ATV

Category: Lajme

  • Prattipati nderohet me fanellën e Kosovës me numrin 250 nga Federata e Futbollit

    Prattipati nderohet me fanellën e Kosovës me numrin 250 nga Federata e Futbollit

    E Ngarkuara me Punë në Ambasadën e Shteteve të Bashkuara të Amerikës në Kosovë, Anu Prattipati, është nderuar me një fanellë të ekipit kombëtar të Kosovës me numrin 250, për nder të 250-vjetorit të Pavarësisë së ShBA-së.

    Përmes një njoftimi, Ambasada amerikane në Kosovë falënderoi Federatën e Futbollit të Kosovës për këtë gjest simbolik, duke e cilësuar atë si një shprehje të miqësisë së fortë ndërmjet dy vendeve.

    “Faleminderit Federata e Futbollit të Kosovës për këtë gjest domethënës dhe për festimin e miqësisë së qëndrueshme midis dy vendeve tona”, thuhet në njoftim.

  • Policia shpërndan protestuesit me ujë dhe gaz lotsjellës në Tiranë, disa të arrestuar

    Policia shpërndan protestuesit me ujë dhe gaz lotsjellës në Tiranë, disa të arrestuar

    Tensione dhe përplasje janë shënuar mëngjesin e së enjtes para Parlamentit, teksa protestuesit janë mbledhur aty rreth orës 09:20, para se të niste seanca plenare.

    Një pjesë e ligjvënësve socialistë ishin futur në sallë më herët, ndërsa të tjerët që mbërritën më vonë u sulmua me vezë dhe miell nga një grup protestuesish. Policia ndërhyri duke shoqëruar 8 prej tyre.

    Masat e sigurisë rreth Parlamentit janë shtuar që para nisjes së tubimit të qytetarëve. Përveç gardhit metalik dhe rrethimit të zonës, janë pozicionuar një autoblindë e forcave të sigurisë si dhe një autobot uji, i cili përdoret zakonisht për shpërndarjen e protestuesve në raste të përshkallëzimit të situatës.

    Ndryshe, protestuesit zhvilluan një protestë para Parlamentit ku u regjistruan disa incidente. Situata u tensionua ku pati përplasje fizike dhe hedhje të mjeteve piroteknike. /Euronews.al/

  • Mbyllet afati i katërt për përmbushjen e reformave nga Plani i Rritjes, KE do të dalë me një vlerësim

    Mbyllet afati i katërt për përmbushjen e reformave nga Plani i Rritjes, KE do të dalë me një vlerësim

    Dita e fundit e muajit qershor ishte afati përfundimtar në kuadër të periudhës së katërt raportuese për vendet e Ballkanit Perëndimor për t’i përmbushur reformat e parashikuara nga Plani i Rritjes për këto vende.

    Tani, këto vende kanë afat deri më 15 korrik për t’i dorëzuar raportet mbi hapat e zbatuar të reformave.

    Komisioni Evropian (KE) më pas do të vlerësojë përmbushjen e tyre dhe do të vendosë për pagesat përkatëse për secilin vend.

    Megjithatë, zyrtarët e KE-së theksojnë se të hollat ndahen vetëm pasi të jetë vlerësuar se reformat nga agjendat e reformave të vendeve përkatëse janë zbatuar në të vërtetë.

    “Instrumenti për reforma dhe rritje bazohet në performancë dhe fondet paguhen vetëm kur reformat zbatohen plotësisht”, tha për Radion Evropa e Lirë (REL) zëdhënësi i Komisionit Evropian, Guillaume Mercier, transmeton Radio Evropa e Lirë.

    “Tashmë po shohim përparim të rëndësishëm: 78 për qind e reformave në tri rundet e para të raportimit tregojnë ose sukses të plotë, ose të paktën njëfarë përparimi, ndërsa vetëm 22 për qind janë të bllokuara”, shtoi zëdhënësi.

    Mjetet financiare nga Plani i Rritjes janë të kufizuara në kohë. Nëse vendet përfituese nuk i përmbushin kushtet, përkatësisht nuk zbatojnë reformat e parashikuara në agjendat e reformave, Komisioni Evropian ka të drejtë t’i mbajë fondet e destinuara për këta hapa reformues.

    Këto fonde, sipas rregullave të Planit të Rritjes, mund të rishpërndahen te vendet që arrijnë rezultate më të mira në zbatimin e reformave.

