Category: Lajme

Presidentja e vendit, Vjosa Osmani pas takimit me liderët politikë ka thënë se ka optimizëm minimal që të dilet nga ngërçi politikë për konstituimin e Kuvendit të Kosovës.

Ajo para mediave tha se ‘tymi i bardhë’ do të dalë kur të konstituohet Kuvendi, përcjell Telegrafi.

“Pavarësisht dallimit në qëndrime diskutimi ka qenë me respekt të ndërsjellë. ‘Tymi i bardhë’ do të dalë vetëm atëherë kur të kemi konstituim të Kuvendit. Vullnet ka për të gjetur zgjidhje përpara dhe për të dëgjuar ide të reja”, ka thënë Osmani.

Osmani tha se pa u konstituuar Kuvendi nuk mund të shkohet në zgjedhje.

“Sa i përket zgjedhjeve të gjithë jemi pajtuar që ato mund të jenë në disa raste…për momentin pa konstituim të Kuvendit nuk mund të shkohet në opsionet për zgjedhje, pasi fillimisht duhet të konstituohet Kuvendi. U fol se nëse shkohet shumë gjatë atëherë liderët duhet të ulen dhe të pajtohen për zgjedhje, por fillimisht duhet të konstituohet Kuvendi”, sqaroi Osmani.

Presidenti i SHBA-së, Donald Trump, nuk është i kënaqur me planin e shefit ekzekutiv të Apple, Tim Cook, për të prodhuar iPhone-t për SHBA-në në fabrika të reja në Indi.

Ai tha se i kishte thënë Cook-it se “nuk dëshiron që Apple të ndërtojë në Indi”, edhe pse Apple po rrit prodhimin në SHBA, transmeton CNN.

Apple ka vendosur të zhvendosë prodhimin e iPhone nga Kina në Indi për të shmangur tarifat e larta, të cilat mund t’i shtojnë kompanisë deri në 900 milionë dollarë shpenzime në tremujor. Cook pritet që shumica e iPhone-ve të shitur në SHBA të kenë Indinë si vend origjine.

Megjithatë, Apple nuk ka kapacitete për prodhim të madh në SHBA për shkak të kostove të larta, dhe çmimi i iPhone-it mund të trefishohet nëse prodhohet në Amerikë. Trump ka vendosur tarifa të larta për të rritur prodhimin e brendshëm, por ekspertët thonë se kjo është sfidë e madhe për kompani si Apple.

Apple ka njoftuar një investim prej 500 miliardë dollarësh për zgjerimin e kapaciteteve në SHBA gjatë katër viteve të ardhshme, duke krijuar 20,000 vende pune. Kjo pjesë e strategjisë për të diversifikuar prodhimin jashtë Kinës, përfshirë rritjen e prodhimit të Mac Pro në Teksas, transmeton KosovaPress.

Presidentja e Kosovës, Vjosa Osmani, po pret në takim përfaqësuesit e partive të komuniteteve jo shumicë.

Pas takimit me liderët politikë të partive shqiptare, përfaqësuesit e partive të komuniteteve jo shumicë janë parë duke hyrë në zyrën e presidentes Osmani, raporton KosovaPress.

Në takimin me liderët e partive politike shqiptare nuk ka pasur ndonjë lëvizje drejt tejkalimit të ngërçit të krijuar politik si pasojë e mos konstituimit të Kuvendit të ri. /kp

Kryetari i LDK-së, Lumir Abdixhiku, tha se është habitur nga deklarata e kryeministrit Albin Kurti gjatë takimit, ku ky i fundit ka thënë se situata aktuale politike në vend “nuk ka urgjencë”, raporton EO.

Abdixhiku theksoi se nuk kishte asnjë propozim, asnjë lëvizje të Kurtit nga dëshirat e tij partiake.

