Avokati Arbër Jashari, në emisionin CONTEXT në ATV, shprehu dyshime për mundësinë e AAK-së për të marrë Qeverinë, duke vlerësuar si ambicioz planin e tyre zgjedhor.
Jashari tha se standardi politik i ngritur në zgjedhjet e fundit e bën të vështirë për një parti e vogël të udhëheqë qeverinë.
“Mendoj që 14 shkurti i zgjedhjeve të kaluara ka ngritë një standard të madh, dhe nuk besoj që ka më parti që mund ta marrë rolin e kryeministrit me 6 për qind duke qenë parti e vogël”, tha Jashari.
Ai shtoi se, edhe pse AAK ka pasur rol të rëndësishëm në të kaluarën, rrethanat aktuale politike janë të ndryshme.
“Me gjithë respektin që kam për partinë, nuk besoj që është e mundur të marrë kryeministrinë tani, ndonëse kanë qenë partnere të suksesshëm në të kaluarën”, tha Jashari.
Deklaratën e plotë të Arbër Jasharit në CONTEXT e gjeni në videon më poshtë:
Kandidatja për deputete nga AAK-NISMA, Xhevahire Izmaku, në emisionin CONTEXT në ATV, kritikoi diskursin e Qeverisë që përmend vazhdimisht rrezikun e luftës, duke theksuar se kjo ndikon negativisht te qytetarët.
Izmaku tha se qeveria duhet të ofrojë qetësi dhe siguri për qytetarët, duke shmangur retorikën që përhap pasiguri.
“Përveç qytetarëve që ju intereson Kosovën si vend, si shtet, na intereson integrimi sigurisht, anëtarësimi që është fokusi numër një i komplet koalicionit anëtarësimi në NATO, neve na intereson edhe qytetarët thjesht nga politika me dëgju një lloj sigurie dhe qetësie, sepse fatkeqësisht këto dy vite, e kam dëgju gjithmonë nga i pari vendi dhe nga qe nga kjo qeveri se ne jena prapë të rreziku nga lufta”, tha Izmaku.
Ajo tha se prania e NATO-s përmes KFOR-it garanton sigurinë dhe se nuk ka rrezik për një konflikt të armatosur.
“Me këtë program koalicioni ynë edhe ka me dhanë një qetësi në në popullatë, sepse nuk ka rrezik kur NATO është prezent përmes forcave të të natës të KFOR-it, këtu nuk ka rrezik për një luftë, pra na e kemi këtë të sigurt”, deklaroi Izmaku.
Deklaratën e plotë të Xhevahire Izmakut në CONTEXT e gjeni në videon më poshtë:
Kandidati për deputet nga koalicioni AAK-NISMA, Besnik Tahiri, në emisionin CONTEXT në ATV, tregoi se vizita e Ramush Haradinajt në Uashington lidhet me çështjet e sigurisë dhe integrimin e Kosovës në NATO.
Tahiri tha se siguria e përhershme për Kosovën dhe rajonit mbetet prioritet kryesor, ndërsa integrimi në NATO është kyç për paqen e qëndrueshme.
“Integrimi në NATO do të ndihmonte sigurinë e brendshme dhe do të mbyllte një kapitull të luftave potenciale në Ballkanin Perëndimor”, tha Tahiri.
Ai theksoi se Haradinaj do të takohet me zyrtarë të lartë amerikanë për të diskutuar hapat që duhet të ndërmarrë Qeveria e ardhshme në këtë drejtim.
“Haradinaj udhëton pasnesër në Uashington, ku do të ketë takime në State Departamentin në Pentagon dhe institucione tjera për të sqaruar më tutje çka duhet të bëjë Qeveria e ardhshme,” tha Tahiri.
Deklaratën e plotë të Besnik Tahirit në CONTEXT e gjeni në videon më poshtë:
Kandidati për deputet nga koalicioni AAK-NISMA, Besnik Tahiri, në emisionin CONTEXT në ATV, u shpreh se programi i tyre zgjedhor përfshin rritjen e pagave, ku sipas tij, nuk do të ketë pagë më të vogël se 1000 euro në Kosovë.
Tahiri tha se qeveria e ardhshme duhet të sigurojë paga më të larta dhe të ristrukturojë ekonominë për të përmirësuar bilancin tregtar.
“Nuk do të ketë pagë më të vogël se 1000 euro, dhe në të njëjtën kohë do të bëhen intervenime përmes rritjes së deficitit buxhetor, që do të ndihmojnë subvencionimin e fushave të caktuara”, deklaroi Tahiri.
