Category: Lajme

10 persona janë arrestuar në Gjakovë nën dyshimin për organizim të skemave piramidale.

Gjatë kontrollit në dy lokacione janë gjetur dhe sekuestruar 3 aparate APEX, para të gatshme 5645 €, 250 franga Zvicerane, 140 $, 90 pound, çipa të pokerit, dhe po ashtu në veturën e njërit nga të dyshuarit është gjetur e konfiskuar një revole.

Të dyshuarit janë dërguar në mbajtje.

“ORGANIZIM I SKEMAVE PIRAMIDALE- Gjakovë / 22.03.2025 – 03:00. Janë arrestuar dhjetë (10) të dyshuar kosovarë nën dyshimin se kanë kryer veprën e cekur. Gjatë kontrollit në dy lokacione janë gjetur dhe sekuestruar 3 aparate APEX, para të gatshme 5645 €, 250 franga Zvicerane, 140 $, 90 pound, çipa të pokerit, dhe po ashtu në veturën e njërit nga të dyshuarit është gjetur e konfiskuar një revole. Me vendim të prokurorit, të gjithë të dyshuarit pas intervistimit janë dërguar në mbajtje.”

Strategji të qartë dhe unitet nga partitë politike, ka kërkuar politologu Argjend Zejnaj sa i përket dialogut me Serbinë, raporton Ekonomia Online.

Sipas tij, partitë politike duhet të ulen në një tryezë dhe ta krijojnë strategjinë sa i përket edhe integrimit të Kosovës në arenën ndërkombëtare, pasi sipas tij, Kosova ka humbur energji këto katër vitet e fundit.

“Jo vetëm partia ose kryeministri i ardhshëm por të gjithë subjektet politikë duhet të ulen në një tryezë që duhet të udhëheqë presidentja e Kosovës dhe ta bëjë një strategji të qartë dhe sa i përket me dialogun dhe me Serbinë dhe sa i përket me integrime dhe me aleancat na janë ftohur gjatë këtyre katër viteve. Duhet të kemi një fokus të veçantë sa i përket dialogut sepse po i humb shumë energji Kosovës dhe po e lë në aspektin e brendshëm dhe atë të jashtëm”, theksoi Zejnaj, teksa pret edhe shtim të presionit nga faktori ndërkombëtar.

“Do të jetë presion, e pamë edhe vizitën e fundit të dërguarit të ri të BE-së, dhe ky do të jetë më kompetetivë sa i përket lehtësimit të dialogut të Kosovës me Serbinë, për të ardhur deri në një konkluzion të marrëveshjes finale por urojmë që do të ndihmojë edhe ShBA sa më shpejtë që është e mundur. Duhet të respektohet marrëveshjet e arritura që nga fillimi i dialogut dhe në të njëjtën kohë edhe Kosovës i bëri thirrje që të filloj të mendoj seriozisht mënyrë se si do të jepet kompetencë autonomi sociale politike komunitetit serb. E kishte parasysh Asociacionin e komunave serbe, por në të njëjtën kohë kishte përballë një kryeministër i cili ka hezituar për katër vite që të ndërmarrë hapa konkret sa i përket kësaj teme dhe përmbylljes së mundshme të dialogut me Serbinë, këto janë dy pikat kryesore”, ka thënë Zejnaj.

Zejnaj ka thënë se nëse Shtetet e Bashkuara të Amerikës involvohen direkt në dialog, qasja e Kosovës do të jetë më ndryshe, pasi “ShBA nuk ka kohë të presë për teket tona”.

“Respektimi nga ana e Serbisë dhe fillimi implementimit nga ana e Kosovës, ky është ngërçi kryesor pa të cilin nëse nuk tejkalohet, nuk do të kemi përmbyllje dhe konkluzion sa i përket dialogut. Nëse do të kemi rikthim të fuqishëm të ShBA-së në tavolinën e dialogut nëse do të jetë Kurti kryeministër, do të duhej të rikapituloj vetveten qëndrimet e tij dhe duhet të qaset ndryshe, përndryshe nuk do të ketë të ardhme as si kryeministër e as të ardhme politike sepse Amerika nuk kanë kohë që të na presin për teket tona”, u shpreh Zejnaj.

