Category: Lajme

Dragana Trifkoviq është dëbuar nga Austria dhe i është ndaluar hyrja në zonën Schengen, ka bërë të ditur avokati serb, Cedomir Stojkoviq në profilin e tij në Facebook.

Stojkoviq ka thënë se e njëjta ka lidhje me Shërbimin e Sigurisë Ruse (FSB).

Kush është spiunja serbe Dragana Trifkoviq që shoqërohet me sadistin që dhunonte ukrainasit e zënë robër?

Trifkoviqit i është ndaluar hyrja në Kosovë që nga viti 2016, ku Agjencia Kosovare e Inteligjencës (AKI) e ka kategorizuar atë si agjente me ndikim të FSB-së, përmes një operacioni kibernetik, kur u publikua fotografia e saj me një letër ku ishin dhënë meritat nga shërbimi rus.

Ajo ishte deputete e Kuvendit të Serbisë para se të kalonte në partinë ekstremiste “Dveri”.

Gjithashtu, institucionet e sigurisë së Ukrainës dhe mediat e këtij vendi e kanë akuzuar Trifkoviqin se ka marrë pjesë si vëzhguese e rreme e zgjedhjeve në Krimenë e pushtuar nga rusët.

Trifkoviq shoqërohej me Oleksiy Yuriyovych Milchakov, sadist dhe dhunues i ushtarëve ukrainas të zënë rob. Po ashtu Milchakov ishte instruktor në kampet serbe në Serbi, në përgatitje të ‘’luftërave serbe” për të luftuar përkrah rusëve në Ukrainë.

Milchakov ishte i dhunshëm edhe në fëmijëri ku në një video shihej duke e bërë copë-copë një qen.

Në vitin 2019 në kampet e trajnimit të të rinjve në Serbi dhe Rusi, adoleshentëve u mësohen vlerat “patriotike” pro-ruse dhe u jepen udhëzime ushtarake nga ekstremistët e krahut të djathtë me lidhje me konfliktin në Ukrainën lindore.

Një kamp i ashtuquajtur ‘ushtarako-patriotik’ ishte krijuar për të rinjtë në zonën malore Zlatibor të Serbisë. Kampi u bashkëorganizua nga një organizatë ruse me lidhje me luftëtarët separatistë në konfliktin e vazhdueshëm në Ukrainën lindore. Disa nga trajnerët në kurset e mëparshme e kanë deklaruar hapur veten si neonazistë.

Në kampe të këtij lloji, fëmijët mësuan për teknikat e mbijetesës në natyrë – dhe për mbajtjen e armëve. Faqja e disa pjesëtarëve në Facebook ishte plot me fotografi me uniformë, dhe përmbajtjet që kishin shpërndarë fokusohet kryesisht në dashurinë për Rusinë, Kosovën dhe organizatat ekstremiste serbe dhe pro-ruse.

Aleksei Milchakov, të cilin Bashkimi Evropian e vendosi në listën e sanksioneve në vitin 2015 për përfshirjen e tij në një grup të armatosur separatist që luftonte në Ukrainën lindore, ishte një anëtar dhe instruktor i shquar i ENOT Corp.

Ai u bë i njohur në qarqet e krahut të djathtë pasi u qarkulluan foto të tij duke prerë kokën e një qeni dhe duke veshur simbole neo-naziste.

Përpara se të shkonte për të luftuar në Donbas në vitin 2014, Milchakov ngarkoi përmbajtje që lavdëronte Zeljko Raznatovic, komandantin serb të njohur si Arkan, në faqen e tij në rrjetin social të njohur rus VK (VKontatke). Më vonë, fotografitë e tij në frontin e betejës në Ukrainë filluan të shfaqen gjithashtu. Në ato fotografi ai ka pozuar, me buzëqeshje, pranë trupave të ushtarëve të vdekur ukrainas.

