Category: Lajme

Lufta në Ukrainë ka hyrë në një fazë të paqartë përfundimtare, ndërkohë që përpjekjet për të siguruar një paqe të qëndrueshme vazhdojnë të përballen me pengesa.

Zëvendëspresidenti i SHBA-së, JD Vance, në një intervistë tha se kjo luftë nuk do të përfundojë “së shpejti”, duke theksuar se edhe pas një marrëveshjeje historike SHBA-Ukrainë për mineralet, që i jep Amerikës një rol të rëndësishëm në të ardhmen e Kievit, nuk ka shenja të përfundimit të shpejtë të konfliktit.

“Nuk do të shkojë askund… nuk do të mbarojë së shpejti”, tha Vance.

Kremlini ka shprehur gatishmëri për bisedime të drejtpërdrejta me Ukrainën, por hodhi poshtë një propozim paqeje të SHBA-së që nuk e njeh territorin e pushtuar nga trupat ruse.

Ukraina ka refuzuar gjithmonë njohjen e aneksimit të territoreve të saj nga Rusia, duke insistuar se Vladimir Putin nuk duhet të shpërblehet për agresionin e tij.

Ndërkohë, sekretari amerikan i shtetit, Marco Rubio, theksoi se presidenti amerikan do të tërhiqet nga bisedimet e paqes nëse nuk ka përparim të dukshëm.

“Lufta në Ukrainë nuk është lufta jonë”, tha Rubio, duke shtuar se “pa një përparim, presidenti do të duhet të marrë një vendim se sa më shumë kohë do t’i kushtojmë kësaj”.

Sidoqoftë, Donald Trump, presidenti i SHBA-së, tha se të dyja palët janë “shumë afër” një marrëveshjeje, duke e mbështetur këtë pretendim me faktin se i dërguari i tij, Steve Witkoff, u takua me presidentin rus, Vladimir Putin, për bisedime në Moskë.

Një operacion i kontrolluar për shpërthimin e një predhe të vjetër ka përfunduar me sukses sot në Kaçanik, raporton Gazeta Sinjali.

Predha, e cila dyshohet të jetë e mbetur nga Lufta e Dytë Botërore, është trajtuar nga njësitet e KFOR-it në bashkëpunim me Policinë e Kosovës.

Ngjarja ka ndodhur në një zonë të theksuar si e rrezikshme, ku për të garantuar sigurinë e qytetarëve, autoritetet kishin vendosur një perimetër sigurie prej 1000 metrash.

“Për sigurinë e qytetarëve, ishte vendosur një perimetër sigurie prej 1000 metrash përreth vendit të ngjarjes. Operacioni ka përfunduar dhe deri në këto momente nuk raportohet për ndonjë incident apo rrezik për banorët”, thuhet në njoftimin e Policisë.

Agjencia për inteligjencë të brendshme në Gjermani e ka shpallur partinë Alternativa për Gjermaninë (AfD) organizatë ekstremiste të krahut të djathtë.

Agjencia, e quajtur Zyra Federale për Mbrojtjen e Kushtetutës (BfV), tha se tani ka konfirmuar këtë cilësim për AfD-në, pasi sipas saj, tashmë ka të dhëna konkrete që partia antimigrante, e themeluar më 2013, ndjek qëllime që kërcënojnë rendin demokratik të Gjermanisë, shkruan Radio Evropa e Lirë.

“Kuptimi i partisë për popullin, i bazuar në përkatësinë etnike dhe prejardhje, nuk është në përputhje me rendin demokratik dhe të lirë”, tha agjencia.

Qëndrimet e partisë dhe udhëheqësve të AfD-së shkelin parimet kushtetuese të paprekshmërisë të dinjitetit njerëzor, thanë zëvendëspresidentetët e agjencisë, Sinan Selen dhe Silke Willems.

AfD-ja, që doli e dyta në zgjedhjet e fundit parlamentare të mbajtura këtë vit në Gjermani, më herët kishte pasur statusin e grupit “të dyshuar” ekstremist. Kjo parti e sfidoi këtë cilësim të agjencisë në gjykatë, por pa sukses./REL

Kryetari i Asociacionit të Gazetarëve të Kosovës, Xhemajl Rexha, e ka cilësuar si rangim shokues renditjen e Kosovës në indeksin e lirisë së shtypit, ku ka rënë për 24 vende.