Qindra banorë, përfaqësues të autoriteteve lokale dhe biznesmenë nga Ulqini protestuan dje në këtë qytet në jug të Malit të Zi, duke thënë se “Ulqini nuk është në shitje”.

Protesta e 22 marsit u thirr për shkak të pakënaqësive lidhur me tenderin për dhënien me qira të plazheve të Ulqinit, të cilat vitet e fundit janë marrë me qira nga biznesmenët lokalë, por këtë vit oferta më e mirë e marrjes me qira të plazheve u vlerësua të ishte ajo e kompanisë arabe, Eagle Hills.

“Plazhi i Madh nuk është një shkretëtirë që dikush të ndërtojë një Dubai. Plazhi i Madh është një mrekulli e natyrës, 20 kilometra bregdet i paprekur, me rërë të ngrohtë dhe shëruese. Krenaria dhe trashëgimia jonë”, tha Dijana Pellinkoviq, presidente e shoqatës “Ada Bojana”.

Sipas saj, banorët e Ulqinit nuk janë kundër progresit, por janë kundër projekteve megalomane që fshijnë identitetin lokal.

“Komuniteti ynë duhet të marrë pjesë në vendimmarrje. Po ngremë zërin kundër centralizmit”, tha përfaqësuesi i qiramarrësve, Albert Kastrati.

Ai vlerësoi se tenderi për qiramarrjen e plazheve ka diskriminuar qiramarrësit vendas dhe ka favorizuar investitorët e huaj.

Protesta në Ulqin u mbajt pavarësisht nga fakti se kryeministri i Malit të Zi, Millojko Spajiq, më 20 mars njoftoi se Eagle Hills ka ndërmend të tërhiqet dhe t’ua kalojë plazhet qiramarrësve lokalë.

Pakënaqësia nisi nga tenderi

Kompania arabe, Eagle Hills, më 11 mars dorëzoi ofertën më të mirë për dhënien me qira për një periudhë katërvjeçare të nëntë nga 19 plazhet në Plazhin e Madh të Ulqinit.

Kjo shkaktoi revoltë te qiramarrësit aktualë të plazheve dhe autoritetet lokale, të cilët deklaruan se plazhet po u jepen investitorëve të huaj “përmes marrëveshjeve të dyshimta”.

Pas kësaj, siç e ka bërë të ditur kryeministri Spajiq, presidenti i kompanisë arabe, Mohamed Alabar, ka hequr dorë nga oferta.

“Personalisht më ka thënë se për të gjitha plazhet ku kanë konkurruar ulqinakët, është i gatshëm të heqë dorë ose t’i japë me nënqira, siç është e mundur edhe ligjërisht”, tha Spajiq.

Qeveria e Malit të Zi njoftoi se, sipas nismës së Spajiqit, investitori ka vendosur që plazhet që i ka fituar përmes tenderit, që më parë ishin marrë me qira nga ndërmarrësit lokalë, t’ua dorëzojë atyre me çmimin që ata kanë ofertuar në tender.

Eagle Hills, që dha ofertën më të lartë për plazhet, është një kompani ndërtimi nga Abu Dabi i Emirateve të Bashkuara Arabe. Kjo kompani njihet për projekte rajonale, sikurse “Belgrade Waterfront”.

Kompania ka përfaqësinë në Mal të Zi, që është regjistruar pas skadimit të afatit fillestar për dorëzimin e ofertave në tenderin për dhënien me qira të plazheve të Ulqinit.

Afati për dorëzimin e ofertave, për tenderin e shpallur më 19 shkurt, ishte 4 mars, por ai u zgjat për shtatë ditë.