    Sipas Mercier, vendet përfituese kanë një vit kohë për t’i përmbushur kushtet përpara se fondet të rishpërndahen.

    Kosova pritet t’i humbë mbi 40 milionë euro nga Plani i Rritjes për shkak të moszbatimit të reformave me kohë, tha të mërkurën kryenegociatori i Kosovës me BE-në, Jeton Zulfaj.

    Përveç kësaj, 30 qershori shënoi përfundimin e të ashtuquajturës periudhë “grejs”, pra kohës shtesë, që Komisioni Evropian kishte miratuar për hapat reformues që fillimisht duhej të përfundonin në mesin e vitit 2025. Për hapat reformues me afate në fund të 2024 dhe në fund të 2025, periudhat përkatëse shtesë përfundojnë më vonë gjatë vitit 2026.

    “Siç është theksuar në Rregullore, kur hapat reformues nuk përmbushen as pas përfundimit të periudhës së grejsit, fondet përkatëse mund të rishpërndahen te përfituesit e tjerë. Kur bëhet fjalë për hapat me afat 30 qershor 2026, Komisioni tani do të kryejë një vlerësim gjithëpërfshirës dhe objektiv të të gjithë përfituesve”, deklaroi zëdhënësi i KE-së.

    Ai, në emër të Komisionit Evropian, u bëri thirrje vendeve të rajonit të intensifikojnë përpjekjet në mënyrë që reformat të zbatohen në kohë para periudhave të ardhshme raportuese.

    “Reformat duhet të mbeten prioritet për përfituesit në mënyrë që të shfrytëzojnë sa më shumë mundësitë që ofron Plani i Rritjes”, tha Mercier.

    Shqipëria, Mali i Zi dhe Maqedonia e Veriut vlerësohen si shtetet më të përparuara në zbatimin e agjendave të reformave.

    Sipas të dhënave zyrtare të Komisionit Evropian, Shqipëria ka zbatuar 33 hapa reformues në tri ciklet e para dhe deri tani ka marrë më shumë se 212 milionë euro nga Plani i Rritjes.

    Kosova deri tani nuk ka zbatuar asnjë hap reformues, prandaj ka marrë vetëm fonde të parafinancimit – mbi 61 milionë euro, që përbëjnë 7 për qind të shumës totale të destinuar për këtë vend.

    Mali i Zi ka zbatuar 32 hapa reformues, për të cilët i janë paguar gati 90 milionë euro.

    Maqedonia e Veriut ka marrë më shumë se 142 milionë euro pasi ka përmbushur 22 hapa reformues.

    Serbia gjatë tre periudhave të para raportuese ka zbatuar tre hapa reformues, mbi bazën e të cilëve Komisioni Evropian ka miratuar pagesa prej më shumë se 167 milionë euro.

    Bosnje e Hercegovina ndodhet në pozitën më të vështirë. Jo vetëm që nuk ka marrë asnjë euro nga Plani i Rritjes, por vitin e kaluar humbi 108 milionë euro për shkak të vonesave në dorëzimin e Agjendës së saj të Reformave.

    Buxheti i përgjithshëm i Planit të Rritjes së Bashkimit Evropian për Ballkanin Perëndimor është 6 miliardë euro për periudhën 2024–2027. Nga kjo, 2 miliardë janë grante, ndërsa 4 miliardë janë kredi me kushte të favorshme.

    Fondet janë shpërndarë sipas dy kritereve bazë – numrit të popullsisë dhe bruto produktit të brendshëm.

    Komisioni Evropian i ka kombinuar këta tregues për të përcaktuar një formulë proporcionale të shpërndarjes midis gjashtë përfituesve, duke siguruar që vendet më të mëdha të marrin më shumë në total, por duke marrë parasysh edhe nevojat e tyre ekonomike.

    Sipas këtyre kritereve, Kosovës i takojnë 882 milionë euro, Serbisë 1.5 miliard euro, Bosnje e Hercegovinës 976 milionë euro, Shqipërisë 922 milionë euro, Maqedonisë së Veriut 750 milionë euro dhe Malit të Zi 383 milionë euro./REL

  • Zjarr masiv në jug të Francës, flakët djegin mbi 800 hektarë

    Zjarr masiv në jug të Francës, flakët djegin mbi 800 hektarë

    Zjarrfikësit po luftojnë me një zjarr të madh që po përhapet me shpejtësi në Aude, në Francën jugore, pasi flakët u përhapën nga Herault dhe dogjën më shumë se 800 hektarë gjatë natës.