Rexha tha se AGK e sheh këtë si relfketim i asaj që ka ndodhur vitin e kaluar dhe që ka qenë një fushatë vazhdimisht e njëjtë e Qeverisë së udhëhequr nga Albin Kurti dhe Lëvizja Vetëvendosje.

“Ky është një alarm i jashtëzakonshëm, është një rangim shokues që e lë Kosovën si vendin e fundit, më së keqi në Ballkanin Perëndimor”, ka thënë Rexha në konferencën e jashtëzakonshme të thirrur pas publikimit të raportit të organizatës “Reporterët pa Kufij”.

Ai tha se klima e Qeverisë Kurti ka qenë vazhdimisht kundër mediave dhe se kjo është vërtetuar edhe me Ligjin për KPM’në, që pastaj u rrëzua nga Kushtetuesja.

Edhe në raport përmendet ky ligj, fushatat e vazhdueshme ndaj gazetarëve, ndërhyrja apo mungesa e pavarësisë së RTK’së, siguria e gazetarëve, rritja e padive SLAPP e të tjera.

Rexha propozoi formimin e një task force për të adresuar gjetjet e këtij raporti, teksa shtoi se janë të gatshëm të bashkëpunojnë me të gjithë për këtë.

Ndryshe, Kosova e ka shënuar rënien më të madhe në 15 vjetët e fundit në indeksin vjetor për lirinë e shtypit të organizatës Reporterët pa Kufij, duke u renditur në vendin e 99-të në botë nga 180 shtete.

Ky është viti i dytë radhazi që Kosova shënon rënie, pasi në vitin 2024 ra nga vendi i 56-të në atë të 75-të.

Në raportin e publikuar nga Reporterët pa Kufij, më 2 maj, në prag të Ditës Botërore të Lirisë së Shtypit, Kosova renditet më së keqi në zonën e Ballkanit Perëndimor dhe Bashkimit Evropian.

Grupi për Studime Juridike dhe Politike ka thënë se dështimi për të konstituuar institucionet tash e dy muaj ndikon negativisht në të gjitha fushat e qeverisjes, veçanërisht në procesin e integrimit evropian.

Kjo organizatë ka thënë se që nga viti i kaluar nuk është ndërmarrë asnjë hap për ratifikimin e Agjendës së Reformave, prej së cilës Kosova mund të përfitojë 883 milionë euro në një periudhë 3-vjeçare.

GLPS-ja ka bërë thirrje për themelim sa më të shpejtë të institucioneve dhe ratifikim e zbatim të menjëhershëm të Marrëveshjes së Planit të Rritjes.

Nënkryetarja e PDK-së, Vlora Çitaku, ka reaguar pas publikimit të raportit të Reporterëve pa Kufij për indeksin e lirisë së mediave, raport në të cilin Kosova ka shënuar një prej rënieve më të mëdha.

Ajo tha se kjo tregon për sulmet e vazhdueshme, etiketimet dhe presionet që po e dëmtojnë ambientin mediatik.

“Rënia dramatike e Kosovës për 24 vende në Indeksin e Lirisë së Medias nga Reporterët pa Kufij përbën një alarm serioz për gjendjen e demokracisë dhe të drejtës për informim në vend. Nga pozita 75 në vitin 2024, në pozitën 99 këtë vit, Kosova po rrëshqet drejt një terreni ku zëri i lirë i gazetarëve dhe transparenca institucionale po cënohen çdo ditë.Kjo rënie nuk është thjesht një statistikë, ajo reflekton kufizime konkrete, presione të vazhdueshme ndaj gazetarëve, si dhe sulme e etiketime të vrazhda që po e dëmtojnë thellësisht ambientin mediatik.Mendësia rrënuese, që shpesh shkon deri në vetëshkatërrim, është bërë konstante e partisë-shtet që e udhëheq vendin tash e pesë vjet”, shkroi Çitaku në Facebook.