Alabar regjistroi kompaninë e tij më 6 mars në Malin e Zi dhe aplikoi në tender. Afatin e zgjati kompania shtetërore që menaxhon plazhet në Mal të Zi.

Plane për investime në Ulqin

Spajiq u ka njoftuar ulqinakët se përveç tërheqjes nga tenderi për dhënien me qira të plazheve, kompania nga Abu Dabi është e interesuar që të bëjë investime në Plazhin e Madh, i cili është afër 13 kilometra i gjatë dhe ende i pa ndërtuar.

Ai tha se kompania është e interesuar të investojnë 30 miliardë euro në një mega-projekt në Ulqin, që do të përfshinte ndërtimin e një aeroporti të madh, spitalit më modern në Ballkan, një marinë dhe rinovimin e qytetit të vjetër të Ulqinit.

Spajiq muajin e kaluar qëndroi në një vizitë zyrtare në Dubai, ku siç u njoftua më 13 shkurt, u nënshkrua një Memorandum Mirëkuptimi mes Qeverisë së Malit të Zi dhe Emirateve, i cili parashikon shkëmbimin e përvojave për modernizimin e administratës dhe bashkëpunim ekonomik.

Çfarë i shqetëson politikanët lokalë

Plani për investimet në mega-projektin në Ulqin nuk ka marrë miratimin e opozitës dhe një pjese të liderëve lokalë.

Deputeti i Bashkimit Demokratik të Shqiptarëve, Mehmet Zenka, konfirmoi se gjatë një takimi, se Spajiq ka thënë se qëllimi i investitorëve arabë është të marrin me qira të gjithë Plazhin e Madh për 99 vjet.

Ai theksoi se kjo është e papranueshme, pasi, edhe pse nuk janë kundër investimeve, “Ulqini nuk është në shitje”.

Sipas tij, një qira për një periudhë 99-vjeçare do të thotë se për Plazhin e Madh do të vendosë dikush tjetër dhe jo komuniteti lokal. Ai shtoi se ekzistojnë edhe lokacione të tjera për investime, por jo 20 milionë metra katrorë të Plazhit të Madh dhe rrethinës së tij.

Spajiq, siç tha Zenka, ka treguar vetëm një plan ideor të investitorëve nëpërmjet një fotografie, e cila nuk ishte e mjaftueshme për një vlerësim serioz.

Një ditë para protestës, u mbajt edhe një mbledhje e Kuvendit të Ulqinit, ku u miratuan në parim projektet e reja për këtë qytet.

Ndër të tjera, u miratua që të gjitha investimet të jenë në përputhje me parimet e zhvillimit të qëndrueshëm, duke respektuar dokumentet planifikues dhe strategjike të komunës dhe shtetit, si dhe duke marrë parasysh qëndrueshmërinë ekonomike, ekologjike dhe shoqërore.

Abazoviq kërkon që Prokuroria Speciale të reagojë

Ish-kryeministri Dritan Abazoviq, i cili është nga Ulqini, ka kërkuar që Prokuroria Speciale e shtetit të hetojë rastin e dhënies së qirasë për Plazhin e Madh, duke pretenduar se bëhet fjalë për një vepër korruptive.

Ai tha se kryeministri Spajiq “ka premtuar pasuri shtetërore dhe komunale pa iu nënshtruar procedurës përkatëse”.

“Spajiq ka prezantuar një projekt që nuk është parashikuar në Planin Hapësinor të Malit të Zi, dhe është paraqitur si përfaqësues i kompanisë që fitoi qiranë. Procedura e tenderit ishte e dyshimtë dhe rregullat për garancinë bankare u ndryshuan në momentin e fundit”, tha Abazoviq për gazetën “Vijesti”.

Mali i Zi nuk ka Plan Hapësinor që nga viti 2020.

Ai shtoi se sipas informacionit që ka, Mohamed Alabar është i pakënaqur, duke theksuar se duke u tërhequr nga qiraja, do të humbiste 100 mijë euro garanci.

