Category: Lajme

Pranvera Hyseni, astronomja shqiptare nga Kosova, po përfaqëson vendin në njërën nga konferencat më të mëdha të shkencës planetare në Houston, Teksas, ku mbi 2 mijë shkencëtarë dhe studentë nga e gjithë bota ndajnë kërkimet e tyre më të fundit.

Pas muajsh analizash të familjeve të asteroideve nga të dhënat e mbledhura përmes teleskopit të NASA-s Infrared Telescope Facility, ajo do të prezantojë studimin e saj të enjten në mëngjes me temën:
“Investigating The Distribution of Soluble Organic Matter Among Hydrated Asteroid Families”.

Përveç prezantimit të hulumtimit të saj, Hyseni do të ketë një vizitë private në NASA’s Johnson Space Center, duke përjetuar nga afër vendin ku zhvillohen misionet e fluturimeve njerëzore në hapësirë.

Si e vetmja përfaqësuese nga Kosova, ajo e konsideron këtë një moment të rëndësishëm për vendin, duke e vendosur Kosovën në hartën e shkencës planetare.

Në këtë lokacion kanë kaluar natën studentët dhe qytetarët që mbrëmë rreth orës 23 kanë bllokuar objektin e Radio Televizionit të Serbisë në rrugën Takovska. Siç kanë paralajmëruar ata do të bllokojnë hyrjen në televizionin publik për në orën 22:00, për të “çliruar RTS”.

Studentët në një postim në Instagram deklaruan se daljet do të lejohen për të gjithë punonjësit, por askush nuk do të hyjë derisa “RTS të çlirohet”.

Përpara hyrjes kryesore, rojet e sigurisë kanë formuar një mur njerëzor dhe nuk po i lejojnë punonjësit të hyjnë në godinë, por kushdo që do mund të largohet, raporton Danas.

Mirëpo, Radio Televizioni i Serbisë sot në mëngjes e transmeton programin e mëngjesit nga studiot në Takovska 10, edhe pse ishte paralajmëruar se programi do të transmetohet nga Košutnjaku.

Një grup punonjësish arritën të hynin në ndërtesën e RTS-së dhe siç tha për N1 Aleksa, student në Fakultetin Matematikor nga Novi Sadi, punonjësit hynë nga një depo aty pranë nëpër hapësirat e bodrumit.

“Studentët janë të dislokuar në tri pika – e para është para hyrjes kryesore në Takovska 10, e dyta në Aberdareva, ku janë vendosur edhe gardhe metalike, dhe e treta në fund të Aberdarevës, menjëherë pas kryqëzimit me rrugën Ilija Garašanina, ku janë vendosur edhe gardhe metalike, në mënyrë që punonjësit e raportuesit të mos i afrohen ndërtesës, tha gazetarja e N1, përcjell KosovaPress.

Me studentët janë edhe një numër i caktuar qytetarësh. Disa erdhën përpara punës për të ofruar mbështetje. Nuk ka policë të uniformuar, gjë që nuk do të thotë se nuk ka oficerë të zbatimit të ligjit me rroba civile.

Studentja Gjurxha Seniq, e cila tërë natën e ka kaluar para RTS-së, thotë se nuk janë të lodhur, se po “pompojnë fort” dhe se as shiu nuk mund t’ua prishë dsponimin.

Përballë RTS është edhe Dijana Hrka, nëna e Stefanit (27), një prej viktimave të shembjes së tendës në stacionin hekurudhor të Novi Sadit.

“Ata janë të gjithë fëmijët e mi. Më mbajnë gjallë, bashkë me djalin tim të vogël. Kam ardhur për të mbështetur, për të luftuar për atë drejtësi. Mbrëmë ishte shumë e shëmtuar që policia sulmoi këta fëmijë. Nuk duhej të ishte kështu. E pashë videon dhe mendoj se duhet të heqin dorë nga ajo. Nuk shkohet ndaj fëmijëve me mburoja. Fëmijët nuk bënë asgjë të keqe. Nuk mund të flija. Kam ardhur herët në mëngjes këtu dhe do të qëndroj me ta sa të jetë e nevojshme”, tha Dijana Hrka për N1.

Sot mbushen 44 vjet nga demonstrata e studentëve të Kosovës më 11 mars e vitit 1981. Kjo demonstratë është vlerësuar njëra ndër to që tronditi ish-Jugosllavinë.