Ai theksoi rëndësinë e një qeverie të vogël dhe taksave më të ulëta, duke promovuar ndërhyrje strategjike shtetërore për të rigjallëruar ekonominë.
“Një qeveri e vogël me taksa më të ulëta dhe me intervenime të duhura mund të rikuperojë humbjen ekonomike që ka ndodhur tash e katër vite”, tha Tahiri.
Deklaratën e plotë të Besnik Tahirit në CONTEXT e gjeni në videon më poshtë:
Qendra “Gjenocidi në Kosovë – Plagë e hapur” dhe Parlamenti i Studentëve të UP-së kanë ndezur sonte qirinj në përkujtim të viktimave të gjenocidit në Kosovë dhe i bënë thirrje Qeverisë të punojë për argumentimin e krimeve të kryera nga Serbia ndaj shqiptarëve të Kosovës dhe që përgjegjësit të dalin para drejtësisë.
Kryetari i Qendrës “Gjenocidi në Kosovë – Plagë e hapur”, Bujar Dugolli ka thënë se paqja mes popujve do të arrihet vetëm kur Serbia të kërkojë falje për krimet e kryera dhe akterët e krimeve të vendosen para drejtësisë.
“Dimri i vitit 1999-të ishte i përgjakshëm për shqiptarët e Kosovës, jo vetëm për masakrën që ndodhi ndaj shqiptarëve në Reçak, por edhe për shumë krime e masakra që ndodhën gjatë luftës së fundit në Kosovë. Mos të harrojmë se gjenocidi ndaj shqiptarëve është bërë edhe dimrat e viteve tjera, që dimrin e vitit 1877, 1878 ku u dëbuan me dhunë dhe u pastruan etnikisht mbi 700 vendbanime shqiptare nga sanxhaku i Nishit, për të vazhduar në dimrin e vitit 1912/13 për të bërë spastrimin etnik dhe dëbimin dhe vrasjen masive të shqiptarëve kur Serbia pushtoj Kosovën në luftën e parë ballkanike… Kulmoi në fund të shekullit XX me atë që nuk e njeh ndonjëherë historia e Kosovës, që mbi 10 mijë civil u vranë, mbi 1 milion shqiptarë u dëbuan dhunshëm nga vatrat e tyre, u dhunuan seksualisht mbi 20 mijë vajza dhe gra shqiptare, vetëm se ishin shqiptarë”, tha ai.
Ai i ka bërë thirrje gjithë shqiptarëve që të mos harrohen këto krime që ka shkaktuar shteti serb. Derisa kërkon nga institucionet përgjegjëse të punojnë më shumë në këtë drejtim.
“Lutemi që këto krime të mos harrohen dhe të punohet në drejtim të argumentimit të këtij gjenocidi që aktorët siç është shteti serb që ka kryer këtë gjenocid ndaj shqiptarëve të Kosovës të përgjigjet kurdoherë. Paqja e vërtetë mes popujve do te ndodhë kur shteti serb kërkon falje për atë që ka bërë, dhe akterët e këtyre krimeve të gjenocidit vendosen para drejtësisë. Pra, nuk ka paqe pa drejtësi”, tha ai.
Në anën tjetër, përfaqësuesi i studentëve në Parlamentin Studentor, Florent Ramusa është shprehur i shqetësuar me neglizhencën e qeverisë për zbardhjen e këtyre rasteve, derisa ka kërkuar nga të njëjtit me shumë punë në këtë drejtim.
“Ne shprehim shqetësimin për neglizhencën e Republikës së Kosovës konkretisht qeverisë. Me miratimin e rezolutës në vitin 2019 nuk ka marrë ndonjë hap konkret për zbardhjen e rasteve…Kërkojmë që këto masa të merren me një trajtim urgjent. Ne nuk harrojmë, dhe do të punojmë derisa këto çështje qoftë nga kjo qeveri apo të ardhshmet të marrin masa urgjente për zbardhjen e këtyre masave”, tha ai.
Ndryshe, Parlamenti Studentor rezoluta, e miratuar qe nga viti 2019, nuk është shoqëruar me hapa konkretë për zbardhjen e këtyre rasteve dhe dënimin e personave përgjegjës.