    Pamjet tregojnë flakët që kalojnë me shpejtësi në shpatin e një kodre, tym të dendur që ngrihet në qiell dhe aeroplanë e ekipe tokësore që luftojnë me zjarrin.

    Zjarrfikësit shihen pranë ‘vijës së frontit’ ndërsa operacioni vazhdon.

    Zjarri shpërtheu në departamentin e Herault të mërkurën pasdite përpara se të përhapej me shpejtësi në Aude, i nxitur nga kushtet e thatësirës dhe erërat e forta.

    Sipas përditësimit të fundit, më shumë se 800 hektarë ishin djegur.

    Ekipet nga të dy departamentet mbeten në vendngjarje ndërsa punojnë për të ngadalësuar përparimin e flakëve dhe për të siguruar zonat e djegura. /Telegrafi/

  • Pas sulmeve në Kiev, BE-ja paralajmëron sanksione kundër prodhuesve rusë të dronëve

    Pas sulmeve në Kiev, BE-ja paralajmëron sanksione kundër prodhuesve rusë të dronëve

    Shefja e politikës së jashtme të Bashkimit Evropian, Kaja Kallas, ka dënuar sulmet ruse gjatë natës ndaj Kievit, duke paralajmëruar se do të propozojë sanksione të reja ndaj Rusisë.

    Ajo tha se sot, më 2 korrik, do të propozojë sanksionimin e më shumë subjekteve të industrisë ushtarake ruse në përgjigje të sulmeve.

    Sanksionet e reja do të synojnë kompleksin ushtarako-industrial të Rusisë, përfshirë kompanitë që prodhojnë pjesë për dronët Shahed dhe Geran.

    “Vetëm fjalët nuk do t’i ndalin sulmet ndaj Kievit. Vetëm mbështetja e vazhdueshme ushtarake për Ukrainën dhe presioni në rritje ndaj Moskës mund ta bëjnë këtë”, tha Kallas.

    Duke iu përgjigjur deklaratave të saj, zëdhënësi i Kremlinit, Dmitry Peskov, u shpreh se Rusia do të vazhdojë të rrisë presionin ndaj “regjimit të Kievit” për të arritur objektivat e saj.

  • ​Popullsia e Kosovës po plaket, mosha mesatare pritet të arrijë 49 vjeç deri më 2060

    ​Popullsia e Kosovës po plaket, mosha mesatare pritet të arrijë 49 vjeç deri më 2060

    Parashikimet për vitin 2060 parasheh se mosha mesatare e popullsisë së Kosovës të jetë 49 vjeç ndërkaq sipas profileve komunale, Prishtina mbetet komuna me popullsinë më urbane, ndërsa Dragashi komuna me popullsinë më rurale, raporton KosovaPress.

    Këto ishin të dhënat kryesore që u prezantuan nga Agjencia e Statistikave të Kosovës e cila të enjten ka publikuar për herë të parë raportin mbi projeksionet e popullsisë deri në vitin 2060 dhe profilet e komunave.

    I pranishëm në këtë prezantim të raporteve ishte edhe Zëvëndësministri në detyrë i Administrimit dhe Pushtetit Lokal, Agon Batusha i cili tha se të dhënat statistikore janë thelbësore për hartimin e politikave dhe vendimmarrjen në nivel qendror e lokal.

    “Të gjithë e dimë që pa statistika, pa të dhëna, asnjë vendimmarrje nuk është e plotë dhe natyrisht që pa të dhëna, ne shumë lehtë mund të marrim vendime të cilat nuk do të kenë vlerë në dobi të qytetarëve, prandaj të dhënat e sakta, të detajuara janë esenciale për të marrë vendimet e duhura, jo vetëm ne si qeveri, ministri, por edhe, dhe sidomos, për komunat dhe agjencitë të cilat japin shërbime të drejtpërdrejta për qytetarët.… 01:39… Prandaj, puna që e ka bërë Agjencia e Statistikave të Kosovës, do ta lehtësojë jashtëzakonisht punën e kryetarëve të komunave dhe vendimmarrjen tonë në nivelin lokal, që t’ju japim shërbime dhe të planifikohen shërbime më të mira për qytetarët e Kosovës”, tha ai

    Në realizimin e këtyre dy raporteve kanë ndihmuar edhe dy ekspertë të huaj. Njëri ndër ta është eksperti Eduardo Jongstra i cili tha se, analizat janë hartuar në mënyrë që të jenë të kuptueshme për vendimmarrësit lokalë, ndërsa ndryshimet në urbanizim dhe migrim kanë ndikuar në dallimet e evidentuara mes dy regjistrimeve.

