Category: Lajme

Gjykata përkohësisht bllokoi kërkesën e presidentit amerikan, Donald Trump nga vendosja e 2200 punonjësve të Agjencisë Amerikane për Zhvillim Ndërkombëtar (USAID) në pushim me pagesë, disa orë para se kjo të ndodhte.

Gjykatësi Carl Nichols lëshoi një urdhër të përkohshëm “të kufizuar”, si përgjigje ndaj një padie të paraqitur në minutën e fundit nga dy sindikata që përpiqeshin të shpëtonin agjencinë.

Urdhri do të mbetet në fuqi për shtatë ditë, saktësisht deri më 14 shkurt në mesnatë, shkruan cnn.

Trump ka pohuar se USAID-i është vetëm barrë për taksapaguesit dhe dëshiron ta shuajë atë. Ai planifikon të vërë në “pritje” rreth 10 mijë punonjës të agjencisë, duke lënë aktivë vetëm 611 prej tyre.

Rreth 500 punonjës tashmë janë dërguar në pushim administrativ dhe 2200 të tjerë pritej t’u bashkoheshin atyre që nga mesnata e së premtes.

Megjithatë, në padinë e ngritur të premten, u argumentua se qeveria po shkelte Kushtetutën e SHBA dhe se punonjësit po pësonin dëme.

Gjykatësi Nichols mbështeti sindikatat, duke thënë se ato do të pësonin “dëm të pariparueshëm” nëse gjykata nuk ndërhynte, ndërsa “nuk do të kishte ndonjë dëm për qeverinë”.

“Të gjithë punonjësit e USAID-it që aktualisht janë në pushim administrativ do të rikthehen në punë deri në atë datë dhe do të kenë qasje të plotë në email, pagë dhe sistemet e sigurisë deri në atë datë, dhe asnjë punonjës shtesë nuk do të vendoset në pushim administrativ para asaj date”, deklaroi gjykatësi.

Gjykata do të shqyrtojë të mërkurën një kërkesë për zgjatjen e ndalimit të përkohshëm. Nga vendimi gjyqësor mbetet e paqartë se çfarë do të ndodhë me pjesën tjetër të vendeve të punës dhe punonjësve.

Ndërkohë, teksa gjykata po merrte këtë vendim, në selinë e USAID në Washington po hiqeshin dhe mbuloheshin tabelat me emrin e agjencisë.

Zëdhënësi i Komisionit Qendror të Zgjedhjeve (KQZ), Valmir Elezi, ka njoftuar se në orën 7:00, të mëngjesit ka filluar procesi i votimit në përfaqësitë diplomatike.

Elezi bëri të ditur se janë hapur qendrat e votimit në shtetet evropiane, ndërkaq votimi në përfaqësitë diplomatike në ShBA dhje Kanada do të fillojë në orën 13:00.

“Në orën 13:00 sipas kohës lokale të Kosovës planifikohen të hapet edhe procesi i votimit në ambasadën e Kosovës në Shtetet e Bashkuara të Amerikës në Uashington deri në konsullatën e Nju Jorkut, gjithashtu edhe në ambasadën e Kosovës në Kanada, respektivisht në Otavë, si dhe në konsullatën e Torontës”, tha Elezi.

Ai tha se numri i përgjithshëm i shtetasve të Kosovës të regjistruar për të votuar është mbi 20 mijë.

“Numri i përgjithshëm i shtetasve të Kosovës të regjistruar për të votuar në këto 30 përfaqësi diplomatike të Republikës së Kosovës është 20 mijë e 324.

Sqarojmë se vetëm votuesit e regjistruar në përfaqësi diplomatike do të mund të votojnë gjatë ditës së sotme, pasi në listën e votuesve e cila është dërguar në përfaqësitë diplomatike janë vetëm emrat e shtetasve që kanë përzgjedhur këtë mënyrë votimi.

Pra, në kohën kur janë regjistruar si votues jashtë Kosovës gjatë periudhës së regjistrimit nga 29 gushti deri më 26 dhjetor 2024. Procesi i votimit do të zhvillohet në 43 vendvotime që u përkasin 16 ambasada dhe 14 konsullatave të Republikës së Kosovës, të cilat janë të vendosura në 19 shtete të ndryshme”, shtoi ai.