“E vendosën në një pozicion të vështirë. Është shumë i zemëruar dhe i gatshëm të humbasë para për të ruajtur reputacionin e tij”, tha Abazoviq.

Dyshimet për parregullsi në tenderin për dhënien me qira të plazheve i kishin shprehur që në fillim edhe sipërmarrësit lokalë, të cilët thonë se nuk janë kundër investitorëve.

“Përmes tenderit, afati i të cilit u shty, në të cilin mori pjesë Eagle Hills Montenegro, ndodhi një sulm i paprecedent i organizuar, i sinkronizuar me institucionet e sistemit”, tha më 18 mars, kryetari i Komunës së Ulqinit, Genci Nimanbegu.

Nga Qeveria e Malit të Zi pohuan se tenderi është realizuar në mënyrë ligjore dhe se çdo veprim tjetër i ofertuesve, përfshirë mundësinë e tërheqjes, është një vendim që u përket atyre.

Ulqinakët kanë nisur një peticion, i cili është nënshkruar edhe gjatë protestës, dhe përmes tij kërkohet, veç tjerash, anulimi i tenderit për qiradhënie.

Plazhi i Madh, i gjatë 13 kilometra dhe me një gjerësi mesatare prej 60 metrash, ndodhet pesë kilometra nga Ulqini, qyteti më jugor i bregdetit malazez, që ndodhet në kufi me Shqipërinë. /REL/

Më 23 mars në Kuvendin e Kosovës, u ndryshua Kushtetuta e vitit 1974 dhe u suprimua autonomia e Kosovës në ish-Federatën jugosllave, duke e lënë atë si pjesë të Serbisë.

Parlamenti i Kosovës ishte i rrethuar me tanke dhe ushtri, dhe nën një shtetrrethim, Serbia dhunshëm ia mori Kosovës autonominë.

Nga 190 delegatët e pranishëm në Kuvend, 10 prej tyre, edhe pse nën presionin e shtetrrethimit të hekurt, kishin votuar kundër këtij suprimimi, e në mbrojtje të pozitës kushtetuese të Kosovës.

Para 23 marsit 1989, muaji shkurt i të njëjtit vit do të karakterizohej me grevën e minatorëve të gjigantit Trepça, në mbrojtje të pozitës kushtetuese të Kosovës.

Në demonstratat kundër suprimimit të autonomisë dhe me kërkesa për krijimin e Republikës së Kosovës, ranë rreth 30 dëshmorë, qindra u plagosën dhe qindra të tjerë u arrestuan dhe u dënuan me burg.

E tërë fushata kundër Kosovës kishte filluar nga serbët në Fushë Kosovë, më 1987, e cila njihet edhe si lëvizja serbe antishqiptare, ku edhe fillon ardhja në pushtet e kasapit të Ballkanit, Sllobodan Millosheviq.

Në Komunën e Prishtinës, prej vitesh nuk është bërë vlerësimi i performancës së drejtorëve të shkollave, edhe pse udhëzimi administrativ e parasheh një proces të tillë. Kjo u bë e ditur për Ekonomia Online nga drejtori i i shkollës fillore “Emin Duraku” në Prishtinë, Visar Osmani.

Sipas tij, kjo mungesë e monitorimit po krijon një lloj komoditeti te drejtorët, të cilët, pasi marrin mandatin katërvjeçar, nuk i nënshtrohen ndonjë vlerësimi të rregullt mbi punën e tyre.

Osmani ka ngritur këtë shqetësim duke theksuar se vlerësimi i performancës është i domosdoshëm për të siguruar një menaxhim më të mirë të institucioneve arsimore.

