore ishte edhe ish-shefi i misionit vëzhgues të OSBE-së në Kosovë, ambasadori Wiliam Walker.

    Njeriu i cili sensibilizoi opinion ndërkombëtar për Masakrën e Reçakut, tha se nuk ka qenë e vështirë për të të deklarojë atë që pa mëngjesin e 15 janarit të vitit 1999.

    “Nuk ka qenë e vështirë të deklarohem për atë që pash në mëngjes, që 45 civilë të pafajshëm u morën nga fshati burra edhe djem të rinj, nën kërcënimet e armëve të armatës së Serbisë dhe u vranë”, tha Walker.

    Në akademi foli edhe kryetari i Shtimes, Qemajl Aliu, duke thënë se për masakrën ende nuk është vendosur drejtësi.

    “Është ditë që ka vulosur fatin e popullit tonë. Fshati i vogël u bë dëshmi e dhimbjes më të thellë dhe sakrificës”, tha Aliu.

    Masakra e Reçakut është njëra prej më të mëdhave që ndodhën në Kosovë gjatë luftës së fundit. Pamjet e saj tronditën botën dhe nga ajo kohë filloi rritja e presionit ndërkombëtar mbi qeverinë e asokohshme serbe që më pas rezultoi me sulme të NATO-s.

  • Ambasada e Francës: Zgjidhja për institucionet paralele është Asociacioni, për keqardhje që vala e mbylljeve po ndodh në fushatë

    Ambasada e Francës: Zgjidhja për institucionet paralele është Asociacioni, për keqardhje që vala e mbylljeve po ndodh në fushatë

    Ambasada e Francës në Prishtinë ka reaguar për veprimet e sotme të Qeverisë së Kosovës për mbylljen e disa institucioneve paralele në nivel vendi. Nga kjo Ambasadë kanë thënë se janë të shqetësuar për mbylljen e një anshme, duke nënvizuar se mbyllja e tyre mund të ketë ndikim ne jetën e përditshme të serbëve të Kosovës dhe komuniteteve të tjera.

    “Jemi të shqetësuar nga mbyllja e njëanshme e një numri të madh të strukturave të ashtuquajtura “Serbia drejton paralele”.Këto struktura funksionojnë pa autorizim formal nga autoritetet kompetente në Republikën e Kosovës, por ato ofrojnë shërbime që kanë rëndësi të madhe për jetën e përditshme të serbëve të Kosovës dhe komuniteteve tjera.Mbyllja e tyre mund të ketë ndikim në jetën e përditshme të qytetarëve”, thuhet në reagim.

    Ambasada ka thënë se Franca është e përkushtuar plotësisht ndaj sovranitetit dhe pavarësisë së Kosovës, megjithatë shtojnë se çështja e institucioneve që drejtohen na Serbia duhet të trajtohet përmes Dialogut dhe se Asociacioni është zjgidhja.

    “Jemi plotësisht të përkushtuar ndaj sovranitetit dhe pavarësisë së Kosovës. Megjithatë, kujtojmë se çështja e këtyre strukturave ‘paralele’ duhet të trajtohet në kuadër të dialogut të lehtësuar nga BE-ja. Zbatimi i ASMM-së, në bazë të draft statusit të përgatitur nga BE-ja, do të mundësojë vazhdimin e ofrimit të shërbimeve të caktuara për qytetarët serbë të Kosovës në respekt të plotë të kornizës kushtetuese të Republikës së Kosovës”, thuhet në reagimin e Ambasadës së Francës.

    Në fund, Ambasada e Francës thotë se është për keqardhje që kjo valë mbylljesh po ndodh gjatë fushatës zgjedhore, duke shtuar se kjo periudhë do të duhej të ishte një mundësi për të paraqitur perspektiva gjithëpërfshirëse për të ardhmen e të gjitha komuniteteve, në përputhje me natyrën multi-etnike siç kishte kërkuar bashkësia ndërkombëtare në vitin kur ishte shpallur pavarësia.

    “Është gjithashtu për të ardhur keq që kjo valë mbylljesh po ndodh gjatë fushatës zgjedhore. Kjo periudhë duhet të jetë një mundësi për të paraqitur perspektiva gjithëpërfshirëse për të ardhmen e të gjitha komuniteteve të Kosovës, në përputhje me natyrën multietnike të Kosovës, siç kërkohet nga bashkësia ndërkombëtare në vitin 2008”, përfundon reagimi.

  • Ambasadori Bajrami i reagon BE-së: S’ka asnjë marrëveshje që përcakton negociatat për të ardhmen e strukturave paralele serbe

    Ambasadori Bajrami i reagon BE-së: S’ka asnjë marrëveshje që përcakton negociatat për të ardhmen e strukturave paralele serbe

    Ambasadori i Kosovës në Bruksel, Agron Bajrami, i është përgjigjur Bashkimit Evropian me tri qartësime sa i përket aksionit të Policisë së Kosovës në mbylljen e strukturave paralele në disa rajone të mërkurën, i cili u bë pa koordinim me Prokurorinë e Shtetit.