Moti gjatë ditës së shtunë pritet të jetë me diell dhe pjesërisht i vranët.

Sipas të dhënave të Institutit Hidrometeorologjik të Kosovës, temperaturat do të lëvizin nga -5 deri në 8 gradë Celsius, transmeton Klankosova.tv.

“Të shtunën, moti parashikohet me diell dhe pjesërisht i vranët. Temperaturat minimale do të variojnë nga -5°C deri në -3°C, ndërsa maksimalet do të arrijnë nga 5°C deri në 8°C. Era do të fryjë nga verilindjes me intensitet të lehtë deri mesatar”, njofton IHMK-ja.

Në Kosovë është vërejtur një rritje e ndjeshme e rasteve të trafikimit dhe përdorimit të drogës, veçanërisht të kokainës, duke sjellë shqetësime serioze mes ekspertëve të fushës, raporton Ekonomia Online.

Drejtori i Qendrës për Këshillim dhe Trajtim të Varësisë “Labyrinth”, Safet Blakaj, në një intervistë për Ekonomia Online ka thënë se përdorimi i kokainës është në rritje të shpejtë gjatë dy viteve të fundit, duke shënuar edhe një ulje të konsiderueshme të moshës së përdoruesve.

“Natyrisht është për tu shqetësuar 17 për qind rritja e rasteve të trafikimit të drogës. Natyrisht ajo mund të jetë edhe për shkak të shtimit të aktiviteteve të Policisë, e ka gjera të tjera të cilët ndërlidhen. Por si do që të jetë kjo shifër sipas meje përputhet përafërsisht edhe me të dhënat tona për arsye se rritje e shpejt e përdorimit të kokainës po ndodh këto dy vitet e fundit posaçërisht. Edhe mosha e fillimit të përdorimit të kokainës ka rënë dukshëm, pra këto janë dy gjëra që na bëjnë që të ndihemi të shqetësuar se çka po ndodh në lidhje me përdorimin e drogës në Kosovë”, ka thënë ai për Ekonomia Online.

Ai tha se të dhënat tregojnë se mosha mesatare e personave që fillojnë të përdorin drogë tashmë është 16 vjeç.

Sipas Blakajt, një tjetër aspekt shqetësues është lloji i kokainës që po përdoret, e cila është duke shkaktuar varshmëri të shpejt edhe çrregullime psikologjike e psiqike.

“Të dhënat tona tregojnë që është 16.2, ka rënë 16 vjeç kur ka filluar për herë të parë drogën. Mendoj që nuk ka ku të bie më poshtë, për të gjitha drogat vlen kjo. Por, sa i përket kokainës, katër-pesë vite më parë ka qenë mosha e atyre që kanë ardhur që të kërkojnë ndihmë lidhur me përdorimin e kokainës ka qenë 35-45 vjet, ndërsa nëse e krahasojmë me vitin e kaluar janë 25-35 me një tendencë për të rënë më poshtë, kjo po na shqetëson shumë. Natyrisht edhe mënyra e përdorimit të kokainës, është një lloj i crack cocaine, që nxirret nga kokaina e cila shkakton varshmëri të shpejt edhe kjo po na bënë shumë të ndihemi të shqetësuar për arsye që përveç efekteve të tjera negative të kokainës e ku e rrit edhe agresivitetin edhe shpeshtësinë e përdorimit edhe vashmërin edhe shkakton edhe probleme të tjera anësore të cilat janë edhe çrregullimet psikologjike e psikike”, ka thënë ai.

Në Kosovë, përdorimi i kanabisit dhe marihuanës vazhdon të mbetet i përhapur, por shqetësimi kryesor është rritja e përdoruesve të kokainës. Sipas Blakajt, numri i përdoruesve të kokainës është rritur me shpejtësi dhe gjithnjë e më shumë të rinj po e përdorin atë në baza të përditshme.