    “Për të arritur në një përgjigje, për të balancuar atë përzgjedhje të indikatorëve, ne kishim dy kriteret e mëposhtme: analiza duhet të jetë e thjeshtë, duhet të jetë e kuptueshme për njerëzit që nuk kanë asnjë përvojë në statistika apo demografi, sepse ajo është e destinuar për vendimmarrësit lokalë si rregull i përgjithshëm. Dhe kjo ishte në fakt pika e dytë, duhet të jetë relevante për të informuar administratorët lokalë dhe vendimmarrësit e politikave për zonat ku ata mundësisht mund të ndërmarrin veprime për të fuqizuar zhvillimin lokal….. Ajo që është më shqetësuese janë ndryshimet që ndodhin për shkak të lëvizjes së njerëzve. Dhe ka dy dimensione për këtë. Lëvizja lokale, urbanizimi, largimi nga zonat rurale drejt zonave urbane, por edhe lëvizja ndërkombëtare, migrimi ndërkombëtar. Dhe të gjithë ju e dini se Kosova është një vend migrues. Dua të thotë, njerëzit e zakonshëm të Kosovës gjatë gjithë kohës lëvizin jashtë vendit dhe kthehen”, tha ai.

    Ndërkohë, eksperti Tomas Kucera theksoi se ndryshimet në fertilitet, mortalitet, migracion dhe në strukturën e popullsisë grumbullohen me kalimin e kohës, prandaj nevojitet një vizion realist për zhvillimin e ardhshëm të popullsisë.

    Ai sqaroi se parashikimi kombëtar ishte i mundur falë të dhënave për lindjet, vdekjet, regjistrimin e popullsisë dhe migracionin ndërkombëtar, ndërsa në nivel komunal mungesa e statistikave të besueshme për migracionin e brendshëm dhe ndërkombëtar nuk lejoi hartimin e parashikimeve të plota.

    Kështu, drejtori ekzekutiv i ASK-së, Avni Kastrati prezantoi statistikat e viteve 2011 dhe 2024 si dhe paraqiti raportin e parashikimeve për vitin 2060 i cili do të jetë i qasshëm në formë online.

    Ai tha se projeksionet e reja të popullsisë deri në vitin 2060 tregojnë një plakje graduale të popullsisë dhe rënie të shtimit natyror, por theksoi se ato duhet të shërbejnë si një udhërrëfyes për planifikim dhe jo si një parashikim i pandryshueshëm.

    Gjatë prezantimit të raportit për projeksionet e popullsisë, Kastrati deklaroi se dokumenti është hartuar mbi bazën e regjistrimit të popullsisë të vitit 2024, statistikave të lindjeve, vdekjeve dhe migracionit, duke ofruar tre skenarë të zhvillimit demografik.

    “Është e rëndësishme të kuptohet se ky nuk është një parashikim absolut i të ardhmes. Janë faktorë të ndryshëm që mund të ndikojnë. Ky është një projeksion, nëse do ta bazojmë në të dhënat që i kemi në dispozicion. Ndryshimi i popullsisë vitale, raporti tregon drejtimin e mundshëm të zhvillimeve demografike, nëse trendet aktuale vazhdojnë. Nëse arrijmë të krijojmë një shoqëri më të edukuar, me një migrim të nxitur, me një diasporë dhe të përmirësojmë kushtet, a trendet e të dhënave të moshës demografike mund të jenë edhe pak më ndryshe se sa këto që janë paraqitur këtu? Prandaj, ky raport duhet parë si një kornizë strategjike për planifikim dhe jo si një parashikim i pandryshueshëm, por standard. Sidomos kur ju komuna, pra e keni, e keni, e ka e ka profesori Thomas, e keni edhe një parashikim, ka një, një projeksion apo një estimation për 15 vitet, sepse ka qenë sfiduese me marrë”, u shpreh ai

    Ndërsa eksperti nga ASK-ja, Idriz Shala, prezantoi Profilet e Komunave, duke theksuar se ato ofrojnë një pasqyrë të detajuar statistikore për secilën komunë përmes 43 treguesve kryesorë, analizave sektoriale dhe hartave tematike, të cilat ndihmojnë në identifikimin e dallimeve zhvillimore dhe nevojave për investime.