“Siç e dimë, udhëzimi i fundit administrativ parasheh kriteret për përzgjedhje të drejtorëve dhe zëvendësdrejtorëve. Parashihet që pas një viti secilit drejtor t’i bëhet vlerësimi i përformancës apo çka është punuar brenda një viti. Në Prishtinë ka qenë praktikë edhe më herët, por fatkeqësisht nuk ka ndodhur. Është mirë që të bëhet vlerësimi i përformancës së drejtorëve, jo një vit, po çdo vit. Kështu që të mos krijohet njëfarë lloj komoditeti te drejtorët që vjen mandati e janë katër vjet dhe thuajse konsiderohen të paprekshëm. Por, megjithatë duke filluar nga shkolla jonë, nga unë personalisht, kushdo që vjen, qoftë vlerësim i jashtëm apo i brendshëm është i mirëseardhur, sepse edhe ne mund të ngecim në realizim të objektivave që i kemi përpara dhe ato vlerësime që bëhen ato janë njëfarë lloj imputi që prioritete që i kemi të realizohen dhe të mos ketë stagnim të punës në menagjim të shkollës”, ka thënë ai.

Osmani ka kujtuar se më parë, drejtorët kishin një periudhë prove njëvjeçare, por kohët e fundit kjo praktikë nuk është zbatuar, edhe pse është një mekanizëm i rëndësishëm për garantimin e cilësisë në arsim.

“Vitet e fundit nuk është bërë në komunë të Prishtinës, por është mirë që të bëhet. Më herët, ne i kemi pasur dy kontrata kur jemi zgjedhur, një ka qenë njëvjeçare si punë provuese dhe tjetra ka qenë tri që i bie katër vjet mandati. Kohët e fundit nuk është bërë, edhe pse është mirë duke u bazuar në legjislacionin në fuqi që të bëhet një vlerësim i punës njëvjeçare të drejtorëve që vijnë në detyrë. Kjo kishte me qenë mirë edhe për ne, edhe për ata që pretendojnë të vijnë në detyrë, në mënyrë që të dihet që dikush edhe punën tonë e përcjell dhe e monitoron”, ka thënë ai.

Mungesa e vlerësimit të drejtuesve shkollorë, sipas Osmanit, po ndikon edhe në cilësinë e menaxhimit të shkollave. Ai thekson se disa institucione janë bërë burim i problemeve të përditshme për shkak të keqmenaxhimit.

Ai ka përmendur edhe se disa shkolla arrijnë rezultate të shkëlqyera në periudha të shkurtra kohore, ndërsa të tjera përballen me probleme që ndikojnë edhe tek komuniteti shkollor më gjerë.

Sipas tij, një sistem i mirëfilltë vlerësimi do të ndihmonte në identifikimin dhe adresimin e problemeve në menaxhimin e shkollave, duke përmirësuar cilësinë e arsimit në nivel komunal.

“Varësisht prej shkollave, ne kemi shkolla që janë burime të problemeve në baza ditore. Kemi shkolla që policia çdo ditë rri në shkollë, do të thotë keqmenagjimi e çorienton dhe e dezorganizon punën e institucioneve, është një adresë varësisht prej lidershipit se kush e merr udhëheqjen e shkollës. Ne kemi shkolla që kanë rezultatet të mira në periudha të shkurtra, duke u nisur nga shkolla jonë, pothuajse të parët në nivel vendi. Ideja është që po kemi edhe shkolla që janë burim i problemeve edhe ato probleme mund të barten shumë lehtë edhe në komunitetin e shkollave të tjera”, ka thënë Osmani.

Një deponi ilegale është aktive në hyrje të fshatit Runjevë të Kaçanikut. Banorët ankohen për të, derisa thonë se komuna nuk intervenoi kurrë për ta asgjësuar.

Ndërkaq, nga qeverisja lokale në Kaçanik theksojnë se këtë vit planifikohet të asgjësohet kjo deponi.

Drejtori për Shërbime Publike në Kaçanik, Ramadush Osmani, tregon se në atë zonë ka intervenuar vetëm kompania që punoi në hekurudha, derisa sipas Osmanit, komuna do ta asgjësojë deponinë ilegale, këtë vit.

Komuna shpejt synon ta funksionalizojë një lokacion për hedhjen e mbeturinave inerte, në periferi të qytezës.