Parlamenti Studentor falënderon Qendrën Plagë e Hapur më Kosovë për bashkëpunimin e tyre, i cili simbolizon dhe thekson angazhimin për të mos harruar atë që ka ndodhur. /kp
Kandidatja për deputete nga koalicioni AAK-NISMA, Xhevahire Izmaku, në emisionin CONTEXT në ATV, deklaroi se fushata aktuale po reflekton frikën e humbjes së pushtetit nga Qeveria, ndërsa koalicioni i saj ka ofruar një program të qartë dhe konkret.
Izmaku tha se narrativa nga Qeveria është e sforcuar dhe reflekton mungesë mbështetjeje.
“Narrativa e sforcume prej Qeverisë është një shqetësim, domethënë një frikë nga humbja e pushtetit, dhe duket që i kanë informacionet se nuk është ajo mbështetje qysh ka qenë”, tha Izmaku.
Ajo shtoi se koalicioni AAK-NISMA ka qenë i pari që ka ofruar një plan konkret zgjedhor.
“Ne jemi mbështetë në plan programin tonë dhe besoj që të parët nga të gjitha subjektet politike kemi dalë me një projekt-propozim zgjedhor që e kemi vendosë në një libër” deklaroi Izmaku.
Deklaratën e plotë të Xhevahire Izmakut në CONTEXT e gjeni në videon më poshtë:
Saktësisht një vit, e një muaj e gjysmë nga vrasja e Liridona Ademajt, Prokuroria e Prishtinës ngriti aktakuzë lidhur me rastin.
Përgjegjës kryesor për vrasjen e Ademajt, sipas organit të akuzës ishte bashkëshorti i saj, Naim Murseli.
Prokurorja e rastit Javorka Prelenevic, e ka cilësuar mënyrën e kryerjes së veprës penale si likuidim.
Për motivin u la pak të nënkuptohet, pasi Prokuroria u rezervua në dhënien e informacioneve, ndonëse tashmë kanë përfunduar hetimet dhe shqyrtimi gjyqësor do të jetë publik.
“Kemi marrë përgjigjeje nga organet e Suedisë, dhe atëherë jemi mundur të kompletojmë fotografinë dhe të gjëmë motivin qe e ka shty Naimin të likuidojë Liiridonën sepse mënyra e kryerjes se veprës penale ka qenë likuidim. Liridona dhe Naimi sa kanë jetuar në Suedi kanë pasur raporte të çrregulluara”, tha Prelenevic.
Përveç Murselit, për vrasjen e Liridona Ademajt, prokuroria i ngarkon edhe Kushtrim Kokallën, Granit Plavën.
Ndërsa Tom Dodaj, nga i cili e kishte blerë Plava armën, akuzohet për armëmbajtje pa leje.
Ndërkohë kryeprokurori i Prokurorisë së Prishtinës, tha se presin një vendim kapital nga Gjykata.
Dënim meritor për të akuzuarit presin edhe familjarët e viktimës.
Liridona Ademaj, shtetase e Suedisë, e cila la pas dy fëmijë, u vra në fund të nëntorit të vitit të vitit 2023, në rrugën “Dalip Alshiqi” në Prishtinë.
Rasti fillimisht ishte raportuar si grabitje me pasojë të vrasjes, ndërsa vetëm pak orë pasi varrosi bashkëshorten, Naim Murseli ishte arrestuar.
Tashmë një kohë të gjatë kjo shtyllë qëndron kështu.
E nëse rrëzohet, rrezikon fëmijët dhe punëtorët e çerdhes “Armela” në fshatin Lluzhan të Podujevës.
Lidhur me këtë çështje ATV ka kontaktuar edhe me Komunën e Podujevës dhe KEDS-in.
Nga komuna thanë se përgjegjësit e çerdhes kanë kërkuar nga KEDS-i largimin e shtyllës.
“Përgjegjësja e çerdhes në Lluzhan ka dorëzuar kërkesë tek KEDS-i për largimin e shtyllës e cila është duke rrezikuar kalimtarët e rastit, megjithatë ende nuk është larguar ajo shtyllë. Ne do të kontaktojmë përsëri më KEDS-in që sa më parë të largohet ajo shtyllë”, ka thënë zëdhënësi i Komunës së Podujevës, Fatri Zhitia.
Ndërkaq KEDS-i tha se është në dijeni për problemin.
“KEDS tashmë është në dijeni për gjendjen e shtyllës në fshatin në fjalë. Si i tillë, KEDS u jep prioritet rasteve që kanë të bëjnë me sigurinë e qytetarëve për çka do të dërgoj një ekip për të verifikuar gjendjen e kësaj shtylle”, ka thënë zëdhënësi i KEDS-it, Lulzim Krasniqi.