Ndërsa ishte në Donbas, Milchakov drejtoi njësinë Rusich, anëtarët e së cilës deklaruan publikisht mbështetjen e tyre për ideologjinë neo-naziste. Një video incizim i marrë gjatë një seance stërvitore të mbajtur në Rusi në shtator 2017, ku Shoqata Serbe e Pjesëmarrësve në Konfliktet e Armatosura çoi fëmijë, përshkruan një instruktor rus duke shpjeguar, me ndihmën e një përkthyesi, se si të përdorin armët. Në krahun e tij të majtë është logoja e njësisë Rusich. /The Geopost

Në Ditën Kombëtare të Viktimave të Zhdukjeve me forcë, u kujtua Bajram Çerkinaj i cili vdiq pa ditur se ku ndodhet djali i tij. Aty u mbajt një minutë heshtje në kujtim të jetës dhe angazhimit të tij.

Mërgim Memoviq nga Qendra Burimore për personat e zhdukur tha se koha po e rëndon dhimbjen, raporton KP.

“Për neve si qendër kjo datë sot është edhe më e vështirë për ta përkujtuar sepse sot nuk e kemi shtyllën e organizatës sonë, nuk e kemi figurën që e ka nisur këtë çështje, nuk ndodhet baca Bajram Çerkinaj. Një figurë e cila u bë simbol për të vërtetën, baca Bajram bashkë me urtësinë e tij ishte ballë deri në frymën e fundit. Baca Bajram nuk e jetoi jetën vetëm me dhimbjen e tij, por me dhimbjen e mijëra familjeve”, u shpreh ai.

Në qendër të qytetit, në Komunën e Leposaviqit, sot u hap pika e re, e katërta në këtë komunë, e Postës së Kosovës, në objektin e rikthyer nën menaxhim të Postës së Kosovës.

Sipas një njoftimi për media thuhet se të pranishëm në këtë përurim zyrtar ishin kryeministri në detyrë i Republikës së Kosovës, Albin Kurti, ministrja në detyrë e Ekonomisë, Artane Rizvanolli, kryetari i Komunës së Leposaviqit, Lulzim Hetemi, kryesuesi i Bordit të Postës së Kosovës, Gëzim Paci dhe kryeshefja e Postës së Kosovës, Nora Rraci, raporton KosovaPress.

Kryeministri Kurti përgëzoi dhe falënderoi Postën, Ministrinë e Ekonomisë dhe Komunën e Leposaviqit për punën. Ai tha se hapja e zyrës së re në pronën e rikthyer, është bashkëdyzim i ligjshmërisë dhe cilësisë.

“Ata operatorët e pa licencuar që kanë funksionuar më herët janë mbyllur dhe tash e kemi Postën e Kosovës ku përveç dërgesave të zakonshme të postës mund të pranohen edhe mjete financiare në euro për qytetarët e Leposaviqit. Ky është një lajm i mirë edhe për banorët e komunës, por edhe për shërbimin postar publik të Republikës së Kosovës”, u shpreh kryeministri.

Më tej, ai theksoi se dikur Posta e Kosovës ka operuar me humbje, kurse tash me kryeshefen e re, Nora Rracin, ajo operon me fitim, dhe përveç kësaj ka shtrirje territoriale gjithandej, anekënd komunave të Kosovës dhe përbrenda komunave, përfshirë edhe në zonat të cilat janë më larg qyteteve dhe qytezave.

“Posta e Kosovës nuk e shikon se ku ka fitim që të ketë zyre, por ka ku qytetarë që të ketë shërbim”, tha kryeministri.

Kryetari i Komunës, Lulzim Hetemi, falënderoi dhe përgëzoi qeverinë dhe postën për përurimin e sotëm dhe e ftoj këtë të fundit që të hapë edhe pika tjera në komunën që ai drejton.

Ndërkaq, kryeshefja e Postës së Kosovës, Nora Rraci foli për planet e ndërmarrjes që udhëheq, për të qenë sa më të pranishëm aty ku qytetarët kanë nevojë për shërbimet e operatorit publik, por edhe për rezultatet e zgjerimit të rrjetit të pikave të postës.