Në bazë të të dhënave të qendrës “Labyrinth”, numri i atyre që kanë kërkuar ndihmë për varësinë nga droga është 20 për qind më e lartë se vitet e kaluara.

“Numri është rritur, flasim posaçërisht për drogat e kanabisit, mariuana natyrisht që ka shtrirje të gjerë në Kosovë, ndërsa kokaina me shpejtësi është rritur numri i përdoruesve të drogave, tejet me shpejtësi dhe kjo na ka bërë që të shqetësohemi edhe që po bie mosha me shpejtësi. Kalimi në përdorim e përditshëm të kokainës po ndodh tek të rinjtë. Sa i përket numrave ne i kemi databazën tonë, aty regjistrohen të gjithë ata që kërkojnë një shërbim mjekësor, ndërsa për shërbime të tjera nuk jemi të obliguar por edhe hezitojnë që të japin të dhënat. Sidoqoftë flitet që ata që kanë kërkuar e kalon pak 100 për vitin e kaluar, diku 20 për qind më shumë se vitet e mëparshëm, kjo është shqetësuese”, ka thënë ai për Ekonomia Online.

Një faktor kryesor që po ndikon në rritjen e numrit të përdoruesve është qasja e lehtë në drogë. Blakaj ka deklaruar se, pavarësisht përpjekjeve të Policisë për të luftuar trafikimin, ka ende pengesa që e bëjnë të lehtë sigurimin e drogës në Kosovë.

“Njëri prej faktorë që përdorin drogë është edhe qasja e lehët tek drogat. Ka qasej të lehtë tek drogat në Kosovë. Pavarësisht që Policia përpiqet që të kryej punë e vetë, por ne e dimë disa pengesa e gjëra që ndodhin. E dimë që ka shumë dilera të vegjël që bartin kapak sasi, e për çdo dy tre jave furnizohen”, ka thënë ai.

Sipas raportit të Policisë së Kosovës për vitin 2024, ka një rritje prej 17.7 për qind të veprave penale të lidhura me narkotikët, duke reflektuar trendin shqetësues të rritjes së përdorimit të drogës, sidomos mes të rinjve.

Ambasada e Kosovës në Slloveni ka bërë të ditur se atje procesi i votimit ka filluar me kohë në orën 07:00.

Në njoftimin e lëshuar në Facebook janë ftuar të gjithë kosovarët që jetojnë dhe veprojnë atje të dalin të votojnë.

“Saktë në ora 07:00, në Ambasadën e Republikës së Kosovës në Lubjanë të Sllovenisë është hapur procesi i votimit!”

“Ftojmë të gjithë votuesit që paraprakisht suksesshëm janë regjistruar të votojnë në ambasadë, të shfrytëzojnë të drejtën e tyre deri në ora 19:00!”, thuhet në njoftim.

Profesori universitar, Fatmir Çollaku, në një intervistë për EO, ka vlerësuar se Kosova është një shembull i organizimit të zgjedhjeve të lira dhe demokratike, duke u krahasuar me vendet me demokraci të konsoliduar, raporton Ekonomia Online.

Sipas Çollakut, institucionet e rendit dhe të sigurisë, veçanërisht Policia e Kosovës, kanë treguar një nivel të lartë profesionalizmi në mbikëqyrjen e proceseve zgjedhore, duke parandaluar incidentet dhe shkeljet serioze.

“Policia e Kosovës edhe në zgjedhjet e kaluara në 10 vitet e fundit, të gjithë e dimë që Kosova është shembull për organizmi të zgjedhjeve në kuptimin më të mirë të fjalës dhe krahasohet me shtetet me të konsoliduar dhe me demokraci të fuqishme në kuptimin e organizimit të zgjedhjeve, realizmit të zgjedhjeve dhe mungesës së incidenteve dhe shkeljeve të rënda. Në Kosovë nuk ka pasur as në zgjedhjet e kaluara as parakaluara, as të ato më herët shkelje siç ndodh në shtet e tjera. Kosova në këtë segment është shembull i organizimit të mirë të zgjedhjeve dhe monitorimit të mirë, përkatësisht kujdesit të madh të organeve të rendit dhe institucioneve të tjera që kanë mandat sigurinë që të parandalohet çdo gjë që kish me rrezikuar interesin e shteti dhe sigurinë nacionale”, ka thënë ai.

