Category: Lajme

Në kuadër të aktiviteteve shtetërore në shënim të 27-vjetorit të Epopesë së UÇK-së, krerët e shtetit, sot në ditën e dytë të këtij manifestimi, do të bëjnë homazhe në Kompleksin memorial “Adem Jashari”, në Prekaz.

Homazhe janë paraparë edhe nga të gjitha komunat e vendit dhe në të gjitha komplekset memorialë të dëshmorëve.

Nga ora 10:00, drejtues të institucioneve qendrore dhe lokale do të bëjnë homazhe në Kompleksin Memorial “Adem Jashari”, në Prekaz.

Kurse nga ora 17:00, në Prishtinë, është paraparë akademi përkujtimore për Epopenë e UÇK-së.

Të mërkurën Prekazi u vizitua nga shumë qytetarë të ardhur nga të gjitha viset shqiptare. Kurse, në Qeverinë e Kosovës është mbajtur mbledhje solemne për Epopenë e UÇK-së.

Gjithashtu një manifestim është mbajtur në kazermën ‘Adem Jashari’ në Prishtinë. Në të gjitha aktivitetet u vlerësua lartë sakrifica e familjes Jashari për lirinë e Kosovës.

Bashkimi Evropian ka shprehur shqetësim lidhur me zhvillimet në Serbi, si për pengimin e punës së Parlamentit, ashtu edhe për ndërhyrjet në punën e organizatave të shoqërisë civile.

“Jemi shumë të shqetësuar për pengimin e punës parlamentar dhe dhunës në Parlament. Parlamenti duhet të jetë vend për debat demokratik në interes të qytetarëve dhe ai duhet ta ushtrojë rolin e vet të plotë”, tha një zëdhënës i BE-së përmes një njoftimi për media.

“Zhvillimet e fundit në Serbi, të drejtuara ndaj organizatave të shoqërisë civile janë po ashtu shqetësuese. Shoqëria civile luan një rol vital në zhvillimet e demokracisë dhe shoqërisë pluraliste”, shtohet në njoftim.

Më 4 mars, seanca plenare në Serbi u përshkua me incidente, pasi deputetët e opozitës lëshuan dy herë bomba tymi dhe mjete piroteknike, teksa partitë e koalicionit qeverisës miratuan rendin e ditës, të cilin opozita e kundërshtoi.

Deputetët opozitarë iu afruan tavolinës së kryetares, aktivizuan bomba me tym të kuq dhe të zi dhe shpalosën një pankartë ku shkruhej “Serbia po ngrihet për të rrëzuar regjimin”.

Gjatë incidentit janë lënduar tre deputetë që ishin në sallë, përfshirë një deputete që është raportuar se ka pësuar “goditje në tru” dhe është “në rrezik për jetë”.

Bashkimi Evropian tha se i fton të gjitha palët që përmes dialogut t’i adresojnë shqetësimet që kanë.

“Ne vazhdimisht kemi bërë thirrje për uljen e tensioneve, duke krijuar kushte për një dialog gjithëpërfshirës nga të gjithë pjesëmarrësit, përfshirë aktorët politikë, institucionet dhe përfaqësuesit e shoqërisë civile për të adresuar reformat e domosdoshme për të ardhmen e Serbisë në BE”, u tha në reagimin e BE-së lidhur me zhvillimet e fundit në Serbi.

Gjatë seancës plenare më 4 mars, partitë në pushtet në Serbi refuzuan kërkesën e opozitës që të diskutohej vetëm për ndryshimet në Ligjin për arsimin e lartë. Kjo është kërkesë e studentëve që po protestojnë në Serbi që nga shembja vdekjeprurëse e një strehe në Stacionin Hekurudhor të Novi Sadit, më 1 nëntor të vitit të kaluar.

Qeveria serbe pretendon se ka plotësuar kërkesat e studentëve protestues. Por, studentët thonë se bllokadat dhe protestat e tyre do të vazhdojnë dhe se grupet e ekspertëve do të përcaktojnë nëse kërkesat janë plotësuar ose jo.

Pas ngjarjeve në Parlamentin serb, Prokuroria Themelore në Beograd tha se i ka kërkuar policisë që të mbledhë informatat e nevojshme për këtë ngjarje.

Drejtori i CIA-s, John Ratcliffe, tha të mërkurën se SHBA-ja ka pezulluar mbështetjen me informacione dhe dërgesat e armëve për Ukrainën pas përplasjes në Zyrën Ovale midis Presidentit Volodymyr Zelensky dhe Presidentit amerikan Donald Trump të premten e kaluar, shkruan A2 CNN.

“Trump kishte të drejtë kur pyeti, nëse Presidenti Zelensky ishte i përkushtuar ndaj procesit të paqes, dhe ai tha le të bëjmë një pauzë”, tha Ratcliffe në një intervistë për Maria Bartiromo në Fox Business të mërkurën.

Ratcliffe shprehu shpresën se pezullimi do të hiqet së shpejti dhe theksoi angazhimin e tij për të punuar me Ukrainën drejt arritjes së paqes, pas një letre që presidenti ukrainas i dërgoi Trump-it.

“Dhe mendoj se do të punojmë krah për krah me Ukrainën, siç kemi bërë, për të zmbrapsur agresionin që është atje, për ta vendosur botën në një pozitë më të mirë në mënyrë që këto negociata paqeje të ecin përpara”, shtoi drejtori i CIA-s.