“Nëse flasim në krahasim me vitin e kaluar, kemi pasur një rritje prej 11% të numrin të zyrave postare gjithandej Kosovës. Nëse flasim për katër komunat veriore të Kosovës, para dy vjetëve kemi pasur vetëm dy zyra në pikat kufitare, ndërsa po festojmë pikën 13-të, që besoj që është një rezultat shumë i madh duke qenë se e kemi arritur brenda dy vjetëve”, tha ajo.

Derisa Rizvanolli, u shpreh e lumtur me hapjen e kësaj pike sot, duke thënë se Qeveria e Republikës së Kosovës, do të vazhdojë të mbështesë Postën në zgjerimin e rrjetit të saj dhe avancimin e shërbimeve që ofron.

Ndryshe në njoftimin e lëshuar për media thuhet se Posta e Kosovës, me mbështetjen e Qeverisë së Republikës së Kosovës, po zbaton program e zgjerimit dhe modernizimit të rrjetit të saj.

Si rezultat i kësaj sipas komunikatës thuhet se: Janë arritur 157 zyra postare aktive në gjithë Kosovën, duke shënuar një rritje prej 11%, në katër komunat veriore operojnë tashmë 13 zyra postare, është investuar në mjete të reja transporti, infrastrukturë IT dhe shërbime të reja postare dhe financiare.

Posta e Kosovës poashtu ka njoftuar se ofron shërbime moderne për qytetarët, përfshirë transfere ndërkombëtare të parave, shpërndarjen e dokumenteve shtetërore dhe mbështetjen e zhvillimit të e-commerce.

Posta e Kosovës poashtu ka njoftuar se ofron shërbime moderne për qytetarët, përfshirë transfere ndërkombëtare të parave, shpërndarjen e dokumenteve shtetërore dhe mbështetjen e zhvillimit të e-commerce.

Reporteri ka siguruar vendimin e gjyqtarit të procedurës paraprake Lutfi Shala, në të cilën URDHËROHET shoqërimi me forcë MENJËHERË ndaj të pandehurve.

Trupat e civilëve shqiptarë që dyshohen se u vranë nga ky grup, sipas urdhër-arrestit, ishin gjetur në një varrezë masive në Batajnicë. Derisa vrasja dhe keqtrajtimi i tyre ka ndodhë në vendin e quajtur “Ura e Taliqit” në Gjakovë, gjatë periudhës kohore 7 maj deri më 10 maj 1999.

Urdhër arresti është lëshuar më datë 15 prill 2025, pas kërkesës së Prokurorisë Speciale të datës 27 mars 2025.

“Prokuroria Speciale e Republikës së Kosovës pranë kësaj gjykate ka parashtruar kërkesën për lëshimin e urdhër arrestit PPS.nr.25/2025 te datës25.03.2025, ndaj tê pandehurve Milovan Kovacevic, Radomir Colió, Milos Đ osan, Milos Dosan, Predrag Ristié, Srdan Krstió, Ljubisa Obradovió, Zivko Sarié, Spaso Sarió, Lazar Draskovió, Zvonko Ristió, Darko Gligorijevié, Cedomir Bozovié, Vladimir Bozovic, Robert Dobrunaj, Radomir Rakovió, Ljubisa Rakovié, Milos Scepanovié, Milan Radoidió, Svetislav Gligorijevié, Tomica Avramovié, për shkak të veprës penale Krimi i luftës kundër popullsisë civile, e sanksionuar me nenin 142 lidhur me nenin 22 te Ligjit Penal të ish Republikës Socialiste Federative te Jugosllavisë, ligi ne fugi në kohën e kryerjes së veprës penale, aktualisht e sanksionuar me nenin 146 lidhur me nenin 31 të Kodit Nr. 06/L-074 Penal të Republikës se Kosovës. Prokuroria Speciale e Republikës së Kosovës ne kërkesë ka cituar se me date 18.03.2025 ka nxjerr aktvendim për fillimin e hetimeve nën shenjën PPS.nr. 20/2025 ndaj të pandehurve për shkak të dyshimit të arsyeshëm se në periudhën kohore 1998-1999, në vendin e quajtur “Ura e Taliqit” në Gjakovë nga data 7 maj e deri me date 10 maj te vitit 1999 pjesëtaret e forcave ushtarake dhe policor serbe të uniformuar, në mesin e tyre edhe të pandehurit e lartcekur filluan te hyni shtëpi për shtëpi, ku me force dhe kanosje i nxorën nga shtëpitë te gjithë personat që ishin prezent duke i ndarë burrat nga gratë dhe fëmijët dhe me pas i vranë gjithsej 106 civil të nacionalitetit shqiptar dhe pas luftës trupat e tyre u gjeten në një varrezë masive në Batajnice të Serbisë.”, thuhet në arsyetimin e urdhër-arrestit.