44 vjet më parë, në mars të vitit 1981, në Prishtinë shpërthyen demonstratat e studentëve me kërkesa sociale.

Demonstratat që ndodhën në Kosovë, 44 vjet më parë, më 11 mars, nisën si shprehje e pakënaqësisë së studentëve shqiptarë të Universitetit të Prishtinës, të cilët me 4 mars të vitit 1981, në Mensën e Studentëve brenda Qendrës së Studentëve në Prishtinë, protestuan spontanisht ndaj kushteve jo të mira, sipas tyre, në të cilat jetonin dhe studionin në atë kohë.

Por, më pas, më 11 dhe 27 mars, si dhe më 1 dhe 2 prill të vitit 1981, kërkesat fillimisht me përmbajtje sociale, evoluuan në kërkesa që shpërfaqnin pakënaqësitë politike, shoqërore dhe kombëtare.

Një person ka pranuar tretman mjekësor pasi që i njëjti pas një mosmarrëveshje është sulmuar me thikë nga një person tjetër.

Sipas raportit 24 orësh të Policisë së Kosovës bëhet e ditur se ngjarja ka ndodhur të hënën rreth orës 12:45 në rrugën “Zahir Pajaziti”, në Podujevë.

Tutje thuhet se si provë materiale është gjetur dhe konfiskuar një brisk.

“Viktima mashkull kosovar ka pranuar tretman mjekësor pasi që i njëjti pas një mosmarrëveshje është sulmuar me thikë nga i dyshuari mashkull kosovar. Si provë materiale është gjetur dhe konfiskuar një brisk”, thuhet në raport.

Ndërkaq siç thuhet në raport i dyshuari është arrestuar dhe me vendim të prokurorit  është dërguar në mbajtje.

Tregjet e aksioneve në SHBA ranë ndjeshëm të hënën për shkak të shqetësimeve mbi ndikimin negativ ekonomik të tarifave të Presidentit Donald Trump. Në Azi, humbjet fillestare të së martës u zbutën deri në pasdite.

Kjo erdhi pasi Trump deklaroi në një intervistë televizive se ekonomia amerikane ishte në një “periudhë tranzicioni”, duke pranuar shqetësimet për një recesion të mundshëm. Që nga ajo deklaratë, zyrtarët dhe këshilltarët e tij janë përpjekur të qetësojnë investitorët.

Tregjet aziatike pësuan luhatje të martën, raporton BBC, me Nikkei 225 që u mbyll me 0.6% rënie dhe Kospi të Koresë së Jugut me 1.3% rënie. Të hënën, në SHBA, S&P 500 ra me 2.7%, Dow Jones me 2% dhe Nasdaq me 4%.

Aksionet e Teslës ranë 15.4%, ndërsa Nvidia dhe kompani të tjera të mëdha teknologjike si Meta, Amazon dhe Alphabet pësuan rënie të ndjeshme. Analistët thonë se paqartësia rreth tarifave të Trump po ndikon negativisht te tregjet, përcjell KosovaPress.

Një zyrtar i Shtëpisë së Bardhë tha se tregjet po reagojnë ndryshe nga bizneset, të cilat sipas tij po mbështesin agjendën e Trump me miliarda investime.

Investitorët shqetësohen se tarifat e Trump do të rrisin çmimet dhe do të dëmtojnë ekonominë amerikane. Masat u vendosën si reagim ndaj Kinës, Meksikës dhe Kanadasë, të cilat kanë mohuar akuzat e Trump për trafik droge dhe emigracion të paligjshëm.

Një diplomat rus, i tërhequr nga Brukseli mes një spastrimi të spiunëve nga autoritetet belge, është nominuar për të drejtuar misionin në Beograd të organit më të madh të sigurisë në Evropë, sipas një hetimi të përbashkët të Radios Evropa e Lirë dhe disa mediave evropiane.

Moska ka nominuar Dmitry Iordanidin, ish-zëvendësshef i misionit të Organizatës për Siguri dhe Bashkëpunim në Evropë (OSBE) në Bosnjë e Hercegovinë, me një përvojë të gjerë në Ballkan, për të drejtuar misionin e organizatës në Serbi, sipas dokumenteve të brendshme të OSBE-së të siguruara nga REL-i.