Agjencioni për Mbrotjen e Mjedisit, në verën e vitit 2023 ka regjistruar 14 deponi ilegale në Kaçanik.

 

Ish-presidenti i Kroacisë, Stipe Mesiç, ka thënë se marrëveshja në mes të Kosovës, Shqipërisë dhe Kroacisë në fushën e mbrojtjes është një marrëveshje e mirë, derisa ka shtuar se presidenti i Serbisë, Aleksandër Vuçiq, s’ka pse shqetësohet meqë marrëveshja në mes të këtyre tri shteteve është për mbrojtje.

Marrëveshja e arritur në mes të Kosovës, Shqipërisë dhe Kroacisë në fushën e mbrojtjes ka marrë shumë vëmendje dhe ka nxitur reagime të shumta, sidomos në Serbinë e Aleksandër Vuçiqit.

Ka qenë vetë kreu i shtetit serb që i ka dhanë dramë gjithë ngjarjes. Duke folur në Bruksel pas takimit me Sekretarin e NATO-s, Vuçiq kishte bërë përpjekje për ta paraqitur marrëveshjen si një zhvillim kundër Serbisë. Ndëkrohë që Ministria e Puënve të Jashtme e Serbisë kishte thënë se do t’iu kërkonte llogari Kroacisë dhe Shqipërisë për këtë marrëveshje me Kosovën.

“Është situatë e vështirë për ne, por ne e kemi kuptuar mesazhin e tyre. Dhe, ne do ta ruajmë vendin tonë, do t’i pengojmë ata dhe gjithmonë do ta mbrojmë me sukses nga çdo agresor i mundshëm, qoftë edhe një agresor kaq i fuqishëm”, ka deklaruar Vuçiq për gazetarët në Bruksel më 19 mars.

Megjithatë ish-presidenti i Kroacisë, Stipe Mesiç, ka thënë se presidenti i Serbisë, Aleksander Vuçiq, s’ka pse të shqetësohet meqë marrëveshja mes tri shteteve ka të bëjë me aspekte të mbrojtjes.

“Nuk ka asnjë arsye që presidenti i Serbisë të shqetësohet, sepse bëhet fjalë për një marrëveshje mbrojtjeje”, ka thënë ish-presidenti Mesiç për Express.

Marrëveshjen në fushën e mbrojtjes mes Kosovës, Shqipërisë dhe Kroacisë e ka cilësuar si një marrëveshje të mirë, me mundësi që t’i bashkohen edhe shtete të tjera.

“Marrëveshja e mbrojtjes së Kosovës, Shqipërisë dhe Kroacisë është e mirë, me mundësinë që edhe vende të tjera të bashkohen”, ka përfunduar ish-presidenti kroat, Stipe Mesiç.

Ndaj reagimeve të Serbisë për marrëveshjen kanë reaguar edhe krerët e shtetit kroat. Kryeministri Andrej Plenkovic ka thënë se për bashkëpunimin me Kosovën e Shqipërinë nuk e pyesin Serbinë.

“Para se të flasin, do të ishte mirë që ta marrin mundin për pesë minuta dhe ta lexojnë atë marrëveshje. Ai memorandum është një memorandum për bashkëpunim. Aty nuk ka asnjë karakter armiqësor, kështu që e kuptoj se tash duhet kërkuar probleme diku tjetër, por në këtë tekst nuk mund të gjejnë”, ka thënë Plenkovic, duke folur para gazetarëve në Bruksel më 20 mars 2025.

Më herët edhe ministri i Mbrojtjes i Kroacisë, Ivan Anushiq, i ishte përgjigjur Serbisë në reagim, duke thënë se “ka kaluar koha kur Zagrebi është dashur ta pyesë Beogradin se çfarë mund të bëjë e çfarë jo” dhe ka shtuar se “kjo kohë më nuk do të kthehet kurrë”.

Edhe kreu i Ministrisë së Mbrojtjes së Shqipërisë, Ejup Maqedonci, ka thënë se Aleanca me Shqipërinë e Kroacinë s’ka për synim të kërcënojë asnjë shtet dhe se është një mesazh për paqe.