Komuna e Prishtinës rifilloi sot punimet në sheshin “Xhorxh Bush”, me gjithë ndalimin dy herë të punimeve nga Inspektorati i Trashëgimisë Kulturore, duke i kërkuar Komunës që lënda për pajisje me leje nga Instituti i Kosovës për Mbrojtjen e Monumenteve (IKMM) të plotësohet, raporton EO.

Me rastin e rifillimit të punëve në Sheshin “Xhorxh Bush”, i pranishëm ishte edhe kryetari i Prishtinës, Përparim Rama.

Kryetari i Prishtinës, Përparim Rama ka thënë se punimet në sheshin “Xhorxh Bush” janë duke vazhduar pasi, sipas tij, ato janë brenda kornizave ligjore në çdo aspekt.

Ai ka theksuar se nëse Inspektorati i Trashëgimisë Kulturore tenton ndalimin e tyre, atëherë do të intervenojë Policia.

“E kemi Policinë dhe e çon Inspektoratin te shtëpia. Ne punimet do t’i vazhdojmë”, tha Rama.

U panë edhe zyrtarë të Policisë së Kosovës.

Para disa ditësh, Rama, ka thënë se ndalimi i punimeve është i paligjshëm e se “arsyetimet për këtë ndërhyrje janë të pabazuara nga institucionet që duhet të jenë të pavarura e që po përdoren për qëllime politike”.

Sipas tij, ky veprim është ndërhyrje e qëllimshme, e cila cenon të drejtën e Prishtinës për zhvillim të qëndrueshëm urban dhe kulturor.

Projekti i Komunës së Prishtinës është në vlerë 18.4 milionë euro.

E ngarkuara me Punë në ambasadën e SHBA-së në Kosovë, Anu Prattipati, bëri homazhe te memoriali kushtuar personave të zhdukur.

“Ambasada amerikane është e përkushtuar të mbështesë të vërtetën, drejtësinë dhe përpjekjet për pajtim”, thuhet në postimin e ambasadës.

Më tutje, ambasada thekson se familjet meritojnë informacion të plotë për fatin e më të dashurve të tyre.

Ministria e Industrisë, Ndërmarrësisë dhe Tregtisë, përmes Agjencisë për Pronësi Industriale ka shënuar Ditën Botërore të Pronësisë Intelektuale, raporton KP.

Ministrja në detyrë e Industrisë, Ndërmarrësisë dhe Tregtisë, Rozeta Hajdari tha përmes markave tregtare kanë avancuar në ruajtjen e pronësisë intelektuale.

Ajo tha se pronësia intelektuale është e rëndësishme në shekullin e teknologjisë dhe revulucionit industrial.

Ndërkaq, përfaqësuesi i Doganës së Kosovës, Driton Azemi, tha se vitin 2024 kanë pasur 148 kërkesa për veprim doganor në fushën e pronësisë intelektuale.

Vendimi i Zyrës së Rregullatorit për Energji (ZRRE) për ngritjen e çmimit të energjisë elektrike është padyshim një nga temat më aktuale në vend.