Kandidatura e tij u bë mes akuzave në rritje nga Shtetet e Bashkuara dhe qeveritë evropiane vitet e fundit për aktivitete “të dëmshme” ruse në rajonin e mbuluar nga organizata rajonale e sigurisë me 57 shtete, me seli në Vjenë.

Iordanidi, 55 vjeç, është një nga 20 diplomatët rusë që u larguan në heshtje nga Brukseli në vitin 2023 për shkak të akuzave nga Shërbimi belg i Sigurisë Shtetërore (VSSE) se ishin spiunë që vepronin nën mbulesë, sipas një liste të përpiluar nga inteligjenca belge dhe të vërtetuar në mënyrë të pavarur nga tri burime të inteligjencës perëndimore, sipas hetimit të përbashkët të REL-it, faqes së lajmeve EUobserver me bazë në Bruksel, gazetës belge De Morgen, revistës javore belge Humo dhe gazetës franceze Le Monde.

Një burim nga institucionet e inteligjencës e quajti këtë tërheqje të spiunëve si një “rast për të zbrazur sirtarin tonë” pas pushtimit të plotë të Ukrainës nga Rusia në shkurt të vitit 2022.

Ndërkohë që qeveria belge nuk publikon lista të diplomatëve të akredituar në vend dhe misioni diplomatik rus në Bruksel nuk publikon emrat e personelit të tij, REL-i verifikoi në mënyrë të pavarur praninë e disa prej diplomatëve të dëbuar rusë në Belgjikë në vitin 2023.

Diplomatët rusë, të cilët nuk janë identifikuar publikisht deri më tani, ishin të lidhur në listë me Shërbimin e Inteligjencës së Jashtme të Rusisë (SVR) ose drejtorinë e saj të inteligjencës ushtarake, të njohur si GRU.

Iordanidi, të cilin lista e inteligjencës belge e identifikon si të lidhur me SVR-në, është i vetmi diplomat mes 20 të dëbuarve që nuk u shpall persona non grata, sipas një burimi të inteligjencës. Burimi tha se Rusia e tërhoqi Iordanidin pasi Belgjika komunikoi se ai do të shpallej persona non grata nëse Moska nuk do ta tërhiqte atë.

Tani, Moska po përpiqet ta rikthejë Iordanidin në OSBE, organizatën shumëpalëshe me bazë në Vjenë që, deri në pushtimin e Ukrainës nga Rusia në vitin 2022, kishte luajtur një rol qendror në monitorimin e agresionit rus në Ukrainë dhe përpjekjet për të ndërmjetësuar mes Moskës dhe Kievit.

Iordanidi u listua si një nga tetë kandidatët për kreun e misionit të OSBE-së në Serbi pas afatit të aplikimeve më 1 dhjetor 2024, sipas dokumentit të siguruar nga REL-i.

Policia e Kosovës gjatë hetimit të një rasti të dhunës në familje, tek i dyshuar ka gjetur armë.

Rasti sipas policisë ka ndodhur në Gjilan derisa janë realizuar kontrolle në shtëpinë dhe objektet përcjellëse të të dyshuarit.

“Njësitë policore nga Stacioni Policor Gjilan gjatë hetimit të një rasti tjetër të dhunës në familje tek i dyshuari në brezin e tij kanë gjetur një (1) armë pistolete e tipit KEL-TEC të kalibrit 9mm me një karikator dhe dhjetë (10) fishekë. Me leje të Prokurorit të Shtetit është realizuar kontrolle në shtëpinë dhe objektet përcjellëse të të dyshuarit ku gjatë kontrollit janë gjetur dhe konfiskuar edhe një (1) armë e gjatë e tipit AK-47 së bashku me dy (2) karikator dhe njëqind e nëntë (109) fishekë të kalibri 7.62mm dhe njëzet e pesë (25) fishekë të kalibrit 9mm”, thuhet në njoftimin e policisë.

Me urdhër të Prokurorit të Shtetit i dyshuari sipas policisë është dërguar në mbajtje për 48 orë dhe ndaj tij do të ngritët kallëzim penal për veprën penale “Mbajtja në pronësi, kontroll ose posedimi i pa autorizuar i armëve”.

Presidenti i Ukrainës Volodymir Zelensky tha se ka pasur takim me Princin e Kurorës së Arabisë Saudite, Mohammed bin Salman.

Zelensky tha se është mirënjohës për këndvështrimin e tij të mençur për çështjet globale dhe mbështetjen për Ukrainën. Derisa tha se ishte veçanërisht e rëndësishme të dëgjoheshin fjalë besimi në të ardhmen e Ukrainës, raporton KosovaPress.