    Ai bëri të ditur se Prishtina mbetet komuna më e madhe në vend me rreth 227 mijë banorë, apo 13-14 për qind të popullsisë së Kosovës, ndërsa pas saj renditen Prizreni, Ferizaj, Gjilani, Peja dhe Gjakova. Në anën tjetër, komunat më të vogla janë Kllokoti, Ranillugu dhe Parteshi.

    Sipas tij, ndryshimet demografike dhe migrimi kanë ndikuar edhe në strukturën e papunësisë, ndërsa Kosova vazhdon të ketë një shkallë të lartë të papunësisë së të rinjve në krahasim me vendet e Bashkimit Evropian.

    “Kjo tregon se kjo shpejtësi e rritjes më të madhe të migrimit ka ndikuar në ndryshimet e strukturës së papunësisë. Piramida e papunësisë së të rinjve pasqyron qartë këtë tranzicion, baza e saj po ngushtohet, ndërsa pjesa e sipërme po zgjerohet, duke reflektuar rritjen e numrit të të moshuarve. Në krahasim me Bashkimin Evropian, Kosova mbetet, një vend ku papunësia e të rinjve është relativisht e lartë. Sipas regjistrimit të vitit 2014, 23.8% e papunësisë në Kosovë ishte në moshën 15, ndërsa në Bashkimin Evropian ishte 14.8, 14.8% në 15.Kjo pasqyron qartë zhvillimin në nivelet arsimore, kjo gjatë periudhës 2012-2014, të dhënat tregojnë se ndryshimi i të papunëve me arsim të mesëm të lartë ose të lartë është rritur, ishte rreth 49.5% në vitin 2012 dhe 52.4% në vitin 2014. Kjo tregon një përmirësim të dukshëm në nivelin e arsimit në vend”, tha ai.

    Shala theksoi se të dhënat tregojnë edhe përmirësime në nivelin e arsimit dhe në kushtet e banimit, duke përfshirë qasjen në infrastrukturën bazë, elemente që sipas tij duhet të shërbejnë si bazë për hartimin e politikave publike dhe planifikimin e zhvillimit në nivel lokal. /KP/

  • ‘‘Po shkoj në kryeministri’’, Kurti sërish s’ju flet gazetarëve për formimin e institucioneve

    ‘‘Po shkoj në kryeministri’’, Kurti sërish s’ju flet gazetarëve për formimin e institucioneve

    Kryeministri në detyrë Albin Kurti sërish iu është shmangur pyetjeve të gazetarve për sa i përket formimit të institucioneve.

    “Po shkoj në kryeministri”, tha shkurt Kurti, shkruan EO.

    Ndryshe, kjo s’është hera e vetme që lideri i VV’së, ka shmangur përgjigjen në pyetjet për formimin e institucioneve. I njëjti, ka thënë se duhet pritur certifikimi i rezultateve të zgjedhjeve të 7 qershorit, për të filluar diskutimet me partitë e tjera.

  • Lushi: Specialja po bën politikë, u bëj thirrje partive që Hashim Thaçin ta zgjedhin president

    Lushi: Specialja po bën politikë, u bëj thirrje partive që Hashim Thaçin ta zgjedhin president

    Ish-eprori i UÇK-së, Uk Lushi, ka kritikuar Gjykatën Speciale për shtyrjen e vendimit ndaj ish-krerëve të UÇK-së.

    Ai ka bërë me dije se me këtë veprim Specialja ka treguar hapur se po bën politikë.

    Në profilin e tij në Facebook, Lushi ka shkruar se kjo gjykatë po mundohet t’ia ndalojë politikën Hashim Thaçit.

    “Gjykata Speciale me shtyerjen e verdiktit lirues për Presidentin Hashim Thaçi et al. për shtator 2026 ka treguar haptas që po bën politikë. Specialja po mundohet t’ia ndalojë politikën Hashim Thaçit. Trupi Gjykues i Speciales e di që verdiktet fillojnë e shkruhen prej ditës së parë të një gjykimi dhe mund të përfundohen brenda ditësh pas fjalëve përfundimtare. Koha nuk është justifikim më”, ka shkruar ai, duke shtuar se Thaci duhet të bëhet president.