Megjithatë, Çollaku theksoi se Serbia mbetet rreziku kryesor për stabilitetin në Kosovë, duke e akuzuar atë për përpjekje të vazhdueshme destabilizuese.

“Ne e dim historikisht shteti i vetëm që gjeneron pasiguri dhe vazhdimi ka pretendime edhe territoriale dhe pretendime destabilizuese për Kosovën është Serbia. Kurse prapa Serbisë rrinë Rusia e cila natyrisht ka interes me të gjerë të shtrirjes së interesit të vetë në këtë pjesë të Ballkanit. Por ne Kosova e kemi vetëm Serbinë problemin kryesor, shtete tjera në fqinjësinë tonë nuk janë të kalibrit të tillë për të destabilizuar apo rrezikuar integritetin tonë territorial, vetëm Serbia është rrezikuesi kryesor”, ka thënë ai.

Lidhur me mundësinë e cenimit të procesit zgjedhor, ai tha se sfidat mund të ekzistojnë, por institucionet e sigurisë janë të përgatitura për t’i parandaluar çdo tentativë për destabilizim.

“Jo nuk mendoj që rrezikohet, mund të sfidohet sistemi i sigurisë dhe procesi zgjedhor mund të sfidohet, por të rrezikohet jo. Sfidimi nënkupton përpjekje për të destabilizuar, përpjekje për ta penguar realizmin e zgjedhjeve, përpjekje për të paraqitur gjendjen kishe trishtuese dhe të pa sigurt për serbet atje. Por realisht kjo është e pa mundur sepse edhe një herë po e përsëri që institucionet që kanë mandat, si ato për mbarëvajtje e zgjedhjeve si ato për sigurinë, edhe organet tjera janë në nivel të lartë të detyrës dhe kanë një vigjilencë të shtuar sidomos për procesin zgjedhor”, ka thënë ai.

Eksperti i çështjeve të sigurisë shtoi se strategjia e Serbisë për të paraqitur Kosovën si një vend të paqëndrueshëm përmes incidenteve të inskenuara nuk do të ketë sukses.

“Destabilizimi nënkupton edhe frikësim që të mos dalin në zgjedhje ata ose të shkaktojnë skandale, incidente që paraqitet Kosova si jo stabile, si vend që nuk ofron sigurinë qytetarëve atje. Kjo është tendencë e Serbisë përmes mekanizmave të ndryshme, skenarëve të ndryshëm. Realisht as kjo nuk do të realizohet apo finalizohet në plotëni sepse me po e përsëris me argumente të fuqishme që rendi dhe qetësia publike, siguria nacionale, procesi zgjedhor janë duke monitoruar, janë duke u realizuar dhe zbatuar sipas legjislacionit, sipas planeve operative puna e policisë dhe sipas objektivave të synuara të KQZ për të realizuar këto zgjedhje në mënyrën më të lartë demokratike”, ka thënë ai.

Presidentja e Kosovës, Vjosa Osmani, gjatë vizitës së paparalajmëruar që po zhvillon në Washington, është takuar me Kryetarin e Komisionit për Punë të Jashtme në Dhomën e Përfaqësuesve të Shteteve të Bashkuara të Amerikës, Brian Mast.

Përmes një postimi në profilin e saj në Facebook, ajo ka bërë të ditur se gjatë takimit kanë diskutuar për lidhjen historike të Kosovës me Shtetet e Bashkuara, duke e konsideruar si një aleancë e ndërtuar mbi vlera të përbashkëta dhe përkushtim për paqe e siguri.

“Me administratën e Presidentit Trump, synojmë thellimin e bashkëpunimit në fusha të ndryshme, përfshirë mbrojtjen, investimet strategjike dhe vazhdimin e punës së përbashkët për forcimin e pozitës ndërkombëtare të Kosovës”, ka shkruar Osmani.

Tutje, ajo ka potencuar se mbështetja amerikane ka qenë dhe mbetet jetike për Kosovën.