“Ne nuk synojmë të kërcënojmë askënd, as në Ballkanin Perëndimor, as kudo tjetër. Dëshirojmë të dërgojmë mesazh për stabilitet dhe siguri, por edhe mesazh për të gjithë ata që synojnë të kërcënojnë sigurinë në Ballkanin Perëndimor, territorin dhe jetën e qytetarëve të vendeve tona,” ka deklaruar Maqedonci më 20 mars.

Sot ka reaguar edhe ministri i Mbrojtjes së Shqipërisë, Pirro Vëngu, duke publikuar marrëveshjen e plotë mes tri shteteve. Ministri shqiptar thotë se Serbia ka injoruar prej dy vitesh iniciativat rajonale dhe në këtë mënyrë ia ka pamundësuar vetes mundësinë për të nxitur apo për të marrë pjesë në konsultime shumëpalëshe.

Vëngu ka thënë pezullimi i një qëndrimi të tillë injorues të Serbisë është në dorën e Beogradit zyrtar që të lihet anash, dhe kjo gjë e bën të kotë çdo narrative viktimizuese që vjen nga Serbia.

Disa lagje në Prishtinë kanë mbetur pa ujë të pijes që gati dy ditë. Për këtë, Kompania Rajonale e Ujësjellësit “Prishtina”, ka thënë se kjo ka ndodhur për shkak të një defekti në rrjet.

Rrugët që kanë mbetur pa ujë janë: “Muharrem Fejza”, “Holger Petersen”, Rruga “B”, “Ukshin Kovaqica”, “Jakov Xoxa”, “Ahmet Gashi”, “Muhamet Qami” edhe rrugët përreth Mati-1.

Në një njoftim në rrjetin social ‘Facebook’, KRU “Prishtina” theksoi se ekipet janë duke u marrë me izolimin e defektit e më pas në rregullimin e tij.

Pas përfundimit të pames për kryefamiljarin e tyre të ndjerë, Haxhi Thaçin, familja e ish-presidentit Hashim Thaçi përmes një komunikate dërguar mediave i ka falënderuar të gjithë qytetarët që ishin për ngushëllime në familjen e tyre, si dhe institucionet e liderët politikë për telegramet dhe thirrjet e tyre për ngushëllime.

“Jemi thellësisht mirënjohës për mbështetjen e madhe që morëm nga mijëra qytetarë anekënd Kosovës, Shqipërisë, Maqedonisë së Veriut, Luginës së Preshevës dhe diasporës shqiptare, nga fjalët e mira dhe mirësia e tyre”, thuhet ndër të tjera në falënderimin e familjes Thaçi.

Po ashtu, në njoftim familja Thaçi se la pa falënderuar Komunën e Skenderajt, dhe kryetarin e saj, Fadil Nura, për mbështetjen në organizimin për ceremoninë së varrimit dhe aktiviteteve të përkujtimit.

“Institucionet e Kosovës, Shqipërisë, Malit të Zi dhe përfaqësitë diplomatike të shteteve mike i falënderojmë për telegramet e tyre të ngushëllimit, ndërsa liderët politikë shqiptarë i falënderojmë për thirrjet e tyre telefonike”, thuhet në njoftim.

Tutje, familja Thaçi thekson se mirësia e të tjerëve do të mbetet përherë me na dhe do jenë gjithmonë mirënjohës për mbështetjen dhe forcën që u dhanë gjatë këtyre ditëve të pikëllimit.

Haxhi Thaçi ka vdekur të dielën më 16 mars, dhe është varrosur më 18 mars të kësaj jave. Në varrimin e tij ish-presidenti Hashim Thaçi nuk ishte lejuar të marrë pjesë nga Dhomat e Specializuara në Hagë, por këta të fundit i dhanë leje ish-komandantit të UÇK-së të vijë në Kosovë të premten dhe të qëndrojë edhe sot.