    “U bëj thirrje VV-së, LDK-së, AAK-së, PDK-së dhe partive të pakicave në Kuvendin e Kosovës të zgjedhin Hashim Thaçin President sepse Specialja po sfidon shtetin e Kosovës duke u vendosur mbi shtetin. Sidomos Albin Kurti dhe VV e kanë rastin të tregojnë që ishin dhe janë kundër Speciales që ka kapur drejtësinë dhe shtetin. Le ta propozojnë Thaçin për President. Dhe mandej Specialja le të urdhërojë e dënojë Hashim Thaçin si President”, ka shkruar ai.

  • Zgjidhet ngërçi për punëtorët teknikë të shkollave në Prishtinë, premtohen paga dhe kontrata

    Zgjidhet ngërçi për punëtorët teknikë të shkollave në Prishtinë, premtohen paga dhe kontrata

    Federata Sindikale e Punëtorëve Teknikë të Sektorit Privat të Kosovës (FSPTSPK) ka njoftuar se ka zhvilluar një takim me nënkryetarin e Komunës së Prishtinës, Florian Dushi, ku është diskutuar për statusin e punëtorëve teknikë të shkollave fillore në kryeqytet.

    Sipas njoftimit të federatës, në takim morën pjesë kryetari i FSPTSPK-së, Jusuf Azemi, bashkë me bashkëpunëtorët e tij, ndërsa tema kryesore ishte situata e punëtorëve teknikë, të cilët aktualisht janë pa kontrata pune dhe, si pasojë, ekzistonte rreziku që të mbeteshin edhe pa pagën për muajin qershor.

    FSPTSPK bën të ditur se në përfundim të takimit, nënkryetari i Komunës së Prishtinës, Florian Dushi, ka garantuar se nuk do të ketë largime nga puna dhe se punëtorët do të marrin pagat për muajin qershor.

    Po ashtu, sipas federatës, është premtuar se procedurat për lidhjen e kontratave të punës do të përfundojnë në afatin më të shpejtë të mundshëm.

    Federata Sindikale e Punëtorëve Teknikë të Sektorit Privat të Kosovës thekson se do të vazhdojë të ndjekë nga afër zhvillimet lidhur me këtë çështje dhe zbatimin e zotimeve të dhëna në takim.

  • ASK-ja publikon parashikimet e popullsisë dhe profilin e komunave

    ASK-ja publikon parashikimet e popullsisë dhe profilin e komunave

    Agjencia e Statistikave të Kosovës (ASK) ka prezantuar dy publikime të reja që dalin nga procesi i regjistrimit të popullsisë: parashikimet e popullsisë dhe profili i komunave, të cilat organizohen për herë të parë në këtë format.

    Gjatë prezantimit u theksua se parashikimet e popullsisë ndihmojnë në kuptimin e zhvillimeve demografike në vitet në vijim, ndërsa profili i komunave ofron një pasqyrë krahasuese të zhvillimit lokal mes viteve 2011 dhe 2024.

    Zëvendësministri i Administrimit të Pushtetit Lokal, Agon Batusha, vlerësoi se të dhënat e publikuara nga ASK do të kenë ndikim të drejtpërdrejtë në punën e institucioneve lokale dhe planifikimin e shërbimeve publike.

    “Agjencia e Statistikave të Kosovës, në raportin për vendin të Bashkimit Evropian për Kosovën, gjithmonë ka nota pozitive dhe i plotëson standardet teknike që i kërkon Bashkimi Evropian. Prandaj, puna e ASK-së është në përputhje edhe me standardet e Bashkimit Evropian dhe na afron më shumë me Bashkimin Evropian në këtë fushë, por gjithsesi edhe ajo që është alfa dhe omega është që na lehtëson punën e secilit vendimmarrës në hartimin e politikave tona”, ka deklaruar Batusha.

    Edhe eksperti ndërkombëtar, Eduardo Jongstra, ka vlerësuar metodologjinë dhe kredibilitetin e të dhënave të përfshira në këto publikime.

    “Këto profile janë mjaft kredibile, sidomos duke marrë parasysh ndryshimet politike e ekonomike të cilat kanë ndodhur në mes të 2011 dhe 2014”, ka thënë Jongstra.

    Sipas ASK-së, për këto dy publikime janë realizuar gjithsej 56 raporte të bazuara në regjistrimin e popullsisë, ekonomive familjare dhe banesave të vitit 2024.