Të pakënaqur me këtë vendim janë qytetarët dhe bizneset, pasi nga 1 maji do të paguajnë shumë më shtrenjtë për rrymën e shpenzuar, 16.1 për qind – të gjitha kategoritë e konsumatorëve, raporton KosovaPress.

E derisa ata do të paguajnë më shumë për rrymë, kjo nuk vlen edhe për serbët në veri të vendit, të cilët nuk preken nga vendim i ZRRE-së.

Zyra e Rregullatorit për Energji (ZRRE) ka thënë për KosovaPress, se vendimi për rritjen e tarifave të energjisë elektrike 16.1 për qind nuk do të përfshijë katër komunat veriore të vendit.

Në një përgjigje me shkrim të ZRRE-së, tarifat e miratuara nga Bordi i këtij institucioni do të hyjnë në fuqi më 1 qershor 2025 dhe do të zbatohen nga Furnizuesi me Shërbim Universal në të gjithë territorin ku ai operon.

Megjithatë, sipas ZRRE-së komunat veriore – të cilat aktualisht furnizohen nga kompania Elektrosever – nuk përfshihen në këtë vendim, pasi siç thuhet nga ZRRE-ja, Elektrosever operon jashtë sistemit të Furnizuesit me Shërbim Universal dhe marrëdhëniet tarifore atje janë të ndryshme.

“Tarifat e miratuara nga Bordi i Zyrës së Rregullatorit për Energji (ZRRE) zbatohen nga Furnizuesi me Shërbim Universal duke filluar nga data 01 qershor 2025 në gjithë territorin ku ai operon. Nëse pyetja ka të bëjë me katër komunat veriore të vendit të cilat aktualisht furnizohen nga Elektrosever, atëherë këto tarifa nuk zbatohen në atë pjesë të territorit, për shkak se Elektrosever operon jashtë sistemit të Furnizuesit me Shërbim Universal dhe marrëdhëniet tarifore janë të ndryshme” thuhet në përgjigjen me shkrim nga ZRRE-ja.

Për gati 25 vjet, banorët në katër komunat veriore të vendit nuk kanë paguar për energjinë elektrike të shpenzuar.

Faturimi në këtë pjesë ka filluar tek në shkurt të vitit 2024, por pjesa më e madhe e banorëve vazhdojnë të mos e paguajnë.

Shkalla e pagesës që nga shkurti i vitit 2024 e deri në dhjetor të po këtij viti për Mitrovicë të Veriut, Leposaviq, Zveçan dhe Zubin Potok mësohet të jetë jo më pak se 20 për qind.

Zyra e Rregullatorit të Energjisë në Kosovë më 11 prill bëri të ditur se rritja e tarifave për të gjitha kategoritë e konsumatorëve bazuar në të Hyrat e Lejuara Maksimale është 16.1 për qind, raporton KosovaPress.

Qytetarët e Kosovës nga muaji maj do të paguajnë 16. 1 për qind më shtrenjtë për energjinë elektrike. Kështu kishte thënë kryesuesi i Bordit të ZRRE-së, Ymer Fejzullahu.Shtrenjtimi i energjisë elektrike, ka shkaktuar reagime të shumta nga bizneset, subjektet politike dhe qytetarët, madje kishte edhe disa protesta në Prishtinë.

Ministria e Punëve të Brendshme ka njoftuar qytetarët e Republikës së Kosovës se kanë mbetur edhe pak ditë për të shfrytëzuar të drejtën për aplikim për regjistrimin e fakteve në Regjistrin Qendror të Gjendjes Civile të Republikës së Kosovës, sipas Vendimit të ministrit të Punëve të Brendshme me Nr. 0616/2024 të datës 21 nëntor 2024, përcjell KP.

“Ftojmë qytetarët që të shfrytëzojnë të drejtën për regjistrim të fakteve sipas vendimit Nr. 0616/2024 të datës 21.11.2024 deri me datë 30 prill 2025, ndërsa pas kësaj date, faktet e gjendjes civile (lindja, martesa dhe vdekja) që janë regjistruar në strukturat jo-legale serbe nga data 10 qershor 1999 deri në datën 1 shkurt 2025, nuk do të mund të regjistrohen në Regjistrin Qendror të Gjendjes Civile të Republikës së Kosovës”, thuhet në njoftim.