“Ne diskutuam të gjitha çështjet kyçe në rendin e ditës – si çështjet dypalëshe ashtu edhe bashkëpunimin me partnerët e tjerë. Unë i pranova përpjekjet e Princit të Kurorës për të afruar paqen e vërtetë. Arabia Saudite ofron një platformë vendimtare për diplomacinë dhe ne e vlerësojmë këtë. Delegacioni ukrainas mbetet në Jeddah për të punuar me ekipin amerikan të martën, më 11 mars, dhe ne shpresojmë për rezultate praktike. Pozicioni i Ukrainës në këto bisedime do të jetë plotësisht konstruktiv”, ka shkruar Zelensky në X.

Ai tha se me Princin e Kurorës, patën një diskutim të hollësishëm mbi hapat dhe kushtet e nevojshme për t’i dhënë fund luftës dhe për të siguruar një paqe të besueshme dhe të qëndrueshme.

“E theksova veçanërisht çështjen e lirimit të të burgosurve dhe kthimit të fëmijëve tanë, që mund të bëhet një hap kyç në ndërtimin e besimit në përpjekjet diplomatike. Një pjesë e konsiderueshme e diskutimit iu kushtua formateve të garancive të sigurisë. Ne vlerësojmë gatishmërinë e Arabisë Saudite për të zgjeruar bashkëpunimin ekonomik dhe për të investuar në Ukrainë. Diskutuam sektorët kyç për investime, duke filluar me sigurinë, energjinë dhe infrastrukturën. Ne ndajmë një vizion të përbashkët për zhvillimin dhe ndërveprimin ekonomik, veçanërisht në lidhje me rindërtimin e Ukrainës”, ka shkruar tutje Zelensky.

Princi i kurorës sipas tij ndau gjithashtu strategjinë ambicioze ekonomike të Arabisë Saudite.

“Ne jemi të gatshëm të bashkëpunojmë dhe kemi besim se lidhjet më të forta midis kombeve dhe rajoneve tona do të përfitojnë si për popujt tanë ashtu edhe për botën”, përfundoi Zelensky.

Sot bëhen 20 vite nga vrasja e piktorit të mirënjohur mitrovicas, Kadri Kadriu, raporton KP.

Në marsin e vitit 1999, pikërisht më 11 mars Kadri Kadriu gjatë kthimit për në shtëpinë e tij te kullat e famshme me “plis” që ndodhen në lagjen “Kroi i Vitakut”, pas qëndrimit tek të afërmit, ai kapet tinëzisht nga forcat paramilitare e makineria serbe dhe vritet mizorisht, ndërsa trupi i tij gjendet në Stan Tërg.

Kadri Kadriu është njëri nga piktorët më të njohur kosovarë, i cili është vra nga forcat serbe.

Gjatë përplasjes së tyre në Zyrën Ovale, presidenti amerikan, Donald Trump, i tha homologut ukrainas, Volodymyr Zelensky, se “t’i aktualisht nuk i ke letrat”.

Deklaratat e bëra nga Trumpi muajin e kaluar i referoheshin pozicionit të perceptuar të dobët të Kievit në dritë të përparimeve në fushëbetejë nga Rusia dhe një Shtëpie të Bardhë që është e etur që t’i japë fund luftës trevjeçare.

Tani, teksa Zelensky viziton Arabinë Saudite – ku një ekip negociator ukrainas do të zhvillojë bisedime të nivelit të lartë me zyrtarët amerikanë më 11 mars lidhur me një marrëveshje të mundshme të paqes – letrat e Kievit do të çelen plotësisht.

“Ukraina ka letrat më të dobëta në tavolinë”, tha Michael Froman, president i Këshillit për Marrëdhënie të Jashtme. “Siç Trumpi dhe të emisarët e tij e kanë bërë të qartë, Uashingtoni nuk është i prirë ta mbështesë pafundësisht Kievin”.

Që nga përplasja në Shtëpinë e Bardhë në fund të shkurtit, Uashingtoni ka rritur presionin ndaj Ukrainës, duke pezulluar ndihmën ushtarake dhe ndarjen e informacioneve të inteligjencës. Po ashtu, një marrëveshje e rëndësishme për minerale SHBA-Ukrainë ka mbetur e panënshkruar.