    Bajrami ka sqaruar se ato struktura ishin ilegale të drejtuara nga Serbia, se s’ka marrëveshje mbi ato dhe që aksioni nuk nxiti tensione.

    “Për sqarim: Nuk ka struktura të mbështetura nga Serbia në Kosovë; ato ishin struktura ilegale të drejtuara nga Serbia. Nuk ka asnjë marrëveshje që përcakton negociatat për të ardhmen e këtyre strukturave. Sot, operacioni i Policisë së Kosovës nuk shkaktoi tensione”, ka shkruar Bajrami në platformën X.

    Bashkimi Evropian ka kritikuar Kosovën për shkak të mbylljes së strukturave paralele, pasi siç ka thënë, mbyllja e strukturave “të mbështetura nga Serbia” bien ndesh me detyrimet e saj ndaj BE-së. Në reagimin e BE-së u tha se përderisa konkluzionet janë se BE-ja do të heqë gradualisht masat paralel me hapat e Kosovës për depërshkallëzim të tensioneve në veri, “këto veprime nuk janë të favorshme për këtë qëllim”.

    BE-ja ka thënë tutje se statusi i strukturave të mbështetura nga Serbia parashikohet të zgjidhet përmes dialogut.

    Policia e Kosovës të mërkurën ka mbyllur komunat paralele serbe në Lipjan, Obiliq, Prishtinë, Fushë-Kosovë, Vushtrri, Novobërdë, Kamenicë, Viti, Rahovec, Skenderaj si dhe posta e zyra tatimore ilegale.

  • Mbyellja e strukturave paralele, vjen reagimi nga ambasada britanike

    Mbyellja e strukturave paralele, vjen reagimi nga ambasada britanike

    Ambasada e Mbretërisë së Bashkuar në vendin tonë ka reaguar lidhur me aksionin e sotëm për mbyelljen e strukturave paralele serbe.

    ”Mbretëria e Bashkuar është e shqetësuar nga veprimet e sotme në strukturat paralele të Serbisë në mbarë Kosovën. Ne kemi kërkuar nga Qeveria e Kosovës që të sigurojë që këto veprime të kryhen në përputhje me kornizën e saj ligjore, por edhe që ato të marrin parasysh faktin se shumë serbë të zakonshëm të Kosovës, duke përfshirë edhe më të cenuarit, vazhdojnë të mbështeten në këto institucione për shërbime”, thuhet në reagimin e Ambasadës.

    Më tutje thuhet se angazhimi konstruktiv, nga qeveritë e Serbisë dhe Kosovës, përmes Dialogut të lehtësuar nga BE-ja, duke përfshirë zbatimin e plotë të Marrëveshjeve të Brukselit dhe themelimin e ASMM-së, është mënyra më e mirë për të adresuar këto çështje.

    Ndryshe, Policia e Kosovës në bashkëpunim me institucionet kompetente të mërkurën ka realizuar një aksion policor në disa rajone të Kosovës.

    Ministri i Brendshëm, Xhelal Sveçla ka njoftuar se janë mbyllur strukturat paralele “kriminale” të Serbisë në Republikën e Kosovës.

    Sipas ministrit, komunat paralele të Serbisë janë mbyllur në Lipjan, Obiliq, Prishtinë, Fushë-Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyreve tatimore ilegale.

    Ndërkaq, Prokuroria Themelore në Prishtinë ka thënë se nuk ka lëshuar autorizim për bastisjet në objektet e strukturave paralele.

  • BE-ja dhe SHBA-ja e kundërshtojnë mbylljen e institucioneve serbe në Kosovë

    BE-ja dhe SHBA-ja e kundërshtojnë mbylljen e institucioneve serbe në Kosovë

    Bashkimi Evropian dhe Shtetet e Bashkuara e kanë kundërshtuar të mërkurën vendimin e autoriteteve të Kosovës për mbylljen e institucioneve paralele serbe në vend, duke thënë se ato ndikojnë në synimet e Kosovës për t’iu bashkuar komunitetit euroatlantik.

    Disa komuna paralele të Serbisë, ashtu si edhe zyra postare dhe tatimore të saj u mbyllën të mërkurën në dhjetë komuna të Kosovës, në anën jugore të lumit Ibër.

    Në një reagim, Bashkimi Evropian tha se veprimet e Kosovës përmbylljen e strukturave të mbështetura nga Serbia – në një kohë fushate zgjedhore për zgjedhjet parlamentare të 9 shkurtit – janë në kundërshtim me detyrimet e saj në rrugën drejt Bashkimit Evropian në kuadër të procesit të normalizimit.