Sipas KEDS-it ekipi do të dal shumë shpejt në terren dhe sipas nevojës do të largojë shtyllën.
Në një aksion të gjerë, Qeveria dhe Policia mbyllën institucionet paralele ilegale të Serbisë për dhjetë komuna në Kosovë: Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec dhe Skenderaj.
Krahas të ashtuquajturave komuna, u mbyllën edhe zyra tatimore dhe posta paralele-ilegale.
Në një video-adresim të përbashkët ministrat Xhelal Sveçla dhe Elbert Krasniqi zyrave të mbyllura iu referuan si “fundi i paralelizmave kriminal të Serbisë”.
Në kuadër të aksionit, njoftimi për “ndërprerje të përkohshme të veprimtarisë” iu vendos derës kryesore të komunës paralele ilegale në Graçanicë.
Vetëm 200 metra më poshtë, në po atë rrugë, njësoj u veprua edhe me zyrat e postës pa licencë.
Me flamurin e Serbisë në dorën e djathtë, dhe disa dokumente në të majtën, nga aty u largua drejtori i kësaj poste paralele-ilegale.
“Policia erdhi për të mbyllur postën, duke thënë se është gjë e përkohshme derisa të aplikojmë për licencë. Por, mua asgjë s’më duket e përkohshme, as qëllim i përkohshëm. Sikurse në veri, ashtu edhe në jug, qëllimi është tjetër, të heqin postën nga bisedimet në Bruksel, sepse atje po diskutohet për këtë. Këtë e di Kurti, por s’ka nevojë para zgjedhjeve të bëj filma. Filma sikurse që bënte represion me Policinë ndaj popullit serb. Kjo fushatë është negative dhe them se do t’i ‘thyhet për koke’”, tha Ivan Milojeviq, drejtor i postës së mbyllur në Graçanicë.
Dryni iu vu zyrës së postës së njëjtë edhe në fshatin Uglarë.
Po aty, u mbyll edhe institucioni paralel për komunën e Fushë Kosovës.
Njoftimi i njëjtë u vendos edhe në derën e zyrës paralele ilegale për Lipjanin.
Për këtë aksion nuk dha leje Prokuroria Themelore e Prishtinës.
“Prokurori i shtetit duke pasur parasysh faktin që me këtë rast nuk janë përfillur procedurat e nevojshme të përcaktuara decidivisht në Kodin e Procedurës Penale të Republikës së Kosovës, nuk ka mundur që në rastin konkret të lëshohet çfarëdo autorizimi”, thuhet në njoftimibn nga Prokuroria Themelore në Prishtinë.
Për, siç shprehimisht shkroi, “ndërprerjen e aktiviteteve të institucioneve të jashtëligjshme”, Policia njoftoi se asistoi me kërkesë të Qeverisë.
“Të gjitha veprimet policore janë realizuar në bashkëpunim dhe koordinim me institucionet kompetente, ku varësisht nga të gjeturat do të ndërmerren masat e mëtejme ligjore, në bashkëpunim dhe koordinim me organet e drejtësisë”, thuhet në njoftimin e Policisë së Kosovës.
Më herët, këtë vit dhe të kaluarin, në aksione të ndryshme u mbyllën një mori institucionesh paralele ilegale të Serbisë në Kosovë.
Asnjëri nga pesë të akuzuarit për krime lufte në rajonin e Gjilanit nuk e ka pranuar fajësinë.
Dragan Cvetkoviq, Dragan Niçiq, Millosh Soshiq, Slobodan Jevtiq dhe Nenad Stojanoviq, u deklaruan të pafajshëm në shqyrtimin fillestar.
Prokuroria Speciale pretendon se ata vepruan si grup kriminal gjatë periudhës së luftës në rajonin e Gjilanit.
I akuzon për vrasjen e tetë civilëve, e plagosje, përfshirë të një vajzë të moshës rreth 2 vjeçare.
Sipas aktakuzës në fshatin Llovcë, i kishin marrë peng dy civilë, e pasi ishin maltretuar, ishin liruar.
Pesë serbët, në mesin e tyre edhe Millosh Soshiq, që kishte punuar në Policinë e Kosovës dhe Nenad Stojanoviq që kishte punuar për një periudhë në FSK, u arrestuan në gusht të vitit të kaluar gjatë një aksioni, ku policia mes tjerash kishte sekuestruar edhe armë.
Avokati i këtij të fundit i ka propozuar Gjykatës ekspertizë psikiatrike, pasi ka pretenduar se ka çrregullime.