Trump ka shprehur optimizëm për bisedimet, duke u thënë gazetarëve se “besoj që ne do të bëjmë shumë përparim gjatë kësaj jave”. Para se të udhëtonte për në Arabinë Saudite, Zelensky tha se “ne do të vazhdojmë të punojmë për hir të paqes”.

“Tani vjen koha për një rund të ri bastesh”, tha Froman. “Cila është vija e kuqe e Ukrainës, me SHBA-në dhe Rusinë? Çfarë lëshimesh amerikane është Trump i gatshëm të bëjë, jo vetëm për të arritur një marrëveshje të çfarëdoshme, por një marrëveshje që krijon paqe të drejtë e të qëndrueshme?”.

Kush do të marrë pjesë në bisedime?

Bisedimet njëditore në Arabinë Saudite do të jenë bisedimet e para mes zyrtarëve ukrainas dhe amerikanë që nga vizita e tensionuar e Zelenskyt në Shtëpinë e Bardhë.

Ato do të mbahen po ashtu një muaj pasi zyrtarët amerikanë dhe rusë u takuan në kryeqytetin saudit, Riad, lidhur me përfundimin e luftës në Ukrainë – pa praninë e Kievit.

Presidenti ukrainas në vizitën e 10 marsit do të takohet me Princin saudit të Kurorës, Mohammed bin Salman.

Presidenti ukrainas, Volodymyr Zelensky, gjatë përplasjes me presidentin amerikan, Donald Trump, në Shtëpinë e Bardhë më 28 shkurt 2025.

Ekipi negociues ukrainas do të qëndrojë në shtet për t’u takuar me homologët amerikanë një ditë më vonë. Delegacioni i Kievit do të përfshijë Andriy Yermak, shefin e stafit të Zelenskyt, ministrin ukrainas për Punë të Jashtme, Andriy Sybiha, dhe atë të Mbrojtjes, Rustem Umerov.

Bisedimet SHBA-Ukrainë do të mbahen në qytetin Xheda. Ekipi negociues amerikan do të udhëhiqet nga sekretari i Shtetit, Marco Rubio, dhe në të do të bëjë pjesë edhe këshilltari për siguri kombëtar, Mike Waltz.

I dërguari i Trumpit për Lindjen e Mesme, Steve Witkoff, që mori pjesë në bisedimet e Riadit, pritej të merrte pjesë. Por, raportimet tani thonë se ai mund të udhëtojë për në Katar për bisedime lidhur me armëpushimin e brishtë në Rripin e Gazës mes Izraelit dhe Hamasit, grupit palestinez të shpallur organizatë terroriste nga SHBA-ja dhe Bashkimi Evropian.

Çfarë dëshiron SHBA-ja nga Ukraina në këto bisedime?

Trump tha se Ukrainës po i mbarojnë fuqitë njerëzore dhe burimet dhe duhet që shpejt të ulet në një tavolinë negocieuse me Rusinë.

Fokusi i bisedimeve në Xheda do të jetë vlerësimi nga zyrtarët amerikanë dhe ukrainas se çfarë lloj i procesit të paqes është i mundur.

Witkoff tha javën e kaluar se shpreson që të diskutohet për një “kornizë” lidhur me një marrëveshje të mundshme armëpushimi dhe marrëveshje të paqes.

Përplasja verbale mes presdientit ukrainas, Volodymyr Zelensky, dhe presidentit amerikan, Donald Trump, dhe nënpresidentit JD Vance. 28 shkurt 2025.

Zyrtarët amerikanë po ashtu do të shikojnë se ku Kievi është i gatshëm për kompromis. Që nga nisja e pushtimit rus të Ukrainës më 2022, Kievi ka bërë thirrje për kthimin e të gjithë territorit të tij dhe tërheqjen e plotë të forcave ruse.

Deklaratat e bëra nga Trumpi zyrtarët e tjerë amerikanë lanë të kuptohen se ky qëndrim nuk shihet si realist në Shtëpinë e Bardhë.

Renditja e hapave në procesin e paqes për të arritur një marrëveshje gjithashtu mund të jetë pjesë e bisedimeve, duke përfshirë çështje si një armëpushim i hershëm për të ndërtuar besim, këmbimi i të burgosurve dhe, potencialisht, në një moment të caktuar, mbajtjen e zgjedhjeve në Ukrainë.