Të drejtën për parashtrimin e kërkesës për regjistrimin e fakteve sipas këtij vendimi e kanë të gjithë qytetarët e Republikës së Kosovës, të cilët kanë regjistruar faktet e gjendjes civile (lindjen, martesën dhe vdekjen) në strukturat jo-legale serbe, nga data 10 qershor 1999 deri në datën 1 shkurt 2025.

“Njoftojmë qytetarët se për faktet, përkatësisht lindjet dhe vdekjet që kanë ndodhur pas datës 1 shkurt 2025 në territorin e Republikës së Kosovës, qoftë jashtë institucioneve shëndetësore dhe atyre për të cilat nuk mund të ofrohet si dëshmi ndonjë certifikatë apo dokument, të parashtrojnë kërkesë për regjistrim të mëvonshëm përmes deklarimit, pranë Zyrave të Gjendjes Civile në komunat e tyre përkatëse”, është thënë në njoftim.

Trajtimi i kërkesave, kriteret dhe procedura sipas njoftimit të MPB-së, do të zhvillohet në pajtim me legjislacionin e gjendjes civile.

“Qytetarët mund të marrin informatat në Zyrën e Gjendjes Civile ku do të parashtrojnë kërkesën, lidhur me dokumentet që duhet të dorëzojnë dhe kriteret që duhet ti plotësojnë. Deri tani, vendimi është duke u zbatuar me suksese të plotë për të gjitha kategoritë që rregullohen prej tij dhe gjatë periudhës 01.02.2025 deri me 25.04.2025, janë realizuar gjithsej 4330 regjistrime, përfshirë: 2159 lindje, 1108 martesa dhe 1063 vdekje”, thuhet tutje.

Duke pasur parasysh suksesin e arritur deri tani, ministria e Punëve të Brendshme, po vazhdon të ndërmarrë të gjitha veprimet e nevojshme për të siguruar zbatimin e plotë të Vendimit, si dhe për të përmirësuar shërbimet, me qëllim që të ofrojë më shumë mundësi dhe mbështetje për qytetarët e Republikës së Kosovës.

Sot është afati i fundit për subjektet politike që të deklarojnë shpenzimet e fushatës së zgjedhjeve të 9 shkurtit.

Lajmin për portalin rtv21 e ka konfirmuar zëdhënësi i Komisionit Qendror të Zgjedhjeve (KQZ), Valmir Elezi.

Ai ka deklarur se subjektet politike janë të obliguara t’i dorëzojnë raportet financiare për shpenzimet e fushatës zgjedhore për zgjedhjet parlamentare të mbajtura më 9 shkurt 2025.

“28 prilli është afati i fundit për dorëzimin e raporteve financiare të fushatës zgjedhore. Ky është një detyrim ligjor për të gjitha subjektet politike që kanë marrë pjesë në zgjedhje”, ka thënë Elezi.

Ndër të tjera ai thotë se të gjitha 28 subjektet politike të certifikuara për pjesëmarrje në zgjedhjet për Kuvendin e Kosovës janë njoftuar me kohë nga Zyra për Regjistrim, Certifikim dhe Kontrollin Financiar të Subjekteve Politike për detyrimet e tyre.

“Raportet duhet të përfshijnë periudhën nga 16 gusht 2024, dita kur janë shpallur zgjedhjet, deri më 9 shkurt 2025, kur ato janë mbajtur. Raportet financiare të fushatës, ashtu si edhe ato vjetore, do t’i nënshtrohen një procesi auditimi nga auditorë të përzgjedhur përmes një konkursi të hapur publik”, tha Elezi.

Krejt në fund ai u shpreh se transparenca financiare është një pjesë thelbësore e procesit zgjedhor për ndërtimin e besimit të qytetarëve në demokraci.