    *Në videon më poshtë mund ta shikoni aksionin e mbylljes së institucioneve paralele serbe më 15 janar.

    Ambasada amerikane në Prishtinë tha në një deklaratë për Radion Evropa e Lirë se mbyllja e institucioneve të drejtuara nga Serbia “ndikon drejtpërdrejt dhe negativisht te qytetarët e Kosovës – serbët etnikë dhe komunitetet tjera – dhe mund t’i minojë aspiratat e Kosovës për t’iu bashkuar komunitetit euroatlantik”.

    “Këto veprime, në kundërshtim me këshillat tona më të mira, e dobësojnë besimin në marrëdhënie dhe kufizojnë aftësinë tonë për ta ndihmuar Kosovën që të sigurojë një të ardhme më të mirë dhe më të ndritshme për të gjithë qytetarët e saj”, sipas një zëdhënës të Ambasadës amerikane në Kosovë.

    Ndërkohë, BE-ja e përsëriti se çështja e strukturave të mbështetura nga Serbia “parashihet të zgjidhet në dialogun e lehtësuar nga Bashkimi Evropian”.

    Kosova dhe Serbia kishin arritur një marrëveshje për shuarjen e institucioneve paralele më 2013 në dialogun për normalizimin e raporteve në Bruksel, por ende kjo marrëveshje nuk është zbatuar plotësisht.

    BE-ja gjithashtu i paralajmëroi autoritetet kosovare se vendimi i së mërkurës mund të ndikojë në vendimin e saj për të mos i hequr masat ndëshkuese ndaj Kosovës.

    Blloku evropian vendosi masa ndëshkuese ndaj Kosovës më 2023, pas rritjes së tensioneve në veri të vendit. BE-ja pati vlerësuar se Qeveria e Kosovës nuk ka bërë mjaftueshëm për shtensionim.

    “Ndërsa, siç theksohet në konkluzionet e Këshillit për zgjerimin për vitin 2024, BE-ja do t’i heqë gradualisht masat ndaj Kosovës paralelisht me hapat e shtesë të ndërmarrë nga Kosova për t’i ulur tensionet në veri, këto veprime i dëmtojnë këtë qëllim”, tha blloku të mërkurën.

    Derisa Prokuroria në Prishtinë tha se nuk e autorizoi aksionin e së mërkurës, Policia e Kosovës tha se operacioni u krye me kërkesën e Ministrisë së Administrimit të Pushtetit Lokal, dhe se qëllimi i tij ishte ndërprerja e “shërbimeve të jashtëligjshme” të Serbisë në Kosovë.

    Autoritetet në Kosovë thonë se puna e këtyre institucioneve serbe, që ishin në funksion që nga paslufta më 1999, është “e paligjshme”, dhe nisën mbylljen e tyre qysh në fillim të vitit të kaluar.

    Në Serbi, kryeministri Millosh Vuçeviq tha se “zhvillimi i situatës” në Kosovë po ndiqet me kujdes.

    “Do t’i ndërmarrim të gjitha masat për ta mbrojtur popullsinë serbe nga sulmet e reja të Albin Kurtit [kryeministër i Kosovës], i cili, mesa duket, fushatën e tij parazgjedhore e ka shndërruar në vazhdim të keqtrajtimit të popullit tonë”, tha Vuçeviq.

    Mbyllja e institucioneve serbe në 10 komuna të mërkurën – Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec dhe Skënderaj – vjen disa ditë pasi policia mbylli më 8 janar Administratën Tatimore serbe në Mitrovicën e Veriut dhe kompaninë e sigurimeve nga Serbia “Dunav Osiguranj”.

    Kosova nisi mbylljen e institucioneve serbe qysh në janar të vitit 2024, duke ua vënë fillimisht drynin organeve të përkohshme komunale të Dragashit, Suharekës, Prizrenit dhe Rahovecit, të cilat gjendeshin në jug të lumit Ibër.

    Pastaj u mbyllën organet e përkohshme komunale të Pejës, Istogut, Klinës, Skenderajt, si dhe ato në komunat në veri: Mitrovicë e Veriut, Zveçan, Zubin Potok dhe Leposaviq.

    Ndërkohë u mbyllën edhe degët e Postës së Serbisë në veri të Kosovës, kasaforta e Bankës Popullore të Serbisë në Leposaviq, Banka Kursimorja e Postës, Zyra për Kosovën e Qeverisë së Serbisë, Drejtoria e Fondit për Sigurimin Pensional dhe Invalidor, Qarku Administrativ Kosovë-Mitrovicë dhe Qendra për Punë Sociale në Vushtrri.

    Të gjitha këto institucione me mijëra punëtorë funksiononin në sistemin e Serbisë/ REL