“Nuk ka ndodhur ndonjë zgjidhje eventuale për ngërçin politik. Është për keqardhje. Në këtë takim kam elaboruar idenë e një qeverie të unitetit për një periudhë të shkurtër. Jam i lumtur që pati konsideratë nga dy parti. Është mirë që sa më parë presidentja ta dërgojë këtë çështje në Gjykatën Kushtetuese”, tha Abdixhiku.

“Asnjë propozim, asnjë lëvizje nga dëshirat e tij partiake. Si i tillë, ky takim nuk ka kurrfarë kuptimi. Ajo që më habit është fakti që na tha se nuk ka asnjë urgjencë. Pritja është më shumë mediatike sesa për popullin”, përfundoi ai.

Kryeministri britanik, Sir Keir Starmer, gjatë konferencës me homologun e tij shqiptar, Edi Rama tha se është privilegj për tëm të jetë në Tiranë.

Lidhur me Samitin e Komunitetit Politik Evropian, në Shqipëri, Starmer tha se përmes tij po përçohet mesazh i qartë, se Evropa është e bashkuar, dhe se janë të fortë e të sigurt.

“Në këtë moment kritik, ne po përçojmë mesazh shumë të qartë, që Evropa është e bashkuar, jemi të fortë, jemi të sigurt brenda shtëpive tona, po vendosim paratë aty ku duhen edhe në xhepat e qytetarëve tanë, dh epo thellojmë partneritetet tona. Ishte privilegj për mua që isha këtu”, tha Starmer.

Kryetari i AAK-së, Ramush Haradinaj, është deklaruar pas takimit që zhvilloi me Presidenten Vjosa Osmani, në përpjekje për të zgjidhur krizën institucionale që po mban të bllokuar Kuvendin e Kosovës, tash e tre muaj pas zgjedhjeve.

Haradinaj tha se kanë mirëpritur ftesën e Presidentes dhe e shohin si një mundësi për të çuar përpara procesin.

“Kandidati për kryetar kuvendi duhet të jetë një person unifikues në mënyrë që të kalojmë në etapën tjetër, edhe kuptohet e kemi mirëpritur këtë mundësi të bisedës me presidenten,” tha ai para mediave.

Kryetari i Partisë Demokratike të Kosovës, Memli Krasniqi, ka dhënë detaje për takimin e zhvilluar në Presidencë, ku u diskutua për situatën e krijuar pas dështimit të zgjedhjes së kryetares së Kuvendit.

Krasniqi u shpreh se nuk pret që lideri i Vetëvendosjes, Albin Kurti, të tërhiqet nga kandidatura e propozuar për kryesuese të legjislativit, duke shtuar se një hap i tillë do të ishte i nevojshëm për të dalë nga bllokada aktuale.

“Ishte diskutim brenda pozicioneve që ju i dini, që i kemi shprehur. Në emër të PDK-së, kërkova që kryetari i VV-së, deputeti Kurti, ta ndryshojë kandidaten, të vijë me një propozim që ka mjaft në grupin e tij parlamentar. Një gjë e tillë nuk pres që do të ndodh. Jemi në situatën e njëjtë ku jemi. Megjithatë, duhet ta shohim këtë takim si hap para, përpjekje shtesë, edhe nga involvimi i presidentes në këtë temë”, tha ai.

Kreu i PDK-së shtoi se i ka propozuar presidentes Vjosa Osmani që të ndërmarrë hapa konkretë për të kërkuar interpretim kushtetues mbi situatën.

“Iu njoftoj se kam propozuar që presidentja, në zbatim të përgjegjësive, t’i drejtohet Gjykatës Kushtetuese me pyetje kushtetuese, apo përmes dërgimit të një lënde për krejt procesin zgjedhor, që të kemi rrugëdalje. Më shumë se problem juridik, kemi politik – kjo është krizë politike. Nëse kjo qasje imponuese e VV-së vazhdon, e kemi obligim për të gjetur zgjidhje”, theksoi ai.