Para bisedimeve, Serhiy Leshchenko, këshilltar për kreun e Zyrës së Presidentit ukrainas, u tha gazetarëve se Kievi po përgatitet për të pranuar një armëpushim të pjesshëm që do të mbulonte sulmet ajrore dhe detare.

“A dëshironi armëpushim, ne jemi gati”, tha ai më 10 mars. “Megjithatë, në terren ku [presidenti rus, Vladimir] Putin do të jetë në gjendje të pranojë një armëpushim për disa muaj: të kurojë të plagosurit, të rekrutojë këmbësori në Korenë e Veriut dhe ta rinisë këtë luftë”.

Në këmbim të koncesioneve nga Ukraina, administrata Trump po shikon që të rinisë ndihmën ushtarake dhe ndarjen e informacioneve të inteligjencës.

Trump tha më 9 mars se SHBA-ja “pothuajse” ka përfunduar pezullimin e ndarjes së inteligjencës me Ukrainën, duke lënë të kuptohet se ndarja e informacioneve mund të rifillojë dhe do të jetë një rezultat pozitiv në Arabinë Saudite.

A ka Ukraina ndonjë levë negociuese?

Zelensky është përballur me presion të madh nga SHBA-ja për të bërë koncesione para ndonjë bisede për paqe dhe ka kërkuar garanci të forta të sigurisë për Kievin, që deri më tani nuk i ka pranuar.

Po ashtu, mbi takimin në Xheda rëndon edhe fati i marrëveshjes për minerale mes SHBA-së dhe Ukrainës. Kievi dëshiron të përfshijë një garanci të qartë të sigurisë nga SHBA-ja në këmbim të qasjes në burime të mineraleve të caktuara në Ukrainë, një kërkesë që është refuzuar nga Uashingtoni.

Ajo marrëveshje u pezullua gjatë vizitës së Zelenskyt në Uashington, por të dyja palët kanë shprehur gatishmërinë që ta nënshkruajnë atë. Para bisedimeve të ardhshme, Trump tha se mendon se Ukraina do ta nënshkruajë marrëveshjen.

Gjatë një interviste dhënë së fundi, i dërguari i posaçëm amerikan, Keith Kellogg, sugjeroi se ky mund të jetë opsioni më i mirë i Kievit.

“Nëse SHBA-ja ka interes të drejtpërdrejtë ekonomik në Ukrainë, atëherë SHBA-ja ka po ashtu interes të drejtpërdrejtë për të mbrojtur interesat e saj ekonomike – që shërben, de facto ….. si garanci të sigurisë për Ukrainën”, tha ai.

Po Rusia?

Kësaj radhe, Rusia nuk do të jetë në tavolinë të bisedimeve në Arabinë Saudite, por ajo që Moska është e gatshme të heqë dorë – nëse ka diçka – është një pyetje që gjithashtu rëndon mbi takimin SHBA-Ukrainë.

Zelensky ka thënë se Putini nuk dëshiron paqe dhe ka theksuar se udhëheqësi rus ka shkelur marrëveshjet paraprake të armëpushimit.

Aleatët evropianë të Ukrainës kanë argumentuar se Kievi mund të arrijë një marrëveshje me Rusinë vetëm nga një pozicion i forcës dhe se Ukraina nuk duhet të nxitohet që të ulet në tavolinën e negociatave.

Pavarësisht këtyre gjërave, ish-drejtori i Këshillit Kombëtar të Sigurisë për Rusinë, Thomas Graham, që ka shërbyer gjatë mandatit të presidentit George W.Bush dhe ende mban kontakte me zyrtarët në Moskë, tha se “Kremlini nuk ka hequr dorë nga kërkesat e saj maksimaliste për përfundimin e konfliktit”.

Moska vazhdon të kërkojë që Ukraina të mbetet jashtë NATO-s, vazhdon të kërkojë që t’i njihen territoret ukrainase që i ka okupuar, çarmatosjen e Ukrainës dhe heqjen e sanksioneve perëndimore ndaj ekonomisë ruse.

“Kremlini mirëpret hapa të mëtejshëm të sekuencuar që dëmtojnë pozicionin e Ukrainës, siç është vendimi i SHBA-së për të pezulluar dërgesat e armëve për Ukrainën, të cilin një zëdhënës i Kremlinit e quajti ‘kontributin më të mirë për kauzën e paqes”, tha Graham.