Një zyrtar i lartë ushtarak amerikan tha se SHBA-ja tashmë ka kufizuar ndarjen e disa informacioneve të inteligjencës, duke përfshirë kryerjen e më pak fluturimeve të mbikëqyrjes dhe zbulimit, çka mund të ndikojë si në operacionet sulmuese ashtu edhe në ato mbrojtëse, përfshirë mbrojtjen ajrore, pasi Ukraina varet nga inteligjenca amerikane për mbikëqyrje. (A2 Televizion)

Këshilli Federal ka njoftuar se Qeveria zvicerane ka miratuar 16 sanksione e reja të BE-së drejt Moskës.

“48 individë të tjerë dhe 35 subjekte janë sanksionuar me ngrirje të aseteve dhe ndalim të ofrimit të fondeve dhe burimeve ekonomike”, thuhet në njoftim.

Këtyre personave iu është ndaluar edhe hyrja apo vetëm kalimi nëpër Zvicër.

“Individëve u ndalohet gjithashtu hyrja apo kalimi tranzit në Zvicër.

Paketa më aktuale e sanksioneve parashikon gjithashtu një sërë masash të mëtejshme kundër Rusisë, përfshirë në fushën e mallrave, financave dhe shërbimeve”.

Përparim Rama, kryetari i Prishtinës, përmes një postimi ka bërë të ditur se komuna ka caktuar lokacionin për vendosjen e monumentit të Adem Jasharit në kryeqytet.

Ai ka njoftuar edhe se për këtë komuna ka pëlqimin edhe të vetë familjes Jashari.

Postimi:

Kryeqyteti, ka caktuar tashmë lokacionin për monumentin e Heroit Legjendar “Adem Jasharit”

Nderim i përjetshëm për sakrificën që vulosi lirinë tonë

Sot, në seancën solemne të Kuvendit të Kryeqytetit, përkujtuam dhe nderuam sakrificën e pavdekshme të familjes Jashari – një akt trimërie që shënoi pikë kthese në rrugëtimin tonë drejt lirisë dhe pavarësisë.

Mirënjohja e dorëzuar familjes Jashari nuk është thjesht një simbol, por një zotim i Kryeqytetit se sakrifica e tyre do të mbetet përherë në themelin e shtetit tonë, në ndërgjegjen kombëtare dhe, mbi të gjitha, në zemrat tona.

Me përkushtim të plotë për të ruajtur dhe nderuar këtë trashëgimi, Kryeqyteti, ka caktuar tashmë lokacionin për monumentin e Heroit Legjendar “Adem Jasharit”, lokacion për të cilin kemi pëlqimin edhe të vetë familjes Jashari.

Ky monument do të qëndrojë si dëshmi e përjetshme e lavdisë dhe heroizmit të tij.

Çmimi letrar “Adem Demaçi” iu nda të mërkurën, nga Lidhja e Shkrimtarëve të Kosovës “Ora e Lirisë”, shkrimtarit Hysen Këqiu, për krijimtarinë e tij letrare që për temë ka luftën e lavdishme të Ushtrisë Çlirimtare të Kosovës.

Ky manifestim tashmë është tradicional dhe është viti i tretë me radhë që organizohet.

Në mesin e rreth 60 autorëve që konkurruan për këtë çmim, sipas vlerësimit të jurisë, Hysen Këqiu meritoi të marrë këtë çmim për poezinë që lexoi dhe për krijimtarinë e përgjithshme të tij.
“Juria në përbërje me Adem Zejnullahu, Xheladin Mjeku dhe unë, i ka propozuar kryesisë që çmimi letrar Adem Demaçi, për poezinë që e lexoi dhe krijimtarinë të përgjithshme, t’i jepet poetit dhe shkrimtarit, Hysen Këqiu”, tha kryetari i Lidhjes së Shkrimtarëve të Kosovës, Shyqri Galica, shkruan KosovaPress.

Më 5, 6 dhe 7 mars, me aktivitete të ndryshme, shënohet Epopeja e UÇK-së në të cilën kujtohet heroizmi i familjes Jashari në Prekaz.

Gjykata Themelore në Prishtinë ka vendosur ta shtyjë seancën fillestare për të akuzuarit për spiunazh, Bedri Shabani e Muharrem Qerimi.

Ky vendim u mor pasi avokatët e të akuzuarve kërkuan që kjo seancë të shtyhet.Seanca e shqyrtimit fillestar do të mbahet më 17 mars.

Avokati i Shabanit, Besnik Berisha, tha se klientit të tij i duhet më shumë kohë për t’u njohur me aktakuzën, në mënyrë të ai të vihet në dijeni në detaje mbi fajësinë apo pafajësinë e tij.

Kryetari i Kuvendit të Republikës së Kosovës, Glauk Konjufca, mori pjesë në ceremoninë e rreshtimit të kuadrateve të Forcës së Sigurisë së Kosovës, që u mbajt në Kazermën “Adem Jashari” në Prishtinë në kuadër të aktiviteteve shtetërore të organizuara për ndër të 27-vjetorit të Epopesë së Ushtrisë Çlirimtare të Kosovës.

Në kuadër të këtij manifestimi kryetari Konjufca, së bashku me presidenten Vjosa Osmani, kryeministrin Albin Kurti dhe përfaqësuesin e Familjes Jashari, Rifat Jashari, bëri homazhe dhe vendosi lule pranë Obeliskut të UÇK-së në ambientet e Kazermës “Adem Jashari”.